جیهانی نوێ، سەعی سەقزی

دابه‌شکرا بوو به‌و پێنج به‌شه‌‌‌‌ ئه‌م گۆی زه‌وییه‌   

ئاسیا، ئوروپا، ئه‌فریقا، ئه‌مریکا، ئه‌قانوسییه‌  

ئێستا کراوه‌ به‌ دوو به‌شی دوو جه‌مسه‌ر

یه‌کیان په‌نابه‌ر و ئه‌وی دی په‌ناده‌ر

 

‌وه‌ک بڵێی وه‌ها داڕێژراوه‌ ئه‌م زه‌مینه‌

به‌شێ ئاوه‌دان بێ و به‌شێکیش‌ وێرانه‌

به‌شێ تێر و ته‌سه‌ل و ته‌یار

به‌شێ کانی نه‌خۆشی و ده‌رد و ئازار

 

به‌شێ کارخانه‌ی تۆپ و تانگ و تفه‌نگ

به‌شێ کار به ‌وانه‌ بۆ خوێنڕێژیی و جه‌نگ

به‌شێ مه‌کۆی زانست و فه‌رهه‌نگ و هونه‌ر

به‌شێ چاوگه‌ی نه‌زانین و تاکی به‌دفه‌ر

 

به‌شێ لانکه‌ی مافی مرۆڤ و سه‌ربه‌ستی

به‌شێ لانه‌ی دیکتاتۆری و تاکپه‌ره‌ستی

له‌م به‌شه‌وه‌ شا و شازاده‌، ئیمام و ئیمامزاده‌

سه‌رۆککۆمار پۆل پۆل به‌ سواری و پیاده‌

 

مامۆستا و پزشک و زانا و خوێنکار

پرۆفسۆر و توێژه‌ر و تاکی به‌هره‌دار

سه‌رله‌شکر و سه‌رکرده‌ و باڵوێز و وه‌زیر

کرێکار و کوڵفه‌ت و قاعید و عه‌سکه‌ر و گزیر

 

سه‌ڵت و خاوه‌ن مناڵ – جوان و پیر

ئه‌که‌وینه‌ رێ بۆ لای پیری ده‌سگیر

ئاگامان نییه‌ له‌ پیلانی پیلانگێڕان

که‌ چلۆن دائه‌ڕێژن پلان بۆ جهان

 

رامان ئه‌گوێزن وه‌ک مۆره‌ی تخته‌نه‌رد

پێمانوایه‌‌ ده‌ربازین له‌ ترس و‌ له‌ ده‌رد

خۆمان لێگۆڕاوه‌ و خۆ به‌ زانا ئه‌زانین

نازانین‌‌ که‌ چه‌نه‌ ساویله‌که‌ و نه‌زانین

 

ئاواره‌ین و ئاواره‌ین و ئاواره‌

به‌و پیلانه‌ چه‌په‌ڵه‌‌ نادیاره‌

واین له‌ گێژه‌نی مه‌رگه‌ ژیان

ژیانی کۆیله‌ی و خۆ فریودان.

**

: Magnus Hjalmarson Neideman

وێنه‌ له‌ سایتی رادیۆ زایه‌ڵه‌ وه‌رگیراوه‌

سه‌عی سه‌قزی    15/1/2016

qayshi@yahoo.com