22ی پووشپەری 1393هەتاوی 25ساڵ بە سەر شەهید بوونی دوكتور قاسملووی زاناومەزن دا تێ دەپەرێ، بەم بۆنەوە و لەم رۆژەدا
حیزبی دێموكراتی كوردستانی ئێران وگەلی كورد ودۆستان ولایەنگرانی كورد و دوكتورقاسملوو، لە زۆر شوێنی جیهان دا، بە شێوەی جۆراوجۆر رێز لە یاد و بیرەوەری ناودارترین كەسایەتی سیاسی و گەورە پیاوی مێژووی كورد ، دوكتور قاسملووی نەمر دەگرن. .
لە 22ی پووشپەری ساڵی 1368هەتاوی (بەرانبەربە 13ژوئیەی ساڵی 1989زایینی) دا، تیرۆریستە دڵرَەشەكانی رێژیمی ولایەتی فەقیە ،كەبە ڕواڵەت بۆباس و دیالوگ لەسەر مەسەلەی كورد لە ئێرانەوە ناردرابوونە ڤییەن (پێتەختی ئوتریش ).دوكتورقاسملوو سكرتێری گشتی حیزبی دێموكراتی كوردستانی ئێرانیان دەگەڵ كاك ”عەبدوڵا قادری ئازەر”ئەندامی كومیتەی ناوەندی و نوێنەری حیزب لە دەرەوەی وڵات و” دوكتور فازڵ رەسووڵ ”ماموستای كوردی زانستگەی ڤییەن ،تیرور كرد.
رێبەرانی كۆماری ئیسلامی ئێران ، دەیانزانی كە دـ قاسملوو هەروەك لە خەبات بۆ دادپەروەری سیاسی و نەتەوایەتی و كۆمەڵایەتی دا شێلگیرە ، زۆر زیاتر لەوەش باوڕی بە وتووێژ و چارەسەری ئاشتیخوازانەی مەسەلەی كورد هەیە و هەر بۆیە كاتێك لە رێگای نیزامی یەوە زەفەریان پێ نەبرد ، فێڵبازانە و دەغەڵكارانە لە دەروازەی ئاشتیخوازانەوە بۆی هاتنە مەیدان و بە ناوی وتووێژی ئاشتیخوازانە لە سەر مافی گەلی كورد لە كوردستانی ئێران ،لە ڤییەن دەگەڵی دانیشتن و تێروریان كرد.
راستییەكی حاشا هەڵنەگرە ،كە شەهید یوونی دـقاسملوو زەبرێكی كاریگەر و خەسار و كۆستێكی مەزن و شوێن دانەر بوو ، كە بە تایبەتی لە حیزبی دێموكراتی كوردستانی ئێران كەوت.تەنانەت دەتوانین بڵێین ئەو كۆستە گەورەیە ،كۆستی هەموو نەتەوەی كورد بە گشتی و بزوتنەوەی مافخوازانەی گەلانی ئێران و بزوتنەوەی خەبات بۆئاشتی وئازادی و دێموكراسی لە ئاستی جیهانیدابوو.
ئەو كۆستە گەورەیە لەلایەك بوو بە مایەی خەم و پەژارەی خەڵكی كوردستان و دۆستانی گەلی كورد و لەلایەكی دیكەوە ڕق و قینی شۆرشگێرانەی ڕۆڵەكانی گەلی كوردی بەرانبەر بە رێژێمی ئاخوندی زیاتر لە پێشوو بزواند ولە سەر درێژەدانی خەبات و رێبازی رێبەرە مەزنەكەیان شێلگیر تری كردن ولەئاستی جیهانیش دا ،سیما و نێوەرۆكی تێرویستی كۆماری ئیسلامی ئێرانی باشتر دەرخست.
دوكتور قاسملوو،بە شاهیدی و ئیعترافی زۆر كەسایەتی ناوداری كورد و ئێرانی و جیهانی كەلە نزیكەوە ناسیویانە ،گەورەترین و بەئێعتبارترین كەسایەتی سیاسی و مێژووی كورد بوو ،تەنانەت لە رۆژهەڵانی ناوەڕاستیش دا كەسایەتیەكی كەم وێنە بوو ،بزووتنەوەی رزگاری خوازی كوردستان بۆبەشێكی بەر چاو لە دەسكەوتەسیاسیەكانی خۆی قەرزداری زانایی و زیرەكی سیاسی ئەو رێبەرە مەزنەیە ،بە داخەوە ئیستاشی لە گەل َبێ گەلی كورد رێبەرێكی دیكەی هاوتای قاسملووی نەبوەتەوە.
دوكتور قاسملوو ،خوێندكارێكی زیرەك و بە بەرنامە ، مامۆستایەكی كەم وێنە ،بیرمەند و رووناكبیرێكی بیركراوە و تێژبیر و وریا و ژیربوو.
دوكتور قاسملوو ،رێبەرێكی مودێرن و سیمایەكی دێموكرات ،مروڤێكی شورشگێر ، ،سیاسەتوانێكی واقع بین و نمونە ،دیپلۆماتێكی هەڵكەوتو وسەفیرێكی گەورەی نەتەوەی چەوساوەی كورد بوو..
دوكتور قاسملوو ،مودیرێكی داهێنەر و چالاك و پڕكار و ماندووی نەناس ، رێكخەرێكی بە توانا و ئەمانەت دار ،پێشمەرگەیەكی بە نەزم و دیسیپلین ،تێكوشەرێكی خاكی و خەڵكی و بەهەست و قسە خوش و راستگۆ ،كوردێكی مافخواز و نیشتمان پەروەر بوو.
دوكنور قاسملوو ،لەئاستی كوردستان و ئێران و جیهان دا ،بەراستی خەباتگێڕی شێلگیر و لە خۆ بوردو و ماندووی نەناسی رێگای ئاشتی و ئازادی و دێموكراسی و مافی مرۆڤ و مافی نەتەوایەتی بوو..
دـقاسملوو ،بە زیرەكی و توانایی و ئەزموونی كەم وێنەی خۆی رۆنێسانسێكی لە حیزبی دێموكراتی كوردستانی ئێران دا وەڕێ خست ،پێرەوپرۆگرامی حیزبی لە سەر بناغەو بنچینەی دیمۆكراسی وبەرژەوەندی گەلی كورد و سەربە خۆی سیاسی بریاردان دارشتەوە و كردییە بە رێبازی سیاسی حیزبی ،سوسیالیستی دێموكرانی لە ناو حیزب دا چەسپاند و كردییە بە ئامانجی دوا رۆژی حیزبی دیموکرات.
شەهید دوكتور قاسملوو ،باورێكی قووڵی بە دێموكراسی هەبوو ،پێی وابوو دێموكراسی شتێك نییە تەنیا تایبەت بە هێندێك كەس و چەند وڵات بێ ، بەڵكو دەسكەوتێكی مروڤایەتییە و هەركەسێك و هەر وڵاتێك مافی هەیە كە هەیبێ و كەڵكی لێ وەرگرێ ،ئەو نەك هەر بۆ دۆستان تەنانەت بۆ دوژمنەكانیشی دێمۆكراسی دەپاراست و دەیفەرموو : ”خەبات بۆ دێموكراسی نابێ بچێتە ژێر سێبەری خەبات بۆ مافی نەتەوایەتی و چینایەتی”
دـقاسملوو ،باوڕی قووڵی بە” ئازادی و داد پەروەری”هەبوو ، پێی وابوومرۆڤ هەروەك بۆ درێژەدان بە ژیان ٍپیویستی بە ”ئاو هەوا ”هەیە،هەر بەو چەشنەش بۆپەرەگرتن و گەشە كردن و درەوشانەوی كومەڵگای مرۆڤایەتی پیویستی بە ”ئازادی و دادپەروەری” هەیە.
شەهید دوكتور قاسملوو،باوڕی قووڵی بە”دۆستایەتی و پەیوەندی و هاوكاری”نێوان مرۆڤەكان هەبوو، پێی وابوو بۆ بەردەوام بوونی ژیانی كۆمەڵگای مرۆڤایەتی ،بە پاراستنی ”بەرژەووندی و سەربە خۆیی و حورمەتی”بەرانبەر ،پیویستە ئەو پێوەندی و هاوكارییە هەمیشە گەشە بكا و پەرە بستێنێ.
لە بەر هەمووی ئەو تایبەتمەندییە بەرزانەی كە دـقاسملووی نەمر هەیبوون ،شەمشەمە كوێرەكانی حکومهتی ئیسلامی ئێران،دوژمنانی ئاشتی و ئازادی و مافی مرۆڤ ،بە پیلانی ئاشتی و بەغەدر و خەیانەت دەست بەكار بوون و مامۆستای دێموكراسی و پێغەمبەری ئاشتییان شەهیدكرد.
ٍئەوان بە هەڵە چوون ، پێیان وابوو بە تێروری دـقاسملوو ، رێباز و ئامانج و حیزب وگەلی قاسملووشیان تێرور كردوە ، بەڵام ئیستا پاش تێپەر بوونی 25ساڵ بە سەر شەهید بوونی دـقاسملوو دا ، زۆر ئاڵوگۆری هەمە لایەنە وگرینگ و چارەنووس ساز لە ئاستی جیهانی و ناوچەیی و ناوخویی دا پێك هاتوون كە تەنانەت لە سەر حیزبی دێموكرات و گەلی كوردیش شوین و كاریگەری بەرچاویان هەیه ، رێژیمی كۆماری ئیسلامی ئێرانیش زیاتر لە هەموو كاتێك كەوتوەتە بەر گەمارۆی جۆرواجۆری نێودەوڵەتی و جیهانی و حیزبی دێموكرات و بیر ورێباز و ئامانجی قاسملووش بەردەوام لە بەرهو پێش چوون و گەشە كردن و درەوشانەودان و رێبواران و قوتابیانی قوتابخانەی قاسملووش ،ئاڵای پڕلە شانازی ئەویان بە شەكاوەیی راگرتوە و بۆ گەیشتن بە ماف و ئامانجە بەرزەكانی گەلی كورد ،دڵسوزانە و سەربەرزانە و شێلگیرانە و بێووچان خەبات دەكەن و بەرەو ئاسۆی روون هەنگاو دەنێن.
حوسێن نازدار