بانگەوازی ژمارە ٣ی مانگرتنی ٢٧ی خەزەڵوەر بڵاو کرایەوە

بە پێی هەواڵدێری ئاژانسی کوردبا ئەمرۆ چوارشەممە لیژنەی بەرێوەبەریی بانگەوازی ٢٧ی خەزەلوەر بۆ پشتیوانی لە زیندانیانی سیاسی مەحکووم بە ئێعدامی ناو زیندانەکانی کۆماری ئیسلامی  لە بانگەوازێکدا  روو بە جەماوەری کوردستان ، چالاکانی سیاسی، حیزب و رێکخراوە سیاسییەکان داوایی پشتیوانی بەرینتریان لەو بانگەوازە کردووە .

لەو بانگەوازەدا هاتووە لە کاتێکدا کە دونیای ئەمرۆ بەرەو نەمانی حوکمی ئێعدام لە هەموو سیستمە دادپەروەرەکاندا پێهەڵدێنێتەوە و تەنانەت لە ئێعدام و کوشتنی تاوانبارانی کۆمەڵکوژیش خۆ دەبوێرێن ، لە وڵاتی ئێمە زیاتر لە ٢٧ رۆڵەی چالاک و تێکۆشەر بە بێ ئەوەی هیچ تاوانێکیان کردبێ حوکمی ئێعدامیان بەسەردا سەپاوە ، هەر بۆیە ئەرکی هەموو لایەکە بە هەر جۆرێک بۆیان دەکرێ نارەزایەتی خۆیان دەر ببڕن ، سەردانی بنەماڵەی زیندانیانی سیاسی بکەن و ئەمەگناسی خۆیان لە خەباتکار و تێکۆشەرانی گەلەکەیان دەرببڕن و بەو کارە رێگڕبن لە جێبەجێ کردنی  ئەو حوکمە نامرۆێانەی بەسەر زیندانیانی سیاسی کوردا سەپاوە .

فەرموون لە گەڵ دەقی تەواوی بانگەوازەکە .

هاونیشتمانیانی بەرێز

چالاکانی سیاسی و مەدەنی

ئەحزاب و رێکخراوەکانی کوردستان

لە هەلومەرجێکدا کە دونیا بەرەو لەناو بردنی یەکجاری حوکمی ئێعدام لە هەموو سیستمە دادپەروەریەکاندا دەچێ و لە کاتێکدا کە وڵاتانی دیکە تەنانەت لە ئێعدام و کوشتنی تۆمەتبارانی کۆمەڵ کوژی خۆدەبوێرن ، زیاتر لە ٢٧ کەس لە بەنرخترین و چالاکترین رۆڵەکانی کورد لە ئێراندا بەبێ ئەوەی تاوانەکانیان ( تەنانەت بە پێی قانوونی خودی ئێران ) سەلما بێت کە لەگەڵ حوکمی نامرۆیانەی ئێعدام بەرەوروون و لەناو بێدەنگیی ئێمە و رێکخراوانی مافی مرۆڤ و میدیا ئازادەکاندا رۆژ لە دوای رۆژ بە ئان و ساتی ئەو کارەساتە نزدیک دەبنەوە و بەبێ ئەوەی کەمترین بەرگرییەکیان لێ بکرێت خەریکە دەنگی بوێر و ئازادیخوازان بۆ هەمیشە کپ بکرێتەوە .

دیارە جێبەجێ بوونی ئەو حوکمانە خەسارێکی جیدی و کارەساتێکی قەرەبوونەکراوە بۆ جەستەی کۆمەڵگای کوردی . هەر بۆیە داوا لە حیزب و رێکخراوە مەدەنییەکان لە ناو یان لە دەرەوەی کوردستان دەکەین کە بە لەبەرچاو گرتنی ئەرکی خۆیان و هەروەها گرینگی دان بە دۆخی هەستیاری زیندانیانی سیاسی ، هەلوێستی خۆیان بەرانبەر بەورووداوە دەرببڕن و هەموو هەولی خۆیان بۆ پشتگیری لەو زیندانییە سیاسیانەی کە حوکمی ئێعدامیان بەسەردا سەپاوە بخەنە گەڕ .

هەروەها داوا لە چالاکانی مەدەنی ، خوێندکاران و هەموو توێژەکانی کۆمەڵگا دەکەین کە لە رۆژی ٢٧ خەزەڵوەر وەک رۆژی بەرگری لە زیندانیانی سیاسی بە هەموو شێوەیەک نارەزایەتی خۆیان لە حوکمی ئێعدامی ئەو زیندانی سیاسیانە دەرببڕن و لە رێگای سەردانی بنەمالەی زیندانییەکان و هەروەها بە کەڵک وەرگرتن لە شێوازە جۆراوجۆرەکانی خەباتی مەدەنی هەم هێمنی و هیوای ئەو دایک و باوکانە بن کە رۆڵە بێتاوانەکانیان لە ژێر پەتی سێدارەدان و هەم ئەمەگناسی خۆیان بەرانبەر بە تێکۆشەرانی گەلەکەیان دەرببڕن .

لیژنەی بەرێوەبەری بانگەوازی ٢٧ی خەزەڵوەر

٢٤/٨/٢٧١٢کوردی بەرانبەر لەگەڵ ١٤/١١/٢٠١٢

سەرچاوە ئاژانسی کوردبا