ڕۆژی چوار شەممە رێكەوتی ٣ی بەفرانباری ١٣٩٣ی هەتاوی بەرانبەر بە٢٤ی دێسامبری٢٠١٤ی زایینی، کومیتەی حیزبی دیموکراتی کوردستان ئێران لە شاری کارلستادی وڵاتی سوید
بۆ بەرز و پیرۆز ڕاگرتنی ٢٦ی سەرماوەز ڕۆژی پێشمەرگەی کوردستان، سیمینارێكی بۆ بەڕێز کاک ” عەلی پاڵانی”بە بەشداری ھەژمارێكی بەرچاو لە ئەندامان و دۆستانی حیزبی دیموکرات و نوێنەری حیزب و ڕێکخراوەکان لەو شارە پێک هێنا.
سەرەتای سیمینارەکە بە خولەکێک بێ دەنگی بۆ رێزگرتن لە گیانی پاکی شەهیدان دەستی پێ کرد. دواتر بەڕێز ”حەمید سەرمەستی” خێرهاتنی ئامادە بووان، نوێنەرانی حیزب و ڕێکخراوەکانی ئەو دەڤەرەی کرد و ئاماژەی بە شێوەی بەڕێوەبردنی سیمینارەکە کرد.
پاشان بەڕێز کاک ” ئاسۆ پاڵانی” بەرپرسی کومیتەی حیزب لە شاری کارلستاد پەیامی کومیتەی بە بۆنەی ٢٦ی سەرماوەز ڕۆژی پێشمەرگەی کوردستان خوێندەوە.
دواتر برووسکەی پیرۆزبایی کومیتەکانی لاوان،ژنان و یەکییەتی کوردانی ئەو شارە لە لایەن بەڕێوەبەری سیمینار پێشکەش کرا.
لە نێو ئاخنی بەرنامەکەدا دوو پارچە هۆنراوە بە بۆنەی ٢٦ی سەرماوەز، لە لایەن بەڕێزان کاک ” موحەممەد جافی” و خاتوو ” کلسوم بەرزەکاو” خوێندرایەوە.
لە بەشێکی دیکەی ڕێوڕەسمەکەدا چەند وتەیەک لە لایەن خاتوو ” حیدە”وە بە بۆنەی ٢٦ی سەرماوەز پێشکەش کرا.
لە بەشی کۆتایی سیمینارەکەدا کە تەرخان کرا بوو بۆ کۆڕگێڕ، بەڕێز کاک ” عەلی پالانی” بە کورتە باسێک لەسەر پێشمەرگە و ناوی پیرۆزی پێشمەرگەی کوردستان دەستی پێکرد.
ناوبراو لە درێژەی قسەكانیدا، ئاماژەی بە باردۆخی ھەستیاری ڕۆژهەڵاتی ناوین و ناوچەکە بەگشتی و كوردستان بەتایبەتی كرد و گوتی نەتەوەی كورد بۆ گەیشتن بە ئامانجەكانی پێویستی بە یەكگرتن و یەک دەنگی ھەیە، بۆ گەیشتن بەو ڕۆژە، ئەركی سەرشانی ھێزە كوردییەكانە كە ئەو یەک دەنگی و یەكگرتنە دروست بكەن.
بەڕێز پاڵانی لە بەشێکی دیکەی قسەکانیدا تیشکی خستە سەر چاونەترسی و لێهاتووی هێزی پێشمەرگەی کوردستان و ڕۆڵی پێشمەرگە و شەڕڤانانی کورد بەرانبەر بە داگیرکەران و هەروەها هێرشی دڕندانەی ڕێکخراوی تیرۆریستی دەوڵەتی ئیسلامی عێراق و شام ” داعش ” بۆ سەر خاکی پیرۆزی کوردستان.
حیزبی دیموکرات کوردستانی ئێران ـ کارلستاد
٢٤ ـ ١٢ ـ ٢٠١٤