لەکورتە پۆستێکی فەیسبووکدا ، باسی میدیا و حیزبی باشوری کوردستانم کرد کە چەند بایەخ بە ھەڵبژاردنەکانی تورکیا دەدەن و چەند بانگەشە بۆ هەدەپ دەکەن، بەڵام لەکاتی ھەڵبژاردنەکانی ئێراندا ، لەلای حیزب و میدیاکانی باشور ، کوردی ڕۆژھەڵات چەند بێ پشت و پەنا و تەریک کراوە!.
دیارە لەلای بەشێک لە
دۆستان خراپ لێک تێگەیشتنێک ھەبوو ، بۆیە ویستم لێرەدا زیاتر مەبەستەکەم ڕوون بکەمەوە.
پێشتر گوتم کە ڕاگەیاندنەکانی باشوور بە چەپ و ڕاستیانەوە بانگەشەیەکی زۆریان بۆ”پاتی دێموکراتیکی گەلان”( HDP) کرد و بوونە بەشێک لە ئەجێندای سیاسی ئەو پارتە کە کارێکی باشیان کرد و دەستیان خۆش بێ.
چونکە وەکوو ئەرکێکی ئەخلاقی ، نەتەوەیی و نیشتیمانی ، پێویستە ھاوکار و ھاوسۆزی ھەرھێزێکی کوردستانی بین لە ھەرپارچەیەکی کوردستاندا.
ئاماژەم بەوەشدا کە ئەگەر سبەی لە ئێران و ڕۆژھەڵاتی کوردستان ھەڵبژاردن بکرێ، (کەلە مانگی رەشەمە، واتا سەرەتاکانی مانگی مارس هەڵبژاردنی پارلەمان-مەجلس-ی ئێران بەرێوە دەچێت)، )ئەو ڕاگەیاندنانە”دەچنەوە ناو قاوغی خۆیان و متەقیان لێوەنایەت و تەنانەت ناتوانن وەکوو میدیاکانی کۆماری ئیسلامیش باسی ھەڵبژاردنەکان و کورد لەو جوغرافیایەدا بکەن؛ کە ئەوانیش نەتەوەیەکی بن دەستن و وەکوو گەلی کورد لەباکور ، بەدەست ڕژێمی ڕەفتارفاشی و دیکتاتۆری مەزھەبییەوە دەناڵێنن!”.
گوتیشم کە قسەکردن لەسەر دۆخی کورد لە ڕۆژھەڵاتی کوردستان، لەکاتی ھەڵبژاردنەکاندا ”جورئەتی سیاسی” دەوێ. کە من ئەمڕۆکە ئەو جورئەتە سیاسیە لە حیزب و میدیاکانی باشوردا نابینم.
لەڕاستیدا ئەمن باوەڕم بەوە ھەیە کە ھەرپارچەیەکی کوردستان ھەلومەرجی تایبەتی خۆی ھەیە، چونکە نیزامی جیاواز بەسەریاندا حاکمە. بەڵام حیزب و ڕاگەیاندنەکانی باشور حەساسیەتی زۆریان بەرامبەر بە ”ڕۆژھەڵاتی کوردستان”ھەیە و لە بەرنامەکانی خۆیاندا کەمتر ئاوڕ لە مێژووی سیاسی و چەوساندنەوەی نەتەوەیی ئەو پارچەیەی کوردستان دەدەنەوە.
ئەوەی کە ئێستا حیزب و میدیای کوردی لە باشور پەیوەست بە ڕۆژھەڵاتی کوردستانەوە قسەی لەبارەوە دەکات ، زیاتر بابەتە فەرھەنگی و کۆمەڵایەتییەکانە. بۆنموونە : شانۆی سەرشەقام لە مەریوان ، خۆسووتاندنی ژنێک لە مەھاباد ، ووشک بوونی گۆلی ورمێ و ھتد… دیارە ئەو شتانەش بەرلەھەموان ، میدیای کۆماری ئیسلامی باسیان دەکا و میدیای باشوریش وەکوو سەرچاوە بەکاریان دێنێ.
لەڕوانگەی منەوە فاکتەرەکانی ئەو حەساسیەتەی حیزب و ڕاگەیاندنەکانی باشور دیارن ، پێش ھەمووشتێک بە ئاشکرایی و بێ پەردە دەیڵێم کە پەیوەندی ئاڵۆز و وابەستەیی سیاسی میدیا و حیزبەکانی باشورە بە کۆماری ئیسلامی ئێرانەوە.
بەشێک لەدۆستان دەڵێن ”ئەو ئازادییەی لە تورکیادا ھەیە لە کۆماری ئیسلامی دا بەدی ناکرێت”. باشە خۆ ئەو میدیایانەی کە ھەنووکە ئەو کارەی بۆ ( HDP) لە تورکیا دەی کەن ، با بەپێچەوانەوە بڵێن :
”ئەی گەلی ڕۆژھەڵاتی کوردستان ، نیزامی کۆماری ئیسلامی ئێران نیزامێکی دیکتاتۆری مەزھەبییە ، لەسایەی ئەو نیزامەشدا ، بەڕێوەچوونی ھەر ھەڵبژاردنێک تەواو نمایشی و فۆڕمالیتەیە و بەشداری تیادا مەکەن”.
لەو نێوەشدا حیزب و میدیای باشوری کوردستان ،کەرەستە و ھێزی مرۆیی و مادی گونجاوی لەبەردەستدایە کە بتوانێ بەو کارە ھەڵبستێ و ئەرکی سەرشانی خۆی جێبەجێ بکات.
بەڵام :
بەو ناسینەی کە من لەسەر حیزب و ڕاگەیاندنەکانی باشوور ھەمە ، ھیچ لایەن و میدیایەک بایی ئەوەندە ”جورئەتی سیاسی” تێدانییە ئەو قسەیە یان پێچەوانەکەی بڵێت. چونکە بەشێکی زۆری ئەو میدیا و حیزبانەی کە موزایەدەی سیاسی بە باکوری کوردستانەوە دەکەن و سینگ دەردەپەڕێنن و ”ھەڵوێستی نیشتیمانی و نەتەوەیی”مان پێدەفرۆشنەوە ، لەڕاستیدا وەکوو گەمەیەکی شەتڕەنجی وان کە دەستێک لە”تاران”ەوە دەیان جوڵێنێ.
بەڵێ ، ئێستاش دەیڵێم :
قسەکردن لەسەر چەوساندنەوەی نەتەوەیی و ڕیسواکردنی ڕەفتارە نامرۆڤانەکانی کۆماری ئیسلامی ، ”جورئەتی سیاسی”گەرەکە کە لە میدیا و حیزبی باشوری کوردستاندا نایبینم!.