ڕۆژی شەممە ڕێکەوتی ٣٠،١،٢٠١٦ بە بۆنەی یادی ٧٠ ساڵەی دامەزرانی کۆماری کوردستان لە لایەن حیزبی دیموکراتی کوردستانی ئێران کومیتەی ئوتریش لە شاری ویەن
ئاهەنگێک بە بەشداری زیاتر لە ٣٠٠ کەس لە کوردەکانی هەموو بەشەکانی کوردستان و هاووڵاتی ئوتریشیەوە بەڕێوە چوو.
بەرنامەکە بە بەخێرهاتنی میوانان و ڕاگەیاندنی پرۆگرامی ڕێوڕەسمەکە لە لایەن کاک حوسەین خاڵخاڵ ئەندامی کومیتەی حیزبەوە دەستی پێکرد ، پاشان سرودی نیشتمانی ئەی ڕەقیب و خولەکێک بێدەنگی بۆ ڕێزگرتن لە گیانی پاکی شەهیدانی کورد و کوردستان ڕاگەیەندرا. لە لایەن بەرپرسی کومیتەی حیزب کاک جەزا ساڵحییەوە سەبارەت بە دەسکەوتەکانی کۆماری کوردستان، سیاسەتی دەست تێوەردان و پاوانخوازانەی کۆماری ئیسلامی لە ناوچەی ڕۆژهەڵاتی ناوەڕاست و هۆی بایکۆت کردنی هەڵبژاردنەکانی پارلمانی ئێران لە لایەن حیزبی دیموکراتی کوردستانی ئێرانەوە وتارێک پێشکەش کرا.
ئاهەنگەکە بە گۆرانی گۆرانیبێژانی دەنگ خۆش خاتون سۆزان ماجید ، کاک هەژار عومەر میراو و کاک چۆمان ڕەشید و موسیقای ژەنیارانی بە توانا کاک شازاد جەزا ، کاک ئامانج عەلی و کاک فاروق و شادی و هەڵپەڕکێی بەشدارانی ڕێوڕەسمەکەوە درێژەی پێدرا و لە سەعاتی یەکی شەو بە سەرکەوتنەوە کۆتایی پێ هات.
شایانی باسە نوێنەری حیزب و ڕێکخراوە کوردستانیەکانیش لە سەر بانگێشتنی کومیتەی حیزب لە ئوتریش لە ئاهەنگەکەدا بەشدار بوون و پەیامی پیرۆزباییان پێشکەش بە کومیتەی حیزب کرد، ئێمەش لە لایەن کومیتەی حیزبەوە زۆریان سوپاس دەکەین و سوپاسی هەموو بەشدارانی ئاهەنگەکە و بە تایبەت ئەوانەی کە لە بەڕێوەچوونی ئاهەنگەکەدا هاوکار و یارمەتیدەرمان بوون دەکەین.
حیزب و ڕێکخراوە کانی بەشدار ئەمانەی خوارەوە بوون:
١–پارتی دیموکراتی کوردستان
٢–یەکیەتی نیشتمانی کوردستان
٣– ئەنجومەنی بزوتنەوەی گۆڕان
٤–حیزبی شوعی کوردستان
٥–پارتی دیموکراتی کوردستانی- سوریە
٦–حیزبی شوعی عێراق
٧–مەڵبەندی کوردی لە ئوتریش
حیزبی دیموکراتی کوردستانی ئێران کومیتەی ئوتریش
٣٠،١،٢٠١٦
