نیشتمان ئەو خاکەی کە لێوەی هاتووین و تێدا گەورەبووین و تێدا فێربووین هەمان ئەو بوونە پیرۆزەیە کە پێی دەڵێن شەرەف!
ئەوەش کە وشەی نامووس و شەرەف دەخەنە پاڵ یەک لە بەر ئەوەیە کە نیشتمان دایکی ئەو خەڵکەیە کە لە باوەشی ئەودا گەورەبوون و پێگەیشتوون و لە گەورەیشدا دەبینین کە خزمەتی دایکی خۆیان نیشتمان دەکەن هەر وەک چۆن مرۆڤیش دەبێ خزمەتی دایکی بکات بە تایبەتیش لە کاتێکدا کە پێگەیشتووە و دایکیش رێک لەو تەمەنە پیرییەدا پێویستی بە رۆڵەکەی خۆی هەیە!
بەتەمۆدانی دوو چەمکی نیشتمان و دایک لە گەڵ شەرەف لە راستیدا یەک واتای بە ناوەرۆک لە خۆدەگرێت کە ئەویش هەمان نیشتمانە کە تەنانەت دایک بۆ خۆیشی تێدا پەروەردە بووە و ئەویش هەمان رۆڵەکەی ئەو نیشتمانە پیرۆزەیە کە رۆڵەکانی خۆی بۆ پەروردە دەکات بۆ ئەوەی خزمەتی دایکیان نیشتمان بکەن!
کەسێک کە نیشتمانی نەبێت بەڕاستی هیچی نییە! نیشتمانە کە دەبێ بە شەرەف بۆ رۆڵەکانی و خاوەندارەتی لە رۆڵەکانی دەکات و لە هەموو شەتە و نەخۆشی و شەڕ و دۆژمنایەتییەک دەیپارێزێت!
بۆ بەرچاوڕوونی لە فەلسەفەی شەرەف هەر ئەوە بەسە کە بێ نیشتمان خاوەنی هیچ شتێکی خۆی نییە و هەر بۆیە شەرەف نیشتمانە و ئەو کەسەی کە نیشتمانی هەیە لە گەڵ ئەو کەسەی کە بێ نیشتمانە لە کۆمەڵگەدا وەک یەک وەرناگیرێن واتە ئامانجی مرۆڤە خاوەن نیشتمانەکان سەربەرزی نیشتمانەکەیانە کە ماناکەی ئەوەیە بە بوونی ئەو نیشتمانەیە کە تاکەکان ماڵ و گیان و بوونیان دەپارێزرێت!
کاکڵەی دەقەکەم ئەوەیە کە ژنیش نیشتمانی رۆڵەکانی خۆیەتی لە هەمان کاتدا ژن و پیاو و کوڕ و کچی ئەو نیشتمانە هەر هەموویان بە یەکەوە رۆڵەی یەک نیشتمانن کە نیشتمان وەک دایک رۆڵەکانی خۆی لە باوەشی خۆیدا دەپارێزێت!
ئامانج لە دەقی نووسینەکەم لەڕاستیدا ئەوەیە کە شەرەف تەنیا بۆ نیشتمان بە کار ببەن و ئیتر شەرەف نابێ ببێ بە وشەی سووک و یەکتری پێ سووک بکەن!
لە هەموو وڵاتێک تاکی خراپ بوونی هەیە بەڵام ئەو جۆرە کەسانە بۆ خۆیان لەوانەیە خراپ بن بەڵام خۆ دژی نیشتمانەکەی خۆیان نین کە وابوو ئەویش شەرەفی هەیە واتە نیشتمانی هەیە!
نیشتمان هەموو بوونێکی ئێمەیە ئەوەی کە نیشتمانی نەبێ هیچی نییە!
شەرەف نیشتمانە!
ڕەوف گوڵبەدەن