با مێژوومان میللی بکەین و شكڵێکی میللی و نەتەوەیی بە خەبات بدەین، ئیبراهیم لاجانی

قەیرانی هەموولایەنەی کۆماری ئیسلامی هەروادێ بەرین دەبێتەوە. بایکۆتی ئابووری و بازرگانی وماڵیی رێژیم و بێزراویی سیاسی و دێپلۆماسی ئەو لە نێو وڵاتانی ناوچەو دونیادا لە لایەک و ئەو ناڕەزایەتیە جەماوەریەش کە لە نێوخۆدا لەگەڵی بەرەو ڕوویە لە لایەکی دیکەوە،

هەموو ‌هێزو لایەنە نیشتیمانی و خەباتگێرەکانی وڵاتەکەمان هاندەدەن کە هەرچی زووتر خۆیان بۆ رووبەڕووبونەوە  لەگەڵ ئەو ئاڵوگۆڕو چاڵینجانە کە لە پێشماندان و شوێن لەسەر چارەنووس و داهاتووی وڵاتەکەمان دادەنین، ئامادەبکەن.

درێژەدان بەو پڕشوبڵاویە سیاسیەی کە لەنێو کەسایەتی و هێزو لایەنە خەباتگێرەکانی کوردستاندا هەیە، مەترسی ئەوە زیاد دەکا کە میللەتەکەمان نەتوانێ وەک پێویست کەڵک لەو هەلانە وەرگرێ کە خەریکە دێنە پێش یا نەتوانێ زەرەری ئەو مەترسیانەکەم کاتەوە کە بۆی لە کەمیندان.

ڕاستیەکەی ئەوەیە کە حیزب و ڕێکخراو و کەسایەتی و لایەن و هێزە نیشتیمانی و دێموکراتیەکانی نێو گۆڕەپانی بزووتنەوەی میللی کوردستان لەگەڵ چالێنج و تاقیکردنەوەیەکی  نەتەوەیی  ئەوتۆ بەرەوروون کە ئاکامەکەی پێوەندیی بە ڕادەی وشیاری، ئاگاهی و لەخۆبردوویی و مایەلەخۆدانانی ئێستای ئەوانەوە هەیە.

 ئێمە ئەگەر بە شێوەیەکی هاوئاهەنگ، یەکگرتوو، بەهێز و بە وشیاریەوە بجوڵێینەوە، نەک هەر دەتوانین تاڕادەیەکی زۆر ئەو پیلان و مەترسیانە پوچەڵکەینەوە کە لەسەر رێی خەباتی ڕەواماندان، بەڵکو دەتوانین بروا بەوەش لەخۆاماندا بەهێزبکەین کە لەدەستمان دێ بەڕەی میللەتی خۆمان لە ئاوێ دەرێنین و  بزووتنەوەکەمان بگەیەنینە سەرکەوتن.

هێنانەگۆڕی ناکۆکیە فیرقەیی، حیزبی و شەخسیەکانی ڕابردوو و زەقکردنەوەی خۆویستی و تێبینیە حیزبی و بەرژەوەندیە تایبەتیەکانی نێوان لایەن و کەسایەتیە میللی و نیشتیمانیەکان، تا ئێستا نەیان هێشتوە  هێزو لایەن و کەسایەتیە میللی و نیشتیمانیەکانی کوردستان، بە پاراستنی ڕوانگە و بەرنامەی سیاسی خۆیانەوە، بتوانن لەسەر قازانج و بەرژەوەندیە نەتەوەییەکان پێکەوە هاوکاری بکەن.

 وەختی ئەوەیە ڕابردوومان و  میژوومان و کەسایەتیە ساسی و خەباتگێرەکانی ئێستاو ڕابردوومان، حیزبەکان و رێکخراوە سیاسیەکانمان، حیزبی دێموکرات، كۆمەڵە، خەبات، حیزبی کۆمۆنیست، پارتی ئازادی و هەروەها پێشەوا، ئەحمەد تۆفیق، موعێنی، قاسملوو،  شەرەفکەندی شێخ عیزەدین، شێخ جەلال، مەلاخدری عەبباسی، یەزدان پەنا، موفتی زادە و ئەوانی تر و تەنانەت ئەوانەش کە ئێستا لە گۆڕەپانەکەدان،  ناشناڵیزە و میللیی بکەین. یانی ئەوانە  خۆیان و خەباتەکەیان و ئامانج و داواو رێبازە کەیان هی میللەتی ئێمە و هی کوردستانن و دەبێ ئاواش ببینرێن و هەلسەنگێنرێن. ئەگەر بەو پلەیە لە تێگەیشتنی  سیاسیی بگەین، بزووتنەوەکەمان دەکەویتە سەر سکەیەکی لە گەڕانەوەنەهاتوو و بە خێراییەکی زۆر بەرەوپێشەوە دەڕوا. چونکە هەموو ڕۆڵەکانی کوردستان بە بیرکردنەوەیی جیاوازی سیاسی و فکریەوە خۆیانی تێدا دەبیننەوە.

 ئەو وەزعەسیاسیەی لە پێشماندایە هیچی دیکە ئیجازەی درێژەدانی ئەو ڕەوشەمان پێنادا کە خومان پێوەگرتووە و لە نێوی دا دەژین.

 ئەو کەس و لایەنانەی هێشتاش لەباری سیاسیەوە گەشەیان نەکردوە و جارێ هەر  سەرمەستی وتنەوەی سرودی ئەنالحەقی خۆیانن، زۆر ناکیشێ تێدەگەن کە قەتاری زەمان و کاروانی خەبات بەجێی هێشتوون.

کاروانێک وەڕێکەوتوە کە بە خێرایی دەڕواتە پێش و لەسەر کەسیش ڕاناوەستێ. ئاڵوگۆرەکانی ناوچەو دونیا و ئێرانیش، بای بە هێزتر دەخەنە پشتی سەریی کەشتی چارۆکەداری ئەو کاروانە. کۆمەڵگای کوردستان ئاڵوگۆڕی بنەڕەتی بەسەرداهاتوە. بەشی زۆری حەشیمەتی کوردستان لاو و باسەواد و وشیار و زانکۆ دیدەن. هەستی نەتەوایەتی و هاوپێوەندیی کوردایەتی ناسنامەی هاوبەشی هەموو ڕۆڵەکانی کوردستانە.  چێنێکی مام ناوەندی بە هێز لە کوردستان پێگەیشتوە کە ماتۆڕی  بزووتنەوەی کوردستان هەڵدەسوڕێنێ و پێگەی تەبەقاتی حیزبی دێموکڕاتە. خەڵک سەبارەت بە مەسەلە نەتەوایەتی و میللیەکان لەسەر هەستن و بەو هەموو سەرکوت و زەبروزەنگەوەش کە لەسەریانە، لە هەر دەرفەتێکدا کە بۆیان هەڵدەکەوێ، هاوپێوەندی نەتەوەیی خۆیان و عەزم  ی خۆیان بۆ خەبات لە پێناوی ئازادی و ڕزگاریدا نیشاندەدەن.

جەوهەری کاری سیاسی  و نێوەرۆکی پۆلیتیکی کوردی ئەمڕۆ لە کوردستانی ئێراندا، شتێک نیە جگە لە خەباتی میللی و دێموکڕاتیک. شتێک نیە جگە لە کوردایەتی و خەبات بۆ ڕزگاری  لەستەمی نەتەوایەتی و دواکەوتوویی سیاسی و ئابووری و کۆمەڵایەتی و دابین کردنی مافی دیاریکردنی چارەنووس. هەر بۆیەیە نەوەی نوێی کوردستان، نەسلی تازەو وشیارو بێداری کوردستا، تادێ زۆرتر قاوغە تەسک و ئیدەئیلۆژیکیەکان بەجێ دێڵێ.

ئێمە ئێستا ئەرکێکی گرنگتر لەوەمان لە پێشدانیە کە تێکۆشین هەموو ڕۆڵەکانی میللەتی کورد لە کوردستانی ئێران لە دەوری پلاتفۆرمێکی میللیی هاوبەش کۆکەینەوە. ئەوە کە بەزمانی ماتماتیک پێی دەڵێن گەورەترین کۆڵکەی هاوبەش واتە  دۆزینەوەی گەورەترین مەخرەجی موشتەڕەکی  نێوانی هێزو حیزب و کەسایەتیە نیشتیمانی و میللیەکان  ئەرکی هەرەسەرەکی ئەو قۆناخەی خەباتە.

مۆبیلیزەکردنی هەموو هێزولایەن و کەسایەتیەکانی نێوکۆمەڵگای کوردستان بۆ چالاکی زیاتر، بەشداری زیاتر و مایەدانانی زیاتر   تا هێزی زیاتر بخەینە خزمەت بزووتنەوە، ئەرکێکێ دیکەی  ئەمڕۆی هێزولایەنە سیاسیەکانی کوردستانە. بە هێزکردنی پێوەندی و ئاستی هاوکاری  نێوان هێزە خەباتگێڕەکانی کوردستان و پەرەپێدانی دیالۆگ و کۆمونیکاشۆن لە نێوانیاندا، ئەرکێکی دیکەی سەرشانی هەموو لایەکمانە. هەلومەرجی بردنە پێشی سیاسەتێکی لەوچەشنە لە هەموو بارێکەوە ئامادەیە. لەلایەک خەڵک ئومێدێکیان بەوە نەماوە کە لە چوارچێوەی ئەو ڕێژیمەو سیاسەتەکانی دا ئاڵوگۆرێک بە قازانجی ئازادی پێک بێ. لە لایەکی دیکەشەوە قورسایی باری ژیان و بەڕێچوون پشتی زۆربەی هەرەزۆری کۆمەڵانی خەڵکی چەماندۆتەوە. بەمجۆرە زەمینەی عەینی وەلانانی کۆماری ئیسلامی پێکهاتووە. ئەوە تەنیا رێگاچارەی ئەو قەیرانە سیاسیە هەمەلایەنەیە کە وڵاتەکەمان گیرۆدەیەتی.

 لە هەلومەرجێکی ئاوادا،حیزبی دێموکڕاتی کوردستانی ئێران کە هێزی سەرەکی نێو بزووتنەوەی میللی و دێموکڕاتی کوردستانە بە ئەرکی سەرشانی خۆی دەزانێ بەورێگایەدا بڕواتەپێش و زەمینەی  گەیشتن  بە تەوافوقی میللی درووستکات.

ئیعتباری سیاسی و پرستیژی بەرز  لە کوردستان و ئێران و ناوچەدا توانای ئەوە  دەداتە حیزبەکەمان کە  لە درووستکردنی زەمینەی ئەو سیاسەتەدا نەخشی کارساز ببینێ.  یانی ئەوە کە کار بۆ ئەوەبکەین خەبات لە شکڵی دەستەیی و گرووهی و فیرقەیی و حیزبی بێنینە دەر و شکڵی میللی پیبدەین.

ئیبڕاهیم لاجانی

٢٦.٠١.٢٠١٢