پەێام کونگرەی یەکیەتی یارسانی ئەڕا ڕێکخستن ناو ماڵ کوردستانی لە کوردستان ئێران

ڕێزداران، حزب و سازمانە سیاسیەکان

مەردم ئازادیخواز و زوڵملێکریاگ کوردستان،

لە کونگرەێ ئتحاد یارسانی کە لە 7 و 8 مانگ ئاپریل لە سوئد پێک هات، دو سازمان یارسانی جونبش دموکراتیک یارسان و یاریکورد، خوەێان لە ژێر ناو سازمان دمکراتیک یارسان سازمان دان و وەکردەوە فرە موتەحد پا نا مەێدان موبارزە. هەر ئەوجورەێکە لە گوزەشتە باس کردیمە و گام ئەڕاێ هەڵ گردیمە بێ یەک دەنگی و یەک ڕێزی حزب و ڕێکخراوگەل کوردستانی سەرکەفتن  و پیروزی و وەدەسهاوردن حەق ملەتەکەمان کارێک ئاسان نیە. ئیمە هایم ئەو باوەڕە کە ماڵ کورد لە کوردستان ئێران باێەد ڕێک بخریەت و حزب و ڕێکخراوە کوردستانیەکان بێ لە وەر چەو گردن کەمی و کەێفی، بایەد خوەێان لە بەرەێک یەکگردگ، ئەڕا وە دەس هاوردن مافەکان ملەت کورد مبارزە بکەن. یەک گردنە کە دیگەران توانن هەساو لە سەرمان بکەن، باوەڕ دیریم سبقەت لە یەک گردن ئەڕا ملاقات وەل سازمانگەل ئێرانی و دەرەکی بێ لە وەرچەو گردن منافەێ ملەت کورد، ناتوانێ دەسکەفتێک درێژخایەن داشتوت.

بەڕێزان،

ئیمە لە ڕی ئی بانگەوازوە جارێکتر ئیوە و حزبە کوردستانیەکان وە گشت قەوارەکانێوە داوەت کەیم کە با گشتمان لە دەور یەک جەم بیمن و هەوڵ بێەیم ئەڕا پەێا کردن مکانیزمێک کە بتوانێ لە بەرەێکی یەک گردک جەممان بکەێت. سازمان دمکراتیک یارسان وەخاتر منافەێ ملەت کورد لە کوردستان ئێران ئی دەس پێشخەریە کەێت و ئی بانگەوازە ئاراستەێ ئیوەێ ئەزیز، حزب و ڕێکخراوە کوردستانیەکان کەێت و  هەر لەی ڕابتە سازمان دمکراتیک یارسان ئامادەس جور ئەرکێک نەتەوی ئەم مێوانداریە قەبول بکەێ. ئەگەر بتوایم تاریخ و مەردم لە سەرمان وە نیکی هەساو بکەێ، پەس نیاز وە یەکتر قەبولکردن دیریم و بایەد قەبول بکەیم کە مەسڵەحەت گشتی لە ئیمە تواێت کە وە کردەوە ئەڕا یەکیەتی و یەکدنگی ملەت کورد موبارزە بکەیم.

ئومیدواریم وە دەنگ بانگوازەکەمانوە باین، چوینکە تەنیا لە ڕێگای دیالوگ و وەیەک باوەڕکردنە کە توانیم میکانیزمێک ئیمڕوژ و مەردمپەسەند پەێا بکەیم.

 جواو دایین موسبەت وەی بانگەوازە، نیشانەی دڵسوزی و خەمخوەریتانە ئەڕا مەسەڵەی ڕەوای ملەت کورد.

یەک دەنگی و یەک ڕێزی زامن پیروزی ملەتەکەمانە

بژی کورد و کردستان

سازمان دمکراتیک یارسان

14. اپریل 2012

تێبینی:

ئی بانگەوازە ئەڕا تەمام حزب و ڕێکخراو و شخستەتگەل موبارز کوردستان  ئێران کڵ کریاس.

هازریم لەی باروە لە کاناڵگەل تلویزیونی و ڕاگەیاندنەکانوە روشنگەری بکەیم کە هەدەفمان لەی بانگەوازە چەس.

{jcomments off}