کۆمەڵەی زەحمەتکێشان و کۆمەڵەی شۆڕشگێڕی زەحمەتکێشان یەکیان گرتەوە

کۆمەڵەی زەحمەتکێشانی کوردستان و کۆمەڵەی شۆڕشگێڕی زەحمەتکێشانی کوردستانی ئێران یەکگرتنەوەی خۆیان راگەیاند. 

رۆژی یەکشەممە 20/11/2022 لە رێوڕەسمێکدا لە ستۆکهۆڵمی پایتەختی سوێد،  کاک عومەر ئیلخانی زادە سکرتێری کۆمەڵەی زەحمەتکێشانی کوردستان بە  و  عەبدوڵا موهتەدی سکرتێری کۆمەڵەی شۆڕشگێڕی زەحمەتکێشانی کوردستانی ئێران  بە فەرمی یەکگرتنەوەیان راگەیاند.

عەبدوڵڵا موهتەدی، سکرتێری گشتیی کۆمەڵەی شۆڕشگێڕی زەحمەتکێشانی کوردستانی ئێران لە رێوڕەسمەکەدا رایگەیاند، دوای یەک ساڵ و نیو هەوڵی چڕوپڕ، ئەمڕۆ یەکگرتنەوەی هەردوو کۆمەڵە رادەگەیێنین.

بەپێی زانیارییەکانی وەرگیراو لە روداو، ناوی کۆمەڵە دەبێتە کۆمەڵەی شۆڕشگێڕی زەحمەتکێشانی کوردستانی ئێران و لە رۆژانی داهاتوو بڕیاری کۆتایی لەسەر ئۆرگان و ناوەندەکانی دیکەی دەدرێت.

کەریم کەریمی، ئەندامی سەرکردایەتی و بەرپرسی پەیوەندییەکانی کۆمەڵەی زەحمەتکێشانی کوردستان لە هەولێر بە تۆڕی میدیایی رووداوی راگەیاند، لەبەر خۆپێشاندانەکانی رۆژهەڵاتی کوردستان، گوشارێکی زۆرمان لەسەربوو بۆ یەکگرتنەوە، بۆیە هەنگاوی یەکەممان پاڵپشتیکردنی خۆپێشاندانەکان دەبێت و دواتریش گەڕاندنەوەی ئەو کەسانەی کە لە کاری حیزبی دابڕاون.

هاوکات، کاکۆ عەلیار، ئەندامی لیژنەی یەکگرتنەوە کۆمەڵەکان بە رووداوی راگەیاند، ئەمڕۆ بە فەرمی یەکیان گرتووەتەوە و لە رۆژانی داهاتوودا بڕیار لەسەر ئۆرگان و هەیکەلی حیزب دەدەن.

کۆمەڵەی زەحمەتکێشانی کوردستان ساڵی 2007 لە کۆمەڵەی شۆڕشگێڕی زەحمەتکێشانی کوردستانی ئێران جیابووەوە و عومەر ئیلخانیزادە سکرتێری گشتیی حیزبەکە بوو.