خاک و خه‌ڵک و پێشمه‌رگه‌، ره‌شید حه‌یده‌ری

که‌ خۆی ناسی، وه‌کوو گه‌نجێک، ورد و په‌یجۆر    

ویستی له‌ مانای ژیان تێبگا.    

به‌های ئازادی بزانێ،    

له‌ ژێرده‌ستی و فه‌رهه‌نگی دیلێتیی باو،

له‌ نه‌ریتی کۆن و سواو

له‌ تاریکه‌ رێی داسه‌پاو،

رێ ده‌ر بکا.

له‌ خۆی پرسی: رێگاچاره‌؟

له‌ ناخیه‌وه‌ ده‌نگێک به‌ نهێنی درکاندی و تێیگه‌یاند

بۆ زانینی نرخی ئازادی، بۆ گه‌ییشتن له‌ واتای ژیان

ده‌بێ له‌ قامووسی فیداکاری و خۆنه‌ویستیی پێشمه‌رگه‌دا

په‌یجۆر ببێ.

کاتێک لاپه‌ڕه‌کانی قامووسی به‌ ئه‌سپایی هه‌ڵدایه‌وه‌،

{jcomments off}له‌ پێناسه‌ی ژیاندا نووسرابوو:

” لای هه‌ڵۆی به‌رزه‌ فڕی به‌رزه‌ مژی، چۆن بژی شه‌رته‌ نه‌ک چه‌نده‌ بژی.”

له‌ پێناسه‌ی ئازادیدا ته‌نیا وێنه‌یه‌ک دانرابوو:

منداڵێکی خنجیلانه‌ی کورد، جانتای کتێبه‌کانی له‌ شان کردبوو و له‌سه‌ر رێگای قوتابخانه‌، له‌ فڕۆکه‌یه‌ک ده‌یڕوانی که‌ به‌سه‌ر ئاسمانی شاردا ده‌سووڕایه‌وه‌. به‌ڵام نه‌ک هه‌ر هه‌ڵنه‌هات، به‌ڵکوو به‌ پێچه‌وانه‌ی باوی جاران، به‌ پێکه‌نینه‌وه‌ ده‌سته‌ بچکۆله‌کانی له‌ فڕۆکه‌وانه‌کان راده‌وه‌شاند و سڵاوی لێ ده‌کردن….

له‌ لاپه‌ڕه‌ی یه‌که‌می قامووسه‌که‌دا سێگۆشه‌یه‌ک

به‌ ئاڵای ره‌نگینی کوردستان نه‌خشێنرابوو

ورد ورد لێی راما،

له‌ بنه‌وه‌ی هێماکه‌دا به‌ هێڵی سوور نووسرابوو:

” هێلانه‌ی ژیان، سێگۆشه‌یه‌کی بیرکارییه‌

له‌ نێو ئه‌م سێگۆشه‌یه‌دا، خاک و خه‌ڵک و پێشمه‌رگه‌

گه‌رم گه‌رم یه‌کتریان له‌ ئامێز گرتووه‌.”

گه‌ر پێشمه‌رگه‌ نه‌بێ،

ئازادی ده‌پووکێته‌وه‌،

خاک له‌ ژێرپێی داهۆڵی داگیرکه‌ردا پێشێل ده‌بێ و

خه‌ڵک زنجیری کۆیلایه‌تی و دیلیی له‌ مل ده‌کرێ.

خاک و خه‌ڵک و تاسه‌ی دووری

له‌ نه‌بوونی پێشمه‌رگه‌دا

ده‌بن به‌ هاوڕێی گیانی گیانی

و ئیتر به‌ یادی پێشمه‌رگه‌ و

به‌ هیوای هاتنه‌وه‌ی به‌هارێکی تر

به‌ ئازاره‌وه‌ زستانی ژیان ده‌سووتێنین.

ره‌شید حه‌یده‌ری – ستۆکهۆڵم

‏‏١٦‏/١٢‏/٢٠١١