یارسانەکان تەنانەت لە سیاچاڵەکان حکومەت اللە ئەمنیەت و ئاسایش نەێرن, بشیر امیرخانی

لە تویل 34 ساڵ حکومەت اللە، حکومەت زد ئنسانی جمهوری ئسلامی ئەقلیەتە ئاینیەکان وە تایوەت یارسانەکان روی ئەمنیەت و ئاسایش نەێرن و ڕوژ نیە کە وە بەهانەگەل جوراوجور، ئەزیەت و ئازاڕێان نەێەن.

وەختێ باس لە ئێران کەیت و ویشیم ئێران ئەڕا گشت چینەکان ناو وڵات ئێرانە، وە باوەڕم لە دەوران حکومەت جمهوری ئسلامی سدق ناکەێ و ڕاس نیە، جویکە وەختێ حکومەت وڵاێەت فقیەس و نمایندە ێ اللە وە قەوڵ خوەێان( بێ گومان لە ئسلام شیئە خوەڵاسەێ کەنوە) لە ئێران حکومەت کەێ، پەس جێیک ئەڕا باقی ئەقەلیەتەکان وە تایوەت یارسانەکان لە ژێر دەسەڵات ئی ڕژیمە نیە. 34 ساڵە کە یارسانەکان هانە ژێر گەورەترین فشار و بێ هورمەتی مقامات رژیم جمهوری ئسلامی و لەی 34 ساڵە هەزاران کەس لەی مەردمە ئعدام،شکەنجە و ئاوارەێ دەس ئی ڕژیمە بینە و هەمراێ ئدامە دێرێ.

هەر ئەوجورە لە خەوەرەکان هاتگە لە زندان هەمەدان وە ئەو پەڕ بێ هورمەتیوە مامورەکان زندان هەمەدان،سێوڵ یەک زندانی یارسانی وە زور تاشن، لە ‌هاڵیکا سێوڵ لە لاێ یارسانەکان جێ ڕێز و هورمەتە. لە فکرمان نەچوت کە فرە لە یارسانەکان وە باب دڵ خوەێان سێوڵ تاشن، وەڵێ ئیە وە زور کەس نیە و باب مەیل شەخس خوەێە. وەختێ یارسانەکان لە زندانیچ ئەمنیەت نەێرن و کەفنە وەر بێ‌هورمەتی دەسڵاتدارەکان ڕژیم، لە دەیشت زندانەکان چوێ ئاسایش وئەمنیەت توانن داشتون. وە خاتر ئی بێ هورمەتیە کە وە ئی زندانیە کریاس دو نەفەر وە ناوەکان کەیومەرس نمناک و نیک مەرد تاهری وە نیشانەێ ئتراز وە مقامات ڕژیم خوەێان لە دەر فەرمانداری ڕژیم لە هەمەدان ئاگر دەن کە وە داخوە نیک مەرد تاهری گیانێ لە دەس دەێت و کەیومەرسیچ ئیستا لە بیمارستانە و وە پاێ‌خەوەرەکان 60 لە سەد لە جەسەێ سوزیاس.

ئی کار قیزەونە کە مقامات ڕژیم دەر حەق وە مەردوم یارسان کەنەێ، نە ئەوەلینە و نە ئاخرین، وەڵێ چارە چەس ئەڕا ئەوەێکە بتوانیم یەک جار ئەڕا هەویشە لە دەس ئی بێ هورمەتیە ڕزگارمان بووت و دی وە ناو اللە و وە ناو دین سێوڵمان نەتاشن و سەنگ سارمان نەکەن و شار وە دەرمان نەکەن؟

ئەگەر ئی اللە کە ڕژیم جمهوری ئسلامی پەێرەوێە و هەر ڕوژە وە ناو ئەو ئنسانەکان قەتڵ و ئام کەن، حکم دەێ کە من باێەد سێوڵ نەێاشتوم، چادر لە سەرم بوو، ڕیش و پەشم داشتوم و وە فەرمان ڕژیمەکەێ کە ڕژیم وەڵاێەت فقیە هەڵسۆ کەفت بکەم، نە پەرسمەێ و نە چەنە پەخشەێک ئەرزش ئەڕاێ دانەم. پەس بایم با ئەڕا لە بەین بردن ئی نزامە و ئی نمایندەێ اڵلەێ قەهارە لە سەرزەمین ئێران یەک دەس و یەک دەنگ هاوار بکەیم ئێران وە ئیوە تاڵوق نەێری، ئێران سەرزەوی کەسێکە کە دەم لە ئنسانیەت و بەرابەری دەێ. ئێران سەرزەوی ئنسانی و ئارامشە نە قەتڵ و جنایەت.

ئیستایچ ئنتسابات ریاست ڕژیم وڵاێەت فقیە ها ڕیوە ( وە ناو ڕیاسەت جمهوری)و تبق ماموڵ جیرە خوەرەکانێان کڵ کەنە ناو مەردوم کە ڕاێ وە کی بێەن وە کی نەێن! کام کاندید خزمەت کەێ و کام خراوە.مەردوەم شەرافەت مەند یارسان، ئەێ ئەو ئنسانگەڵە کە لە سیاچاڵەکان ڕژیمیچ ئارامش و ئاسایش نەیرین و بێ‌هورمەتی وە پیتان کریەت، باوەڕ وە هویچکام لەی مورەگەل ڕژیمە مەکەن، گشتێان چڵکاو خوەر وڵاێەت فقیەن و قەسەم خوەردەێ ئی نزامەنە.وە ئاشکارا و وە بانگ بەرز ئی ئنتساباتە تەحریم بکەن و نە وە کوڵ ڕژیم بویشن. من نە سەڵاحیەت ئەوە دێرم و نە هام لە مقامێک کە بتوانم وە کەسێک بویشم چە بکەێ و چە نەکەێ و خاسیچ زانم کە فشار چەنێ لە سەر مەردم یارسان فرەس وەڵێ وە باوەڕ ئیوە لەی بێ‌هورمەتیە گەورەتێر هەس کە وە پیمان بکریەت!؟ من وەتم فرە کەس یارسانی هەس کە سێوڵ تاشن و هویچێچ نەقومیاس وەڵێ تەنانەت نان خواردنیچ وە زور قەبوڵ ناکریەت، وە قەوڵ پێشەنان مەرگ یەک جار و شیوەن یەک جار.

جێ‌خوەێ دێرێ کە جوانەکان ئەمنیەت و ئاسایش ئەڕا مامورە چڵکاو خوەرەکان ڕژم نەیڵن، لە هەرکورە بەرخورد وە پێان کەن ئاسایش لە ڵێان بوڕن، ئیە نە تەنیا لە مەنتەقەێ یارسان نشین وە باوەڕم جێ دێرێ لە سەرتاسەر ئێران لە وەرانوەر مامورەکان ڕژیم مردوم ئی کارە بکەێ.

مەردوم شەریف یارسان:

ئەڕا ئەوێکە تەنانەت لە شۆن ڕمیان حکومەت اللە لە ئێران، جارێکتر بێ‌هورمەتی وە پیمان نەکەن و وە زور سێوڵمان نەتاشن و نەکەفیمە وەر هەڕەشە تەنیا یەک ڕی دیریم ئەویچ یەک دەنگی و یەک ڕێزیە.

شەرمەزار بۆو ئەو کەسگەڵە کە ناتوان و نایلن ئنسانەکان وە ئازادی و ئارامش و باب مەیل خوەێان ژیان بکەن.

ڕوح نیک مەرد تاهری شاد و داواێ شافاێ ئاجل کەم ئەڕا کەیومەرس

بشیر امیرخانی

7.6.2013