بەرەو ڕاسان…!عارف عەزیزی

من ئەمساڵیش جێژن ناکەم

 ڕێگای پیرۆزم لە بەرە،

 لە سەر ڕێگای ڕاسانەوەم

 ڕێگام بەرەو تیشکی خۆرە

 من پەیمانم بە گەل داوە

 تاکوو گەشتن بە ئازادی،

 ماڵم سەنگەری خەبات بێ و

 نەچمە کۆڕی جێژن و شادی

 من پارویەک نانی وەشکی

 شەوەزەنگی خەباتەکەم،

 ناگۆڕمەوە بە بەهەشتی

 داگیرکەری وڵاتەکەم

 ئەوەی کە بۆ من گرنگە

 لە ئێستادا نیشتمانە،

 هاوسەنگەرانم لە شاخ و

 کۆڵەپشی و چەکی شانە

 بۆیە دیسان پەیمان دەدەم

 بە گەل و خاکی وڵاتم،

 بە جێژن و شادی دێمەوە

 کوردستانی ڕۆژهەڵاتم.

 

06-07-2016

 سوید