ڕوانگە و چاوەڕوانی ، براتان مەلا برایمی مەجیدپور

 وەک ئاگادارن کۆنگرەی ١٦ حیزبی دێمۆکڕاتی کوردستانی ئێران لە کەشو هەوایەکی پڕ هیوا دا بەڕێوە چوو پاش باس و خواس و ڕەخنەو پێشنیاری زۆرو بەپێزو خۆماڵیانە

mela-braym-mejidpur-0

مەلا برایم مەجیدپوور

 دوایی بـەکارەکانی خۆی هێنا . کۆنگرە نـاوەکەی ڕاسان بوو هاوڕێیانیش قۆڵی هێمەتیان لێهەماڵی و ئەوەی بەبیرو هزریان دا دەهات بۆ باشترو جوانتر بـەڕێوە بـردنی کارەکانی کۆنگرەو دواتـریش بـۆ دابەزاندنی پەسند کراووەکانی دەکاریان هێناو بەرهەمێکیان لێی وەبەر هێناو ناویان نـا ناوەندی سیاسی و بەڕێوەبەری، دەستەیەک لەباشترینەکانیان بۆ ئەو کارانە دیاریکرد . بەدوای ڕاگەیاندنی کۆتایی هاتنی کۆنگرە من پاش گوێگرتن لـە قسەکانی بـەڕێز کاک مستەفـا لێپرسراوی گشتیو ڕێـزدار مـامـۆستا حەسنی شێوەسەڵی و خوێندنەوەی ناوی ئەندامانی ناوەندی سیاسی وگوێگرتن لەهێندێک قسەو باسی موخالیف و موافق و خوێندنەوەی هێندێک کۆمێنتی سەر فەیسبوک بە قەدەر زانینی خۆم لە کەوو بێژینگم دان و بەو قەناعەتە گەیشتم کە ڕوانگەو چاوەڕوانی خۆمی لەسەر دەربڕم . بە بڕوای من هاوڕێیانی حیزبی هەلومەرجو بارودۆخی سیاسی جیهان و کوردستـان و ڕۆژهەڵاتی نـاوەڕاستیان دەرک کردوەو هەڵیان سەنگاندوە ، بە پێی دەرکو بەرداشتی خۆیان وا تێگەیشتون کە کاتی ئەوە هاتوە حیزب لەو قالبە بەرتەسکو جغزدراوە بێتە دەرو بە شێوەیەکی لیزانانەو بەرنامە بۆ داڕێژراو پڕۆسەی ڕاسان ڕێکو پێکترو بەهێزترلە جاران درێژە پێبدەن و ئەوەی من تێیگەیشتوم و هیواداریشم هەرواش بێی ئەوەیە کە حیزب دەیەوێی بگەڕێتەوە سەر ڕێبازی ئەسڵی خۆی کە حیزبی دێمۆکڕاتی کوردستانە بە هەمو چینو توێژیەوە ، نەک حیزبی ئێدە یان ئایین یام تاقم و دەستەیەک ، دەڕوا بە شوێن ئامانجی خۆیدا کە ڕزگاری گەلو نیشتمانە،ئەوەش لە بنەڕەتدا ویستو داخوازی گەلەکەمانە . هیواداریشم لەبیری نەکەین ئەوە ڕێبازو ئامانجی ڕێبەرە شەهیدەکانمانە. ئـێـمـە تـەنـیـا حیزبین ڕێبازێـکمـان گرتوە کە ئاواتو ویستی سەرجەم چینو توێژو دانیشتوانی کوردستانە.

بە پێی ئەزمونێکی کە هەمە لە ناو ئێمە دا و تەنانەت گەلەکەشماندا هەبـون و هەشن ئەوانەی کە لە نوێکردنەوەو چاک سازی دەترسێن یان لانی کەم بەگومانن، بێگومان ئیواش هەن بەقازانجی خۆیانی نازانن وهەشن وەک پێویست لە ماناو ناوەرۆکی نەگەیشتون بە هۆی ئەوەی شارەزاییان نیە زۆر جار ناشیانە هەڵوێست دەگرن . نایشارمەوە ئەو بۆچونەم لەوەڕا سەرچاوەی گرتوە کە زۆر جار ئاڵوگۆڕو چاک سازی لە قالبی دروشم تێنەپەڕیوەو جاریواشە گوڕانەکە بە پێچەوانە دەرکەوتوە و هەبوشە کە بـۆ مەبەستێکی دیکە بـەکار هێندراوە. دەگەڵ هەموی ئەوانە بە پێی ئەو ناسیاویەی لە سەر لێپرسراوی گشتی وبەشێک لە ئەندامانی ناوەندی سیاسی لەنیزیکەوەم هەیەو هێندێکیان ماوەیەک کارم دەگەڵ کردون ، دڵنیام ئەو گوڕانکاریە لەنیازپاکی و دڵسۆزی بۆ گەلوحیزبەوە هاتۆتە ئاراوە ئەگەر جەبرێک پێشی پێنەگرێی ڕەوتەکە دروست بـەڕێـوە دەچێو مزڵی دوایی گەیشتن بەئامانج و سەرکەوتنە .  ڕاستی ئەوەیە ،گۆڕانکاری پێویستیەکی حەیاتیە بۆ کۆمەڵگای مرۆڤایەتی نەک هەربۆحیزب و سازمان ،ئەوەی جێگای نیگەرانی ومشتو مڕوئاڵۆزیە گۆڕینی ئـامانجە گشتیەکانە ، چونکە وەک چۆن لـە حیزبێک دا بـەزۆرینەی دەنـگی ئەندامانی ئەوحیزبە ئاڵوگۆڕ لە پێرەوو بەرنامە دا دەکرێی ، گۆڕانی ئامانجی گشتی گەلیش دەبێی بەدەنگی زۆرینەی گەل بکرێی نەک حیزبێک یان تاقمێک یان دەوڵەتو دەسەڵاتێکی دەرەکی .ئامانجی حیزبی ئێمە جۆرێک دیاری کراوە کە دەگەڵ بونو نەبونی گەلەکەمان گرێیدراوە . لێرەدا ئەو فەرمودەی شەهید قاسملو دێنمەوە بیرتان کە دەفەرموێی : { چارەنوسی گەلی کورد لە واشەنگتۆن و لەندەن و پاریس و مەسکۆ دیـاری نـاکرێی ، خەڵکی کـوردستان بـۆخـۆی چارەنوسی خۆی دیاری دەکا و ئەو چارەنوسەش لە کوردستان بڕیاری لەسەر دەدرێی } ئەو وتەیە ئەو پەڕی خۆبەکم نەگرتنو بوێریو دڵنیایی، پشت بەستن بەگەل دەنوێینێ ، دەریدەخا ئێمە گەلێکین ڕوبارێک خوێنمان بۆ ئازادی وڵاتو گەل داوە ، سەرەڕای ئەو هەمو جینایەتو کۆمەڵکوژیەی دەرهەقمان کراوە ، قورسو قایم بـە ورەو بڕوایەکی بەهێزە وە سورین لەسەرداوا ڕەواکەمان و کۆڵمان نەداوە. یەکێک لە شانازیەکانی حیزبی ئێمە ئەوەبوە کە لە بڕیاردان دا سەربەخۆ بوەو ئامادەش نەبوە بۆ دوستایەتی هیچ حیزب و دەوڵەتێک ئەو سەربەخۆییە لەدەست بدا وەک شەهیدی ڕیبەر قاسملوی مامۆستا فەرمویە : { ئەگەر پیویست بێی ئامادەین واز لەدۆستایەتی بێنین ، بەڵام واز لە سەر بەخۆیی سیاسی و بڕیاردانی خۆمان ناهێنین } چاوەڕوانیشم هەر ئەوەندەیە خۆمان و حیزب بەقوربانی نیشتمان و گەل بکەین ،نەک بۆ مەبەستی حیزبی وتاکی گەلو وڵات بکەینە قوربانی .هیوادارم و دڵنیاشم ڕێبوارانی ڕاستەقینەی قاسملو وەک چۆن کۆنگرەکەیان سەرکەوتوانە بەڕێوە برد ئاواش یەکدەست، یەکدەنگ، بـڕیـارەپـەسند کراوەکانیشی دابـەزێنن ، ڕەوشتێکی تـەشکیلاتی و سیاسی ئەوتۆ بگرنە پیش کە دژبەر بکەن بەدوست نەک دۆست بکەن بەنەیار. دەبێی ئـەوەی باش بزانین بەرزراگرتن و پاراستنی کەسایەتی گەلو حیزبـو سەنـگو ئیعتیباری خۆشمان لـەوەدایـە سادقانـە دەگەڵ گـەلـەکەمـان بـدوێین ودڵسۆزانـەو لـە خۆبرادوانە بـۆ گەیشتن بـەئامانجی گـەل تێبکۆشین. لەدەست دانی بڕواوموتمانەی گەل بەمانای لەناو چۆنی ئامانجونەمانی پشتو پەنای گەلیو هۆی دواکەوتن و سەر نەکەوتنمانە.

بەمافی خۆمی دەزانم بەنیگەرانیەوە بڕوانمە بابەتەکەو بەتاسەوە چـاوەڕوانی بەروبویان بم ،چونکە لە کۆنگرەی چوارەوە نیزیک و دور دەگەڵ روداوەکانی ناو حیزب تائێرەهاتوم .لە هەمو کۆنگرەکان دا ئەگەر شتێکی نوێی هاتبێتە ئاراوە ، کەمو زۆر هێندێک بۆیان قوت نەچوەو دەگەڵ ویستی ئەوان ڕیک نەکەوتوەو پرتەو بۆڵەی تاڕۆیستنیشی بەدوادا هاتوە ،بەڵام ئەوجارەیان چونـکە لە دنیایەک دا دژین کە هەمو ئامرازی فێربونو زانین وئاگادار بون لە نـاوخۆو دەرەوەش گەلێک زۆرن و مەودای دەر بڕینی بیرو بۆ چون گەلیک بەر فراوانە بۆیە باوەڕم وایە گۆڕانکاریو چاک سازی ئەوجارەمان دەبێی ئـەو دیاردە نەشیاوانەی پێشوی وەلا خستبێ و بتوانێ پڕۆسەکە بە هیمەتی موافق و موخالیف بە جۆرێک بە رێتە پێش و بەدژبـەرانیشی بسەلمێنێ کە بـەلای دێمۆکڕاتەکانەوە ئامانج و ڕیباز مەبەست و پیرۆزە نەک کەس و پلەو پایە. دەبێی ئەوەش بڵێم : پڕۆسەکە ئی تاک نـیـە و ڕاو ڕاوێـژی لـەسەر کـراوەو بە دەنگی زۆرینەش پەسند کراوەو لەئاکامدا بەڕیوە بردنی ئەرکی هومانەو سەرکەوتنیشی لە کردەوەدا دەبێتە میداڵی شانازیو سەربەرزی بۆ هەمومان.

دەگەڵ پیرۆزبایی گەرم لە پێشمەرگەوگەلو ڕێبەرایەتی ، سڵاوو ڕێـزم هەیە بۆ شەهیدان وبـنـە مـاڵەکەیان وبـەندیە سیاسیەکانـو بـنەماڵە کانیا ن. هـیوادارم حیزبەکەمان بتوانێ لەو بارودۆخە ناسکو هەستیارەدا ئەرکی مێژویی خۆی بەجێی بێنێ و دەسکەوتێکی تری وەک ئاڵاو کۆمار بۆ گەل وەدەست بێنێ.

 

 براتان مەلا برایمی مەجیدپور ١ / ٣ / ٢٠١٨

کاتالۆگ