"an independent online kurdish website

سپاس بۆ (تۆ) که‌ بۆ رۆژی له‌ دایکبوونم نامه‌ت بۆ ناردووم!

که‌ وایه‌ با پێکه‌وه‌ ئه‌و چه‌ن دێڕه‌ بخوێنینه‌وه‌:


 

رۆژی 7/7/1323 پێش ئه‌وه‌ی مه‌لا بانگ با

پێش ئه‌وه‌ی تاو له‌سه‌ران با

پێش ئه‌وه‌ی که‌ڵه‌باب بخوێنێ و خه‌ڵک له‌ خه‌و هه‌ڵسێنێ

له‌ گه‌ڕه‌کی سه‌رپه‌چه‌ی سه‌قز له‌ نزیک مزگه‌وته‌ بچکۆله‌، مناڵێ به‌ قیژه‌قیژ و به‌ (7) مانگ به‌ یارمه‌تی نه‌نکی (دایکی باوکی) که‌ مامانی بێجیره‌ و مواجبی ئه‌و گه‌ڕه‌که‌ بوو له‌ سکی دایکی ده‌رئه‌به‌ڕی و ده‌سئه‌کات به‌ پرسیار و ئێژێ:

ئێره‌ کوێیه‌؟

بۆ گه‌یشتوومه‌ته‌ ئێره‌؟

باشه،‌ منتان هێناوه‌ته‌ ئێره‌؛ کۆا پێخۆر و نان؟

کوا جل و به‌رگی جوان؟

کوا ئاهه‌نگ و شادی و چه‌پڵه‌ لێدان؟

 

دایکی که‌ له‌ به‌ر هه‌ژاری و نه‌داری و باری دووگیانی لاواز و بێهێز ببوو، به‌ڵام له‌ خۆشی ئه‌وه‌ی که‌ یه‌که‌مین مناڵی خۆی بینیوه‌ ده‌م ببزه‌ ئه‌چرپێنێ به‌ گوێیدا و ئێژێ:‌ رۆڵه‌ گیان تۆزێ ئارام و له‌سه‌رخۆ‌به، بۆ کردته‌ به‌ بازاری خۆت؟!

نان و بێخۆری خۆش و به‌تامت ئه‌وێ؟

جلوبه‌رگی تازه‌ و بۆنخۆشت ئه‌وێ‌؟

کاکه‌، ئێستا سه‌رده‌می جه‌نگه‌

جه‌نگی جهانی دووهه‌مه‌

خواردن و جلوبه‌رگ زۆر که‌مه‌!

ئه‌بێ له‌ پێشا سجیلت بۆ وه‌رگرن، پاشان کۆپین به‌ناوی خۆته‌وه‌ ده‌ربێنن، چییان پێدای هه‌ر ئه‌وه‌یه‌!

پاشان ده‌سئه‌کات به‌ پێچانه‌وه‌ی مناڵه‌که‌ی، له‌گه‌ڵ مالابانگداندا (باوک و مامی) مناڵه‌که‌ به‌په‌له‌ کۆڕه‌که‌ ئه‌بن بۆ مزگه‌وت که‌ له‌ نزیک ماڵه‌که‌یاندا ئه‌بێ، ئه‌ڵێن مامۆستا گیان، ئه‌مشه‌و خوا ئه‌م کوڕه‌ی پێداوین، هێناومانه‌ بانگ به‌ی گوێیدا و ناوی بنێی.

مه‌لایش به‌ رووخۆشییه‌وه‌ ئێژێ: ناوی ئه‌نێن چی؟

مامۆستا گیان، حه‌مه‌ سه‌عی.

ناوێکی جوانتان بۆ هه‌ڵبژارده‌، (محه‌مه‌د سه‌عید) ته‌مه‌ن درێژ و ساڵح بێت، ئینشائه‌ڵا!

پاشان به‌ناوی (محه‌مه‌د سه‌عید)ه‌وه‌ بانگ درا به‌ گوێیدا. هه‌ر ئه‌و رۆژه‌ گه‌یاندیانه‌ ئیداره‌ی (سجیل ئه‌حواڵ) و خێرا سجیلیان به‌ناوی (محمد سعید قایشی) و له‌‌ رۆژی (موالید)دا بۆ ده‌رهێنا، دوانیوه‌ڕۆی ئه‌و رۆژه‌ کۆپینیشیان بۆ وه‌رگرت.

 

له‌گه‌ڵ ئه‌وه‌دا که‌ کۆپینه‌که‌ هه‌ر ناوی بوو نه‌ک ناوه‌رۆک، به‌ڵام جاروبار باوکی له‌ رووی خۆشه‌ویستییه‌وه‌ پێیئه‌وت:

رۆڵه‌ سه‌عی تۆ قه‌ت ئه‌رکت به سه‌ر ئێمه‌وه‌ نه‌بووه‌، هه‌ر له‌ یه‌کم رۆژه‌وه‌ کۆپینی خۆت بووه‌.

وایه‌ له‌ یه‌که‌م رۆژه‌وه‌ کۆپینی خۆی بووه‌، به‌ڵام {(ره‌نج و خه‌مخۆری باوکی و دایکێ که‌ به‌ هه‌ژاری و نه‌داری، به‌ڵام به‌ دڵسۆزییه‌وه‌

که‌ له‌ هه‌موو بواره‌کانی ژیاندا یارمه‌تییان داوه‌)، هیچ پێنووسێ ناتوانێ بینووسێته‌وه‌}!

به‌ڵام پێنووسی یاده‌کان و کامێرای چاوه‌کان و هه‌ستی دڵ و ده‌روونی خودی (سه‌عی)یه‌ که‌ ئه‌توانێ هه‌ست به‌وانه‌ بکات و به‌س!!!!

 

به‌ڵێ، جا خۆت ئه‌و {(7/7/1323) واته‌ رۆژ و مانگ و ساڵی‌ هه‌تاوی، کۆچی و ئیسلامییه‌‌} بکه‌ به‌ {رۆژ و مانگ و ساڵی زائینی، میلای و مه‌سیحی} بزانه‌ ئه‌کاته‌ که‌ی. ئه‌کاته‌ رۆژی 29/9/1944 – به‌ڵام تۆڵک (وه‌رگێڕه‌که‌ی) ئیداره‌ی په‌نابه‌رانی سوید به‌ (17/10/1944)ی نووسیوه‌، ئه‌وه‌یش هونه‌ری ئه‌و تۆڵکه‌ بۆ من و بۆ ئێوه‌ که‌ نامه‌تان بۆ ناردووم و دووباره‌ سپاستان ئه‌که‌م.

 

سه‌عی سه‌قزی قایشی

 

17/10/2018

Sai.saqzi@gmail.com

 

نویتـرین هەواڵ و بابەت


فارسی