ئەمریکا و رووسیە و بریتانیا سەرەتابە ئامانج یانبگرە، ئەوجا دەبنە دۆست و هاوپەیمانت!، محەممەد سلێمانی

 وڵاتە زلهێزەکانی جیهان و لە نێویشیاندا ئەمریکا و رووسیە و بریتانیا بەدرێژایی مێژوو لایەنگری سەرکووت و ستەمی سیاسی و کۆمەڵایەتی ئەو وڵاتانەیان کردوە کە زیاتر لە نەتەوەیی باڵادەست لە وڵاتدا بوونیان هەیە،

 وەك نموونە تەنیا ئاماژە بە چوار وڵاتی داگیرکەری کوردستان بەسە بۆ سەلماندنی ڕاستیەکان. وەك دەبین لە ئێران و سووریە و تورکیە و عێراقدا زیاتر لە نەتەوەیەك دەژین و تەنیا نەتەویی باڵادەست و دەسەڵاتدار هێزی ئیداری و سیاسی و سەربازی و ئابووری لە ژێردەست دایە و ئەو توانا و هێزەش سەرەتا بۆ گەلانی ژێر دەستەی وڵاتەکەیان بەکار دێنن. گەلی کورد کە ژمارەی دانیشتووانی لەسەرویی 40 میلیۆن دەبێت، هەتا ئێستاخاوەنی کیانی سیاسی و سەربەخۆی نیە! بۆچی زۆر روونە، ئەو هێزە گەورە و زەبەلاحانەی گێتی زیاتر لە 100 ساڵە هاوبەشی دەکەن لە ژێر دەستەی و نەبوونی گیانێك بۆ گەلی کورد لە ئاستی ناوچەکەدا. وڵاتانێکی وەك رووسیە و ئەمریکا و بریتانیا هەرگیز بەدۆستایەتی و هاوکاری و چاکە و پیاوەتی بۆ کورد نایەنە سەرخەت. سەرەتا دەبێت ئامانجەکانیان بە نیشانە بگری و دژایەتی بەرژەوەندیەکانیان بکەیت، ئەو کات ئاوڕی خێرت لێدەدەنەوە و پاڵەپشتیت لێدەکەن. چوونکی لە عێراقدا موقدەداسەدر ڕێبەری دیاری شیعەکان بۆ ماوەیەکی دڕێژ سەربازی ئەمریکای کردەئامانج و دژایەتی کردن. دیتمان ئەمریکا دواجار ڕێزی بۆدانان. ئۆردۆغان بە بڕیارێك فرۆکەیەکی شەرکەری رووسیەی خستەخوار و تەرمی فڕۆکەوانەکانیشیان شێواند. دواجار دەبینین رووسیە بە لایەنگری لە تورکیە، خەیانەتی لە کورد کرد و مێژووی خەیانەتی دیسان دووبارەکردەوە، هەر وەك لە کۆماری کوردستانیشی کرد. هەر بۆیە ڕێبەرانی سیاسی و بیرمەندان و توێژەرانی سیاسی و نێونەتەوەیی لازمە لێکۆڵینەوە و خوێندنەوەی بابەتیانەی باروودۆخی هەنووکەی لەسەر ئەساسی بەرژەوەندیەکانی نەتەوەیی کورد بکەن. ئەمریکا و رووسیە دەبێت وەك  دوژمنی سەرەکی گەلی کورد بناسرێن  و بە دوو وڵاتی بەهێز و  گەورە و فیتنە گێڕی گێتی لە قەڵەم بدرێن و کورد، لازمە دژایەتی ئامانج و بەرژەوەندیەکانیان بکات، ئەگەر بێت و  سیاسەتی خۆیان لە هەمبەر کورددا نەگۆڕن و بەردەوام خەیانەتمان لێبکەن و بۆ لەباربردنی ئەزموونە سیاسی و سەرکەوتنەکانمان. ئەو وڵاتانە ئەوەی کورد بە خوێن و تێکۆشان بەدەستی دێنێت و پاشەکشە بەداگیرکەرانی کوردستان دەکا، زلهێزەکان دێنە نێو رووداوەکان و بە خەیانەت و  بێوەفایی نواندن، بەردەوام  بەداگیرکەرانمان دەفرۆشن لە پێناوی هێندێك دەسکەوتی پچووکی سیاسی و ئابووری و سەربازی خۆیاندا. گەلی کورد ئەگەر بە گشتی خۆێ ڕێکبخات و دووربکەوێتەوە لە دژایەتیکردنی یەکدی، هیچ هێزێك ناتوانێت بە چۆکیدا بێنیت و لەوەی زیاتر ستەمی سیاسی و نەتەوەیی لێبکات. بەداخەوە کوردی ئەوتۆ هەیە بۆ بارەقەڵا و خۆشیرنکردن تاوانی رووداوەکانی عەفرین و هێرشی سپای تورکیە دەخاتە گردنی پەکە کە و،  پێیوایە هۆکارەکەی ئەوانن. باشە دوژمنانی کورد دەڵێن ئەگەر کورد ڕیفراندۆمی ئەنجامنەدابا، رووداوەکانی 16ی ئۆکتۆبەریش نەدەتاتنە پێش و کورد نزیك بە نیوەی خاکەکەی لە دەست نەدەدا! هەر لە ئێوە دەپرسم، خۆ کوردەکانی ڕۆژئاوا و لە نێویاندا عەفرین ریفراندۆمی سەربەخۆیان ئەنجامنەداوە، کەچی  دەوڵەتی تورکیە پەلاماری دوان و بە ناو دۆستەکانیشیان خۆیانکڕکردوە، بۆچی! بەدڵنیایەوە تەنیا لەبەر ئەوەی کوردن و چاویان بەسەرکەوتن و گەشەکردن و ئاشتی و ئارامی گەلی کورد هەڵنایەت نایەت!  ئێمەی کورد بە دڕێژایی مێژووی سەرهەڵدانەکانمان، خۆمان لە گەڵ هەژاری بیرکردنەوەیەدا ڕاهێناوە و بەجارێك قوڕمان بۆ سەری خۆمان گرتۆتەوە و بەردەوام خەبات و تێکۆشانی نەتەوەیی لە دیدی داگیرکەرانەوە تەماشا دەکەین و لێکدانەوە و خوێندنەوەی لەبارەوە ئەنجامدەدەین و هەرخۆمان بە هۆکاری کێشە و قەیرانەکان دەزانین و تاوانباران لە کردەوە  و ستەمکاریەکانیان بێبەری  دەکەین. 

بە رووداوی عەفرین دەرکەوت، کورد دۆست و هاوپەیمانی درێژخایەنی نیە و ئەوانەشی پشتگیری دەکەن، لە پێناوی بە هێز بوون و پەرەپێدان بە دەسەڵات و نفۆزی خۆیاندا رۆڵەکانی گەلی کورد بەکار دێنن، کاتێك داعش وەك مەترسیەکی گەورە سەری هەڵدا لە سەر ئاستی ناوچە و گێتیدا، هەموو لایەك ئامادەیان دەربڕی هاوکاری و یارمەتی هێزەکانی سووریەی دێمۆکرات بکەن، بەڵام ئێستا لە ئاستی هێرش و پەلاماری تورکیەدا خۆیان لە خەت لاداوە و شەرعیەتی ئەو شەڕەش بە حکوومەتی ئانکارا دەدەن. جارێکی تر رووی ڕاستە قینەی ئەمریکا و رووسیە دەرکەوت کە بە درێژایی مێژوو لەپشتەوە خەنجەریان لە کوردداوە و هەتا ئەمرۆش بە دۆست  و هاوپەیمانی خۆیان سەیردەکەین. هەر دوێنی بوو ئەمریکا بە ڕۆژی رووناك خەیانەتی لە کوردی باشوورکرد و ڕێگایی بە هێزە عێراقیەکاندا هێرش  بکەنە سەر ” کەرکوك”  و لە ژێر دەستی کورد دەربهێنرێت لە پێناوی مانەوەی عەبادی و ڕازیکردنی نەیارەکانی لە ناوچەکەدا. ئەمرۆش دەبینین رووسیە هەر وەك چۆن  کۆماری کوردستانی بە بەرمیل نەوتێك بە قەوام و سەڵتەنە، کە سەردەمی شای دیکتاتۆر وەزیری دەرەوەبوو، فرۆشت و پشتیکردە کۆماری کوردستان و حکوومەتی دێمۆکراتیکی ئازەربایجان و، دەستی سپاسی ئێرانی گرت هاتە ئەو دوو حکوومەت برۆخێنیت و خاکەکەیان داگیر بکاتەوە. کاتێکێش ئەوەیانکرد کە مەترسیەکانی ئاڵمان لێیان دوور کەوتەوە و شەری دووهەمی جیهانی بەرەوکۆتایی چووبوو. ئەمرۆش رووسەکان بۆ پاروەنانێكی چەورتر عەفرینیان بە تورکیە فرۆشت و بۆ جارێکیتر خەیانەتیان لە گەلی کورد کردەوە. هەر بۆیە کورد دەبێت لە ئێستادا ئەوەبزانێت کە ئەمریکا و رووسیە  وەك دوو وڵاتی گەورە و بەنفووز،  بوونتە سەر چاوەی فیتنە و ئاژاوەگێڕی و ناسەقامگیری ناوچەیی و، بەدوای قازانج و بەرژەوەندیەکانی خۆیاندا دەگەڕێن و لە بەرانبەر قەتڵووحامی خەڵکی بێتاوانی کوردی دانیشتووی عەفرین پێشی سپای زەبەلاحی تورکیەیان  واڵاکردوە، بە ئازادی و بەبەر چاوی کۆمەڵگای جیهانیەوە ستەم وزوڵم لە گەلی کورد بکرێت و شار و گوندەکانی لە زەوی و ئاسمان ڕا بردوومان بکرێت و مناڵ و پیر و لاوی کوردستان لە خوێندا شەڵاڵ بکەن.

سەرکەوێت خەباتی ڕزگاریخوازی نەتەوەیی.

 

محەممەد سلێمانی

24.01.2018