هەڵەبجە، د. حوسێن خەلیقی

لەم رۆژانەدا، گوێ بیستی بە ستانکردنی هەڵەبجە بووم وچاوم لە شادی دەربڕینی دانیشتوانی ئەو دەڤەرە بوو کە دەسەڵاتی عێراق، ئەوەی پەسند کردووە.

دیارە ئەو گورانکارییە خۆی لەخۆیدا، دیاردەیەکی سەرنجراکێشە و دەبێتە هۆی گەشەکردنی بنکە و بنیاتی ناوچەکە و جموجۆڵێکی بەرچاو بەخۆیەوە دەبینێ. بەڵام ئەوەی لای من، جێی سەرسووڕمان بوو ئەوە بوو کە خەلکی هەڵەبجە بە فەرمانی دەسەڵاتی پێشووی عێراق، بە چەکی شیمیایی، بۆمباباران کران و بێجگە لە شەهیدبوونی ٥هەزار مرۆڤی بێتاوان، شوێنەوارێکی گیانیی(رۆحی) ئەوتوی لە مێشکی پاشماوەکانیاندا دانا، تا سەدان ساڵی دیکە بەرە لەدوای بەرە، لەژێر کاریگەریدا دەمێنیتەوە! ئەوە سەرەرای زیانی ماکی(ماددی) فراوان و پیسکردنی کەش و هەوای ناوچەکە و قرکردنی هەزاران سەر مەر وگا و بزن و… کە چی لە دوای رۆخانی رژیمی دیکتاوری عیراق و هاتنە سەرکاری رژیمی نوێ، لە جیاتی ئەوە خەڵکی هەلەبجە داوا بکەن جێگرەکانی رژیمی شیمیاباران، ئەو گشت زیانە ماکیی و میناکییەیان قەرەبوو بکاتە، دەنگیان لێوە نەهات و ئێستا لەوانەیە، سوپاسی مالکیش بکەن کە رێگای داوە، ئەو شارە بەڵا لێدراوە ببێتە ستان یان موحافەزە!!!

  ئەوە لەکاتێکدایە کە رژیمە داگیرکەرە ئورووپاییەکان، خەریکن، زیان و زەرەی خەڵکی ئەو وڵاتانە قەرەبوو دەکەنەوە کە پێشتر، وڵاتەکەیانیان داگیرکرد بوو. سەمەرەتر لەوە، رژیمی شیمیاباران، ٤٠٠٠هەزارگوندی باشووری کوردستانی ویران کرد و زیندەوەری تێدا نەهێشت و بە ناپاڵم شاخ و دار و دەوەن و دۆڵ و لێڕەواری کیڵان و زیاتر لە دووسەد هەزار مرۆڤی بێتاوانی بە ناوی ئەنفال و بە پشت بەستن بە قورئانە عەرەبییەکەیان، زیندە بە گوڕ کرد، کە چی خەڵکی باشوور لە دەسەڵاتی دوای بەعس، داوای نەکرد، ئەو گشت زیانە مرۆڤیی و ماکیی و میناکیانە قەرەبوو بکاتەوە!!! سەیرتر لەوە، نەک هەر ئەوەی نەکرد، پێنج لە حەڤدەی بودجەی ئەو دەوەرەی قرتاندووە و ئەوەش بووتە مایەی سەرئێشە و دانوستانی دەسەڵاتی هەرێم لەگەل جێگرەکانی سەدامدا!! بوونی هەڵەبجە بە موحافەزە، مافێکی رەوا و سرۆشتی و پێویستییەکی هەنووکەییە. بەپێی زۆر بوونی حەشیمەتی  و نیازی ئەو دەڤەرە، دەبوو  زووتر ئەو هەنگاوە هەڵبگیردرایە.

 ئایا کێشەی هەڵەبجە بە موحافەزە بوونی چارەسەر دەکرێ؟

ئایا ئەگەر هەڵەبجە کرا بە ستان، ئێش و ئازاری پاشماوەکانی شیمیاباران سارێژ ئەبێ؟

ئایا موحافزەکردنی هەڵەبجە، رێگا بۆ پەرەدان بەو گەندەڵییە کە رەگ و ریشەی داکۆتاوە، نادا؟

 دەکرێ ئەم داوایە، جێگای ئەو زیانە سامناکە بگرێتەوە؟

 خەلێقی١-١-٢٠١٤