بەشداری لە یادی ٥٩ هەمین ساڵی دامەزرانی پارتی دیموکراتی کوردستان لە سوریە

ڕۆژی شەممە بەرواری ٢.٧.٢٠١٦ لە لایەن کومیتەی ئوتریشی حیزبی دیموکراتی کوردستانی ئێرانەوە هەیئەتێک لە شاری ویەن بەشداری لە یادی ٥٩ ساڵەی دامەزرانی پارتی دیموکراتی کوردستان لە سوریە کرد .

لەم یادەدا  بەشێک لە حیزبە کوردستانیەکان وسەدان کوردی هەمو بەشەکانی کوردستان بەشداربوون .

بەڕێوەبەری بەرنامەکە هەر لە سەرەتای دەست پێ کردنی قسەکانیدا و پاش بە خێرهێنانی میوانان و ڕێکخراوە کوردستانیەکان زۆر بە حەماسەتەوە باسی دەست پێ کردنەوەی خەباتی چەکداری لە ڕۆژهەڵاتی کوردستان کرد ، رێزی لە خەباتی بوێرانەی پێشمەرگە گیان لە سەر دەستەکانی حیزبی دیموکراتی کوردستانی ئێران گرت و سەرەڕای سەرەخۆشی بە بۆنەی پێشمەرگە شەهیدەکانەوە هەڕەشەکانی ئەم دواییانەی کۆماری ئیسلامی ئیرانی بە توندی شەرمەزار کرد. ئێمە وەک کومیتەی حیزب لە وڵاتی ئوتریش ئەم هەڵویستە نیشتمانپەروەرانە و بوێرانەی پارتی دیموکراتی کوردستان لە سوریە بەرز دەنرخێنین و سوپاسیان دەکەین و دڵنیایان دەکەینەوە کە ئەم شێوە هەڵویست گرتنە لە بەرانبەر ملهوڕی دوژمنانی گەلەکەماندا شۆڕشی کورد بەهێز دەکات و لەمپەرێکی بە هێز دەبێت  لە بەرانبەر سەرەڕۆیی دوژمنان دا .

 کاک دلاوەر هەنارە یەکێک لە ئەندامانی حیزب بە ناوی کومیتەی حیزبی دیموکراتی کوردستانی ئێرانەوە لە ئوتریش پیرۆزبایی یادی ٥٩ ساڵەی دامەزرانی پارتی دیموکراتی کوردستانی لە سوریە لە هەموو ئەندامان و لایەنگرانی ئەو حیزبە کرد وپاش داوای سەرکەوتن بۆ خەباتی کوردستانی ڕۆژئاوا بە بۆنەی باگێشتن کردنی کومیتەی حیزبەوە بو ڕێ و ڕەسمەکە سوپاسی کردن.

 وتاریک لە لایەن نوێنەری پارتی دیموکراتی کوردستان لە  سوریە لە سەر مێژووی پارتەکەیان  و ئاڵ و گۆڕەکانی ڕۆژئاوای کوردستان  و چۆنیەتی هەڵس و کەوتی دەسەڵات بە دەستان لە گەڵ هاووڵاتیانی کورد پێشکەش کراو و ڕێ و ڕەسمەکە  بە بەشداری گۆرانی بێژان سەعید یوسف،  حکەمت حاجی و شاهیبان عەفرین و شادی و هەڵپەڕکێی بەشداران تا دەرنگانی شەو درێژە کێشا.

بە ناوی کومیتەی حیزبی دیموکراتی کوردستانی ئێرانەوە  لە ئوتریش  جارێکی تر سوپاسی هەستی شۆڕشگێڕانەیان بۆ پێشمەرگەکانی ڕۆژهەڵاتی کوردستان و دەربڕینی هاودەردییان بە بۆنەی پێشمەرگە شەهیدەکانەوە دەکەین و سەرکەوتن بۆ حیزب و شۆڕشەکەیان بە ئاوات ئەخوازین.

 

حیزبی دیموکراتی کوردستانی ئێران کومیتەی ئوتریش

٢.٧.٢٠١٦