ڕۆژی شەممە ڕێکەوتی ٢ی ڕەشەمەی ١٣٩٣ی هەتاوی، شاندێکی کومیتەی سویدی حیزبی دیمۆکراتی کوردستانی ئێران لەسەر بانگهێشت کردنی فەرمی
” کۆمەڵەی شۆڕشگێڕی زەحمەتکێشانی کوردستانی ئێران” وەک حیزبێکی هاو پەیمان، لە ڕێوڕەسمی ٢٦ی ڕێبەندان یادی ٣٦ ساڵەی خەباتی ئاشکرا بوونی ئەو حیزبە، لە هۆڵی ” هالوندا” لە شاری ستۆکهۆڵم پایتەختی وڵاتی سوید بەشداری کرد و لە لایەن بەڕێوەبەرانی ڕێوڕەسمەکە و بەڕێز ” ئەبوبەکر مودەڕسی” جێگری سکرتێر و هەروەها ” زاگرۆس خوسرەوی” ئەندامی کومیتەی ناوەندی ئەو حیزبە بەگەرمی پێشوازیان لێ کرا.
شایانی باسە سەرەتای ڕێوڕەسمەکە بە ڕاگرتنی خولەکێک بێ دەنگی بۆ ڕێزگرتن لە گیانی پاکی شەهیدانی کوردستان و کۆمەڵە و خوێندنەوەی ڕیزبەندی بەرنامەکە لەلایەن بەڕێوەبەرانی مەراسمەکە بە هەردوو زمانی کوردی و سویدی دەستی پێ کرد.
پاشان وتەیەک لەلایەن ” ئەبو بەکر مودەڕسی” جێگری سکرتێری گشتی کۆمەڵە لە سەری وەزعی ئێستای ڕۆژهەڵاتی ناوین و کێشەی داعش و بیرۆکەی سەلەفی سیاسی و هەروەها بارودۆخی کوردستان بەگشتی و ڕۆژهەڵاتی کوردستان و ئێران بە تایبەتی پێشکەش کرا.
دواتر چەندین پەیامی پیرۆزبایی سەبارەت بەو ڕۆژە خوێندرانەوە، یەک لەوان پەیامی پیرۆزبایی کومیتەی سویدی حیزبی دیمۆکراتی کوردستانی ئێران بوو، کە لە لایەن ” محەممەد ئەحمەدی” خوێندرایەوە.
حیزبی دیمۆکراتی کوردستانی ئێران ـ سوید
٢٢ ـ ٢ ـ ٢٠١٥