بۆ یەکگرتنەوەی دێموکرات ، دڵسۆز یاری

کوردە بڕوانە لە مێژووی دواوە

نیشتمانەکەم بەخوێن نەخشاوە

لەدەشت و چیا لەگوند و شاران

لە جۆگەو رووبار،مەنزڵگەی یاران

یان لەسەر کانی شوێنی جەحێڵان

یان لە ناو حوجرە و ژووری فەقێیان

لە پاڵ کێلە شین یان بابا یادگار

هەر لە مادەوە بە درێژی رۆژگار

خوێنی دەچۆڕێ، زامدارە لەشی

گیانی دەسێنن، نەمانە بەشی

کوردە بڕوانە چەند هەزار ساڵە

ئەمە بەشمانە ، ژیانمان تاڵە

وڵاتی کوردان ناڵە و زاریەتی

ژان دەچێژێ لەدەست کۆیلیەتی

کوشت و کوشتار و وڵاتی خنکاو

لەت و کوتیش بین،ریزمان لێک بلاو؟

کوردە بەسیەتی ئەم پرژ و بڵاوە

گەر نەبین بەیەک سەرمان بێکڵاوە

لەکونجی زیندان لاوانی دڵێر

بەپێوە دەمرن وەکوو بەچکە شێر

لەسەر قەندیل و کێوی ئاگری

یان لە ئارارات قەڵای بەرگری

شاهۆ و داڵاهۆ،ئاویەر و هەڵگورد

نزار و کوێستان، فێنکستانی کورد

دامێنیان سەوز و سوورە گوڵزارن

گشتی شکۆفەی باڵای سەردارن

لە یادیان نەکەین، کوردە غیرەتێ

ڕێچکەیان بگرین،دەیسا هیمەتێ

رێچکەی خەبات و سەربەستی ژیان

یەکگرتنی دەوێ بۆ سەرکەوتنمان

دەبا یەک گرین هەموو بە هەڤڕا

ئازاد بێ وڵات بە هەوڵی تێکڕا

دڵسۆز یاری

فینلاند

19.01.2015