شەش پێشمەرگەی حیزبی دێموکرات لە پیرانشار شەهید بوون

بەداخەوە لە پیرانشار شەش پێشمەرگەی حیزبی دێموکرات شەهید بوون. ناوەندی تەشکیلاتی نهێنیی حیزبی دێموکراتی کوردستانی ئێران ڕایگەیاند،

کە لە تێکهەڵچوونێکی چەکداریدا لە نێوان پۆلێک لە پێشمەرگەکانی شار و هێزەکانی سپای پاسداران لە ناوچەی پیرانشار، شەش پێشمەرگە شەهید بوون.

بەپێی ڕاگەیەندراوی ناوەندەکە، ڕووداوەکە شەوی چوارشەممە (١٠ی پووشپەڕی ١٤٠٥) لە گوندی ”قزقەپان” لە نزیک شاری پیرانشار ڕووی داوە، کاتێک ئەو دەستە پێشمەرگەیە لە کاتی ڕاپەڕاندنی ئەرکێکی سیاسی و تەشکیلاتیدا، کەوتوونەتە کەمینی هێزەکانی سپای پاسدارانەوە.

حیزبی دێموکرات ناوی شەهیدەکانی بەم شێوەیە ڕاگەیاندووە: کارۆ هۆرمزیاری، فەردین جەهانگیری، محەممەد خاکی، عەبدوڵڵا محەممەدپوور، توانا عوسمانی و محەممەدئەمین بایەزیدی. ناوەندی تەشکیلاتی نهێنی لە بەیاننامەکەیدا سەرەخۆشی لە بنەماڵەی شەهیدان دەکات و جەخت لەسەر بەردەوامیی ڕێبازی ئەوان دەکاتەوە.

ئێمە وەک سایتی پێشمەرگەکان، سەرەخۆشی خۆمان ئاڕاستەی هاوڕێیان لە حیزبی دێمۆکڕات و بنەماڵە سەربەرەزەکانیان دەکەین. روحی هاوڕێ شەهیدەکان شاد بێ رورەشی بۆ جاشە خۆفرۆشەکانی و نیزامی کۆماری ئیسلامی ئێران.

دەقی تەواوی هەواڵەکە (ڕاگەیەندراوی حیزب):

شەش پێشمەرگەی حیزبی دێموکرات لە پیرانشار شەهید بوون
لە تێکهەڵچوونی پۆلێک لە پێشمەرگەکانی شاری ناوەندی تەشکیلاتی نهێنیی حیزبی دێموکرات لەگەڵ هێزە دژی‌گەلییەکانی کۆماری ئیسلامی لە ناوچەی پیرانشاردا شەش پێشمەرگەی حیزبی دێموکرات شەهید بوون.
لەو شەڕ و تێکهەڵچوونەدا کە شەوی چوارشەممە، ١٠ی پووشپەڕ لە گوندی قزقەپان لە سێ کیلۆمیتری شاری پیرانشار ڕووی دا، شەش پێشمەرگە بە ناوەکانی کارۆ هۆرمزیاری، فەردین جەهانگیری، محەممەد خاکی، عەبدوڵڵا محەممەدپوور، توانا عوسمانی و محەممەدئەمین بایەزیدی شەهید بوون. ئەو دەستە لە پێشمەرگەکان لە کاتێکدا بۆ ئەرکێکی سیاسی و تەشکیلاتی ڕاسپێردرابوون، کەوتوونەتە کەمینی هێزێکی زۆر و کۆک‌وپۆشتەی سپای پاسداران.
ناوەندی تەشکیلاتی نهێنیی حیزبی دێموکراتی کوردستانی ئێران ڕادەگەیەنێ خوێنی گەشی ئەو پۆلە لە پێشمەرگەکانی شار کە لە ناوچەی پیرانشار لە پێناو ئازادیدا تێکەڵ بە خاکی نیشتمان بوو، هەوێنی سەرکەوتنی دواجاری خەباتی حیزب و نەتەوەکەمان بەسەر دیکتاتۆڕیی کۆماری ئیسلامییە. هاوکات پەنابردنی ڕێژیم بۆ سەرکوت و تێرۆر و تۆقاندن، تەنیا نیشانەی زەبوونی، داماویی زیاتر و پەلەقاژەی کۆتایی سیستمێکە کە لە لێواری ڕووخان دایە و لە ترسی تۆڵەی ڕۆڵەکانی نەتەوە، دەستی بۆ تاوانی قێزەون بردووە.
ئێمە لە کاتێکدا سەری ڕێز لە ئاست تێکۆشان و فیداکاریی ئەو نەمرانە نەوی دەکەین، ڕادەگەیەنین خوێنی گەشی ئەم شەهیدانە خوێنبایی ئازادی و هەوێنی گەشەکردنی خەبات و سەرکەوتنی دواجاری گەلەکەمان بەسەر کۆماری ئیسلامی‌دایە و خەڵکی کوردستان و ڕۆڵە خەباتکارەکانی دیکەی نیشتمان ڕێگە نادەن خوێنی بەناحەق‌ڕژاوی ئەو پۆلە پێشمەرگەیە بەفیڕۆ بچێ.
بژی خەباتی ڕزگاریخوازیی گەلی کورد،
نەمری و شانازی بۆ تازەترین شەهیدانی سوورخەڵاتی ناوچەی پیرانشار و سەرجەم شەهیدانی کوردستان.
حیزبی دێموکراتی کوردستانی ئێران
ناوەندی تەشکیلاتی نهێنی
١١ی پووشپەڕی ١٤٠٥

***

کاک مەلا حەسەن شیوەسەڵی

لە نۆروێژ یاد و حەماسەی شەهیدانی قزقەپان بەرز ڕاگیرا

ڕۆژی یەکشەممە ١٤ی پووشپەڕی ١٤٠٥ ( ٣ی ژوئیەی ٢٠٢٦ی زایینی)، لە ناوەندی ئایینیی «قازی» لە شاری سترۆمین، کۆڕێکی ڕێزگرتن و یادکردنەوە بۆ تازەترین شەهیدانی کوردستان «شەهیدانی قزقەپان» بەڕێوە چوو. ڕێوڕەسمەکە لەلایەن ناوەندی پێشمەرگە دێرینەکانی حیزبی دێموکراتی کوردستانی ئێرانەوە ڕێکخرابوو کە تێیدا ژمارەیەکی بەرچاو لە لایەنگران، چالاکوانانی سیاسی و ڕەوەندی کوردی نیشتەجێی وڵاتی نۆروێژ ئامادەی بوون.

ڕێوڕەسمەکە بە سروودی نەتەوایەتیی «ئەی ڕەقیب» و ڕاگرتنی خولەکێک بێدەنگی بۆ ڕێزگرتن لە گیانی پاکی شەهیدانی ڕێگای ڕزگاریی کوردستان دەستی پێکرد. پاشان لەلایەن پێشکەشکاری ڕێوڕەسمەکە، خاتوو گەلاوێژ مێهفەر، بەخێرهاتنی میوانان و نوێنەری ڕێکخراوەکان کرا.

لە بەشی یەکەمی ڕێوڕەسمەکەدا، پێگەی سیاسی و مێژوویی شەهیدانی ئەم دواییە و دۆخی ئێستای بزووتنەوەی ڕزگاریخوازی ڕۆژهەڵاتی کوردستان خرانە بەر باس. لەم چوارچێوەیەدا، پەیامی کۆمیتەی نۆروێژی حیزبی دێموکرات، لەلایەن کاک عەباس نامی بەرپرسی کۆمیتەی وڵاتەوە خوێندرایەوە، کە تێیدا جەخت لەسەر بەردەوامیی ڕێبازی کادر و پێشمەرگە فیداکارەکان کرابوو.

پەیامی ناوەندی پێشمەرگە دێرینەکان، لەلایەن خاتوو شنۆ مێهرپەروەرەوە پێشکەش کرا، کە تیشکی خستە سەر ڕۆڵی مێژوویی تێکۆشەرانی دێرین لە پاڵپشتیکردنی سەنگەرەکانی خەباتدا.

نووسەر و پێشمەرگەی دێرین، کاک برایم لاجانی، وتارێکی سیاسی و شیکاریی پێشکەش کرد و تێیدا پەرەسەندنەکانی بارودۆخی سیاسیی کوردستان و گرنگی حەماسەی قزقەپانی لە مێژووی هاوچەرخی بزووتنەوەکەدا شی کردەوە.

کاک هەمزە ئاگوشی لە وتەکەیدا باسی لە خۆڕاگریی بێوێنەی دایکی شەهیدان کرد وەک سەرچاوەی ورە و وانەی مانەوە و بەگژداچوونەوەی داگیرکەران.

لە تەوەرێکی تری یادکردنەوەکەدا، فیلمێکی دۆکیۆمێنتاری کە لەلایەن «ناوەندی پێشمەرگە دێرینەکانی کوردستان»ـەوە لەسەر ژیان و کارنامەی سیاسی و پێشمەرگایەتی شەهیدان ئامادەکرابوو، نمایش کرا کە سەرنجی ئامادەبووانی ڕاکێشا.

هاوکات تێکۆشەر محەمەد کۆخانی (مەتین) پەخشانێکی سیاسی و حەماسیی خوێندەوە.

پەیامی هاوبەشی «یەکیەتیی ژنان» و «کۆمیتەی ڕۆمەریکێی سەروو» لەلایەن کاک مەنسوور سەممارەوە پێشکەش کرا. هونەرمەندی نیشتمانپەروەر، کاک قادر ئەلیاسی بە دەنگە بەسۆزەکەی، لاواندنەوەیەکی شۆڕشگێڕانەی پێشکەش بە گیانی پاکی شەهیدان و بنەماڵەکانیان کرد.

له‌ کۆتایی کۆڕەکەدا، کاک یاسین حاجیزادە پەیامی سپاس و پێزانینی بنەماڵەی سەربەرزی شەهیدانی حەماسەی قزقەپانی ئاڕاستەی ئامادەبووان و ڕێکخەرانی ڕێوڕەسمەکە کرد. یادکردنەوەکە بە نوێکردنەوەی پەیمانی وەفاداری لەگەڵ ڕێبازی نەپساوەی شەهیدانی ڕێگای ڕزگاری و یەکسانیی کوردستان کۆتایی پێهات.