بەشداری لە خۆپێشاندان ئەرکی سەر شانمانە، ئیدریس هاشمی – نەرگس هاشمی

هاوڕا لەگەڵ ڕاپەڕینی گەلانی ئێران لە ناڕەزایەتییەکانیان دژ بە ڕژیمی دیکتاتۆریی ئێران، لە دوای کوشتنی تاڵ، بەڵام بە شکۆی ژینا ئەمینی لە خۆپیشاندانەکانی شاری ستۆکهۆڵم بەشداریمان کرد.

 وێنەکان پێش وشە و قسە کەوتوون؛ جووڵەکان دروشمەکانیان بەجێ هێشتووە و بوێری و ئازایەتی بەسەر ترسدا و سەمای ژیان و ئازادی بەسەر کۆیلەیی و ئەسیریدا سەر کەوتوو.

 کوشتنی ژینا، جووڵانەوەی ئازادیخوازی و یەکسانیخوازیی بەرینتر و بەهێزتر و یەکگرتووتر و بوێرتر کردووە، ئاسۆ و ئامانجەکانی ڕۆشنتر و ڕیشەییتر و هەمەگیرتر کردووە. ئێمە لەگەڵ کچان و ژنانی کوردستان، کە لە دژوارترین بارودۆخدا بۆ ئازادی و یەکسانی خەباتیان کردووە و هەندێک جاریش گیانیان لەدەست داوە، درێژەدەری ڕێبازی هەزاران ژنی پێشمەرگە و چالاکی سیاسین.

کوشتنی ژینا ئەمینی و بەشداری لە خۆپیشاندانەکان، كۆڵەكەكانی دەسەڵاتی كۆماری ئیسلامیی ئێرانی هێناوەتە لەرزە.  ئێمە بە بەشداریکردنمان لە خۆپیشاندانەکان دەمانەوێت بە هەموو دنیا بڵێین کە تاوانه‌کانی کۆماری ئیسلامیی ئێران دژ به‌ ژیناکان و دژ بە ژنان له‌بیر ناکه‌ین و له‌ ده‌سه‌ڵاتدارانی ڕێژیمی ئیسلامیی ئێرانیش خۆش نابین.

لە دواڕۆژدا بکەرانی ئەم تاوانانە دەبێت لە بەرچاوی خەڵک و لە دادگای گشتیدا لە بەرامبەر 44 ساڵ تاوان دژ بە خەڵکی کوردستان و دژ بە ژنان و هەموو جەماوەری شەریف و ئازادیخوازدا، وەڵامدەر بن. لە هەمبەر کوشتنی ژینای بێتاوان، بێدەنگ نابین. ئێمە بۆ ناوی ژینا و ئاڵاکەمان خەبات دەکەین. لە کۆتاییدا پێویستە ئێمە و ژنان و پیاوانی کوردستان و هەموو کۆمەڵگای ئیران بەتووندترین شێواز هەڵوێست بنوێنین و لە خۆپیشاندانەکانی ناوخۆ و دەرەوەی وڵات بەشداری بکەین تا پێش بە دەزگاکانی سەرکوتکەری کۆماری تێرۆریستیی ڕژیم بگرین و ڕق تووڕەیی خۆمان زۆر بەڕوونی دەربڕین.

 ئیدریس هاشمی – نەرگس هاشمی