ئەمن بە بۆنەی ڕۆژی زمانی دایک ڕێز وخۆشەویستیم پێشکەشی گشت زمانەکانی سەر گۆی زەوی دەکەم و ئاواتە خوازم ھەموو زمان و زاراوەیەکی ئەم دنیایە پارێزراو بن
و پەرەیان پێبدرێ و گەشە بکەن و ھیوادارم پارێزەران و لێکۆرەوانێی زمانی دایک ھەردەم لەش ساغ و دوور لە کەند وکۆسپ بن بۆ زیاتر ناساندنی نرخ و گرینگی و کەڵک و قازانجەکانی زمانی دایک.
توڕەم و لە ناخەوە گلەیی و گازەندەم لە پارێزەرانی نێودەوڵەتیی زمانی دایک ھەیە کە تا ئێستا نەیانتوانیوە سکاڵایەکی پێداگرانە لە دادگای نێودەوڵەتی لەو ڕژێمانە بکەن کە ھەم بوونەتە ھۆی تۆانەوەی ئەو زمان و زاراونەی کە ھەبوون و نیزیک لە ناوچونی بە تەواوەتین و ھەم ئەو زمانانەی کە تا ئێستاش نایەڵن پێی بخوێنن و بنووسن وپەرەیان پێبدەن .
جا بۆیە لێرەدا جێی خۆیەتی دەست و قەڵمی تێکڕای نوسەر و ئەدیب و شاعیر و کەسایەتییانە ماچ کەم کە لە کوردستان نایەڵین زمانی کوردی لە ناو بچی و بگرە قوربانیشی لە پێناو دەدەن.
داگیرکەرانی کوردستان ھەمێشە بونەتە لەمپەرێکی بە ھێز و دڕەندەیەکی بێ ھاوتا بۆ سەر زمان وکلتور وفەرھەنگ و خاکی کوردستان و چاویان بە بوونی نەتەوەی کورد ھەڵنایێ و نەتەوەکانی فارس وتورک و عەرەبیش مخابن بە درێژایی مێژوو مخابن بێجگە ھێندێکی زۆر کەمی نوسەر و زانای ئەو نەتەوانە ھەرگیز جارەکی نە پرسیاریان لە خۆیان کرد و نە حکومەتەکانیشیان کە بۆ چی مافە فەرھەنگی وکۆمەڵاتیەکانی نەتەوەکانیتر سەرکوت دەکەن؟
تەنیا دەبی زمانی فارسی و عەرەبی و تورکی زمانی رەسمی بێت. زمانەکانی دی دەبی کفن ودفن بکرێن.
ھەر بۆیە کوردێکی وەک منیش بڕوای وایە ئەم دنیایە بە ھەموو ڕەنگ ودەنگ و بەرگێکەوە رەسەن وجوان و بێ کەم وکوڕیی و تەواوکار ی یەکترین و ئەگەر وانەبی . مرۆڤەکان پێشێلی تەواوی بەھای مرۆڤایەتیان کردوە و ئەم دنیایە جێی ھەموو بوونەوەرێکە و مرۆڤیش کە گیانلەبەرێکی بە بیرە، دەبی ویژدان وئەخلاقی مرۆڤایەتیش وەکو بناخەیکی نەگۆڕ وھەڵچنین و فراوان کردنی ئازادی بۆ گەشە سەندەنی ھەموو بوارەکانی مافی مرۆڤ و نەتەوایەتییەکان لە بیر بی و بۆی تێبکۆشێ..، نەک وەک ئەو ڕۆی کە بێجگە لە داپڵۆسیینی مرۆڤایەتی ،ھیچ ھونەرێکی دیکە لەو دەوڵەتانە بەدیی ناکەی .
جارێکی دیکە پیرۆزبایی ڕۆژی زمانی دایک لە کۆمەڵگای مرۆڤایەتی دەکەم و ئاواتە خوازم ھیچ زمانێک لەم دنیایە دا ویشک نەکرێ و پاراو و پڕ پیت بێ لە ڕەسەنایەتی نەکەویێ.
حەمە حەریری
20.02.2718 کوردی