روداو: روونکردنەوەیەک لە کانتۆنی عەفرینەوە: بە پلان خەڵکی مەدەنی شارەکەیان چۆڵکرد.

رووداو – هەولێر : بەڕێوەبەرایەتیی خۆسەری دیموکراتیی کانتۆنی عەفرین رایدەگەیێنێ، بەئامانجی رێگەگرتن لە دروستنەبوونی کارەساتی مرۆیی هاونیشتمانییانی مەدەنی شارەکەیان چۆڵکردووە. جەختیشدەکاتەوە لە هەموو شوێنێکی عەفرین ‌هێزیان هەیە و بەرخودان چووەتە قۆناخێکی نوێ.

 

ئێوارەی رۆژی یەکشەممە 18-3-2018، بەڕێوەبەرایەتیی خۆسەری دیموکراتیی کانتۆنی عەفرین بە ئامادەبوونی نوێنەرانی دامودەزگاکانی عەفرین، هێزەکانی یەپەگە و یەپەژە و قەسەدە کۆنگرەیەکی رۆژنامەڤانیی لە ناوچەی شەهبای سەر بە عەفرین ئەنجامدا و، عوسمان شێخ عیسا، هاوسەرۆکی ئەنجوومەنی بەڕێوەبەریی عەفرین راگەیێندراوێکی خوێندەوە.

عوسمان شێخ عیسا بانگەوازی بۆ کۆمەڵگەی نێودەوڵەتی کرد بەرامبەر تورکیا بێنەدەنگ و رایگەیاند: “ئەوەی ئەمڕۆ بەسەر گەلی عەفریندا دێت، سبەی بەگشتی بەسەر کۆمەڵگەی نێودەوڵەتیدا دێت، سبەی ئەردۆغان دەبێتە بەڵا بۆ کۆمەڵگەی نێودەوڵەتیی، چونکە سەرکێشی تیرۆر و چەتەکانی داعش و بەرەی نووسرە کە لە رۆژهەڵاتی نێوەڕاست دروستدەکرێن، لە ئەنقەرە پێشوازی دەکرێن و پەروەردەدەکرێن و بەسەر رۆژهەڵاتی نێوەڕاستدا بڵاودەکرێنەوە”.

 

لەبارەی ئاوارەبوونی خەڵکی مەدەنی لە راگەیێندراوەکەدا هاتووە: “بۆئەوەی خەڵکی عەفرین نەکەونە ژێر هەڕەشەی تۆپباران و بۆردوومان و شەڕ و کوشتار، وەکو هەنگاوێک بەرەو شەهبا و شێراوە چوون، ئەمەش بەو مانایە نییە عەفرین داگیرکرابێت، ئەمە راستنییە. داگیرکاران دەتوانن ئاڵای خۆیان بەرزبکەنەوە و بێنە نێو عەفرین، بەڵام ناتوانن ئیرادەی کۆمەڵگە تێکبشکێنن”.

 

بەیانی رۆژی یەکشەممە 18ی ئادار، لە 58ـەمین رۆژی ئۆپەراسیۆنی چڵە زەیتووندا بۆ سەر عەفرین، رەجەب تەیب ئەردۆغان، سەرۆککۆماری تورکیا رایگەیاند، ئاڵای تورکیایان لە نێوەڕاستی شارەکە هەڵکردووە. داواش لە خەڵکی عەفرین کرد بگەڕێنەوە سەر ماڵ و حاڵی خۆیان.

 

دەقی راگەیێندراوی بەڕێوەبەرایەتیی خۆسەری دیموکراتی لە کانتۆنی عەفرین:

 

58 رۆژە دەوڵەتی تورکیا لەگەڵ پاشماوەکانی داعش و چەتەکان دژی کانتۆنی عەفرین و ئیرادەی گەلی کورد شەڕێکی سەخت و دژوار بە ئامانجی داگیرکاری دەکات، بۆئەوەی گەلی رەسەنی ناوچەکە کە بە هەزاران ساڵە لە ناوچەکەدان کۆچبەر بکات و گۆڕانکاریی دیموگرافی لە ناوچەکەدا بکات و کەسانی بیانی بێنێتە ئەو ناوچانە و ناسنامەی سیاسی و کۆمەڵایەتی و مێژوویی نەهێڵێت.

 

دەوڵەتی تورکیا بە تەنیا ئەم کارەی نەکرد، بەڵکو بە هاوبەشی لەگەڵ دەوڵەتی رووسیا کە گڵۆپی سەوزی بۆ پێکرد، واتە ئەو هێرشەی ئەمڕۆ دەکرێت هێرشێکی هاوبەشە و بە بڕیاری رووسیایە، بۆیە بێدەنگی لە کۆمەڵگەی نێودەوڵەتییەوە هەیە لەماوەی ئەو 58 رۆژەی کە قڕکردن و کۆمەڵکوژی دەکرێت، بەڕاستی دەوڵەتی تورک بە هەموو توانیایەکی سەردەم و تەکنیکی پێشکەوتوو لەبەرامبەر کۆمەڵگەی سڤیل و شەڕڤانانی یەپەگە و یەپەژە و هەسەدە، کە تاوەکو ئێستاش هەوڵی تێکشکاندنی ئەو هێرشە دەدەن، چونکە ئەو هێرشە تەنیا بەرامبەر ئیرادەی گەلی کورد و گەلی عەفرین نییە، بەڵکو بەرامبەر گەلی باکووری سووریایە بەگشتی، بۆیە خۆڕاگری باکووری سووریا و بلۆکی دیموکراتیخواز لەماوەی ئەو 58 رۆژەدا، خۆڕاگرییەکی پیرۆز و مێژوویی بوو، تاوەکو ئێستاش ئەو خۆڕاگرییە بەردەوامە.

 

ئەگەر ئەمڕۆ ئەردۆغان و دەوڵەتی چەتەی سەردەست دەڵێ من سەرکەتووم و عەفرینم داگیرکردووە، با بزانێت تاوەکو ئێستاش گەلی ئێمە و شەڕڤانانی ئێمە لە هەر گوندێک و ناوەندی شاردا تاوەکو ئەو ساتە شەڕی ئەوان لەبەرامبەر ئەو داگیرکەرییە بەردەوامە، ئەو سەرکەوتنەی ئەردۆغان باسی لێوە دەکات، ئێمە دەڵێین سەرکەوتنی گەلی کوردە، سەرکەوتنی ئەو شەڕڤانانەیە کە تاوەکو ئەو ساتە بە سەدانیان خۆیان فیداکردووە لەبەرامبەر ئەو داگیرکارییە.

 

دەوڵەتێکی ناتۆ بە هەموو تەکنیکە پێشکەوتووەکانی لە سێ رۆژدا ئەمڕۆ 58 رۆژە هیچ ئامانجێکی بەدەستنەهێناوە، لەمەودواش بەرخودان و فیداکاری چ لەڕووی سەربازییەوە بێت و چ لەڕووی کۆمەڵایەتییەوە بێت بەردەوامدەبێت و بەهیچ شێوەیەک داگیرکاری و کەوتنی عەفرین قبووڵ ناکەن،  ئەو شەڕە بەردەوادەبێت تاوەکو داگیرکاری لە گشت کانتۆنی عەفرین دەردەکەوێت، بۆ ئەوەش بانگەوازی ئێمە لە کۆمەڵگەی نێودەوڵەتی بەگشتی ئەوەیە لە هەڵوێستی کەڕ و لاڵی خۆی لەبەرامبەر وەحشییەتی دەوڵەتی تورکیا بێتەدەنگ و هەڵوێستی خۆی بنوێنێت، چونکە ئەوەی ئەمڕۆ بەسەر گەلی عەفریندا دێت، سبەی بەگشتی بەسەر کۆمەڵگەی نێودەوڵەتی دێت، سبەی ئەردۆغان دەبێتە بەڵایەک بۆ کۆمەڵگەی نێودەوڵەتی بەگشتی، چونکە سەرکێشی تیرۆر و چەتەکانی داعش و بەرەی نووسرە و کە لە رۆژهەڵاتی نێوەڕاست دروستدەکرێن، لە ئەنقەرە پێشوازی دەکرێن و پەروەردەدەکرێن و بەسەر رۆژهەڵاتی نێوەڕاست بڵاودەکرێنەوە، بینیمان چۆن ئەمڕۆ ئەردۆغان بە تیرۆر هەڕەشە لە جیهان دەکات، بانگەوازی ئێمە بۆ کۆمەڵگەی نێودەوڵەتی ئەوەیە بۆ گەلی کورد و گەلی عەفرین و ئەو بەرخودانییەی دەکرێت، خاوەن هەڵوێست بن.

 

بۆئەوەی خەڵکی عەفرین نەکەونە ژێر هەڕەشەی تۆپباران و بۆردوومان و شەڕ و کوشتار، وەکو هەنگاوێک بەرەو شەهبا و شێراوە چوون، ئەمەش بەو مانایە نییە عەفرین داگیرکرابێت، ئەمە راستنییە. داگیرکاران دەتوانن ئاڵای خۆیان بەرزبکەنەوە و بێنە نێو عەفرین، بەڵام ناتوانن ئیرادەی کۆمەڵگە تێکبشکێنن.

 

ڤیدیۆ بە زمانی عەڕەبی لە روداو وەڕ‌گێڕاو بۆ سەر زمانی کوردی

کۆنگرەی رۆژنامەڤانیی بەڕێوەبەرایەتیی خۆسەری دیموکراتیی کانتۆنی عەفرین ببینە

 

داڕشتنەوە: دەرباز ساڵح

 

کاتالۆگ