ڕۆژی پێنج شەممە ڕێکەوتی ٦ی ڕەشەمەی ١٣٩٤ی هەتاوی، لقی ستۆکهۆڵمی ”کۆنگرەی نەتەوەکانی ئێرانی فیدراڵ”
خۆپیشاندانێکی ناڕەزایەتی بۆ شەرمەزارکردن و بایکۆتی بەناو هەڵبژاردنەکانی مەجلیسی ئێران لە ” گۆڕەپانی سێرگێل” لە ناوەندی شاری ستۆکهۆڵم بەڕیوەبرد.
ئەو خۆپیشاندانە بە دەستپێشخەری سێ هێزی دژبەری کۆماری ئیسلامی ئێران، واتە هەریەک لە حیزبی دێموکراتی کوردستانی ئێران، کۆمەڵەی شۆڕشگێڕی زەحمەتکێشانی کوردستانی ئێران و حیزبی گەلی بەلوجستان (حزب مردم بلوچستان) لە ئاستی کومیتەی شاری ستۆکهۆڵمدا پێکهات بوو.
خۆپیشاندانەکە کاتژمێر ٦ی دوانیوەڕۆ بە کاتی ئورووپا دەستی پێکرد و سەرەتا مەبەستی خۆپیشاندانەکە ڕاگەیەندرا و دواتر وتەیەک ” بەزمانی سویدی” لەلایەن ” ئاسۆ ساڵح” نوێنەری کۆنگرەی نەتەوەکانی ئێرانی فیدڕاڵ لە ستۆکهۆڵم پێشکەش کرا.
بەڕێز ئاسۆ وتەکەیدا هەڵبژاردنەکانی ئێرانی بە سیناریۆ ناوبرد و لە درێژەدا گوتی کەمترین مەجال بۆ بەڕێوەچوونی هەڵبژاردنێکی ئازاد و دێموکراتیک لە سیستەمی سیاسیی رێژیمی ئێراندا بوونی نییە، هەربۆیە ڕیسواکردنی ئەو سیناریۆیە ئەرکێکی ئەخلاقی هەر تاکێکی کۆمەڵگای ئێرانە.
پاشان ” ئازاد ئەمینی” وتارێکی بە زمانی ئینگلیزی لەسەر پێشێلکارییەکانی مافی مرۆڤ لە ئێراندا، پێشکەش کرد.
دواتر ڕاگەیەندراوی ” کۆنگرەی نەتەوەکانی ئێرانی فێدڕال” بە زمانی سویدی لەلایەن شاهین خوسرەوی و هەمان ڕاگەیەندراو بە زمانی فارسی لەلایەن سەعید دلپەزیرەوە خوێندرانەوە.
لە بەشێکی دیکەی خۆپێشاندانەکەدا لە لایەن بەڕێوەبەرانی ئەو خۆپیشاندانەوە چەندین ئامار و بەڵگە لەسەر پێشێلکارییەکانی مافی مرۆڤ لە کۆماری ئیسلامی ئێراندا وەک گرتن، ئەشکەنجە و ئێعدام بەزمانی سویدی خوێندرایەوە.
لە بڕگەیەکی دیکەی خۆپێسانەکەدا، ناڕەوابوونی هەڵبژاردنەکان و بەربەستەکانی بەردەم بەشداری سیاسیی خەڵک لە دەسەڵاتی سیاسیی ئێراندا زیاتر فۆکووسی خرایە سەر.
شایەنی باسە لەو خۆپێساندانەدا کۆمەڵی خەڵک وێرای نوێنەرانی ئەو سێ حیزبە لەو خۆپیشاندانەدا بەشدار بوون و وێڕای پەیامەکانیان بە هەڵگرتنی درووشم و پۆستێری تایبەت بە بایکۆتی هەڵبژاردنەکان دەنگی خۆیان خستە پاڵ دەنگی خەڵکی ناڕازی و نەتەوە ستەملێکراوەکانی ژێر دەسەڵاتی کۆماری ئیسلامی ئێران.
کۆنگرەی نەتەوەکانی ئێرانی فیدراڵ ـ ستۆکهۆڵم
٦ی ڕەشەمەی ١٣٩٤ی هەتاوی
٢٥ی فیڤەریەی ٢٠١٦ی زایینی
