له‌ مه‌ڕ هه‌ڕه‌شه‌نامه‌که‌ی ئه‌مجاره‌ و جاره‌کانی پێشووی پژاک ! حوسەین ئەحمەدپوور

1: عه‌قڵیه‌تێک که‌ هه‌ڕه‌شه‌ له‌ 10 به‌کارهێنه‌ری فه‌یسبووکی بکا به‌ تاوانی ره‌خنه‌گرتن و به‌ جاسووسی بۆ داگیرکه‌ر تاوانباریان بکا.

ئه‌و عه‌قڵیه‌ته‌ به‌ دڵنیاییه‌وه‌ نه‌ به‌ که‌ڵکی خه‌بات کردن له‌ پێناوی رزگاری نیشتمانی دێ له‌ کۆمه‌ڵگای رۆژهه‌ڵاتی کوردستان که‌ کۆمه‌ڵگایه‌کی به‌ ته‌واو مانا پلۆراله‌، نه‌ ئازادی لێ شین ده‌بێ و نه‌ ده‌توانێ ئالتێرناتیڤی هیچ هێزێکی کلاسیک بێ وه‌ک خۆیان بانگه‌شه‌ی بۆ ده‌که‌ن.

2: میلله‌تێک که‌ حیزبه‌ سیاسییه‌کانی، به‌شێک له‌ نووسه‌رانی ره‌خنه‌گری، به‌شێک له‌ چالاکانی سیاسی و مه‌ده‌نییه‌که‌ی و ته‌نانه‌ت په‌نابه‌ره‌کانی له‌ ئه‌مریکا و ئورووپا له‌ دژی بزووتنه‌وه‌ی وڵاته‌که‌ی خۆیان جاسووسی بکه‌ن، ئه‌وا ئه‌و میلله‌ته‌ یه‌که‌م، لایقی رزگاری و خۆ بۆ به‌کوشتدانی نیه‌ و دووه‌م، ئه‌و میلله‌ته‌ به‌ هیزێکی هه‌زار چه‌کداری رزگار نابێ. ئه‌وکات ئێوه‌ له‌خۆڕا زه‌حمه‌ت ده‌کێشن. ئه‌و کات ده‌بێ به‌ جێگه‌ی هه‌ڕه‌شه‌ و کووشتن، کاری فه‌رهه‌نگی بکه‌ن و ئه‌و میلله‌ته‌ نا وشیاره‌ وشیار بکه‌نه‌وه‌ و ئاماده‌ی شۆڕشیان بکه‌ن. که‌ واته‌ رێگه‌یه‌کی هه‌ڵه‌تان گرتۆته‌ به‌ر.
3: به‌م هه‌ڕه‌شه‌ و به‌ جاسووس ناوبردنی ره‌خنه‌گرانتان یه‌ک کاری زۆر باشتان کرد که‌ جێگه‌ی ده‌ستخۆشییه‌، ئه‌ویش ئه‌وه‌یه‌ که‌ زۆر زوو خۆتان ئاشکرا کرد. خۆتان ئاشکرا کرد که‌ له‌ داهاتوودا ده‌توانن کوردستان بکه‌نه‌ چ به‌ندیخانه‌یه‌ک! ده‌توانن چه‌نده‌ مه‌ترسیدار بن بۆ سه‌ر ئازادییه‌کانی خه‌ڵک! خۆتان ئاشکرا کرد به‌ رووی ئه‌و خه‌ڵکه‌دا که‌ وشیارن و ده‌توانن هێزه‌ دژه‌ ئازادییه‌کان بخوێننه‌وه‌ و بیانناسن. خۆتان ئاشکرا کرد که‌ کۆمه‌ڵگای رۆژهه‌لاتی کوردستانتان نه‌ناسیوه‌ که‌ لانیکه‌م له‌ چاو به‌شه‌کانی دیکه‌ی کوردستان له‌ یه‌ک رووه‌وه‌ له‌ پێشتره‌ ئه‌ویش ئه‌وه‌یه‌ خه‌ڵکه‌که‌ی خوێنده‌وارترن.
4: به‌م هه‌ڕه‌شه‌ و گوڕه‌شانه‌ ئاشکراتان کرد که‌ هیچتان به‌ کلتووری سیاسی کورد زیاد نه‌کردووه‌ و هه‌ر له‌ داوای هه‌ڵه‌کانی رابردوودا گیرتان کردوه‌، هه‌ڵه‌ی براکوژی و سڕینه‌وه‌ی فیزیکی یه‌کتر. به‌ڕێزانی پژاک پێمان ناڵێن که‌ میلله‌ت به‌م عه‌قڵییه‌ت و کلتووره‌ چۆن رززگار ده‌بێ؟{jcomments off}