بەڵگەی نهێنی: ئێران سەدان ملیۆن دۆلار بۆ حزبوڵا و جیهادی ئیسلامی تەرخان دەكا .

هاوار بازیان/ بەپێی بەڵگەنامەیەكی هەستیار و گرینگ كە لێرەدا ئاشكرا دەكرێ و مۆری “زۆر نهێنی” پێوەیە، بەرزترین ناوەندی بڕیاردانی كۆماری ئیسلامیی ئێران كە هەمان نووسینگەی عەلی ئەكبەر خامنەیییە بەڕەسمی بڕیاری پێدانی هاوكاریی دارایی بە رێكخراوەكانی ئیسلامیی فەلەستینی و لبنانی و لەوانە حزبوڵای لبنان،

حەماس و جیهادی ئیسلامی دراوە و داوا لە بەرپرسانی جێبەجێكار دەكرێ ئەو ئەركە بەرێوە ببەن. ئەوە لە كاتێكدا ئەو رێكخراوانە بەتایبەت حزبوڵای لبنان لە ئاستی هەرێمی و ناودەوڵەتیدا چەندان تۆمەتی “تیرۆریستی”یان لەسەرە. جگە لەوەی بەردەوام ئاماژە بە تێكەڵبوونی حزبوڵا و بەرگریكردنی لە حكوومەتی بەشار ئەسەد لەسەر راسپاردەی بەرپرسانی ئێران دەكرێ و ئێران بەردەوام رەتی دەكاتەوە لەو رووداوانەدا دەستی هەبووبێ، هەروەها لە دوا پێشهاتدا گەورە بەرپرسانی سەربازیی ئێرانی بە فەرمی رایانگەیاندووە كە شەڕی سووریا بە شەڕی خۆیان دەزانن و لەو پرسەدا حسێبێكی زۆری سەربازی و ئەمنیان لەسەر حزبوڵا كردووە.

دەقی بەڵگەنامەكە لە فارسییەوە بۆ كوردی:

ژمارەی نامە: 6-205 – 79م.س

رێككەوت: 12/11/1379

هاوپێچ: نییە

لە: سەرۆكایەتیی هەواڵگریی نووسینگەی رێبەری

بۆ: بەڕێوەبەری گشتی لە هۆبەی 110

بابەت: رەزامەندی لەسەر بودجەی داواكراو

بەڕێز جەنابی حەدادیان{jcomments off}

وێڕای سڵاو و هیوای باشبوون و سەركەوتنی بەردوام بۆ مسوڵمانان و گەلی چەوساوە و زوڵم لێكراوی فەلەستین.

بەپێی ئەو نووسراوەیە ئاگەدارتان دەكەینەوە كە پاش ئەوەی ناوەندەكەمان بەشێوەیەكی ورد بە دواداچوون و لێكۆڵینەوە لە داواكاریی ئەو بودجەیە كرد كە چەندان جار داوا كرابوو، بۆچوون و تێڕوانینەكانتان بۆ گرینگیی سەرخستنی ئەو داوایە لەلایەن رێبەری باڵاوە پەسند كرا و بڕیار درا بەوەی تا كۆتای ساڵی 1380 /2001/ بڕی 280 ملیۆن دۆلار وەك هاوكاریی دارایی بۆ دابینكردنی پێداویستییە سەربازییە هاوبەشەكانی رێكخراوەكانی حزبوڵای لبنان، حەماس و جیهادی ئیسلامی بەو رێكخراوانە بدرێ تا كاروبارە سەربازییەكانیانی پێ جێبەجێ بكەن.

جێگەی ئاماژەیە، بۆ راپەڕاندنی ئەو ئەركە پێویستە رەچاوی هەموو لایەنی ئەمنی و خۆپارێزی بكەن و وەك جارانی پێشوو بەهاكاریی لایەنەكانی تری پێوەندار و نوێنەری تایبەتی حزبوڵا لە تاران ئەو ئەركە پیرۆزە جێبەجێ بكەن و دیسان هاوكار بن.

عەلی ئەكبەر ناتقی نووری

سەرۆكی هەواڵگریی نووسینگەی رێبەری

12/11/1379 هەتاوی