نەوەکانی داهاتوو، لە یەکەمین چرکەساتی بەهاری تەمەنیاندا،
بۆ وەڵامی پرسیارە مەزنەکانی بوون، هاواریان کرد:
کوانێ ئەو بیروباوەڕ و ئاواتە گەشانەی،
کە خولیای ژیانیان لە ناخی مرۆڤدا دەچاند؟
کوانێ ئەو ئەوین و ئازایەتییە بێپایانەی،
کە دەبووە مەشخەڵی ڕێگای تەمەن،
و تاریکستانی شەوەزەنگی ڕۆشن دەکردەوە؟
کوانێ ئەو وانە و دانایییە قووڵەی،
کە سەرچاوەی پاراستنی تەواوی بوون بوو لەسەر ئەم هەسارەیە،
و هەموو شتێکی پێ ئاڕاستە دەکرایەوە و بنیاد دەنرایەوە؟
کوانێ شادەمارەکانی ژیان؟
ئەو ڕووبارانەی دڵی زەوییان پێ لێ دەدا،
و ئەو خاکە بەپیت و دەوڵەمەندەی،
کە وەک فەرشێکی زەمەروودین،
بە هەزاران ڕەنگی ژیان دەخشێنرا؟
کوانێ چیا سەرکەشەکان، دۆڵە قووڵەکان و لووتکە تەمگرتووەکان؟
ئەو بووکانە سپیپۆشە بنەبڕانەی،
کە بە تاجی بەفرینیانەوە،
زەوییان بە ئاسمانەوە گرێ دەدا؟
کوانێ ئەو دڵۆپە بارانە ڕوون و زوڵاڵانەی،
کە لە دڵی ئاسمانەوە دەبارین
و دەبوونە هەوێنی ژیان و دەرمانی زامەکان؟
کوانێ دارستانە چڕ و باخچە گەشاوەکان،
کە سییەکانی زەوی بوون
و دڵی مرۆڤیان پڕ دەکرد لە سەرسامی و ئەفسوون؟
ئایا ئەمانە پێکەوە،
کۆڵەکە و ڕاگرە بنەڕەتییەکانی تەلارە مەزنەکەی ژیان نەبوون؟
ئایا هەر ئەمانە نەبوون
کە مانای ڕاستەقینەی ئەزموونی بوونیان،
لە نێوان تەمومژی بوون و نەبووندا دەپاراست؟
دایک و باوک و باپیران،
بە سەری شۆڕ و دڵێکی پڕ لە حەسرەت و پەشیمانییەوە،
لە وەڵامدا دەمی بێدەنگییان شکاند؛
بە دەنگێکی کەنەفت و قورس،
لە ژێر باری گرانی یادەوەرییەکانەوە، گوتیان:
”ئێمە بەهۆی نەفامی و غەفڵەتمانەوە کەوتینە تەڵەوە؛
کڕنۆش و بێدەنگییەکەمان بوو بە دەروازە،
و بە دەستی خۆمان ڕێگامان بۆ نەیارانی ژیان تەخت کرد.
ئێمە تەنیا تەماشاکەر بووین،
کە چۆن هەنگاو بە هەنگاو،
لە پێناوی خەونی سەرابی سامانی بێکۆتاییدا،
کانیی هیوامان وشک کرا؛
ئەو مانایە ڕەسەنەی
کە ژیانمان پێی دەژیا،
و تەواوی جوانییەکانمان سووتێنرا؛
هەمووی لە ژێر پێی چاوچنۆکی و بێدەنگیی خۆماندا،
وێران و بەخۆڵەمێش کرا.”
ڕەحیم نزهت‌زاده
