ڕۆژی شەممە ڕێکەوتی ١.٦.٢٠١٩ بەشێک لە ئەندامانی حیزبی دیموکراتی کوردستانی ئێران لە ئوتریش بەشداریان لە مێتینگێکدا کرد کە لە لایەن ڕێکخراوی „ STOP THE BOMB“ ەوە و دژ بە بەڕێوەبردنی ڕۆژی قودس لە لایەن کۆماری ئیسلامی ئێرانەوە ڕێکخرابوو.
لە میتینگەکەدا لە لایەن چەند ڕێکخراوێکی ئوتریشیەوە وتار پێشکەش کران و لە هەموو وتارەکاندا پاش شەرمەزارکردنی سیاسەتی شەڕخوازانەی کۆماری ئێسلامی ئێران لە ناوچەکەدا و هەڕەشەی سڕینەوەی وڵاتی ئیسرائیل لە سەر خەریتە، ئیشارە بە بەرزبوونەوەی ژمارەی لە سێدارەدراوان لە کاتی دەسەڵاتداری حەسەنی ڕووحانی و بەردەوامی چەوساندنەوەی تێکۆشەرانی سیاسی و کەمە ئایینیەکان و شەرمەزارکردنی سیاسەتی پاڵپشتی کردنی وڵاتانی ئورووپایی بە گشتی و وڵاتی ئوتریش بە تایبەتی لە کۆماری ئیسلامی و ڕێسوایی ئەم وڵاتانە سەبارەت بە پێوەندیە ئابووری و بازرگانیەکانیان لە گەل ئێران کرابوو.
شایانی باسە بە دەیان ڕێکخراو و کەسایەتی ناودار لە ژێر ناوی“ یەکیەتی بۆ ئێرانێکی دیموکرات وبە بێ بۆمبی ئەتۆم“ پاڵپشتی خۆیان بە وتار و بە برووسکە لەم ئاکسیونە دەربڕێبوو و یەکێک لەو ڕێکخراوانەش حیزبی دیموکراتی کورستانی ئێران بوو کە لە وتاری ڕێکخراوەکانێش دا چەند جارێک باسی لێوە کرا.
بە گشتی داخوازیەکانی بەشدارانی میتینگەکە بریتی بوون لە :
–قەدەغە کردنی خۆپیشاندانەکانی ئەلقودسی دژ بە یەهوودی
–پشتیوانی لە ئیسرائیل و دژایەتی لە گەل دژبەرانی یەهوودی
–پشتیوانی لە ئۆپۆزیسیۆنی دیموکرات و سکوولار لە ئێران و لە دەرەوە
–پچڕانی چاوپێکەوتنە دەوڵەتیەکان بۆ ئینکارکەرانی هۆلۆکاوست
–پچڕانی بازرگانی لە گەل ڕژیمی ئێران
–قەدەغە کردنی حیزبۆڵا بە یەکجاری لە ئوتریش و لە یەکیەتی ئورووپا
حیزبی دیموکراتی کوردستانی ئێران کومیتەی ئوتریش