یــــــاد، ئاکۆ ئەلیاسی

ئەمشەو یادێک دەمهەژێنێ    

پڕاوپڕ لە تاسە و خۆزگە،    

ئەو خۆزگانەی کە تاسان و ئەوین  قومێک ئاوی نەکرد بەسەر لێویان،

وەکوو پەل و پۆی درەختێک… پاییز پرچ و سەری ڕنی…

شەماڵ سەمای پێ کردن و

بوون بە سۆمای نێو گلێنەی چاوەڕوانی،

وەک پەپوولە لەگوڵ تاران،

بەهار هەرگیز باوەشی بۆ نەکردنەوە…

و

بۆ تا هەتا

لە نێو پێلووی خەون و وەنەوز….

بێناز نێژران!

ئەمشەو خەمێک دەمهەژێنێ

رۆژژمێری دڵە ترپەی تەمەنی نێو هیجرەتم

بۆ

ئەخوێنێتۆ

خەمی ماچە یاقووتییەکان …

ماچەکانی نێو تاراوگە …

ئەو ماچانەی،

وەکوو نزا و لاڵانەوە ….

بەسەر خونچەی لێوێکەوە بڤە بوون و

لە سێبەری تاریکایی

لە دار دران!

{jcomments off}