كچێك لە وەهم، هاوار تەیب

بەیانییەك لە ‌ماڵ خۆتم بۆ بدزەوە

سەرێك بدە لە ‌ماڵی هەور

سەرێك بدە لە ‌ماڵی خەیاڵ و ئەندێشە

ئەی كچێك لە ‌وەهم

تۆ ڕەگەزە‌كانی شەڕ و ئاشتی مەدە بە‌كۆڵ خۆتا

تۆ ڕەنگەكانی من و

دڵشكانەكانی خۆتم

بۆ بگۆڕەوە بە ‌پرتەقاڵێك

بە میلۆدییەك و

بە پێخەفێك لە فرمێسكی یاران و

بە پێكێك لە ‌شەڕابی خوێنی جەنگاوەرە دۆڕاوەكانی خەیاڵ

سووربە وەك خوێنی  دایك.

من لە ‌هەسارەی دەیەمی كۆمەڵەی خۆردا

چاوەڕوانی دەركەوتنم

یەكەم جێژوانتم ڕازاندۆتەوە بە بۆنی ڤینۆس.

ئەی جوانتر لە وەهم

بەیانی بەچییەوە سەرقاڵی؟

لاپەڕە سپپیەكان مەگۆڕەوە بە دوێنێیەكی ڕەش و

دڵی بەرد مەكە بەئاو و

دڵی ئاو مەكە بە ‌ڕەقترین قسەی پیاوانی دۆڕاو.

تینوون بە خوێنی تۆ

من تینووم بە خەیاڵ و ئەندێشەت

لێرەوە من دەبمەوە

بە كوڕە غەمگینەكەی جاران و

لەگەڵ ئاوازە پڕ لە ‌غەمگینییەكانی تۆ سەما دەكەم

پێخەفی ئارامی دەدڕم و

دەبمەوە بەسەرابیترین پیاوی ئەم كەونە!

دەبمەوە بەشێواوترین پیاوی ئەو خەیاڵە.

دەست لە هەموو شتێك بەردەدەم وەهم نەبێ

تۆ نەبێ.

كە برسیم بوو دەست بۆ تاڵێك قژی تۆ دەبەم

‌كە تینووت بوو

پێكێك لە ‌نیگای دۆڕان نۆش بكە

ئەو دوو كۆترەی تۆ دەچنەوە باوەشی نیشتمانێك و

گۆرانییە حەزینەكان دەچرن و باوەشی ئەوان پڕ دەكەن

كە برسیت بوو

مەیەوە

من بە درێژایی شەو بەڕۆژوو دەبم و

یاری بە پەنجەكانی دەستم و

وەهمەكانی تۆ دەكەم.

كە تینووم بوو سەرێك دەدەم

لەو شەقامانەی كە دەمگەیەنن بە موسافیرێكی فیردەوسی.

ڕانیە

هاوار تەیب

لە ژمارە ٢٣ی مانگی ٦ی ٢٠٢٤ی گۆڤاری هەڵمەت لاپەرە ١٥، ساڵی یەکەم بڵاوبۆتەوە