بەسیە ئەو شەڕە فڕە، مەلا برایم مەجید پوور

 هەموو داگیرکەرانی کوردستان و  بە ئەمریکا و ئەنجومەنی نەتەوەیەکگرتوەکان و کۆر و کۆمەڵە نێودەڵەتیەکان و بە ناو پاریزەرانی مافی مرۆڤ، گەلەکۆمەگیان لە کورد کردو حەشدی شیعی و چەندین جڕوجانەوەراتی تریان لە گیانی کورد بەردا ،

mela-braym-mejidpur-0

هێرشیان کردە سەر کەرکوک و ناوچەکانی تر و دەستیان بەسەر داگرتنوو وەک پێشەی هەمیشەییان کوشتن و سوتان و تاڵانکردنیان دەست پێکردو دیارە هەر ئەوەشیان لێی چاوەروان دەکرێ. چونکە ئەوانە دوژمنی کوردن و بەردەوام بۆ لەناو بردن یان بەزیندویی مراندنی کوردان تێکۆشاون و تێدەکۆشن لـەوەش زیاتر هیچیان ناوێ. ئەمریکا و ئوروپاش سەوداگەرن و خوێنی گەلان دەخەنە مەزات و بۆ قازانجی خۆیان کڕین و فرۆشتنیان پێدەکەن .

دوو شت جێی داخ و سرنجن: (١ ) گەل فرۆشانی ناوخۆ کە چەک بە پێشمەرگە شۆڕ دەکەنەوە و کڕامەت و کەسایەتیەکەی دادەبەزێنن و خەوشداری دەکەن . (٢ ) جنێودان و فڕو لاتاو بەیەک دادان و یەکتر تۆمەتبارکردنی بێ زانیاری و بوختان هەڵبەستنمان بۆ یەکتری. ئەوەشیان بمانەوێ و نەمانەوێ تەنیا قازانج بە دوژمنان دەگەێینێ و دەبێتە هۆی هاتنە خواری ورە و دروستکردنی ترس و دڵە ڕاوکێ و ناهومێدی لەناو گەلەکەمان. ڕاستە کورد خافلگیر کراو شکستی بە دەسکیسی خۆماڵی بەسەردا سەپێندرا، هێندێک شوێنی کوردستان دیسان داگیر کرانەوە، بەڵام ئەگەر هێندێک حیزب و ڕێبەرایەتی دۆڕاندویانە و بەتەڵەوە بوون ، خۆ گەلی کورد ماوە و دنیاش دوایی نەهاتوە و قیامەتیش ڕانەکراوە، هەر چەند جێی داخە بەڵام خۆ ئەوە یەکەم جار نیە شکاوین و قوربانیمان داوە. خەبات بـۆ ڕزگاری گەل و وڵاتێک کە بە چوار دەسەڵاتی جێنایەتکار و خوێنمژی دژە کورد دەور دراوە هەروا هاسان نیە.

بەسە با واز لە شەڕە فڕو ململانە نەرێنیەکان بێنین و بەقەدەر تواناو زانستی خۆمان لە پێشدا ئالیاتی پێشگیری لە دوپات بونەوەی ئەو خەتاو خەیانەتانە وەدەست بێنین و پاشان خەریکی ساڕێژ کردنەوەی برینەکان بین و بە لەبەر چاو گرتنی ئەو کەوتن و دۆڕاندنانە خۆمان بۆ قۆناغێکی نوێی بەرنگار بونەوە ڕێک بخەینەوە و هەوڵ بدەین کە لەبەرەکە پڕ کەینەوە و یەک دەنگ و یەک هەڵوێست بەرەو ڕووی پێشهاتەکان ببینەوە . ئەوە چارەی دەردەکەمانە نەک جنێودان و بێحورمەتی بـە یـەکتر کردن. لـە زۆرو بـۆریش مەتـرسن. کـورد بە درێژایی تەمەنی دەگەڵ (٣ ) نەتەوەی دەسەڵاتداری دوژمن بەرەو ڕوو بوە و نەفەوتاوە. هیچ هێزێک ناتوانێی گەل لە ناو بەرێی. بڕوانن تەواوی وڵاتانی عەڕەبی بەقسە دەیانویست ئیسڕائیل لەناوبەرن ، سەرنەکەوتنو شکستیان هێنا. ئیمام خومەینی فەرمانی ئازاد کردنی قودسی شەریفی داو کوتی ڕێگەکەشی بەکەربەلاو نـەجەف دایـە ، بـۆی نـەکراو سەرئـەنجام کشانـەوەکەی وەک خواردنەوەی پیاڵەی ژەهر ناو هێناو پێشی مـرد. کۆمـارە یەکگرتوەکانی شۆڕەوی لەبەرانبەر ویستی داوای گەلانی ولاتە جیـاوازەکان خـۆی بـۆ ڕانەگیراو لەبەریەک هەڵوەشا. خۆشتان دەزانن زیاتر لە چل ساڵە خەباتی ڕزگاری خوازانە ی گەلەکەمان لەهەمو بـەشەکانی بـەئاشکراو نـەهـێنی بەردەوامە ، چوار دەوڵەتی تەیار بەهەمو چەکێکی نوێی مەترسیدارو سەدان پیلانی دژە مرۆڤو ناڕەوا هێرشو بەلاماری کوردیان داوەو ڕانەوەستاون بەڵام بەهیچ ئاکامێک نەگەیشتونو بەڕاستی سەرکەوتنیان بەدەست نەهێناوە،ئەگەر جارو بارە بەدەسکیسی دۆراوی خۆماڵی زەربەیەکیان لە ڕۆڵەکانی گەل دابێی، زۆری نەکێشاوە مستێکی توندی لەدەمی دراوەو گەڕاوەتـەوە بـەرەو دواوە.

بەداخەوە هێندێک خەڵکی بێورەو بەرژەوەند خوازو نۆکەر سفەت ،بۆئەوەی ناکۆکی بخەنەناو ڕیزەکانی گەل و توشی ناهومێدیان بکەن ، تـاوانی ئـەو پەلامارەو داگیرکردنی دووبارەی هێندێک شوێن دەخەنە ئەستۆی حیزبێک یان چەند حیزبو کەسان ، پڕوپاگەندەی ژاراویشی کەویستی دۆژمنانی گەلە پیوەدەکەن ،بۆ ئەوەی کەلەبەری نێوان پارتەکان هەراوتر بکەنو لەوێڕا زەفەر بە یەکڕیزیو شکاندنی کەڕامەتی گەل ببەن و لە ئاوی قوڕاو ماسی بۆ خۆیان بگرن ، پێکەوە ژیانی گەل لەبەریەک هەڵوەشێننو ئازادیو سەربەستیان لێی حەرام بکەن و ڕاپرسی گشتیش وەک هۆی سەرەکی نائارامیو هێرشەکە ناو ببەن . بەدڵنیایەوە دەڵێم : ئەو ڕاپرسیە نەشکرابا ئەو بـەرنامەیە هـەبـوو لە مێژیشە کاری لەسەر دەکرێی . دەبا ئەوانو دنیاش باش بزاننو لەوە تێبگەن گەلێکی کە خۆی لە ناوململانەو جیاوازی ناوحیزبەکانیدا دەژیو بەشێکی ئەندامو لایەنگری ئەوانە، بەڵام ٠/ ٩٢ لەسەدو زیاتریشی بەبێی وەبەرچاوگرتنی بیرو بۆچونی حیزبەکانیان دەنگی بەڵێیان بە ڕیفڕاندۆم داوە . ڕەدکردنەوەی دەنگی گەل هەم بێحورمەتی کردنە بەوانو هەم بەمانای هاو دەنگیە دەگەڵ دوژمنانی داگیرکەروهەرگیز نابێتە پاساو بۆئەوهێرشو پەلامارە وەحشیانە . داگیر کەرانی کوردستان دژایەتی دەگەڵ ئـازادیـو مـافی گەلان بەتایبەت گەلی کوردستان بە ئەرکی نەتەوەییو ئایینی خۆیانی دەزانن.

بەلای منەوە زۆر سەیرو گاڵتەجاڕە تۆ درۆشمی ئازادیو ڕەوایی مافی گەلان لێبدەیو هێرشیش بـکەیـە سەر ئـازادی گەلان و دوژمنایەتی مـافی چارەی خۆنوسین بۆ گەلی کورد بکەی .ئەو هەڵویستە فاشیستیانە مانای ئەوەیە مافی ئینسانیو نەتەوەیی بەکورد ڕەوا نابێنن . ئیستا ڕەنگە بە گەلەکۆمەگی عەڕەبو فارسو تورکو دۆڕاوەکانی ناو خۆو سەوداگەرانی نێو نەتەوەیی بتوانرێی ئەو پیلانە دابەزێندرێی ، بـەڵام گومان لـەوەدانیە زۆری ناخایەنی پـێـلانـەکان ئاشکرا دەبنو پـوچەڵ دەکرێنەوە، زێـدە داگیر کـراوەکان بـۆ خـاوەنـەکانیان دەگێڕدرێنەوەو، گەلانی ژێـر دەستە ڕزگار دەبـنـو ئـەوەی داگیر کەرانوخائنان کردویانە وەک لاپەڕەیەکی ڕەش بۆئەوانو دەسکیسەکانیان دەنوسرێیو وەک دوژمنوخەیانەتکار بەنەوەی نوێی دەناسێندرێن. ئەوشەڕە قسەو تەوسو پلارانـەی خۆشمان دەبنە پێخۆری دوژمنانو نانە بەرش هێناوەکەی خۆیانی پیدەخۆنو دەشی کەنەژەهرو گەلەکەمانی پێدەرمانداو دەکەن . ئەگەر نەتەوە یەکگرتوەکانو مافی مـرۆڤو ئوروپای بەناو کانگای دێمۆکڕاسیو ئـەمریکا تـۆسقاڵێک هـەستی ئینسانیو کەرامەتیان هەبێی، دەبێی وەک لاپەڕەیەکی پرشەنگداری مێژوی کورد لە ڕۆژهەڵاتی ناوەڕاستدا بێنوسنو لەوحی ئیفتیخاریش بدەن بەو گەلەی کەلـەو مەڵبەندە پڕ لە نائارامیو پیلانگێڕیەدا توانیان بەبێ چوکترین پشێوی ئازادانـە ئەو پڕۆسە مەزنە دابەزێننو خوێن لە کەپۆی منداڵێکیش نەهێنن، پێویست بو پشتیوانی لێبکەنو بیکەنە نمونەی ئازادیو دێمۆکڕاسی لەو مەڵبەندە ،نەک بە بێدەنگی خۆیان ڕێگا بۆ ئەو هێرشو پەلامارە وەحشیانە خۆش بکەن، ئەگەر بەڕاستی لایەنگری ئازادیو دێمۆکڕاسین. ئـەو ڕاپـرسیە گشتیەی کوردستان دەریخست کورد ئەوینداری ئازادیو سەر بەخۆییە و نەفرین لـە نـۆکەری دەکا. نیشانیدا ئەوانەی پاشخانەی ئاغایان پێی لەماڵی خۆیان خۆشترە کێنو درۆشمە بێی ناوەرۆکەکانی بێکردەوە خۆ فریودانو خەڵک بەهەڵە بردنە . دنیای ئازادی تێگەیاند ئەو دروشمی ئازادیو دێمۆکڕاسیەی کە ئەمریکاو ئوروپا باسی دەکەن هەرئەوەنـدە ئێعتیباری هەیـە ئـەگەر بـۆ ( پـەز ) زەرەری نـەبێی . مخابـنـو هەزارجار مخابن دەرسمان لە مێژو وەر نەگرتوە. پلەو پایەو دەسەڵاتی حیزبیو کەسیمان وەپیش مافو ئازادی گەل خستوە ، هەر بـۆیەش هەرکات پڕۆسەی سەرکەوتن لەئاسو نیزیک بۆتەوە لەبارمان بردوە.

لە دنیای پێشکەوتوی عیلم و زانست و بـەنـاو ئـازادیـو دێـمۆکڕاسی دا جێی داخو سەر سوڕمانە کە لە سەر داوای مافێکی نەتەوەییو مـڕۆڤانەی ڕەوا گەلەکۆمەگی لە کورد دەکرێو ئـەوانیش مـتەقیان لێوەنـایـە ، وەک فـیلمی سینەمایی سەیـری کوژرانو وێرانکردنو هـەڵـقەندنی خەڵک لـەمـاڵـو حاڵی خۆیان دەکەن.

نـەفرین لـە درۆزنـو مـرۆڤ فـرۆشان.

 مـەلا بـرایـمی مەجید پـور ٢٢ / ١٠ /٢٠١٧ .

ئاگاداریەان
مەلا حەسەن شیوەسەڵی
مەلا محەممەد جوانڕۆیی
ئارشیو