الحق یعلو ولایعلی علیە.، مەلا برایمی مەجیدپور

خوای مەزن لە قورئانی پیرۆزدا فەرمویە :{ زۆر دەستەی بەڕواڵەت کەم و بەبڕوا بە‌ هێز بەسەر دەستەی زۆرو لەخۆ بایی بودا سەرکەوتون.} با هەمولایەک ئەوە بزانن حیزبی دێمۆکڕات حیزبێکە قازی دایمەزراندوەو

قاسملوو شەرەفکەندی درێژەیان پێداوەو ڕۆڵە بەئەمەگەکانی تائێستاش لەو ڕێبازە لایان نەداوەو گەڵی ڕۆژهەڵاتی کوردستان هەروا بەئەمەگناسیەوە لە پشتیان راوەستاوە .ئەگەر وابیر بکرێتەوە کە کەمن هەڵەیە خەونەکەیان بڵقی سەر ئاوە. ئەو حیزبە ئی هەمو چینو توێژەکانی کوردستانە و بەهیچ تیرەو تایەفەو ئیدەو ئایینێکەوە هەڵناوەسراوەو شانازی بێ وێنەشی لەمێژودا سەبت کراوە .

بەبۆنەی شەهیدبونی ڕۆڵەی بەئەمەگی گەلی کوردو پێشمەرگەی حیزبی دێمۆکڕاتی کوردستانی ژێر دەستی ئێران هاوڕێی (قادر کەریمی ) خەڵکی شارستانی نەغەدە هاوخەمی خۆم دەگەڵ بنەماڵەی بەڕێزی و سەرجەم هاوڕێو هاوسەنگەران و خەڵکی ڕۆژهەڵاتی کوردستان و گەلی کورد بە گشتی دەردەبڕم و خۆم بەشەریکی خەمیاندەزانم و دەڵێم : پێی ناوێ بۆ شەهیدی وەتەن شێوەن و گرین ـــــ نامرن ئەوانە وا لەدڵی میلەتا دەژین . ئەو کردەوەی (پەکەکە ) بەهەر بـڕو بیانویەک بوبێیو هـەر پاساوێکی بـۆ بهێندرێتەوە مەحکوم دەکەم و هیواداریشم هەڵویستی کوردانەو ژیرانەی سەرجەم گەلی کوردو حیزبە کوردستانیەکان وەک هێزێکی پۆڵایینی لەبڕان نەهاتو ببنە بەر هەڵستی هەر هێزێکی سیاسی بۆ هەر مەبەستێکی حیزبیو ناوچەیی ، بەرژەوەندیە گشتیەکانی گەلی کورد بکاتە قوربانی ، بـەرەنگاری ببنەوەو ڕێـگە نـەدەن چیتر ئـەو هەڵە مێژوییانەی کەتا ئێستا یەکەمین هۆی سەرنەکەوتنی ئەو گەلەبوە دوپاتو چەند پات بكرێنەوە، ڕۆڵەکانیان ببنە فیدای سیاسەتو ویستێکی ناڕونو نامۆ . ئێستا کاتی ئەوە هاتوە سەرجەم حیزبە کوردستانیەکان هەقانیەتی خەباتی ڕەوا بۆ رزگاری کوردستانو گەلەکەمان بکەنە ئامانجی سەرەکیو لە پێشەوەی هەمو حەزو ویستیەکی دابنێنو ڕاستو ڕوون دەگەڵ یەکتر بدوێنو واز لە دیپڵۆماسیو دروشمی برایەتی بێبنەما بهێننو ئەو برایەتیەی بە کردەوە بسەلمێنن . لەهەر ڕوداوێک دا بەبێی تێبینیو خاترخوایی خەتاکە بـدۆزنەوەو خـەتابار بـناسێنن ، تا نەتوانن چیتر بەدرۆو دروشمی قەڵەو گەلەکەمان هەڵخەڵەتێننو ناڕاستەو خۆ ویستی دوژمنەکانمان وەدی بێنن!

خەڵکی بەشەڕەفی کوردستان خوشکو برایانی ڕۆژهەڵاتی نیشتمان دڵنیابن مێژو سەلماندویەتی گەلی کورد تەسلیمی هیج زەختو زۆرێک نابێ ، لە لایەن هەر هێزو دەسەڵاتێک خۆیی یان بێگانە بوبێ . ئەوانەش کە پشتیان بەزۆری چەکدارو دەسەڵات بەستبێو دژی گەلو بەرژەوەندەکانی کاریان کردبێو خۆیان سەپاندبێ ، سەرئەنجام دەگەڵ هێزی گەل بەرەو ڕودەبنو تۆفانی ناڕەزاییو ئازادیخوازی ڕایان دەماڵێ . با پەکەکەو هەمو حیزبە کوردستانیەکان بەحیزبی دێمۆکڕاتیشەوە دەرس لە مێژو وەرگرنو زۆرە ملی مەحکوم کەنو بزانن گەڵ لەهەمو حیزبو دەسەڵاتێک بەهێزترە. با زۆر دور نەچین شای گۆڕکراوی ئێران لە حاڵێکدا تەختو تاجەکەی وەرگەڕا کە خۆی بۆ [ژاندارمی ڕۆژهەلاتی ناوەڕاست ] ئامادەکردبو !! سەدام حوسێن بیری سەرۆکایەتی دنیای عەڕەبی لەسەردابو کە لەبەرانبەر خەڵکی ڕاپەڕیودا بەقەدەر گۆڕێکی لە ژێر زەویدا بۆ مابو کە ئەوشیان پێڕەوا نەدیت !! بێی پەردە دەڵێم : گومان لەوەدانیە هەر حیزبو سازمانێک ئەگەر ئەوهەڵە گەورەیە بکاو بیهەوێی بەزۆر خۆی بسەپێنێ ، چارەنوسی تێکشکانو نەمانە.

جێگەی داخە (پە کە کە) لە ماوەی نیزیک بە چل ساڵ کارو تێکۆشانی خۆی دەرسی لـەمێژو وەرنەگرتـوەو بـۆ تاکە جـارێکیش پـێی لـە هەڵەی خـۆی نەناوەو خولیایی دەسەڵات وایلێکردوە کە ناتوانێ هێزێکی گەلی قبوڵ بکا، ڕاستیەکانی مێژو بسەلمێنێو مافو هەق وەک بۆ خۆی بەڕەوای دەزانێ بۆ خەڵکیتریشی بسەلمێنێ، واز لەوسەرەڕۆییو شەڕاژۆییە بێنێو ، لەو کاتە هەستیارو دەرفەتە لەبارو کەشو هەوایەدا دەسکەوتەکانی بەشەکانی کوردستان داگیر نەکاو هیوای گەلەکەمان نەمرێنێ !! بەلای منەوە زۆر سەیرە تا ئێستا دوژمنی گەلی کورد وەک کۆماری ئیسلامی ئێران بوو کە ڕۆڵەی کوردی لەماڵو زێدی خۆی دەر دەکردو ڕێگەی گەڕانەوەی پێنەدەدانو دەیگرتنو دەیکوشتن ، کە چی مخابن ئێستا حیزبێکی کوردی ڕێگە بەو کەسانە دەگرێی کە بۆ زێدی خۆیان دەگەڕێنەوە!! ئەوە شتێکی نوێیە کە پەکەکە دۆزیویەتەوە!!

 ئەگەر کوردستان ماڵی کوردانە ، ئەدی چۆنە حیزبێکی کە بەقسە خۆی بە ڕزگاری دەری کوردستان دەزانێ لە شوێنێک کە خۆی خەڵکی ئەوێی نیە ، ڕێگە بە و پێشمەرگانە دەگرێ دەیانەوێی بچنەوە ماڵی خۆیان کە ئەویش لە بەشەکەی ئەواندا نیە ، دەیانکوژێو برینداریان دەکا !! لێرەدا ئەو شێعرە بەجێیە کەدەڵێی : [ ماڵ لەخانە خوێی حەرامکراوە ـــــ مەسەلەی کوردەو لەکورد ڕویداوە.] بەلای منەوە جێگای داخو سرنجە کە پەکەکە لەخۆی زیاتر چاوی بەهیچ هێزێکی کوردستانی هەڵنایەو هیچیانی قبوڵ نیەو ئەگەر بە ڕواڵەتیو بەمەبەست ڕوی خۆش بە حیزبێک نیشان بدا، بەدڵنیایەوە لە ناوەرۆکدا قبوڵی ناکەنو لەکاتی خۆیدا توڕی هەڵدەدەن . لە کوردەواریدا مەسەلەیەک هەبو دەیانکوت : [ مار ماری نەخوا نابێتە ئەژدیها] پەکەکە ئەو تێزە ڕەچاو دەکاو پێیوایە دەبێ هەمو حیزبەکوردستانیەکان یان بچنە ژێر ڕکێفی ئەو یان لەناو بچن با ئەو ببێتە دەسەڵاتی موتلەقو ئەبەر قودڕەت!!

 لەحاڵێکدا کە زۆربەی وڵاتانی دنیاو ئەمریکاو ڕۆژ ئاوا هەرێمی کوردستان بەڕەسمی دەناسنو یارمەتی نیزامیشی بۆ دەنێرن کە چی پەکەکە تائێستاش حکومەتی هەرێمی بەڕەسمی نەناسێوەو نایناسێ. بە پێچەوانەی هەمو یاساو ڕاسایەک بە شیوەی جۆراو جۆر شەڕی دەگەڵ کردوەو کەندو کۆسپی دەخاتە سەر ڕێگاکەیو تەنانەت ئەندامی ڕێبەرایەتیەکەی داوای ڕۆخانی دەکا . بەهەر حاڵ ئەو جۆرە هەڵوێستانەی کورد دەهەق بەکورد هەرکێی بیکا هەم خەتایەو هەم جێی گومانە ، بەدڵنیایەوە سەر ئەنجام بکەرەکەی پەشیمانە ، هەرچۆنێکو بۆ هەرمەبەستو بەهەر بیانویەک کرابێی بەزیانی خەباتی رەوای گەلی کوردستانە . ئەوانەی لەسەر ڕێگایەکی ڕاست بنو ئامانجیان بەژەوەندی گەلی کوردبێی لەسەرهەقنو سەر کەوتنی هەق بەسەر ناڕەوایاندا مسۆگەرەو جێگەی گومان نیە. ئاواتە خوازم ئەو چەشنە بەرخوردو ڕوداوانە نەمێننو ڕۆڵەکانی گەلەکەمان چیتر نەبنە دەسەتە چیلەی ئاگرێک کەتەنیا دوژمنەکانمان خۆی لەبەر گەرم دەکەنەوە.

 براتان مەلا برایمی مەجیدپور . ٢٦ /٥ / ٢٠١٥ ـــ٥ /٣/ ٢٧١٥ کوردی