تاســـــــە، ئاکۆ ئەلیاسی

للە دوورەوە …     

پەنجەی دەستی پرسیارێک بووی…

هەردەم قیت و پڕ لە گومان،

چاوی تاسەم … قەت هەتەڵەی نەدەکردی

تاریکەشەو،

دەبووی بە دوا چۆڕی داکشانی …. تەمەن کورتیی ئەستێرەیەک

بەڵام دیسان … مانگەشەوان

دەزایتەوە نێو گلێنەم

زستان وێنەی سووکە باپووز،

سواری پشتی خۆی دەکردی و هەڵەت … هەڵەت

دۆڵ بە دۆڵ و یاڵ بە یاڵ و بەرەوە لووتکە

دەیفڕاندی

بەڵام …

چاوەڕوانی بێ سنوورم

پەلکێش … پەلکێش

دەی هێناییەوە

ژووری پڕ لە ژواری تەنیام

ڕازی دێڕی پەرتووکێک بووی،

پێچەڵ پێچ و پڕ لە مەتەڵ،

هەموو ساتێک …

بە تاســەوە

تێر … تێرم  … دەخوێندییەوە

هەتا پێڵووی چاوەکانم

بە دیارتەوە کز دادەهات

من تەمەنێک … بە عەشقەوە

خوێندتمەوە

بەڵام هەرگیز…

نە وەڵامم وەرگرتەوە و

نە ئەوینت کۆتایی هـــات!

{jcomments off}