رێکخراوی موجاهدینی خەڵقی ئێران لەسەر بەشداری سەحراروودی لە کۆنفرانسی ژنێف ، هەڵوێستی توندی گرت

“محەممەد جەعفەر سەحراروودی” تیرۆریستی کۆماری ئیسلامی لە ١٣ی ژوئێنی ١٩٨٩ لەگەڵ چەند تیرۆریستی دیکەی ئەو رێژیمە لە ڤیەن پێتەختی ئوتریش

د. عەبدولرەحمان قاسملوو سکرتێری گشتی حیزبی دێموکراتی کوردستانی ئیران و عەبدوڵا قادری ئازەر ئەندامی کۆمیتە ناوەندی و بەرپرسی دەفتەری نوێنەرایەتی حیزب لە دەرەوەی ولات و د. فازل رەسوول مامۆستای زانکۆیان لەسەر مێزی وتووێژ شەهید کرد .

محەممەد جەعفر سەحراروودی وێرای عەلی لاریجانی و چەند بەرپرسێکیتری رێژیمی کۆماری ئیسلامی لە ئێستادا چۆتە وڵاتی سوئیس بۆ بەشداری لە کۆنفرانسی ” ئای پی یۆ” ژنێف .

رێکخراوی موجاهدینی خەڵقی ئێران لەسەر بەشداری ناوبراو ، دوێنێ [ چوارشەممە ١٧ی رەزبەر] هەلوێستی ئینسانی خۆی نواند و لەو بارەوە سەحراروودی بە قاتلی گەلی کورد ناودەبا و داوای ڕادەستکردنی بە یاسا دەکا .

موجاهدینی خەڵق لە ڕاگەیندراوەکەیدا کە سایتی ناوەندی ” سازمان مجاهدین خڵق ایران” بڵاوی کردەوە ، نووسیویەتی :” قاتڵی گەلی کوردستان ، تیرۆریستێکی پیشەیی و قەسابی خەڵکی کوردستانە و ئێمە داوای دەستگیر کردنی خێرا و لێپێچینەوەی پاسداری سەرتیپ جەعفەر سەحراروودی دەکەین”.

رێکخراوی موجاهدینی خەڵق لەسەر سەحراروودی دەڵێ:” لەسەر داوای پولیسی ئوتریش لە رۆژی ٢٢ی دسامبری ١٩٨٩ حوکمێکی نێونەتەوەیی بۆ گیرانی ناوبراو و دوو کەسیتری لە هاوکارەکانی دەرچوو . ئەو ساڵانێکی زۆرە بە هۆی پیشەی تیرۆریستییەوە لە ناوی ” جەعفەری” کەڵک وەردەگرێ و وشەی ” سەحراروودی” لە ناوەکەی سریوەتەوە . سەحراروودی کە لەسەر مێزی وتووێژ پیلانی تیرۆریستی جێبەجێ کرد ، بریندار بوو و بەو هۆیەشەوە نەیتوانی لە شوێنی جینایەتەکە دوور کەوێتەوە و لە لایەن پۆلیسەوە دەستگیر کرا بەڵام پاش ماوەیەکی کورت بە هۆی هەرەشە و تەماع بەرنانی کۆماری ئیسلامی لە ژێر ناوی پاراستنی دیپلۆماسی ، ئازاد کرا و گەرایەوە تاران”.

رێکخراوی موجاهدینی خەڵقی ئێران رەخنە لە ناوەندی ئەرووپایی رێکخراوی نەتەوەیەکگرتووەکان لە ژنێیف بە هۆی رێگەدان بە بەشداری تیرۆریستێکی وەک جەعفەر سەحراروودی دەگرێ و ئەوە لە دژی کۆنوانسیۆنە نێونەتەوەییەکان ناودەبا و بۆ جارێکیتر پێداگری لەسەر گیرانی ناوبراو لە لایەن دەوڵەتی سوئیس و محاکەمە کردنی دەکاتەوە و ئەوەش بە ئەزموونێکی مەترسیداری بۆ سوئیس دەزانێ کە ئاخۆ ئامێز بۆ قاتڵان و تیرۆریستانە دەکاتەوە یان نا؟