وڵامێکی کورت بۆ بەرێز کاک " هیوا گوڵ محەممەدی"

بابەتێک بە ناوی ” رێز گرتن و یادکردنەوەی شەهیدان پیرۆزە بەڵام! ” بە قەڵەمی بەرێز هیوا گوڵ محەممەدی رۆژی یەک شەممە ٢٠ی ئوکتۆبر لە ماڵپەری ” پێشمەرگەکان بڵاو کرایەوە و لەو بابەتەدا بەرێز گوڵ محەممەدی رەخنەی لە شێوازی یادکردنەوەی فەرماندەرانی شەهیدی حیزبی دێموکرات و بەتایبەت شەهیدان کاک شاپوور فیرووزی و کاک سالار ئیبراهیمی لە هەردوو کەناڵی تەلەفزیۆنی ” کورد کاناڵ” و ” تیشک تیڤی” گرتبوو .

بەر لە هەر شتێک پێم خۆشە ئەوە بڵێم کە هەرچی زیاتر رەخنە بگیردرێ لە پێناو باشتر رێزلێنان لە شەهیداندا ، هێشتا کەمە و بە گشتیش رەخنە لە هەموو بوارەکانی کار و باری رۆژانەمان و ژیاندا هەوێنی چاکسازی و بەرەو پێشەڤەچوونی نەتەوەکەمانە ، بەڵام پرسیار ئەوەیە کە رەخنە کێ دەبەی بیگرێ و پێوەرەکانی رەخنە گرتن چین و ئەو بنەما ئەخلاقی و زانستییانە کامانەن کە پێویستە مرۆڤی رەخنەگر ڕەچاویان بکات ؟

هەرچەند رەخنە گرتن لە هەموو لایەک مافی بێ ئەم لا و ئەولای هەموو تاکێکی کۆمەڵگاکەمان بە کاک هیواشەوەیە ، بەڵام ئاخۆ ئەو تاکانە هەموو لە یەک ڕوانگەی پیرۆز و ناخێکی دڵسۆزانەوە رەخنە دەگرن ، ئاخۆ مەبەستی سەرجەم رەخنەگران چاکسازییە یا خود شتێکیتریش هەیە کە لە بەرگی رەخنەدا روخساری خۆی دەنوێنێ ؟

ئێمە تاکەکانی کورد لە کۆمەڵگای کوردەواریدا لەگەڵ قەیرانی رەخنە بەرەورووین کە بەشێکیان بەرهەمی سیاسەتی تەسکی حیزبایەتین و بەرێکیشی بەرهەمی لەخوار بوونی ئاستی رەوشنبیری و نەبوونی زانیاری و تێک ترژانی هەموو بوارەکان بەسەر یەکدایە ، بۆ نموونە شاعیر سیاسەت دەکا و رۆژنامەوان شێعر دەنووسێ و گۆرانی بێژ نووسەری دەکات و سیاسی رەخنە دەگرێ و تا دوایی… . بەڵام ئاخۆ لە هەموو ئەوانەدا ئەو مرۆڤانە تا چەند راستگۆن لە گەڵ خۆیان و کارەکەیان و بە تایبەت رەخنە گران ؟

ئەوەی کە کاک هیوا گوڵ محەممەدی رەخنەی لێ گرتووە ، بە بروای من شتێک نییە بێجگە لە بێ نرخ کردنی بەرنامەی یاد و ریزی شەهیدان لەو دوو کاناڵە ،هەرچەند من نوێنەری ئەو دوو کاناڵە نیم هەروەک چۆن کاک هیوا-ش نوێنەری ئەو شەهیدانە نییە و ئەوە ئەوانن کە لە وڵامدانەوە و نەدانەوە سەربەستن ، بەڵام ئەوەی کە منی هێنایە سەر ئەو باوەرە کە پیویستە وڵامێکی کورت بۆ کاک هیوا بنووسم ، ئاوردانەوە لە مێژوویەکی نە چەندە کۆنە کە بەریزی پشکی شێری لەو بوارەدا بەر دەکەوێ .

لە کاتێکدا دوو کەناڵی تەلەفزیۆنی ” تیشک تیڤی ” و ” کوردکاناڵ” یادی شەهیدان دەکەنەوە کە ئامادەکاران و دەرهێنەر و نووسەر و پیشکەشکار و کامیرا و هەموو ئەو کەسانەی خۆیان بەو بەرنامەوە سەرقاڵ دەکەن ، لە هاورێیانی شەهیدانی حیزبی دێموکراتن و تا ئێستاش لەو سەنگەرەدا درێژە بە خەبات و تێکۆشان ئەدەن ، بێ گومان ئەو بەرنامەیەش وەک هەموو بەرنامەیەکیتر هەڵگری کەم و کوڕی و شایانی رەخنە لێ گرتنیشە ،بەڵام پرسیارەکە ئەوەیە کە بڵێی ئەو بەرێزانە هێندەی کاک هیوا کە پشتی لە شەهیدان و هاورێکانی و رێگا و رێبازیان کردووە و لە پشتی قەڵای خەلکیتر خۆی حرشار داوە ، دڵسۆز نەبن ؟ بڵێی ئەو شەهیدانە هێندە کە لای کاک هیوا نرخدارن ، لای ئەوان بێ نرخن بن ؟ وڵامی ئەو پرسیارانە بێ گومانە نەخێرە .

هێشتا چەند ساڵ بەسەر چۆڵکردنی سەنگەری کاک هیوا دا تێنەپەری بوو کە بەرێزی لە بەرنامەیی ئێوارەباش کوردستان رۆژی ٠٨- ١١- ٢٠٠٨ دا بە بزەی سەر لێو و بەڵێ قوربان بەڵێ قوربان بۆ جنێو و بێحورمەتییەکانی کابرایەکی قین لە دڵ و بێ رێز بە ناوی رەحیم لە سوئیسەوە بە شەهیدی فەرماندە کاک محەممەد عەلی پیرێژن گوێی شل کردبوو و قسەکانی تەسدیق دەکرد. ئەگەر کاک هیوا هێندە لە خەمی شەهیداندایە و شەهیدان بە ناسنامەی نەتەوەیی خۆی دەزانێ، ئەدی چۆن بوو لە بەرانبەر ئەو هەموو بێحورمتییەدا متەقی لێوە نەدەهات؟ ئایا شەهید محەممەدیش هاوسەنگەری کاک هیوا نەبوو؟ فەرماندە نەبوو؟ شەهیدی دێموکرات نەبوو ؟ ئایا بەرێز هیوا گوڵ محەممەدی جارێک لە جاران ئەو بوێرییەی تیا بوو کە داوای لێبوردن لە بنەماڵەی شەهیدان و خەڵکی کوردستان بکات ؟ بێ گومان نا!

لینکی بەرنامەکەی کاک هیوا.

…

لە کاتێکدا بەرێز گوڵ محەممەدی باس لە شەهیدانی کوردستان دەکا و خۆیان لێدەکاتە خاوەن ، کە جەنابی حاجی ئەحمەدی سەرۆکی کاک هیوا و باقی بەرپرسانی پەژاک بە رۆژانە هێرش دەکەنە سەر حیزبی دێموکرات و ئەوەی قسەی ناشرین و دوور لە ئەخلاقە بە هاوسەنگەرانی پێشووی کاک هیوای دەڵێن ، بەڵام جارێک لە جاران بەرێزی نەتەنیا بوێری ئەوەی نەبوو کە رەخنەیەک لەو بارەوە بگرێ ، بەڵکوو بە پێچەوانەوە بەشێکیش بوو لەو کردەوانە و سەکۆی “نەورۆز تیڤی”ی بە بەرێوەبەری جەنابی و جنێوی ئەوانیتر دەرازاندەوە ، خۆ ئەگەر بێینە سەر قسەکەی کاک هیوا و پێمان وابێ ئەو حیزبی دێموکراتە ، دێموکراتەکەی ساڵانی پێشوو نییە ، بەڵام خۆ شەهیدان هەمان شەهیدانەی ئەو ساڵانەن کە بەریزی لافی هاوسەنگەر بوونیانی پێوە لێ ئەدا و یەک لەوان دیسانەوە شەهید محەممەدی عەلی پیرێژن یەکێک لە فەرماندە ئازاکانی شنۆیە.

بۆ ئەوەی کە نە بەرێز کاک هیوا دڵی گەرد بگرێ و نە خوێنەریش تووشی سەر لێ شێواوی ببێ ، پێویستە بۆ بەرپەرچدانەوەی دلسۆزییەکانی کاک هیوا باس لە خاڵێکیتریشەوە بکەم .

بەرێز گوڵ محەممەدی باش ئاگادارە کە لە رۆژی ١٦ی ئاگوستی ئەمساڵدا و بە بۆنەی ساڵ رۆژی دامەزرانی حیزبی دێموکراتی کوردستانی ئێران ، کۆمەڵێک لە ئەندامان و پێشمەرگەکانی دێموکرات روویان کردە بناری قەندیل بۆ چوونە سەر گڵکۆی هاورێ شەهیدەکانیان ، بەڵام بە شێوازێکی زۆر ناشرین و دوور لە هەموو پرنسیبێکی ئەخلاقی و نەتەوەیی لە لایەن چەکدارەکانی پەژاکەوە ڕێیان پێ گیرا و تەنانەت یەکێک لە بەرپرسە باڵاکانی ئەو پارتەش پێیان دەڵێ :” برۆن ، قەندیل شوێنی فارس ، عەرەب و حیزبی دێموکرات نییە”.

….

پژاک رێگە بە ئەندامانی حیزبی دێموکرات نادا سەردانی گلکۆی پێشمەرگەکانیان بکەن

16 Aug 2013

مەگەر ئەو شەهیدانە ، هەمان ئەو شەهیدانە نەبوون کە جەنابیان شانازیان پیوە دەکات ؟ مەگەر ناڵێ کە مرۆڤی شەهید ، شەهیدی کوردستانە ؟ ئەدی بۆ بەریزی کە شەهیدانی کوردستانی هێندە لا پیرۆزە ، هیج متەقی لێوە نەهات و هێندەی بوێری نیشان نەدا کە بە لانی کەمەوە تکا بکات با وازیان لێ بێنن و بتوانن بە ئازادانە ئەندامانی ئەو حیزبە سەردانی گۆڕی شەهیدان بکەن ، خاوێنیان بکەنەوە و گوڵیان لەسەر بنێژن ؟

راستییەکەی ئەوەیە کە بەرێز گوڵ محەممەدی و هاورێکانی خەمی ئەو شەهیدانەیان نییە ، بەڵکوو بە پێچوانەوە و لە پشت قەڵای خەڵکیترەوە سەنگەریان لەو شەهیدانەوە و رێگا و رێبازیان گرتووە . دەنا ئەگەر ئامانج باشتر رێز گرتن لە شەهیدان بێ ، با لە خۆیانەوە دەست پێ بکەن و بە لانی کەمەوە ئەوان لە خەڵکیتر باشتر ریز لە شەهیدان بگرن و ئیزن نەدەن بێ حورمەتی بە شەهیدانی کوردستان بکرێ.

ئاراس چۆمانی

کوردستان

٢١-١٠- ٢٠١٣