بە مەیلی خۆت
هەڵی بژێرە 
لە فۆسەیلەکان
لە مرۆڤە سەرەتاییەکان
لە نیاندرتاڵ وکوڕە بە ئەمەگەکانی
ئیبنی مەقفەع
لە ئەکوان و
تەنوورەی دێوەکانی
لە جیهانی هیرۆگڵێف و
فیرعەونەکانی
لە خشتە برژاو و بزمار ڕێژەکانی،
لە قەمچی تەعزیر و
چوار ڕای ئازادی لە داردانی
لە هەڵواسینی مەیانی هەڵۆ و
هاواری ئەڵاهوو
ئەکبەری زیندانبانی
لە مووروە شینکە و
نووشتووی بەر مووسڵدانی
لە چاڵی جەمکەران و
زێوانەکەی جەمارانی
لە کوول و شکەفتی
سەدەی بیست و یەک
هەڵگەڕاوەی چاخی بەردی
سەرپشک بن و هەڵی بژێرن
بە مەیلی خۆت لە کامیانی؟
لە کامیانی؟
ڕەوف گوڵبەدەن
23.2.2016 ز