خەتەری نەخۆشی کرونا، پرسەی نەمر جەعفەر ماملێی لە دەرەوە راگرت.

پێشمەرگەکان: بنەماڵەی ماملێ لە دەرەوە بۆ پارستنی خەڵک لە نەخۆشی کرونا، پرسە دانانێن.

ئێوارەی رۆژی دووشەممە 17-2-2020، هونەرمەند جەعفەر ماملێ، برای محەممەدی ماملێ لە شاری مەهاباد لە رۆژهەڵاتی کوردستان، کۆچی دوایی کرد.

دەقی ئاگاداری بنەماڵەی ماملێ

هاووڵاتیانی بەرێزی دانیشتووی سوێد !

لە گەڵ سلاو و رێز

کۆچی دوایی هونەرمەندی کورد ” جەعفەری ماملێ ” بوو بە هۆی دەربرینی هاوسۆزی و هاوخەمی کۆمەلانی خەڵکی کوردستان لە ناو خۆ و دەرەوەی وڵات، جگە لە ناوخۆی کوردستان لە چەند وڵاتی ئورووپایش کۆر و یادکردن هاتە ئاراوە.

بریارمان دابوو لە ولاتی سوێد رێورەسمێکی تایبەتی دابمەزرێنین و پێشوازی لە ئێوە ئازیزان و خۆشەویستان بکەین بەڵام بەداخەوە کۆسپی بەردەم گەرانەوەی کچەکانی هونەرمەندی زیندوویادمان ” وەفا و سەفا” لە کوردستان بۆ سوێد وەزعەکەی لە گەڵ بڵاو بوونەوەی نەخۆشی ” کورونا ویرووس” روو بە روو کرد، ئەو رەوشە کاردانەوەی بووە لەسەر بریاری پێشوومان و ناچاری کردووین کە خۆمان لە گەڵ هەوڵەکانی پێویست بۆ بەرگری و رێگری کردن لە تووش بوونی ئەو ویرووسە رێک بخەین و ریزی تەواو بگرین بۆ هاوڵاتیان بە شێوەیەک کە پاراستنی گیان و ژیانیان لە پلەی یەکەمی بەرژەوەندی یەکانی خۆمان بە حیساب بێنین.

لەو دۆخە تایبەتییەدا ئێمەش هاودەنگ دەبین لە گەڵ پلانەکانی پێویست بۆ تووش نەبوونی هاووڵاتیانی خۆشەویستمان بە هەر چەشنە نەخۆشی یەک و پێتان رادەگەیەنین کە لەو هەل ومەرجە نالەبارەدا هیچ بەرنامە ورێ ورەسمی پرسە و سەرەخۆشی بەرێوە نابەین و سپاس و پێزانینی خۆمان ئاراستەی ئێوەی خۆشەویست دەکەین و ئاواتە خوازین گیان و ژیانی خۆتان و بنەماڵەی بەرێزتان بە دوور بێ لە نەخۆشی و ناخۆشی و نالەباری و نەهامەت.

لە گەڵ رێز و سپاسی دووبارە

بنەماڵەی ماملێ لە دەرەوەی وڵات

١ی مارسی ٢٠٢٠