هاوڕێ ئاسۆ نادری کۆچی دوایی کرد، ساڵە نەڵۆسی

کاک ئاسۆ شارەزای بواری ئای تی و بەڕێوەبەری سایتی https://www.webchin.org کە خزمەتێکی زۆری بۆ بەرەوپێش بردنی زانیاری کورد کرد لە بواری ئای تی دا

بەداخەوە رۆژی شەممە 20170805 کۆچی دوایی کرد. یەکەم جار کاک ئاسۆ بوو ماڵپەڕێکی بەشێوی PHP بۆ سایتی پێشمەرگەکان، خۆبەخشانە دروست کرد و زیادتر لە دوو ساڵ لە بواری تێکنیکیەوە هاوکاری کردین کە بتوانین کارەکانمان بێ کێشە راپەرێنین. کاک ئاسۆی نەمر لە ماڵپەڕی خۆی بە ناوی وێبچین دا دەیان بابەتی بە کەڵکی هەن کە قەت کۆن نابن و خوێنەران دەتوانن کەڵکی لێ وەرگرن.
لە یوتوبیش کاک ئاسۆ کاناڵێکی هەیە هەر بە ناوی وێبچین
https://www.youtube.com/user/WebchinOrg
لە دەست دانی کاک ئاسۆ خەسارێکی گەورە بوو بۆ کورد و بەداخەوە زوو جێی هێشتین.
کاک ئاسۆ ئەندامێکی چالاکی یەکیەتی لاوانی حیزبی دێمۆکڕاتی کوردستانی ئێران بوو، هەر لە ناو لاوانیشدا بوو کە من یەکەم جار بە دیداری شاد بووم . کوڕێکی زۆر ژیر و وریا و لە سەرەخۆ بوو، رادەی زانیاری زۆر لە سەرێ بوو، کورێکی زۆر خاکی و هەوڵی دەدا کە کەسانی تر لە زانستەکەی کەڵک وەرگرن و کوردان بتوانن زانیاری خۆیان لە بواری ئای تی دا بەرنە سەر.

روحی کاک ئاسۆ شاد بێ و لە لایەن خۆم و هاورێیانمەوە سەرەخۆشی لە بنەماڵەی بەڕێزی کاک ئاسۆ دەکەم ، خۆم بە شەریکی خەمیان دەزانم.

ساڵە نەڵۆسی

20170805

هەر لەم بارەوە بەشی راگەیاندنی حیزب ئەم پەیامەی خوارێی بڵاو کردۆتەوە.

به‌داخه‌وه‌ بلیمه‌ت و شاره‌زای بواری ئای تی ئاسۆ نادری كۆچی دوایی كرد
لاوێکی تێگەیشتوو و بلیمەت کۆچی دوایی کرد

کوردستان میدیا: ئاسۆ نادری لاوی تێگەیشتووی کورد و هاوکارێکی وریای راگەیاندنی حیزبی دێموکراتی کوردستانی ئێران لە وڵاتی سوید بەهۆی نەخۆشی درێژماوە کۆچی دوایی کرد.

رۆژی ٥ی ئووتی ٢٠١٧، لە نەخۆشخانەیەک لە وڵاتی سوید ، لاوی تێگەیشتوو و بلیمەتی کورد ئاسۆ نادری بەهۆی نەخۆشییەکی درێژماوە کە چەند ساڵێک بوو ژیانی تووشی ئازار کردبوو کۆچی دوایی کرد. ئاسۆ نادری کوڕی ئیبراهیم نادری، لە بنەماڵەیەکی نیشتمانپەروەر و خاوەن رابردوو بوو کە سەرەڕای ئەندامەتیی چەند ساڵەی لە یەکیەتیی لاوانی دێموکراتدا، خۆی وەکوو کەسێکی وریا و بلیمەت، بە تێکۆشانی بێوێنە خۆی پێگەیاندبوو و بەتایبەت لە بواری ئایتی و دیزاین و ئیدارەکردنی ماڵپەڕی ئینتێرنێتیدا خاوەن بیر و جێگا پەنجەی دیار بوو.

ئاسۆ نادری بۆ ماوەی چەند ساڵ هاوکاری نزیکی راگەیاندنی حیزبی دێموکراتی کوردستانی ئێران بوو و بە شێوەی خۆبەخشانە کاری دیزاین و مودیریەتی ماڵپەڕەکانی حیزبی و بەتایبەت ماڵپەڕی ناوەندیی حیزب، کوردستان میدیای دەکرد.

لەو چەند ساڵەدا وێڕای نەخۆشی و ئازاری درێژماوە، بە شەو و بە ڕۆژ بەدەم راگەیاندنی حیزبەوە بوو و بە وریاییەوە کاری لەسەر ماڵپەڕەکانی حیزبی دێموکرات دەکرد.

بەداخەوە کاک ئاسۆ نادری رۆژی ٥ی ئووت دوای بەربەرەکانێی چەند ساڵە لەگەڵ نەخۆشیەکەی، چاوی لەسەریەک دانا و بۆ هەتاهەتایە ماڵئاوایی لێ کردین.

وەکوو کومیسیۆنی راگەیاندنی حیزبی دێموکراتی کوردستانی ئێران، بەبۆنەی کۆچی ناوەختی لاوی وشیاری کورد کاک ئاسۆ نادریەوە سەرەخۆشی لە بنەماڵەی بەڕێزی و هەموو لاوانی پێگەیشتوو کە خەمخۆری خەباتی نەتەوەکەیانن دەکەین و هاوخەمیی خۆمان بۆ بنەماڵەی بەڕێزی دەردەبڕین. رۆحی شاد و نموونەی پێگەیشتووی و فیداکاری و تێگەیشتووی وەها لاوێکی خەباتکار فراوان بێ.

 

وتووێژێکی کاک ئاسۆ لە گەڵ رادیۆ زایەڵە ” ئینترنێت حوکوومه‌تی ئێران ده‌ڕووخێنێ” 

وتووێژێکی کورتی کاک ئاسۆ کە بەداخەوە مەرگ رێگەی نەدا هەموو پروژەکانی ێ بە جێ بکات.

گفتوگۆیەک لەگەڵ ئاسۆ نادری

ئاسۆ نادری ناوێکی دیاری و کەسێکی بەرچاو و بەتوانای وێبی کوردی و پێشخەری وێب ، کە ماوەیەکی زۆرە هەرلە سەرەتای بەرفراوان بوونی وێب و پێگە و ماڵپەڕە کوردی یەکان دا دەرکەوت و هەڵگری پەیامێک ، کە هەمووان بەیەکەوە دەتوانین باشتر بکەین و هەر لە سایەی ئەم پەیامەدا بەردەوام بە سینگ فراوانی  هاوکاری هەمووان بووە و لە ڕێگەی مەکۆکانەوە زۆرترین خزمەتی بە وێبی کردوە

حەزم کرد جۆرێک لە گفتوگۆی لەگەڵ ئەنجام بدەم ، خۆشحاڵانە ئەویش پەسەندی کرد و هەندێ پرسیارم ئاراستەی کرد

 

گەر دەکرێ خۆت بناسێنی ، ئاسۆ نادری کێێە؟ چی خوێندوە و شارەزایی چییە؟ تاکو خوێنەری گفتوگۆکە زیاتر بزانێ

 

وەڵام: کەسێکی سادە و لە هەمووی گرینگتر کوردم، تەکنەلۆژیای زانیاریی بەشێکی زۆری ژیانمە، ئاواتم ئەوەیە ئێمەش وەک بەکارهێنەری کورد بە زمانی خۆمان بتوانین لە ئەو بوارەدا بە پێی پێویست پێشبکەوین و پێشبخەین

خوێندکار و دەرچووی بواری گشتیی تەکنەلۆژیای زانیارییمInformatics ، هەرچەند خوێندن و فێربوون بە تایبەت لە بواری ئای‌تی پرۆسەیەکی بەردەوام و بێ کۆتاییە.

 

ئێستا سەرقاڵی چیی و هەنگاوەکانت بەرەو کوێن لە دونیای تەکنەلۆژیایی زانیاری دا؟

 

وەڵام: ماوەیەکی زۆرە کۆمەڵێک گۆڕانکارییم ئامادە کردووە بۆ وێبچن و پەرەپێدانی، بەداخەوە بە هۆکاری هەندێک بواری تایبەت بە ژیانی تاکەکەسیمەوە لەگەڵ هەر یەکێک لە ئەو هەوڵانەدا هەموو کات شتێکی دیکە هاتووەتە پێش کە جێبەجێکردن و چالاک کردنیانی دواخستوە

وێبچن پرۆژەی سەرەکیمە و کاری بەردەوامی دەوێت، هەرچەند لە ساڵ و کاتەکانی ڕابردوودا زۆر ڕووی نەداوە بە هۆکاری ئەوەی لەسەرەوە ئاماژەم پێدا

 

لە بواری ئای‌تیدا هەروەها لەگەڵ هەندێک لایەنی نێوخۆ لە هەرێمی کوردستان ڕۆڵی پێشنیاردان و بەرنامەڕێژییم هەیە کە ئەوەش پرۆسەیەکی بەردەوامە بۆ باشتر کردن/ درووست داڕشتنی ئەو پرۆژانەی کە جێبەجێ دەکرێن 

بەداخەوە کات ڕێگە نادات بۆ کاری زۆرتر، هەرچەند پرۆژەی و بیرۆکە زۆرن بۆ جێبەجێ کردن

 

لە چ بوارێکی تەکنەلۆژیادا شارەزاییت هەیە و دەستت بۆ بردوە زیاتر هەر لە پێشخستنی وێب و وێبدارێژی دا تاخود لە لایەنەیکانی تریش؟

 

وەڵام: لە کاری ئاسایی ڕۆژانەم لە بوارێکی دیکەدا بۆ کۆمپانیایەکی ئای‌تی گەورە کار دەکەم کە لەگەڵ ڕۆڵی وێبداڕێژیدا جیاوازی هەیە. بەداخەوە بە هۆکاری نهێنی کارەوە ناتوانم ناوی کۆمپانیا بنووسم، بەڵام لە کارەکەم بە شێوەیەکی ڕۆژانە هاوکاری پێشنیاریی کۆمپانیا و تاکەکەس دەکەین هەروەها هاوکاریان دەکەین بۆ چارەسەرکردنی ئەو کێشە تەکنیکیانەی بە شێوەیەکی ئاسایی چارەسەر نابن. کارەکە پەیوەندی هاردوێر ـەوە هەیە

 

دەکرێ باسێکی کورتی مەکۆکانی وێبچن بکەی؟ پلانی دواتر و بەردەوامی ئەم پرۆژەیە چیە؟

 

وەڵام: هەموو مەبەست لە بوونی وێبچن ئەوەیە کە وێبێکی باشتری کوردی پێکبهێنێت، بە خۆشحاڵییەوە دەتوانین بڵێین تا ئێستا بە شێوەیەکی باش لە ئەو بوارەدا ڕۆڵی هەبووە.

لە سەرەتای دامەزراندنی وێبچن، وێبی کوردی زۆر لاواز بوو، نوێ بوو، هەروەها زمانی کوردی لەسەر وێب لاواز بوو، بەڵام وێبی ئەمڕۆ جیاوازیی هەیە و  تەکنەلۆژیای وێبداڕشتن بە شێوەیەکی گشتیی پێشکەوتنی بە خۆوە بینیووە

ماڵپەڕی کوردی ئەمڕۆ بێگومان زۆر لە ماڵپەڕەکانی ساڵانی پێشوودا باشترن، هەرچەند لە هەمان کاتدا زۆرێک لە ئەو ماڵپەڕە گەورە کوردییانە لە بواری تەکنیکی و پەیڕەوی لە یاسای درووستی وێبداڕشتن ناکەن کە ئەمڕۆ هەمان گرینگیی هەیە کە ناوەڕۆکی ماڵپەڕێک هەیەتی.

 

بیرۆکە زۆرە بۆ چۆنیەتی پەرەپێدانی وێبچن، بەڵام ئاواتی سەرەکیی ئەوەیە لە داهاتووش دا یەکەمین سەرچاوەی کوردی بێت لە بواری وێبداڕشتن و وێبداڕێژان بتوانن وەک تا ئێستا توانیویانە وەک سەرچاوەیەکی ڕۆژانە پشتیان پێ بەستووە، لە داهاتووش بە هەمان شێوە پشتی پێ ببەستن و بەشێک بن لە پەرەپێدانی.

ئەوەش نابێت لە بیر بکەین کە لە تەمەنی وێبچن دا کۆمەڵێک هاوڕێ لە ئەو پرۆسەدا ڕۆڵیان هەبووە و هەیە کە لە خۆیدا پاڵپشتێکی گرینگە بۆ بەردەوامبوونی وێبچن

 

پێتوایە ئامانجی خۆی پێکاوە؟ ئاشکرایە کە وێبچن سودی بە زۆر گەنجی تازەی نێو دونیای وێبدارێژی بینیوە؟

 

وەڵام: دەتوانم بڵێم بە شێوەیەکی زۆر باش ئامانجی خۆی پێکاوە، بەڵام بێگومان ئەوەی تا ئێستا جێبەجێ کراوە هەموو شتێک نییە و دەکرێت کاری باشتر و زۆرتر بکرێت

 

وەکو ئاگادار بم  بەژداربووی وەکو گەشەپێدەرێکی ماڵپەڕ  ، لە پرۆژەیەک کە بریتی بوو  لە دابینکردنی کارتێکی ئەلیکترۆنی کە لە رێگەیەوە سودی لێ دەبینرێ بۆ کڕین و فرۆشتن لە نێت دا؟ 

 

وەڵام: وایە، ئەو بیرۆکەیە لە ڕاستیدا کۆن بوو، لە سەرەتای ساڵی ٢٠٠٩ دا هەوڵ درا کە ئەو پرۆژەیە لە نێو خۆی کوردستانەوە بە هاوکاری یەکێک لە بانکەکان جێبەجێ بکرێت بۆ ئەوەی سوودی بەربڵاوتری هەبێت، بەڵام بە هۆی دۆخی سیاسی و ئابووری عێراق پرۆژەکە بێ ئەنجام  بوو.

 

لە کۆتاییدا، لە ساڵی ڕابردوودا لەگەڵ ئەو بانکەی کە لە وڵاتی سوید پەیوەندیمان لەگەڵیان هەبوو کارەکەمان وەک پرۆژەیەکی ئەلەکترۆنی جێبەجێ کرد بۆ لێکۆڵینەوە لەوەی ئایا ئێستا داواکاری بەکارهێنان لە ئاستێکدایە کە دووبارە لەگەڵ بانکەکەی کوردستان تاوتوێ بکرێتەوە. هەرچەند من ئێستا لە ئەو کارە وەدەرم و لە داهاتووی ئاگادار نیم، بەڵام هیوادارم بتوانن لە نێوخۆ کارەکە جێبەجێ بکەن بۆ ئەوەی بۆ بەکارهێنەران ئاسانتر بێت بۆ وەدەست هێنانی کارتەکان و هەروەها لە نزیکەوە هاوکاری بەکارهێنەران بکرێت ئەگەر هەر کێشەیەکیان هەبوو.

 

لە نێو بەکارهێنەرانی کورد دا ، لە دوای بەرفراوان بوونی بەکارهێنانی فەیسبووکـ ، خوێنەری ماڵپەڕ کەم بووە ، وە لە پێشتریش بەکاربەری مەکۆکان زۆر کەم بووە و ئەوەی تێیدا سەرکەتوو بووە وێبچن بووە تۆ بۆچونت چیە؟

 

وەڵام: من بۆ خۆم بەکارهێنەری هیچ تۆڕێکی کۆمەڵایەتی نیم، بەڵام لە هەمان کاتدا دەزانم کە شوێنێکی وەک فەیسبووک بووەتە ئامرازێک بۆ زۆر کەسانێک کە بۆ کاروباری ڕۆژانەی ئینتەرنێتیی خۆیان ڕووی تێبکەن. بەداخەوە بە بڕوای من تەنیا ڕوو کردن لە فەیسبووک بۆ وەرگرتنی زانیاریی کارێکی هەڵەیە و ناهەقییە لە بەرانبەر ئەو سەرچاوانەی کە زانیاری بە نرخ بڵاو دەکەنەوە چوونکە فەیسبووک سەرچاوەی زانیاریی نییە.

 

تایبەتمەندییەکی وێبچن ئەوە بووە و هەیە، کە تەنیا لە بواری تەکنەلۆژیای زانیارییدا چالاکە، ئەوەش وادەکات کە بەکارهێنەری خۆی هەیە و دەبێت لە داهاتوودا، چوونکە ئەو زانیارییەی لە سەرچاوەیەکی وەک وێبچن هەن، ورد و تایبەتن کە بەکارهێنەرانی هەمووکات دەگەڕێنەوە بۆ وەرگرتنی.

ماڵپەڕ و پێگە کوردییەکان چۆن دەبینی وەکو  وێبدارێژەرێک و هەم وەکو کەسێکی بە ئەزمون کە یەکێ لە پەیامەکانت ” وێبێکی کوردی باشتر “ـە ؟

 

وەڵام: ماڵپەڕی کوردی چالاک و بە زانیاریی کە بەکارهێنەری کورد بتوانێت ڕووی تێبکات، کەمن، ماڵپەڕ زۆرن بەڵام هەموویان دووبارەن و هەر هەمان زانیاریی بڵاو دەکەنەوە لە نێوان خۆیاندا.

هەستی بەرهەم هێنان نییە لە نێو ماڵپەڕە کوردییەکان کە بەداخەوە لە ئەنجامدا یەکێک لە ئەو هۆکارانەیە کە بەکارهێنەران ڕوو لە شوێنەکانی وەک فەیسبووک دەکەن.

 

لە بواری تەکنیکیی وێبداڕشتن دا ماڵپەڕە باشەکان بە پەنجەکانی دەست دەژمێردرێن. بۆ خۆم ساڵی ڕابردوو هەر وەک لێکۆڵینەوەیەک سەردانی ئەو ماڵپەڕە کوردییانەم کرد کە ڕۆژانە بەشێکی زۆر بەکارهێنەری کورد ڕوویان تێدەکات، پێم خۆش بوو بزانم لە بواری تەکنیکیدا لە چ ئاستێکدان، بەداخەوە بە ئەنجامی لێکۆڵینەوەکە گەشبین نەبووم، چوونکە تا ئەمڕۆش لە نێو گەورەترین ماڵپەڕە کوردییەکان پەیڕەوی درووست لە ڕاسپاردەکانی وێبداڕشتن ناکرێت.

 

لە هەمان کاتدا و لە مەکۆکانی وێبچن ـەوە دەبینم کە وێبداڕێژی باشمان هەیە و لە نووسینی کۆدەکانیان دەزانن، تەنیا پێشنیارم ئەوەیە گرینگی زۆرتر بدەن بە لایەنی درووست داڕشتن و نووسینی کۆدەکان بۆ پێکهێنانی وێبێکی کوردی باشتر لەسەر بنەمای درووست.

 

پرۆژە ئێستا و پلانی داهاتووت چیە؟

یەکەم شت دەبێت هەندێک بەش کە بۆ وێبچن داڕێژراون چالاک بکرێن، ئەو بەشانە گرینگیی یەکەمن

پرۆژەیەک کە پێم خۆشە ئەمساڵ بیگەینمە ئەنجام پەیوەندی بە بواری فرۆشتنەوە هەیە لەسەر وێب کە ئێستا تەنیا لە قۆناغی داڕشتنی بنەماکانیم و پرۆژەیەکی هەندێک کاتبەر دەبێت

 

لە کۆتایی دا دەمەوێ زۆر سوپاست بکەم و هیوای بەردەوامی و سەرکەوتنت بۆ بخوازم ، سوپاس بۆ ئەو کاتەی کە پێت دام 

 

.زۆر سووپاس بۆ ئێوەش و هیوادارم بە هەموومانەوە درێغی نەکەین لە پێکهێنانی وێبێکی کوردی باشتر

سۆران عبدالرحمن – دەروازە

٤ ی مارچی ٢٠١٥

 

 

ئاگاداریەان
مەلا حەسەن شیوەسەڵی
مەلا محەممەد جوانڕۆیی
ئارشیو