ده‌‌رسێک بۆ مێژوو، رێگا لێ گۆڕان له‌ به‌فرداا؟، مه‌لا برایم مه‌جید پوور

له‌ گۆره‌پانی خه‌باتی ڕزگاریخوازانه‌ی گه‌لاندا مێژوو باسی زۆر که‌سایه‌تی به‌رزو هـه‌ڵکه‌وتـوی بـۆکردووین که‌ چۆن ڕێبه‌ریی شۆڕشیان کردووه‌، زۆرن ئه‌و گه‌لانه‌ی که‌ بۆ سه‌ربه‌ستی گه‌ل و زێده‌که‌یان به‌نرخترین و به‌رزترین قوربانییان داوه‌. هه‌موو ئه‌وانه‌ی له‌و بـواره‌دا گیانـیان به‌خـت کـردووه‌، به‌ قاره‌مانی نه‌ته‌وه‌که‌یان ناویان نراون.‌

زۆرن کاره‌ساتی سه‌رسوڕ هـێـنـه‌ر که‌ لــه‌ مــه‌ودای خــه‌بـاته‌که‌دا ڕویـان داوه‌، نـوسـراون و بـونـه‌ مێژووی گه‌ل و نـه‌وه‌ی دوایی کردویانن به‌ وێنه‌و به‌ڵگه‌ی هه‌قـانییه‌تی داواو خـه‌بـاتـه‌کـه‌یـان و شانازیش به‌و ڕابردووه‌  ده‌که‌ن.

گه‌لی کوردیش یه‌کێکه‌ لـه‌و گه‌لانه‌ی که‌ مێژوویه‌کی دوورو درێژی له‌ خه‌باتی ڕزگاریخوازانه‌ی خۆیدا تۆمار کردووه‌ و قۆربانی زۆر گه‌وره‌و به‌نرخی  پێشکەش به‌ باره‌گای گه‌ڵ کردووەو تا ئێستاش به‌رده‌وامه‌، که‌ به‌ داخه‌وه‌ نه‌گه‌یشتۆته‌ ئامانجه‌ بنه‌ڕه‌تییه‌کانی که‌ برێتیه‌ له‌ ڕزگاری گه‌ل و نیشتمان.  ئه‌وه‌ بۆچی پێیان نه‌گه‌یشتووه‌ ؟ هۆی ئه‌و نه‌گه‌یشتنه‌ چیه‌؟ و زۆر پرسیاریتریش هه‌ن که‌ مه‌به‌ستی ئەو‌ باسه‌ نیه‌. ته‌نیا من ئه‌وه‌نده‌ ده‌ڵێم:‌ یه‌کێک له‌ هۆیه‌ سه‌ره‌کییه‌کان ئـه‌وه‌یـه‌ کـه‌ ئێمه‌ ده‌رسمان له‌ مێژووی ڕابردوومان‌ وه‌ک پێویست وه‌رنه‌گرتـووه‌، زۆر رووداو کـه‌ بـۆ خۆشمان به‌ خراپمان زانیوه‌ دوپاتمان کردوونەته‌وه.‌‌

به‌ جێگای ئه‌وه‌ی بناغه‌کانی خه‌باته‌که‌مـان پته‌وتر بکه‌ین و هه‌ڵه‌ و په‌ڵه‌کان ڕاست که‌ینه‌وه‌و شێوه‌و ڕێکاری ئه‌مڕۆییان بۆ دابڕێژین، ڕاسته‌وخۆو ناڕاسته‌وخۆ خه‌ریکین ئه‌و بنه‌مایانه‌ هه‌ڵده‌وه‌شێنین یان که‌مڕه‌نگیان دەکەین. به‌شێوه‌یه‌ک باس له‌ ڕێبه‌رانمان ده‌که‌ین که‌ به‌ ڕای من ڕه‌خنه‌گرانه‌ نیه‌و ڕوخێنه‌ره‌! ڕاسته‌وخۆ بێ یان ناڕاسته‌وخۆ ئه‌وه‌یه‌ که‌ دوژمنه‌کانمان گه‌ره‌کیانه‌و هه‌ر به‌ قازانجی ئه‌وانیش تەواو بووەو ده‌بێ. سه‌یر ئه‌وه‌یه‌ خۆمان کردبوومانن به‌ ڕێبه‌رو له‌ زۆر حاڵه‌تدا تا ڕاده‌ی په‌رستن خۆشمان  ویستوون و شانازیمان پێوه‌ کردون! که‌چی ئێستا که‌ له‌ نێومان نه‌ماون و گیانیان فیدای گه‌ل و نیشتمان کردووه ‌، ئه‌و هه‌موو خۆبه‌خت کردنه‌یان پێی ڕێده‌خه‌ین و ڕابردوویان ده‌به‌ینه‌ ژێر پرسیار! به‌ بێی ئه‌وه‌ی جارێک له‌ خۆمان بپرسین: ئه‌دی چـۆن بـوو که‌ ده‌مانزانی ئاوا خراپن، کردبومانن به‌ ڕێبه‌ری خۆمان و له‌ به‌رانبه‌ر کرده‌وه‌کانیان نه‌ک هه‌ر بێده‌نگ، به‌ڵکو فه‌ڕمان ‌به‌ریشیان بـویـن!؟ ته‌ماشاچی ئه‌و هه‌مـو هـه‌ڵـه‌و پـه‌ڵانـه‌ بوین و مته‌قێکمان  لێوه‌ نه‌ده‌هات! به‌گژ هه‌ر که‌سدا ده‌هاتین که‌ کۆتبیای پشتی چاویان برۆیه‌!! وتارو بڕیاره‌کانیان ببوونه‌ ئایه‌ته‌لکورسی بۆ چاووزارو خۆپاراستن ده‌مانخوێند! ئێستاکه‌ له‌ گۆڕێدا نین هه‌مـووخراپه‌کان ده‌خه‌ینه‌ سه‌رشانی ئه‌وان وهه‌مو باشه‌کان به‌نێوی خۆمان سه‌بت ده‌که‌ین! ئای چ دابه‌شکه‌رێکی زاڵم و ناعادڵین و چاومان قوچاندووەو زارمان کردۆته‌وه‌، ڕاستیمان ژێر پێی ناوه‌و قه‌ڵه‌ممان له‌ بـوختان و ناڕه‌وا نووسین  وه‌گه‌ڕ خستووه‌! ئەرێ داخوا بێدەنگ بوون له‌ حاند ئه‌و هەموو خه‌تایانه‌ به‌ وته‌ی ئه‌وان خـۆی گه‌وره‌ترین تاوان نیه ؟ به‌ش به‌ حاڵی خۆم پێموایه‌ هیچ مرۆڤێک نابێ ئه‌وه‌نده‌ به‌ پیرۆز بزانین و‌ وا بزانین ئه‌و هیچ عه‌یبی نیەو هه‌ڵه‌وپه‌ڵه‌ی لـه‌ کاره‌کانیدا نابێ‌! مـرۆڤ به‌پـێ سـرۆشتی دەبێ هه‌ڵـه‌و خـه‌تاشی هـه‌بـێ، لـه‌ به‌ره‌ی مرۆڤدا  نیەو گیر ناکەوێ، هه‌ڵه نەکاو هەموو شتێک بزانێ وهەرچی بیکا  هــەر ئه‌وه‌ باش بـێ. ‌با هه‌موومان بـاش بزانین خستنه‌ ژێر پرسیاری ڕێبه‌رانمان، خـستنه‌ ژێـر پرسیاری خـۆمانه‌، نیشانه‌ی نه‌زانی و دڕدۆنگـی و بـڕوا به‌ خـۆ نه‌بونمانه‌. هه‌ن مـیرزای قه‌ڵه‌م به‌ ده‌ستی که‌مـزان، به‌ ناو زانای بیرته‌سک، به‌ ناو ڕووناکبیری ده‌رون تاریک، قسه‌ قه‌ڵه‌وی وره‌ باریک، خۆویستی که‌س نه‌ویست و زار هه‌راوی ده‌رون به‌رته‌سک، بۆ ئه‌وه‌ی وا بنوێنن زۆر زانن،  ده‌چن ڕابردووی زانایان و گه‌وره پیاوان‌ ده‌خه‌نـه‌ ژێر پرسیار، بۆ ئه‌وه‌ی وا بنوێنن گۆیا ئه‌دیب و فه‌یله‌سووفـن، ده‌ست دەکه‌‌ن به‌ قـسه‌ی قه‌ڵه‌می که‌ به‌داخـه‌وه‌ مـانـای وشه‌کانیش به‌باشی نازانن، راسته‌وخۆ که‌وتوونه‌ ژێر کاریگه‌ری پڕوپاگه‌نده‌ی چه‌واشه!‌

 زۆر بـاشـم له‌بیره‌ دوای کۆنگره‌ی هه‌شت که‌ مه‌سه‌له‌ی لیسته‌ی “فیکس” ببووه‌ بابه‌تی رۆژ، زۆر بوون ئه‌وانه‌ی بـه‌ حـه‌ق مانای وشه‌که‌شیان نه‌ده‌زانی و ده‌یانگوت لیسته‌ی فیفس و ببوونه‌ بڵیندگۆیەک که دژی شه‌هید دۆکتور قاسملو پڕوپاگەندەیان بڵاو دەکرده‌وه‌، ئـەوانه‌ ‌ده‌یانه‌وێ رابردوومـان پـێ ڕێخه‌ن و ویسـتی دوژمنان جێخه‌ن!  ده‌چمه‌وه‌ سه‌رباسه‌که‌ی خۆم و چیدی درێژ دادڕی ناکه‌ م. ته‌نیا ده‌ردی دڵه‌ ده‌گه‌ڵ دۆستان. باسه‌که‌م ڕووداوێکی تـاڵ و شیرینه‌ و پڕیه‌تی له‌ ده‌رسی به‌نرخ وکاره‌ساتی سامناک که‌ ئه‌گه‌ر به‌ دڵێکی کراوه‌و به  به‌رچـاوڕونی تێوه‌ی ڕامێنین، زۆر شتـی نه‌دیـتراوی تێدایه‌و ده‌سه‌لمێنی که‌ هه‌ستی نه‌ته‌وایه‌تی له‌ هه‌ستیارترین سات و کات و دژوارترین هه‌لومه‌رجـدا خۆی  ده‌نوێنی و هه‌قانییه‌تی خۆی ده‌رده‌خا، ته‌م و مژی دژایه‌تی و ناکۆکی ده‌ڕه‌وێنێ و ئه‌رکی مـێـژوویی خۆی به‌جێ دێنێ. بۆ روونتر بوونی بابه‌ته‌که‌ پیویسته‌ تۆزێک بۆ دواوه‌ بگه‌ڕێمه‌وه‌. ئێمه‌ وه‌ک کادروپێشمه‌رگه‌ی هێزو کومێته‌ی شارستانی نه‌غه‌ده‌ی حیزبی دیمۆکراتی کوردستانی ژێـرده‌ستـی ئێـران که‌ بـه‌ هـۆی هێرشی هه‌مه‌لایه‌نه‌ی  پاسـدارو ئه‌رته‌شی ئـێران له‌ سه‌ر شاخانی نه‌غه‌ده‌ عه‌یـب نه‌بێ ڕاو نـرا بـویـن!! سه‌ر شاخـانـێکی که‌ ببوو به مه‌کۆی هه‌موو شۆڕشگێڕانی ئه‌و ده‌م، دێمۆکرات و کۆمه‌ڵه‌، موجاهیدو… جگه‌ له‌وانه‌ش هه‌ر کێی له‌ چنگ کۆماری ئـیسلامی وه‌زاڵـه‌ هاتبون روویان کردبووه‌ ئه‌وێ، خۆ قاچاخـچی و سه‌وداگه‌ریش هه‌ر باسی ناکرێ،   ئه‌و قه‌ڵا پته‌وه‌ زۆر به‌هاسانی گیراو ئێمه‌ش هه‌تـا بناری قه‌ندیل دیوی گه‌رمێن ڕۆیشتین وئاوڕیشمان نـه‌داوه‌! ڕۆژی دوای جێژنی 25ی گه‌لاوێژی 1363ی هه‌تاوی له‌  عه‌رزو عـاسمانـه‌وه‌ هێرش کرایە سه‌ر شاخان و زۆر هاسانتر له‌وه‌ی که‌ رژیم  چاوه‌ڕوانیشی نـەده‌‌کـردو ئێمه‌ش  چاوه‌روانی نه‌بوین  ئه‌و مه‌ڵبه‌نده‌ی گرته‌وه‌، جێگای داخه‌ که‌ نەمانتوانی کتێب و شته‌ به‌ که‌ڵکه‌کانیشمان  وەک پێویست لانی که‌م ژێر خاک بکه‌ین که‌ ده‌کرا بیکه‌ین! بۆیه‌ ئاوا به‌ زه‌قـی و بێ تێبینی ده‌ینووسم، چونکه‌ ناوی باسه‌که‌م بۆ مێژویه‌. دیاره‌ ئه‌وه‌ باسێکی درێـژه‌و  ئه‌گه‌ر مه‌رگ مه‌ودام بدا نوسیومه‌و چاپی ده‌که‌م. به‌ بڕوای من باسەکه‌ ده‌بوو ده‌کرا ده‌رسی لـێـوه‌ر بگیرێ. بـه‌ دوای ئه‌و هێرشه‌و ئه‌و به‌ ناو پاشه‌کشه‌ نه‌خوازراوه‌، یان باشتر بڵێم ئه‌و راکردنه‌ی بێ ئاوڕ دانه‌وه،‌ له‌ بناری قه‌ندیل گونده‌کانی، ئاشقوڵکه‌ و سینه‌مۆکه‌، خۆمان گرته‌وه‌. لێره‌دا چونکه‌ بۆ مێژویه‌ ده‌بێ یادێکی به‌ خێر له‌ هێزی قه‌ندیل بکه‌م که‌ ئه‌گه‌ر ڕێنوێنی و هه‌وڵ و ماندوبوونی به‌رپرسانه‌ و شۆڕشگێڕانەی ئه‌وان نه‌بایه‌ بێگومان تووشی مەترسی و کاره‌ساتی زۆر تاڵ و دڵته‌زێن ده‌بوین هه‌ر بۆیه‌ سوپاسیان  ده‌که‌م پێموایه‌ دەبێ حیزبیش ئه‌گه‌ر نه‌یکردبێ بیکا‌. ‌پـاشان بۆ سازمان دان و خۆڕێک خستنه‌وه‌ له‌ لایه‌ن ده‌فته‌ری سیاسی شه‌هـیدی مه‌زن کاک دۆکتور  سه‌عید راسپێردرا وهاته‌ لامان، بۆ ئه‌نجامی ئه‌و ئه‌رکه‌. له‌و شوێنه‌ وه‌ک باسم کرد هـێـزو کۆمیته‌ شارستانه‌کانی پیرانشار، شنۆو نەغه‌ده‌ی لێ‌ ‌جێگیر  بوین. له‌و ڕێکخستنه‌وه‌دا وا بڕیار درا که‌ قۆناغی بنکه‌ی جێگـیر نامێنێ و ده‌چینه‌ قۆناغی پارتیزانـی و هه‌موو کارو چالاکیمان به‌ شێوه‌ی گه‌ڕۆکی درێژه‌  دەده‌‌ین و خه‌بات به‌ردەوام  دەبێ. بـا ئـه‌وه‌ش بڵێم به‌هۆی ئه‌و شکآنه‌ی تـووشی هـاتـبـویــن، هێندێک وره‌یان له‌  ده‌ست دابوو، قوناغی گه‌ڕۆکیش بۆیان نامۆ بوو، بـۆیـه‌  له‌و ڕێـک خستنه‌وه‌دا به‌ پۆل پێشمه‌رگه‌ چه‌کیان داده‌ناو ده‌ڕۆیشتن، ئی وایان هه‌بوو له‌ ڕێگایه‌ ده‌گەڕاوه‌! پاش ئه‌و ڕێک خـسـتنه‌وەیه‌ ‌کومیته‌ی نه‌غه‌ده بڕیاری دا ده‌گه‌ڵ هێزه‌که‌ی بکرێـنه‌ دوو به‌ش و له‌ دوو قـۆڵـه‌وه بچـنه‌وه‌ نـاوخـۆ. لکه‌کانی 2 و3 ده‌گه‌ڵ ئه‌رکانی هێز‌و کادره‌کانی ناوچه‌ و دوو که‌س له‌ ئه‌ندامانی ده‌سته‌ی به‌ڕێوه‌به‌ری بچنه‌وه‌ ناوچه‌کانی خه‌لیفه‌ لیان، قاڕنێ و شاروێرانی سه‌رێی، لکی1و پێشمه‌رگه‌کانی کومیته‌ی شارستان بچنه به‌ر‌ی قه‌ڵاتان و ئه‌گـه‌ر بکرێ سه‌رێکی شاری نه‌غه‌ده‌ش بده‌ن. دیاره ‌به‌رپرسی کومیته‌ی شارستان کاک عـه‌وڵا ئیبڕاهیمی و نـووسه‌ری ئەو دێڕانه‌، بـرایم مه‌جیدپور وه‌ک ئه‌ندامی هه‌یئه‌تی ئیجرائی دەگه‌ڵ ئه‌و دەسته‌یه‌ بوین. ئێمه‌ ده‌بوایه‌ ‌له‌ ڕێگای کێله‌ شینەوه،‌ بڕۆیـن وهێزو کـومیته‌ شارستانی شنۆشمان ده‌گه‌ڵ بوو، ده‌بوایه‌ بچینه‌ مه‌ڵبه‌ندی سیده‌کان، هێزی کێله‌شین ده‌بو هه‌تا ده‌مانگه‌یەنێته‌ شوێنی مه‌عموریه‌تمان ڕێنوێنیمان بکه‌ن. چونکه ‌ ده‌بوو له‌ مه‌ڵبه‌ندی شنۆوه‌ تێ په‌ڕین. دوای جێگیر بوونمان له‌ سیده‌کان لـه‌ باشووری کوردستان، دەسته‌یه‌ک له‌ ئێمه‌و له‌ هێزی کێله‌شین به‌ڕێ کران بۆ ناوچه‌، هه‌تا بارودۆخی ناوچه‌که‌ تاقیکه‌نه‌وه‌ و پێوه‌ندی بێسیمیمان ده‌گه‌ڵ بگرن و ‌پاشان ئێمه‌ش بچین.

بـڕیار ئه‌وه‌ بوو من ده‌گه‌ڵ ئه‌و ده‌سته‌یه‌ بم، شتێکی به‌ ڵای منه‌وه‌ سه‌یر بوو ئه‌وه‌ بوو که‌ به‌رپرسی لک پێداگرت له‌ سه‌ر ئه‌وه‌ که‌ نابێ ئه‌من بچم، دیاره به‌و بیانویه‌ که‌ له‌ به‌ر پاراستنی گیانی من پێش تاقیکردنه‌وه‌ مه‌سڵه‌حه‌ت نیه ئـه‌من ده‌گه‌ڵ ئه‌و  ده‌سته‌یه‌ بم، به‌ڵام پێموایه هۆیه‌کیتری هەبوو ‌که‌ من ئه‌و ده‌م هه‌ستم پێ نه‌کرد کەچی دوایه‌ بۆم روون بووه‌! هـه‌رچند منیش سوور بـووم لـه‌ سـه‌ر ئه‌وه‌ که‌ ده‌چم‌، به‌ڵام به‌رپرسی کۆمیته‌ی شارستان گوتـی: من وه‌ک به‌رپرس بڕیار ده‌ده‌م ئه‌تۆش ده‌گه‌ڵ من بی.

مانگی سه‌رماوه‌زه‌ و قه‌ندیلیش به‌ هاوینێ سه‌رماوه‌زیه‌تی. ڕۆژێک به‌رپرسی کومیته‌ گـوتی: خۆتان ئاماده‌ بکه‌ن ده‌گه‌ڕێنه‌وه‌. تائێستاش بۆم نه‌کرا بزانم بۆ گه‌ڕاینه‌وه‌! هه‌رچی له‌ هاورێی به‌رپرسم ده‌پرسی بۆ؟ وەڵام ئه‌وه‌ بوو بڕیاری ده‌فته‌ره‌! سه‌رئه‌نجام گه‌ڕاینه‌وه‌و له‌ گوندی بۆڵێ که‌ ئه‌وده‌م چۆل بوو، بارگه‌مان لێی به‌عه‌رزی دادا. مه‌سه‌له‌ی کورت مانه‌وه‌مـان خۆی بابه‌تێکیتره‌. ورده‌کاری ئه‌و ڕۆیـن و گه‌ڕانه‌وه‌یه‌ زۆره‌ که‌ هه‌ر بۆ ئاڕشێوی حیزب ده‌بێ.

 ده‌قی ڕوداوه‌که, رێگا لێ گۆڕان له‌ به‌فردا  و که‌وتنه‌ ده‌ست پارتی دێمۆکڕاتی کوردستان

 

 ڕێکه‌وتی ١٣ سه‌رماوه‌زی ساڵی ١٣٦٣ی هه‌تاوی ده‌سته‌یه‌ک له‌ کادرو پێشمه‌رگه‌کانی هـێزو کومیته‌ شارستانی نه‌غه‌ده‌ سه‌ر به‌ حیزبی دیمۆکراتی کوردستانی ژێرده‌ستی ئێران که‌ برێتی بوون له:‌

 ١- کاک عـه‌وڵا ئیبراهیمی به‌رپرسی کۆمیته‌ شارستانی نه‌غه‌ده‌

٢- خالید قاره‌مانی

 ٣- برایم مەحمودی نـاسراو به‌ برایم مونجی

 ٤- مراد دەریازی

٥- نەبی تالـیبـ پـوور (ئازه ری)

 ٦- سولەیـمان باریکی

٧- سولەیمان عەبدوڵاهی

٨- رەحمان مەحموودی

٩ -محەممەد ئه‌حمەدی ناسراو به‌ محەممەده‌ قه‌ڵه‌وه‌

١٠- مـامـۆسـتـا عـوسـمـان محه‌ممه‌د ئه‌مینی 

١١- مـامــۆسـتا مەحموود 

١٢- سمایل 

١٣- محەممەد زیـبا که‌ پ.م-ی هێزی کێله‌شین بوو 

١٤- برایم باڵەخچی

١٥- مه‌لا بـرایـم  مـەجـیـدپـوور، ئه‌ندامی هه‌یئه‌تی ئیجرایی کۆمیته‌ شارستانی نه‌غه‌ده‌

لـه‌ گـونـدی بۆڵێ بناری قه‌ندیلی دیوی گه‌رمێن  به‌ره‌و ڕۆژهه‌لاتی کوردستان وه‌رێی که‌وتین. ئه‌و تیمه‌ پێک هاتبوو لـه‌13 پێشمــه‌رگـه‌و 2  که‌س له‌ ئه‌ندامانی هه‌یئه‌تی ئیجڕایی  که‌ بریتی بوون له‌  به‌رپرسی کومیته‌و نـووسه‌ری ئـه‌م دێـڕانـه‌. قه‌ندیل  سه‌ری سپی و ته‌پومژی لێهاڵاوه‌ و ره‌شایی پێوه‌ دیار نیه‌ ، داوێـنـه‌کانـی ڕه‌شه‌ و به‌فــر بـارگـه‌ی لـێی به‌ زه‌ویـدا نـه‌داوه‌، لـه‌ سه‌ران به‌فـر ده‌بارێ و له‌ داوێنان ورده‌ خــونـاوه‌ی  بارانه‌. به‌و حیسابه‌ کـه‌ هـه‌مـوو ماڵـێکی کـورد ماڵی پێشمه‌رگه‌یه‌ زۆر خۆمان به‌ ته‌داره‌کی خوارده‌مه‌نی و شتی واوه‌ ماندوو نه‌کرد بوو، به‌ڵام مـن بـه‌ پێی ته‌جره‌به‌ی ژیانی فـه‌قێیایه‌تی پێم وابوو ده‌بێ هێندێک خوارده‌مه‌نی ده‌گه‌ڵ خۆمان به‌رین هه‌ربۆیه‌ هێندێک هه‌ڵوام دروست کرد و ته‌نه‌که‌یه‌کی 5 کیلۆییم لێ پڕ کرد.

به‌ پێی وته‌ی برای به‌رپرس ده‌سته‌یه‌ک له‌ پ.م هێزی قه‌ندیل هاوڕێمانن و بۆ به‌ڵه‌دی ڕێگامان خاتر جه‌مین. سه‌ر له‌ به‌یـانـی لـه‌ بنکه‌که‌مان وه‌رێی که‌وتین. له‌  گوندی ئاشقولکه‌ تێپه‌ڕین و وه‌هـه‌ورازی هه‌ڵگه‌ڕاین به‌ره‌و ره‌زگه‌ و ماره‌دۆ که‌چی له‌پـڕ له‌ هێزی   قه‌ندیل ڕا هه‌رایان کرد، برایانی هێزی قه‌ندیل بگه‌ڕێنه‌وه‌ ئێمه‌ په‌کـمـان که‌وتووه‌. ئێمه‌ که‌ به‌ ته‌واوی ئاماده‌ی سه‌فـه‌ر بوین نه‌گه‌ڕاینه‌وه، به‌و حیسابه‌ که‌ برای به‌رپرس خه‌ڵکی پیرانشاره‌و له‌وێش پێشتر کاری حیزبی کردووه‌ له‌وه‌ نیگه‌ران نه‌بوین که‌ ڕێگه‌ نازانین. شه‌و گه‌یشتینه‌ رزگه‌، شەو له‌وێی ماینه‌وه‌. ئێوارێ چوینه‌ لای پۆلێک قاچاغچی ده‌گه‌ڵ وان قه‌رارمان دا پێکه‌وه‌ بڕۆین. ده‌بوایه‌ کاتژمێر 5ی به‌یانی وه‌ڕێی که‌وین و له‌ دیدی پێگه‌ی به‌عسی دوور ده‌که‌وینه‌وه‌، به‌ڵام مەخابن به‌یانی که‌ ڕابوین ئه‌سپه‌که‌مان  نه‌ماوه‌. هێندێک له‌ هاوڕێێان لایان وابوو لێمان دزراوه‌، به‌ ڵام من پێموابوو به‌ڕه‌ڵا بووه‌ و ڕه‌نگه‌ بیدۆزینه‌وه‌ . ئه‌مه‌ به‌ شوێن ئه‌سپدا ده‌گه‌ڕاین له‌ قاچاغچیان به‌ جێماین، ئه‌سپمان دۆزییه‌وه.‌

وڵات رووناک ببوو، مۆڵگه‌ بڕێکیان ته‌قه‌ی ڕه‌شۆکی لێکردین. هه‌ر چۆنێک بێ بۆ نیوه‌ڕۆیه‌کی گه‌یی و گه‌یشتینه‌ کانی که‌نێره‌. کانی که‌نێره‌ ئاوایی نیه‌و کانیاوێکه‌ نانی نیوه‌ڕۆمان له‌وێی خوارد. له‌ وێی به‌و لاوه‌ به‌فـر عه‌رزی داپۆشی بوو، ته‌نیا ڕێگه ‌ڕێچکه‌ی قاچاغچیان بوو. ئه‌و  ڕێچکه‌یه‌ بۆ کوێی ده‌چێ نازانین. ڕێگه‌ جارێک سه‌ر به‌رەو ‌ژێرو جارێک  ده‌سته‌و هه‌ورازه‌و پێچه‌ڵ پوچه‌ڵه‌، دو دو پێکه‌وه‌  قسه‌ ده‌که‌یـن و هه‌ر یه‌که‌ ئاواتێکی هه‌یه‌، یه‌ک نیازی دیتنی ژن و مناڵی هه‌یه‌ ، یه‌ک ده‌یه‌وێی دایک و بـابی ببیبێ، ئاوات و ئامانجی هاوبه‌شیش چونـه‌ ناو خه‌ڵکه‌ بۆ ئه‌وه‌ی ڕاسپارده‌ی حیزبییان پێ بگه‌ێینین و راو بۆچوونی ئه‌وانیش وه‌رگرین بۆ کارو تێکۆشانمان، به‌ کورتی بۆ باشتر به‌ڕیوه‌ بردنی ئه‌رکی شوڕش و خه‌باتمان پێکه‌وه‌ ڕاوێژبکه‌ین.

ئێمه‌ وامان دانابوو کـه‌ شـه‌و ده‌گەینه‌ گوندی ئاڵیمه‌ران و شه‌وی دواتر ده‌گـه‌یـنــه‌وه‌ شوێنی دیاری کراوی خۆمان، به‌ڵام پێشینان گوتویانه‌:  ته‌قدیر ته‌گبیر به‌تاڵ ده‌کا. ئێمه‌ پێشبینی ئه‌وه‌مان نه‌کردبوو بگره‌ ئاماده‌یی ئه‌وه‌شمان نه‌بـوو که‌ ده‌گه‌ڵ سروشت به‌ره‌و روو ده‌بین، باکمان له‌وه‌ نه‌بوو که‌ دوژمن چ خه‌ونێکمان بۆ ده‌بینێ و چ پیلانێک داده‌ڕێژێ و ئاماده‌ی به‌ره‌و روو بوونی بوین، به‌ڵام نـه‌مـانـده‌زانی سـروشت بـۆسه‌ی بـۆ دانـاویـــن و ده‌ یه‌وێ له‌ ناومان به‌رێ.

کاتژمێر 5ی پاش نیوه‌ڕۆیه‌  سۆزه‌ بایه‌کی ساردو تیژ ده‌گه‌ڵ کلۆ به‌فـری سپی و جوان هه‌ڵیان کردووه‌، هه‌روا دێ و توندتر ده‌بن، ڕۆژئاوا نه‌بووه‌، به‌ڵام ته‌پ ومـژو کڕێـوه‌ دنیایان تاریک کردووه‌. به‌ پێی ئەوه‌ به‌ ته‌مه‌نترینی هاوڕێیان بوم و هاوڕێی به‌رپرسیش ئه‌رکی به‌ڕێوه‌به‌ری سه‌فه‌ره‌که‌ی به‌ من ئه‌سپاردبوو، بۆ کارەکان پـرسیان به‌ من ده‌کرد. (له بەر ئەوە‌ی ئێستا له‌ سه‌ر کەیخودایه‌تی شه‌ڕه‌ نەکا کاک عـەوڵا پێی ناخۆش بێ کـه ده ڵێم من بوومه‌ کەیخودا!)‌‌ سه‌رپه‌لی پێشمه‌رگـه‌کان که هه‌ستی به ماندوویی ‌کردبـوو، داوای له ‌هاوڕێیانی کردبوو تاوێک سواری ئه‌سپه‌که‌ی بکەن، به‌ڵام زۆر زوو تێ گه‌یـبـوو کـه‌ ســواری بـه‌و سه‌رمایه‌ جێگای مەترسییەو دابه‌زیبوو. هه‌وا به‌ تـه‌واوی تاریکی کـردوه‌، کڕێوه‌ له‌ حـاڵه‌تی ئاسایی تێپه‌ڕاندووه‌، گێژی ده‌داو ده‌یسوڕێنێ، به‌ڵام وڵات هه‌موو سپییه‌، هه‌موو ڕه‌شاییه‌کی پێوه‌ دیاره. ڕێچکه‌ی کاروان پڕ بۆته‌وه‌، بۆ کوێی ده‌چێن که‌س نـازانـێ، تـه‌نـانـه‌ت رێگای گەڕانه‌وەش نازانین، ته‌نیا شاره‌زای ئه‌و ڕێگایەو ئه‌و ناوچه‌یه‌‌ هاوڕێ به‌رپرس بـوو که‌ به‌داخه‌وه‌ به‌و وه‌زعەو تاریک و تومانه‌ هه‌ر به‌ قه‌ده‌ر ئێمەی نابه‌ڵه‌د‌ شارەزا بوو! ئه‌ویش له‌ حاڵی ئاساییداو ده‌گه‌ڵ  ده‌سته‌یه‌ک بووه‌ که‌ هه‌مویان شاره‌زا بوون، ئێستا بەفـرو کڕێوەیەو ئاسەواری ڕێگا ناسینەوه نابیندرێ، دیاره به‌فری زۆرو کڕێوه‌ش خۆی ڕیگا له‌ به‌ڵه‌دیش ده‌شێوێنێ، ته‌نیا ده‌یگوت به‌ دەستی چەپدا هێنده چەپ ببوین هاتبوینه‌وه ڕاسته! کڕێوه‌ وای هه ڵکردووه کە نه‌ماندەتوانی هەنگاوێک لێک دوور که‌وینەوه. نه‌ ڕێگایه‌ک هه‌یەو نه‌ دەزانین بەرەو کوێی دەچین، ئەوەی روونه و دەبێ دەگەڵی بەرەو روو، بین مـه‌رگه.

‌کڕێوه دەرەتانی بڕیوه‌و نـابێ هەروا به هاسانی خۆی به‌ دەستەوه بدەین. داوام له هاوڕێان کرد لێک وه‌کۆ بین وبیرێک بکه‌ینه‌وه وبڕیارێک بدەین، هەروا بێ به‌رنامه‌ نابێ. هاوڕێ به‌رپرس هێندێک دڵخۆشی دانه‌وه‌و قسەی بۆکردن، منیش گوتم: هاوڕێیان به‌ پێی تەجرەبەی ژیانم دەمەوێ ده ‌قـودۆغـری قسەتان دەگەڵ بکەم، بـاش بـزانـن ئـێمـه ڕێگامان هەتڵه کردووه، تەنانەت روون نیه بەرەو کام لا دەچین! ئـەوەی له هەمـوو شتـێک له ئێمه‌ نزیکتره مەرگه، هاوڕێیان ئێمه‌ پێشمه‌رگەین و بۆ ڕزگاری گەلێک خەبات دەکەین له‌ ناویشمان ڕا دیاره، پێشەنگی مەرگین، که‌وابوو نابێ مه‌ترسی مه‌رگ ورەمان لیێ بستێنی و بەڵایەکمان به سەر بێنێنێ! ‌هاوڕێیان رۆژ رۆژی پیاوانه‌، ده‌بێ بیسەلمێنن که کوڕی ڕۆژی تەنگانەن، دەبێ تا دوا هەناسه بەرەنگاری سروشتیش ببنەوه که دەیەوێ گیانتان لێ بستێنێ، ڕزگار بوون لەو تەنگانەیه حەماسەیەو ئێوەش نیشانتان داوه حەماسه خوڵقێنن.

به خۆشییەوه له ڕواڵەتی هاوڕێیان خۆڕاگری و ورەم دەدیت، مەخابن هەستم بەوه کرد که‌ هاورێی  سه رپەڵ کاک خالید قارەمانی، زۆر ماندوو بووه‌ و گه‌لێک نیگه‌رانـه‌، هەر‌ ده‌ڵێ: مامۆستا چیمان لێ دێی؟

روومان کرده شوێنێک  که‌ گۆڕاییەکی چوکەیه و له سێلاوه کێو دەوریان داوه، به‌ قه‌دو لاپاڵەکانەوه  لک و پۆپی دارو دەوەن دەبیندرێ، بڕیارمان دا لەو شوێنه بمێنینەوەو هەر چـــۆنێک بێ له‌و دارو دەوەنه، ئاگرێک ساز کەین.  له‌ پاناوکەکه به فرمان لاداو بوینه دوو ده سته، دەستەیەک دەچـوو دەسته چیلەی دێناو دەستەکەیتر خۆی گەرم دەکردەوه. ئەو دارو دەوەنه که‌ هەمووی تیرۆک بوو، ‌هەم زۆر هاسان دەشکاو هەم زۆر چاک ئاوری دەگرت، بەڵام که‌م  دەوام بـوو. خـالـیـدی شەهـیـد نەیده‌تـوانی وه‌ک ئەوانـیتر بچێ نۆره داری خۆی بێنێ. بەکورتی ئەو شەوه تا ڕۆژی کردەوه، پێیه‌وه‌ خافڵاین، دیمه‌نێکی چه‌نده‌ جوانه ده‌سته‌یه‌ک هه‌ڵتوته‌کاون و ئاڵـقه‌یان داوه‌، له‌ ناو ئاڵقه‌که‌دا ئاگرێک هه‌ڵگیرساوه‌، کڵوی به‌فر ده‌که‌ونه‌ سه‌ر ئاگرو ده‌توێنه‌وه‌و  چزه‌و فزه‌ی به‌فرو تیرۆک وه‌ک  سازو ئاواز وایه‌، هاوڕێیان سه‌رقاڵی قسه‌ی خۆش بوون، له‌ ڕواڵه‌تی هه‌موویان وره‌وغـیــره‌ت ده‌باری، ته‌نیا یه‌ک نـه‌فـه‌ر نه‌بێ که‌ تـۆسقاڵـێک غـیره‌تی له‌ له‌ش و ده‌رونیدا نه‌بـوو، پرته‌و بۆڵه‌ی ده‌تکوت پیرێژنی دۆلێڕژاوه‌، دیاره‌ ئه‌و که‌سه‌ له ‌دواییدا خۆی ته‌حویلی ڕێژیم داوه‌!  تەنیا خـواردنێکی پێمان مابـوو، هەڵـوای گـۆرین بـوو، ‌ وای به‌ستبوو که بەسەرنێزەش بەحال تۆزقاڵێکی لێ ده‌بۆوه‌. ئەویش دەبوو ماوه‌یەک له زاردا ڕایگری تا دەیکاتەوه.  ئه‌و شه‌وه‌ تا به‌یانی باری، به‌ قسه‌ی خۆش و ده‌سته‌ چیله‌ کۆ کـردنه‌وه‌ شه‌ومان شه‌ق کـرد، ڕۆژ ڕوناکه، وەڕیدەکەوین بۆ کوێی؟ مـەگەرخـوا بـزانـێ. خالید له پێی کەوتووه، تـوانـای ڕۆیشتنی نه ماوه، سواری  ئەسپمان کرد. ئێستا عــاسمان سافـه و تۆزقاڵێکی هەور پـێوه نەماوه، تاو هەڵاتووەو دەگەڵ ئەو بەفره پاکه نوورەکەی چەند بەرانبەر لەو چیاو بەنـدەنه هاڵاوه. خوا وەکیلی بــۆ کــوێی دەچین کەس نازانێ، رۆژ عاسمانی لەت کردووەو له نیوەی لای داوه، له پڕ تارمایی ئاواییەک دەرکەوت، کوێیه‌ و کێی لێیه که‌س نازانێ.

پێشتر باسم کرد ئه‌سپێکمان پێیه، ئـی خۆمان نیه، ئی پیاو چاکێکی بەڕیزو کوردێکی بەپێز بوو که    پێیان ده‌گوت، خه‌نجه‌ر قیت، پ.م برینداریان پێ هێنابوو، ئێمەش بڕیارمان دابوو هەرچۆنـێک بـێ، بۆی بەرینەوه. خالید وه‌زعی له‌ ڕاده بەدەر خراپه، له سەر وڵاغ خۆی را ناگرێ، دوو هاوڕێ  که‌ هەر دووکیان شەهید بوون بەو ناوانه، برایم مەحمودی و سوله‌یمان عەبدوڵاهی، هه‌ر یەکەی قوڵێکیان گرتبوو و منیش له پێشەوه، هاوڕێیانیتر له‌ پێشه‌وەی من.‌ خالید هەر دەیگوت: مامـۆستا چیم لێدەکەی! زۆری بۆ به پەرۆش بووم، لەوەش ناخۆشتر ئەوه بوو هاوڕێیەکت له حاڵی مەرگدایەو‌ داوای یارمەتیت لێدەکاو هیچت له دەست نایه‌، گوتم: خالید گیان ئەوەی له دەستم دێ ئەوەیه خۆم بسوتێنم و تۆ خۆت گەرم کەیەوه! گوتی: مامۆستا لێگەرێ با هەر من بمرم، چونکه ئه‌تۆش ده‌مری و منیش ڕزگاریم نابێ.

ئه‌وه‌ دوایین قسه‌ی بوو که‌ من لێم بیست. دەمانەویست لەو گونده نزیک بینەوه، له قەراغ  ئاوایی له سەر تەپۆڵکەیەک دەدیترا که مۆڵگەی نیزامی لێیه. تا ئێرەش نازانین ئه‌و شوێنه بەشی رۆژهـەڵاته یـان باشوور، مۆڵگەی بەعسه‌یان هی پاسدارانه. به دێتنی ئەو دیمەنه کەوتینه بیرو خەیاڵان،  بڕیارمان دا وچانێک بدەین و ڕێگەیەکیش بدۆزینەوه، نوێژی ئێواره‌یه‌، هێندێک لایان وا بوو یه‌کسه‌ر بچینه ئاوایی، گوتم براینه: ئەوەی دیاره ئه‌و گـونـده مـۆڵگەی لـێیه، کوێـیه، ئێ کـێـیه ڕون نـیه، ئـاقڵانه نـیه هەروا له گـۆتـره خـۆی پیدا کەین، له پێشدا دەڕۆین خۆمان له‌و ئاواییه نەدیو دەکەین و ئێواره درەنگانێک دەچین تاقی دەکەینەوه‌. کەوتینه ڕێی ئێمه له پێشەوه دەڕۆیشتین له پڕ هەرایان کرد مامۆستا، محەممەد زیبا رای کرد بۆ ئاوایی، دیاره‌ ناوبراو  پ.م  هێزی کێله‌شین بـوو. دەڵێن مرۆڤێکی خوێڕی ورەی لەشکرێک دەڕوخێنێ، هەر به دوای ڕاکردنی ئه‌ودا  هەروا   دەرۆیشتین دیسان بانگـیـان کـرد ڕاوه‌ستن. ئێمەش ڕاوەستاین، هەمـوو هاتن تا ئه‌و کاته‌ ئاوام نه‌دێبوون، ئه‌ و هه‌مـوو وره‌و هـێزه‌ی دیبوم هیچی نه‌مابو،  ئه‌و هه‌موو وره‌یه‌ ببوو به‌ ناهومێدی، ٨ که‌سیان داوایان کرد ئیزنیان بده‌ین‌ بچنه ئاوایی. هاوڕێ بەرپرس گوتی: براله وڵامیان بده‌وه‌. گوتم: براینه دەزانم دەگەڵ مەرگ به‌رەو‌ ڕوون، گیان زۆر ئازیزه، هەر بۆیه ئێوه ئازادن چۆنی به باش دەزانـن ئاوا بکەن، به‌ڵام ئێمه‌ ده‌گه‌ڵ ئه‌و ڕایه‌ نین، ئه‌وه‌ی بڕوا، خۆی لێی بەرپرسه، وا باشتره‌ بڕێکیتر خۆڕاگرین. ڕاستی ئه‌وه‌یه‌ وره‌که‌ نه‌ما، بـڕیار دانـیش نامێنێ، دیاره‌ هاوڕێی بەرپرس و من که‌ پلەی بەرپرسایه‌تیمان زیاتر بوو و لاشمان وا بـوو ڕه‌نگه‌  ئه وه ‌ پێگەی دوژمن  بێی  بۆیه‌  نه‌مانده‌ویست هه‌روا له‌ گۆتره سه‌ ر به هەر شوێنێکدا بکەین. به کورتی لەو ١٥ که‌سه‌ ٩ کەسمان ڕۆیشتن، ماینەوه 5 که بریتیبوون له بەرپرسی کومیته، نەبی تالیبپوور، موراد دریازی، محەممەد ئه‌حمه‌دی که‌ پێـمان ده‌گوت محه‌ممەده‌ قەڵەوه و نوسه‌ری ئەو دێڕانه. ئه‌و پێنج که‌سه‌  پێکه‌وه‌ ڕاوێژمان کرد و گه‌یشتینه‌ ئەو بـڕوایه‌ که‌ مەسەلەی مەرگ و ژیانه، کێی ئامادەی مردنه با دەگەلـمان بێ و کێش نایەوێ بمرێی وەشـوێن ئەوان بکەوێ. کورت و پوخت ئەو پێنجەمان بڕیارمان دا بمرین و خۆمان نه دەینه ده‌ستی  چاره‌نوسی نادیار.   ئێستا لامان ڕونه ئاوایی مۆڵگەی لێیه به ڵام کوێیه نازانین.

ئێمه بۆ ئەوەی له ئاوایی نەدیو بین به پەله  دۆڵێک هەڵبوین، ئەو شوێنەی ڕوومان تـێ کـردبــوو ئەوەندەی بەفـر تێکردبوو که‌ دەرەتانی ڕۆیشتنی لێ بڕیـبویـن. بڕیارمان دا ڕاوەستین تا شەو تاریک دەبێ، ئەوجار بچینه دەوری ئاوایی خۆ به ماڵێکدا بکەین و وەزعی ڕێگاوبان و ناوچه‌و ئەو شوێنه کوێیه‌؟ بپرسین و نانێک بخۆین و ئەگەر بۆ مانەوه نەبوو روو له  شوێنێکی ئەمین بکەین.  لەولاشەوه ئەوانەی له‌ ئێمه‌ جیا ببوونه‌وه‌ چوونه ئاوایی. لـه کاتی ڕۆیشتنیان داوام لێکردن ئەو‌ بـرا سه‌رما بـردووه‌شمان که‌ گیانی له‌ به‌ردا ماوه‌ ده‌گه‌ڵ خۆیان بەرن بەڵکو خوا له مه‌رگ ڕزگاری بـکـا، دیـاره‌ ئه‌وانـیش لێـیان قبووڵ کردین و له‌ گه‌ڵ خۆیان بردیان. به‌ڵام سه‌یر ئه‌وه‌ بوو هه‌موویان چه‌ک و چۆڵیان داناو گوتیان ئیمه‌ چه‌کی حیزبی نابه‌ین، وه‌ک بڵێی ده‌چن خـۆ ته‌حویلی ڕژیم ده‌ده‌نه‌وه‌، بۆیه‌ش چه‌ک نابه‌ن، چونکـه‌ خـۆ ته‌حـویـدانه‌وه‌ بـه‌ چه‌که‌وه‌ سه‌زای قـورسی بـه‌ دواوه‌ بــوو، ئێمه‌ش پێمان حه‌یف بوو هه‌روا به‌جێان بێڵین با هه‌تا بۆمان ده‌ڕۆن بیانبه‌ین، گـورجـوو گـۆڵ لـه‌ ئـه‌سپه‌که‌مان قایمکرد، ئەوه‌ ‌ماڵی حیزبه‌و نـابێ زایه‌ بـێـ. گــونـده‌کـه نـاوی کونه مشکێیه وخەڵکی ئاسایی لێنەماوەو له ماڵـەکـانـدا پێشمەرگەی پـارتی که‌ ئه‌وکات پییان دەگوتن قیاده موه‌قەت، جێگیرن و له‌ سەر تەپۆڵکەش مۆڵگەی دوژمنی لێیه.

لێره‌دا پێویسته‌ بڵێم ئه‌و رووداوه‌ له حاڵێکدایه که‌ به پیلانی دوژمنانی گەلی کورد، پارتی دێمۆکڕاتی کوردستان و حیزبی دیمۆکراتی کوردستانی ئێران به توندی له‌ حاڵی شەڕدا بوون، شەڕێک که‌ ته‌نیا دوژمنانمان که‌ڵکیان لێوه‌رگرت و زیانه قورسەکه‌شی به‌ هەر دووک لامان به تایبەتی و گەلەکەمان به گشتی بـڕا!  ئه‌وکات دژایه‌تی و لێکدانەکان جۆرێک بوون  که‌ هەرگیز چاوه‌ڕوانی ئه‌وه‌ نه‌ده‌کرا که‌ ئێمه دیمان.

لێرەڕا بارودۆخەکه به تەواوی گۆراو له سەرماو تۆفان ڕزگاربوین کەوتوینه ناو گێژاوێکیتر که‌ له‌ سه‌رماو سۆڵه‌که‌ زۆر ناخۆشتره‌، ئه‌و جاره‌یان له‌ ئی پێشی زۆر مه‌ترسیدارتره‌، مردووی ده‌ستی سروشت ته‌نیا په‌کوی بۆ ده‌کوترێ و دوعای به‌خێری بۆ ده‌کـرێ، به‌ڵام به‌ دیلگیران و خۆ به‌ده‌سته‌وه‌ دان، هه‌زار قسه‌و قسه‌ڵۆکی به‌ دوادا ده‌گوترێ، دوژمن به‌ دژی خه‌باتی گه‌ل که‌ڵکی لێ وه‌رده‌گرێ و پڕوپاگه‌نده‌ی پێوه‌ ده‌کا.  ئێستا دەبینه دیلی دەستی ئه‌وانه‌ی که‌ به‌  دوژمن ناویان ده‌به‌ین که‌ خۆی له مەرگ گەلێک تاڵ و به ئازارتره. ئه‌وه‌ بۆچوونی ئێمه‌ بو! ئه‌وانەی ئێمەیان بەجێ هێشتبوو، چـووبـوونه ئاوایی بـرایانی پـارتی، بــه شێوەیەکی لێزانانه‌و کوردانه‌و چاوەڕوان نەکراو زۆر پـیـاوانه وەریان دەگرن و پێشیان دەڵێن: نابێ بڵێن ئێمه  پ.م  دیمۆکڕاتین، بڵێین پ.م پارتین و له جـەولـه گـەڕاوینەوه و ڕیگامان لێگۆراوه و ئاوامان به سەر هاتووه، هێندێکیشمان لێ هەڵبڕاون. که‌ بــاسی ئـێـمەیـان بــۆ دەکەن، برایانی پارتی دەڵێن: ئەو شوێنەی ئەوانه ڕوویان تێ کردووه‌ زۆر ئـاستەم و چـڕو هەڵه‌موته، هه‌گیز ناتوانن پێیدا تێپه‌ڕن، دەچین ئەوانیش دێنین. ده‌ستەیەک پ.م به چەکەوه به پشتەوەماندا بەڕێ  دەکەن و چەند کەسێکیان راستەڕی بەره و رووی  ئێمه دێن.

ئێمه که پێمان وابوو زستانەو تەنگی شێوانه کەس کاری به ئێمه نیەو هەر باسیشمان ناکەن، تەنانەت دەمانگوت رەنگه هەر نەشزانن ئێمه دەگەڵ ئەوانه بوین! که‌چی هاوڕێیانی ڕۆیشتوومان باسی ئێمەشیان به‌ وردی بۆ کردبوون. برایانی پارتی بڕیار ده‌ده‌ن بــه هـەر نرخێک  بـێ نەهێڵن ئیمه به هیلاک بچین، هەرچەند یه‌کێک له هاوڕێیانی بێ ورەو ترسنۆکمان بۆ خــۆ شیرین کردن جنێوی به ئێمه‌ش و حیزبیش دابوو که‌ هاوڕێیەکیتر به‌ توندی بەرپەرچی دابووه ‌ لێره‌دا ده‌مه‌وێ ئه‌وه‌ بڵێم بۆیه‌ ناوی ئه‌و که‌سانه‌ی به جۆرێک بوون  نابه‌م، چونکه‌ ئۆسوولەن باسه‌که‌ی من له‌ قاودان و شتی له‌و بابەته نـیه، گێڕانەوه‌ی رووداوێکه‌و هه‌رکه‌سێش له‌و پێوه‌ندیه‌دا پرسیارێکی هه‌بێ ئاماده‌م بـه‌ره‌و روو وڵامی بده‌مه‌وه‌، ته‌نانه‌ت ئه‌گه‌ر هه‌رکام له‌ حـیـزب و  پارتیش بیانه‌وێ ئامادەم له کوێ به باش دەزانن زۆر به وردی باسەکه‌ شی کـەمـەوه.

 به‌ بڕوای من پارتی زۆر زیره‌کانه‌ ویستبوویان له‌و رووداوه به‌ باشترین شێوه‌ له‌ باری سیاسیدا کـه‌ڵکی لـێ وه‌رگـرن، پـێیان وابـوو دەبــێ له‌ شـوێـنێـکـڕا هه‌نگاو بنێن که‌ ئه‌وه‌ باشـترین هه‌ ل بوو ره‌خسا بـوو‌، ده‌بو ئه‌و ‌شه‌ره  ڕابگیرێ و دەبو پارتیش ده‌ست پێشخه‌ر بێ!‌ ‌‌راگرتنی‌ شه‌ڕ خۆی هه‌نگاوێکه‌ بــۆ ئاشت بوونه‌وه‌، چونکه‌  له‌ راستیدا  زۆرینـه‌ی خه‌ڵکی کـوردستان داخـوازی بوون. مـن به‌ ڕاشکاوی ده‌ڵێم ئه‌گه‌ر مافی نه‌ته‌وایه‌تی ببێته‌ ڕۆگه‌ی هه‌موو تاکێک و حیزبێکی کوردی،  هه‌موویان به‌ بوونی بیروڕای جیاوازیش  به‌ره‌و ئه‌وێ هه‌نگاو بنێن، بێگومان زۆربه‌ی هه‌ره‌ زۆری  گرێ پوچکه‌کانمان ده‌کرێنه‌وه، زۆر گرفتی ناوخۆو ده‌ره‌کیمان چاره‌سه‌ر ده‌کرێـنه‌وه‌. بـه‌داخه‌وه‌ تا ئێستاش وه‌ک پێویست بۆ ناساندنی ئه‌وله‌وییه‌تی نه‌ته‌وه‌یی کار نه‌کراوه‌، باری نه‌ته‌وایه‌تیمان لاوازه‌و به‌ زۆری سه‌ر قاڵی دابه‌زاندنی جۆره راو بـۆچونێکین که‌ ده‌بـێ دوای رزگاری کوردستان کاریان بــــۆ بکه‌ین.

ئەو شوێنەی ئێمه روومان تێ کردبـوو به‌ وته‌ی ئه‌وان له‌ مه‌رگ زیاتر چیتری لێ وه‌گیر نەدەکەوت. به‌ کورتی ئێمه به هیوای ئه‌وه‌ شه‌و داهاتووه‌، ده‌مانەویست بچینه دەورو بەری ئاوایی بەڵکو دەرویەکی روون بدۆزینەوەو له‌و مه‌رگه‌ساته‌ رزگار بین، هه‌رگیز بیرمان له‌وه‌ نه‌کـردبووه‌ که‌ برایانی پارتی  ده‌بنه‌ فریشته‌ی ڕزگاریمان. ئه‌وه‌ راسته‌ که‌ جه‌بری مێژوو هێندێک شت ده‌سه‌لمێنێ که‌ مـرۆڤ نه‌ هه‌ستی پێکردووه‌ و نه‌ لـه‌ چـوارچێوه‌ی خه‌یاڵیشیدا گونجاوه‌! ئه‌وان بڕیاریان دابوو بماندۆزنەوەو له مەرگ ڕزگـارمـان بـکـەن. ئێمه ئه‌وانمان نەدی بوو، بەڵام له‌وانڕا دیار بوین.

ئه‌وان ببوونه دوو ده‌سته‌، ده‌سته‌یه‌ک  به‌ بێ چه‌ک بـەرەو روومان دەهاتن و ده‌سته‌یه‌کیش  بەچەکه‌وه‌ به‌ بێ ئه‌وه‌ی ئێمه‌ بزانین پشتیان گرتبوین، ئه‌و کاره‌شیان بـۆیه‌  کردبوو چونکه‌ یه‌کێک له‌وانه‌ی چووبـوونه ‌لایان زۆر به‌  ناره‌وا سه‌باره‌ت به‌ ئێمه‌ قسه‌ی کردبوو، ته‌نانه‌ت گوتبووی هه‌زار جنێویان به‌ ڕیبه‌رانی پارتی داوه‌ ئه‌وه‌ له‌ حاڵێکدایه‌ که‌ ئێمه‌ نه‌ماندەزانی ئه‌و گونده‌ کوێیه‌ و کێی لێیه‌‌. ئەوانەی بەره‌و روومان ده‌هاتن هەرایان ده‌کرد زەلام تەقه‌ مەکەن  خۆمانەین، هاوڕێیان گوتیان شوکر خەڵکی ئاسایین و ڕزگار بوین، هه‌ر بۆیه‌ش ده‌ستمان بۆ چه‌ک نه‌برد، ئه‌گینا ئێمه‌ که‌ بڕیاری مه‌رگمان دابوو پێمان خۆش بو له‌ شه‌ڕدا شه‌هید بین نه‌ک به‌ سه‌رما! گوتم: برایان  ئه‌وانه کوردی رۆژهەڵات نین، چونکه‌  ده‌ڵێن زه‌لام، ئەو وشەیه زاراوه‌ی باشووره،‌ پـێـمـان وابوو گونـده‌کـه‌ش ئـی باشـووره‌. ئـێمـەش هه‌رامان کردن وه‌رنه‌ پێش، ئێمه‌ باش گـوێمان  لێنابێ، ئه‌وانه‌ی به‌ره‌و ڕومان ده‌هاتن بێچه‌ک بوون ، گوتمان وه‌رنه پێشێ با بزانـین کێن. کاتێک گه‌یشتنه چەنـد هەنگاویمان له پڕ له‌ پشته‌وه‌ ڕا  ده‌وریان داین گوتیان: له‌ جـێگای خۆتان جووڵه‌ مه‌که‌ن! له تەسلیم بوون زیاتر ڕێگەیەک نەما! من به‌وه‌ دڵـم خۆش بوو ئه‌وه‌ی ده‌نگی داوین کورده‌! گوتم براینه‌ ئێمه‌ هه‌ر له‌ خۆمانه‌وه‌ جوڵه‌مان لێ بڕاوه‌!! راستی ئه‌وه‌ی له‌و ده‌نگدانه‌ بیستمان و دیـتمـان فـڕی به‌ سه‌ر هەڵس و که‌وتی دوژمـنانەوه نەبوو،  باوه‌شیان پێدا کردین شه‌قه‌ی ماچان ڕۆژه‌ ڕێیەک ده‌ڕۆیی، به‌ قـۆربان و سه‌ده‌قـه‌ ئاشی پـێ ده‌گه‌ڕا، ئـه‌وه‌نـــده‌ به‌ گه‌رمی وه‌ریان گــرتین که‌ نەده‌کرێ مەزەنده‌ی بکه‌ی، نـه‌ده‌بـێ له‌ بیریش بکرێی.

یه‌کێک له‌ هاوڕێیان گوتی: ئه‌رێ مامۆستا بڵی ڕاست بێ؟! گوتم: کاکه‌ من دڵم ناترسێ و هـیوادارم  ڕاست بێ. پاش ماچ و مووچێکی گه‌رم وگوڕ یه‌ک له‌وان ئه‌گه‌ر هه‌ڵه‌ نەبـم، پێیان ده‌گو ت مام قادر، له‌ من و برای به‌رپـرسی  پرسی و ئێمه‌ش خۆمان ناساند و بردیانینـه، بنکه‌کانیان بەڵام من و کاک عه‌وڵایان لێک هه‌ ڵبڕی.

پێش ئه‌وه‌ی درێژه‌ به‌ باسه‌که‌ بده‌م چونکه‌ بۆ مێژوویه،‌ ده‌بێ شتێک هـه‌رچـه‌ند له‌ ده‌ره‌وه‌ی باسه‌که‌یه‌ به‌ڵام پێوه‌ندی پێوه‌ی هه‌یه ‌بـاسی لـێ بکه‌م: یه‌کێک به‌ناوی خدر مه‌ره‌سه‌نه‌، که ‌ میرزا خدریان پێ ده‌گوت له‌ کتێبی بیره‌وه‌رییه‌کانیدا خـۆی له‌و رووداوه‌ کردۆته‌ خاوه‌ن و ڕۆڵی قاره‌مانیشی  بۆ خۆی داناوه‌! به‌ به‌رپرسایه‌تییه‌کی ته‌واو ده‌ڵێم: نـووسراوه‌ی ناوبراو  فـڕی  به‌ ڕاستـییـه‌وه‌ نـیەو ناوبـراو هیچ به‌ڵکو هه‌موو هێزو کومێته‌ی شارستانی سه‌رده‌شتیش تا ئێمه نه‌چوینه بنکه‌ی پ.م-ەکانی گیاڕه‌نگ لــه گـونــدی‌ گۆڕه‌ شێر، نـه‌یانزانـیـبوو، لـه‌ خواو خومان و برایانی پارتی که‌سیتر ئاگاداری نەبووه‌!! ته‌نانه‌ت ڕاستی رووداوه‌که‌شمان به‌ جۆرێک گۆڕی بوو که‌ هه‌ر باسی پارتیشی تێدا نه‌بوو، لێره‌دا بـه‌و برا بێ ئینسافـه‌ ده‌ڵێم: کاکه‌ من خه‌می خۆمانم نیه‌، هاوارم بۆیه‌ نیه‌ یه‌کێک بکه‌مه‌ قاره‌مان، چونکه‌ ئیمانم به‌وه‌ هه‌یه‌ که ‌ قاره‌مانی  راسته‌قینه‌ی گۆره‌پانی خـه‌بـاتی نـه‌ته‌وایه‌تی پێشمه‌رگه‌یه‌، شانـازی حـیزبـیش ئه‌وه‌یه‌ که‌ له‌ سکرتێره‌که‌ی ڕا تا پێشمه‌رگه‌ی ساده‌ هه‌مـوو پـێشمه‌رگه‌ن و پله‌ی جیاوازیان هه‌یه‌. به‌ش به‌ حاڵی خـۆم  شانازیم ئه‌وه‌  ده‌بێ که‌ له‌ مێژووی خەباتی نەتەوەکەمدا وەک پێشمه‌رگه ناوم ببردرێ. خه‌می من ئه‌وه‌یه‌ دوای ئێمه، نه‌وه‌ی داهاتوو ئه‌و بیره‌وه‌رییانه‌ ده‌خوێننەوه‌ و له‌ سه‌ر ئه‌و بنەما غەڵه‌تانـه‌ حیساب ده‌که‌ن و وه‌ک به‌ڵگه‌ی مێژویی چاوی لێده‌که‌ن ئه‌و برایه‌ ئه‌گه‌ر خه‌تی به‌ سه‌ر ئێمەشدا  کێشاوه لانی که‌م شه‌رمێک له‌ مێژوو بکاو زگی بو به‌ره‌ی  دوایی بسووتێ!! پێم وایه‌  ئه‌و برایه‌ بۆ ئه‌وه‌ی به‌ مێژوو قه‌رزدار نه‌بێ و نه‌وه‌ی داهاتووشی چه‌واشه‌ نه‌کردبێ داوای لێبوردن له‌ خوێنه‌ران بکا! دیاره‌ حەز دەکەم دەگه‌ڵ ئه‌و برایه‌م جارێک پێک بگه‌ین و له‌ سه‌ر ئه‌و مه‌سه‌له‌یه‌ پێکه‌وه  قسه بکەین. ‌ خـوێنه‌رانی ‌به‌ڕێز ئه‌و باسه‌ وردەکاری زۆره‌ و لـێره‌دا بـاســم نه‌کردوون، به‌ڵام له‌ جێی خۆی له‌ بیرم نه‌کردوون.

دوای ماچ و مووچان داوایان لێ کردین چه‌که‌کانمانیان ته‌حویل بده‌ین ئه‌وه‌ حاڵه‌تێک بوو کـه‌ به‌ ته‌واوی له‌ دڵـم گران هات و کزه‌ی له‌ جه‌رگی هێنام، چونکه‌ چه‌ ک کران بۆ پێشمه‌رگه‌ی دیمۆکرات شکانی شه‌ڕه‌ف بوو. هه‌رچۆنێک بوو شه‌ومان به‌ خه‌یاڵانه‌وه‌ کرده‌ رۆژ. به‌ ش به‌حاڵی خۆم ئه‌و شه‌وه‌ تا لای به‌یانی نه‌ک نه‌خەو‌تم به‌ڵکـو به‌ فکرانه‌وه‌  گێژببوم و هه‌رچی سه‌رم دێناو ده‌مبرد، ‌خۆم ده‌دی کـه‌ بــه‌ کـۆت و زنجیره‌وه‌ به‌ ناو شاری نه‌غه‌دەدا ده‌مگێڕن! ئاخر حه‌سەنی فەرمانی به‌خشینی هەموو کادرو پێشمەرگه‌ی مەڵبەندی سندووسی ده‌ر کردبوو، گوتبووی هه‌موویان ده‌به‌خشم “بە غیراز ملا ابراهیمی  پدرسوخته”. له‌ به‌ره‌به‌ری به‌یانیدا خۆم به‌ خۆم گوت: برایم تۆ پێشمه‌رگه‌ی ده‌زانی‌ یانی چێ؟ له‌ بیرت نیه‌ سه‌دان شه‌هیدی  به‌رزو به‌نرخ له‌و رێیه‌دا سه‌ریان داناوه‌، شانازیه‌ بچیه‌ ناو ئه‌و کاروانه‌! بڕوا بکه‌ن به‌ره‌که‌تی خوایی وره‌یه‌کی خسته‌ ده‌روونـمه‌وه‌ کـه‌ ئه‌وه‌ی بیری خراپ بێ له‌ مێشکمدا نه‌ماو خرپ خه‌وم لێکه‌وت، به‌ یانی که‌ له‌ خه‌و هه‌ستام خانه‌ خوێیه‌که‌مان  ئاوی بۆ گه‌رم کردبووم ‌و شه‌وێش جل و به‌رگه‌کانی بۆ شوردبووم، ویشکیان کردبوونه‌وه‌، حه‌مامێکم کردو ریشه‌که‌م تاشی، قیت و قنج له‌ سه‌ر سفره‌ دانیشتم. ئه‌وانه‌ی میوانداری ئێمه بوون ئه‌گه‌ر دروستم له‌ بیر بێ 2 برا بوون به‌ ناوه‌کانی ئه‌بوبه‌کر و ئه‌حـمه‌د، دیاره‌ هه‌مـوو پێشمه‌ره‌گه‌کانی جێگیر له‌و گونده‌ خه‌ڵکی مه‌ڵبه‌ندی پشده‌ر بوون. ئه‌گه‌ر ڕاستت بوێی  هه‌موو ناوه‌کانم له‌ بیر نه‌ماون.  ده‌بێ پڕ به‌ دڵ سوپاسی ئه‌و دوانه‌ بکه‌م که‌ زۆر خۆماڵیانه‌ میواندارییان ده‌کردین و ئه‌وه‌یان له‌ خۆیان نیشان نه‌دا که‌ گۆیا حیزبه‌کانمان شه‌ڕیانه‌ و ئێمه‌ دیلی ئه‌وانین. دوای به‌رچایی خواردن داوام کرد بچم هاوڕی به‌رپرس ببینم، ده‌گه‌ڵم هاتن و چوینه مەنزڵه‌که‌ی  ئه‌وی لێ بوو، من و کاک عه‌وڵا به‌ سرنجه‌وه‌  هه‌ر چاومان لێک ده‌کرد، ئه‌و به‌لایه‌وه‌ سەیر بوو، من شیک، جوان و پاک ڕیشم تاشیوه‌ ، ئه‌منیش به‌ تاسه‌وه‌ ده‌مدی ئه‌و ڕیشی هاتووه‌ و بۆ دوکه‌ڵی شه‌وی پـێشتری هه‌رماوه‌، بۆ ئه‌وه‌ی تۆزێک بیبوژێنمه‌وه‌، گوتم: هه‌ی له‌ منت نه‌ که‌وێ، بـرا تۆ پێت وایه‌ له‌ کوێت لـێ قه‌وماوه‌؟  برا گـیان لـێره‌و له‌و حاڵه‌ته‌دا مه‌سه‌له‌ی حیزبایه‌تی له‌ گۆڕێدا نیه‌، مه‌سه‌له‌که‌ ئه‌وه‌یه:‌ کورده‌ لێ قه‌وماوه‌ و برای کوردیش داڵده‌ی داوه!‌

لێره‌دا مێژوو ده‌بێته‌ حاکم، ئـه‌گه‌ر له‌ ماڵی خـۆیـان دایانینه‌ ده‌ستی دوژمن ئه‌وه‌ مێژوو به‌  شانازی و سه‌ربه‌رزی ئێمه‌ی ده‌نوسێ و وه‌ک په‌ڵه‌یه‌ک له‌ ڕابردووی ئه‌وان دیاری ده‌کا. ئه‌گه‌ریش نه‌یانداینه ده‌ستی دوژمـن ئه‌وه‌ به‌ مـێژووی ده‌سه‌لمێنن که‌ کورد شه‌ڕو ناکۆکی یه‌ک ده‌که‌ن به‌ڵام دۆژمـنی یەکتر نین و هه‌ستی نه‌ته‌وایەتی له‌ هه‌ستیـارترین کاتدا به‌  سه‌ر هه‌موو ناکۆکییه‌کاندا زاڵ ده‌بێ.

ئـه‌وه‌نـده‌ قسه‌یه به‌ چه‌شنێک کاری له‌ برای به‌رپرسی ئه‌وان کرد که‌ جڵه‌وی قسه‌ی له‌ من  وه‌رگرت و بـه‌ گه‌رمی هـه‌ستی کـوردانه‌ی دەر‌بڕی و به‌ڵێنی دا دنـیـا به‌ که‌یفی ئێمه‌ بێ. به‌ش به‌حاڵی خۆم له‌ خۆمه‌وه‌ هه‌ستێک که‌وتبووه‌ ده‌روونم که‌ هیچ نیگەران نه‌بووم. ئه‌وان چه‌ند که‌سیان ناردبـووه‌ ئاڵوه‌تان که‌ مه‌ڵبه‌ندیان له‌وێ بوو داوایان کردبوو، ته‌کلیفی ئێمه‌ روون بکه‌نه‌وه‌، سه‌رئه‌نجام  قاسید ئێواره‌ گه‌ڕاوه‌ و که‌سێک له‌ مه‌ڵبه‌ندڕا هاتبوو پێیان ده‌گوت فه‌قێی حه‌سه‌ن، شه‌و کاک عـه‌وڵاو نه‌بی تالیبپورو من، بانگ کراین وقسه‌و باس و گله‌و گازنده‌یه‌کی زۆر ده‌ ستی پێ کرا، ئه‌وان له‌ حیزب و ئێمه‌ له‌‌ پارتی، بـه‌ڕاستی هـه‌ر ده‌تگـوت کۆبوونه‌وه‌مانه‌. پاش باس و خواسێکی گه‌رم و گوڕ ئێمه‌ گوتمان: برایان ئێستا کاتی ئه‌وه‌ نیەو ئێمه‌ ڕانه‌سپێردراوێـن بـۆ وتـووێژ، ئه‌وه‌ رووداوێکی تاڵه‌و به‌ سه‌ر ئێمه‌ هاتووه‌و بڕیاریش به‌ ده‌ستی ئـێـوه‌یه‌، ئێمه‌ هـیـچ داوایه‌کـمان له‌ ئێوه‌ نیه‌ و چۆنی به‌ قازانجی خـۆتـان ده‌زانـن ئـاوا بـکــه‌ن، تـه‌نـیـا داوامان ئه‌وه‌یه‌ بـۆخۆتان بـمانکوژن و ته‌حوێلی کۆماری ئیسلامیمان مه‌ده‌ن!! برای به‌رپرس دوای داوای ئێمه‌ ده‌ستیکرد بـــه‌ تاریفی حیزب و گوتی: حیزبی دێمۆکڕات زۆر مه‌زن و خه‌ڵكی‌ ئێوه حیزبین و ‌باشی ناناسن و قـه‌دری ناگرن، من دوو نموونه‌ی چووکتان بۆ دێنمه‌وه:‌

١– له‌ ئاڵوه‌تان کوڕێکی گه‌نجی لێیه‌ دووکانداره‌، ده‌چین و ده‌پرسین  کاکه‌ سابوونت هه‌یه‌ ؟ ده‌ڵێ نه‌خێر. کاکه‌ ئه‌وه‌ نیه‌ له‌ سه‌ر ئه‌و ڕه‌فـعه‌یه‌ ؟ ده‌ڵێ: پێتان نافرۆشم. ده‌ڵین: ئــه‌دی بـۆ چیت هێناوه‌؟ ده‌ڵێ: به‌ ئێوه‌ی نافرۆشم. بۆچی کاکه‌ پێمان نافرۆشی؟ دەڵێ: کاکه‌ حیزب ده‌ڵێ شتیان پێ مه‌فـرۆشـن‌ و منیش پێتان نافـرۆشم! ئه‌و کوڕه‌ له‌و هه‌موو پاسدارو قیادەیه‌ ناترسێ. ئه‌وه‌ غیره‌تی خۆی نیه‌ و گه‌وره‌یی حیزبه پاڵی پێوه‌ داوه.‌‌

٢- کاتێک حیزب  داوای لـه‌ خه‌ڵک ده‌کـرد هاوکاریمان نه‌که‌ن له‌شاری نه‌غه‌ده‌، نانه‌واخانه‌یه‌ک نه‌بێ تا ماوه‌یه‌کی زۆر که‌س نانی پێ نه‌ده‌فرۆشتین.

پاش ئه‌و قسانه‌ گوتی: برا بڕیاری سه‌رکردایه‌تی‌‌ ئه‌وه‌یه‌ ئێوه‌ ئه‌و پێنج کـه‌سـه‌ ئازاد بکه‌ین، به‌ڵام ئیشکالێکمان هه‌یه‌. گوتمان: ئه‌وه‌ چیه‌؟ گوتیان ئه‌وانه‌ی دیکه که‌ هاتوون خۆیان ته‌حویل داوه،‌‌ ئێمه‌ ناتوانین ڕایان بگرین ناچارین ته‌حویلی کۆماری ئیسلامییان ده‌ده‌ین. ئه‌و کات ڕاستیمان لێده‌ڵێن ئه‌وه‌ زۆر به‌گران بۆ ئێمه‌ ته‌واو ده‌بێ. شاراوه‌ نیه‌ ده‌گه‌ڵ ئه‌و حکـوومه‌ته‌ پەیمان و به‌ڵێنمان هه‌یه‌، گوتمان: کاکه‌ حیزبی ئێمه‌ ده‌ڵێ کادری باشی حیزبی ئه‌وانه‌ن که‌ ده‌تـوانـن له‌ کــاتی ته‌نگانه‌دا بــڕیـاری پـێـویـست بـده‌ن. ئێمه‌ بڕیار ده‌ده‌ین ئه‌وانه‌ی دێنه‌وه‌ لای ئێمه‌ سه‌رچـاومان وئه‌وانه‌ش که بیانه‌وێ خۆیان ته‌حویل بده‌ن یا ئێوه‌ ئیعدامیان بکه‌ن ئێمه‌ به‌ نووسراوه‌ ئیزنتان ده‌ده‌ین، یان بیانده‌ن به‌ خۆمان، خۆمان ده‌یان کوژین بۆ ئه‌وه‌ی هه‌م گیانی چه‌ند که‌س ده‌رباز ده‌کەیـن و هـه‌م نهێـنییه‌ک ده‌پـاریـزیـن کـه‌ پـێوه‌نـدی بـه‌ چاره‌نـووسی ئێوه‌وه‌ هه‌یـه‌! بـه‌ڵام دڵـنـیـایـن که‌ هـه‌موو دێنه‌وه‌، چونکه‌ ئه‌وه‌ندەی ئێمه‌ بیانناسین سه‌رمای له‌ توانا به‌ده‌ر، ‌تووشی ئه‌و کارەی‌ کردن ئه‌گینا له‌ بێ بڕواییان نه‌بوه!‌

زۆر باشم له‌ بیره‌ گوتیان: کاک سه‌ید عـه‌لی، بچۆ به‌و خوێڕیانـه‌ بڵێ: ئه‌وانه‌ی ئاماده‌ن بێنه‌وه‌ لای هـاوڕێێانیان خۆ ئاماده‌که‌ن، ئه‌وانه‌ش که‌ ئاماده‌ نابن ڕه‌میان ده‌که‌ین. سه‌ید ڕۆیشت، کاک  فه‌قێ گوتی: کاکینه‌ هه‌واڵێکی زۆر ناخۆشـم بۆتان هه‌یه! به‌ داخه‌وه‌ خالیدی هـاورێتان  فـه‌وتی کـردووه‌ و هـه‌وڵه‌کانـمـان بـۆ ڕزگار بـوونی له‌ مه‌رگ بێ ئاکام بـوون. به‌ هه‌ق ئه‌و هه‌واڵه‌ تاساندینی، ته‌زاندینی، ئه‌و هه‌واڵه‌ خـۆشه‌ی ڕزگار بوونمان، وه‌ناخۆشی گه‌ڕا، شاییمان لێ بوو به‌ شین، ئه‌گه‌ر ئه‌و هه‌واڵه‌ تاڵه‌ نه‌بایه‌، ڕه‌نگ بوو له‌ خۆشی ڕزگاری له‌ دوو مه‌ترسی سامناک تووشی شۆک و حه‌بـه‌سـاوی بــووبــایــن. دیـاره‌ لــه‌ مـاوه‌ی باسه‌کانماندا زۆر شتمان باس کرد که‌ لێره‌دا نه‌مهێناون و وڵامی ڕه‌خنه‌و گـله‌ییمان داوه‌و زۆر وڵامی خــۆشـمـان وه‌ر گـرته‌وه‌. ئــه‌و بـاسـانـه‌ تا کـاتـژمێر 12ی شه‌وی خایانـد.         

ئه‌وانەی لەو وتوویژه‌دا بەشدار بــویـن، بـرێـتی بـون له کاک عـەوڵا ئـیـبـراهـیـمی، نەبی تالیبپورو ئیبراهـیـم مـەجیـدپوور. ئه‌وه‌ی من هــه‌ستم پێ کرد، ده‌کرێ بڵێم ئه‌وانێش وه‌ک ئێمه‌ پێیان وابوو که‌ شه‌ڕه‌کـه‌مـان پیلانی دوژمنان بووه‌، جیاوازیمان ئه‌وه‌ بوو، ئێمه‌ ڕاسته‌وخۆ ده‌مانگوت و ئه‌وان به‌ خشکه.‌

کاک سه‌ید گه‌ڕاوه‌ و گوتی: کاکه‌ هه‌موو ئاماده‌ن بگه‌ڕێنه‌وه‌. کاک فه‌قی گوتی: جـا برا گیان ده‌بێ هه‌ر ئێستا بڕۆن له‌وه‌ زیاتـر مانه‌وه‌تان بۆ هه‌مو لایه‌ک زیانباره‌.  گوتیان ئێمه‌ ڕێگه‌تان نیشان ده‌دەین و به‌ خواتان ده‌سپێرین، بچنه‌ ئاڵیمه‌ران، گوتمان کاکه‌ ئێمه‌ به‌و حاڵه‌ ناچینه ئاڵیمه‌ران و ده‌مانه‌وێ بگه‌ڕینه‌وه‌ بۆ ڕێبه‌رایه‌تیمان، حاڵی هێندێک له‌ هاوڕێیان باش نیه‌، هه‌تا ده‌مانگه‌یەننه‌ شوێنێکی ئـه‌مین ده‌بێ به‌ڕێمان کـه‌ن، چونکه شوێنه‌که‌ هه‌م به‌فر دای پۆشیوه‌ وهه‌م ئێمه‌ش شاره‌زای نین. بـه‌ ڕای وان نزیکترین شوێن که‌ ده‌یانتوانی هه‌تا ئەوێمان به‌رن دۆڵه‌تـوو بوو. ‌ زۆر گورجوگۆڵانه‌ ته‌رمه‌که‌یان بــۆ هه‌ڵبه‌ستین و مه‌فره‌زه‌یه‌کیان ڕه‌گه‌ڵ خستین و تا شوێنێک که‌ پێیان وابوو ئیدی جێگـای ترس نیه،‌ ده‌گه‌ڵـمان هاتن. من و دوو سێ پێشمه‌رگه‌ ته‌رمه‌که‌مان پێ بوو، له‌ پێشه‌وه‌ ده‌ڕۆیشتین، ڕێگاکه‌  ڕێچکه‌یه‌ک بوو، ته‌نیا دوو که‌س پێیدا ڕۆیشتبوون جارێک ڕووی، له‌ هه‌ورازی ده‌کرد، جارێک سه‌ر به‌ره‌و ژێـر ده‌بووه.‌ هاوڕێیانی دوا‌ی ئێمه‌ وایان    زانی بوو دیسان ڕێگه‌مان لێگۆڕاوه‌و ئه‌مه‌ ڕێگا نیه‌. له‌ به‌ر ئه‌وه‌ی ئێمه‌ ته‌رمه‌که‌مان پێ بوو  زۆر توند ده‌ڕۆیشتین به‌ڵکـو هـه‌رچی زووتر بگه‌ینه‌ دۆڵه‌توو و پێش رووناکی له‌وێش تێپه‌ڕین، چونکه‌ ده‌یانگـوت مۆڵگه‌ی دوژمن به‌سه‌ریدا زاڵه‌. هاوڕێیانمان ده‌گه‌ڕێنه‌وه‌و خۆیان ده‌گه‌ یننه‌وه‌ پ.م-ەکانی پارتی و ده‌ڵێن: هاوڕێیان دیسان ڕێگه‌یان ون کـردووه‌ و له‌وانه‌یه‌ روویان کردبێته‌ پێگه‌ی دوژمن.

برایانی پارتی پێشمه‌رگه‌یه‌کیان به‌ بێ چه‌ک ده‌گـه‌ڵ ناردبـوون کە‌ هه‌تا دۆڵه‌تــوو ده‌گه‌ڵمان بێ و سبه‌ینێش بگه‌ڕێته‌وه‌. بۆیه‌ش به‌بێ چه‌ک، چونکه‌ پێیان وابوو ده‌کرێ پێشمه‌رگه‌ی حیزبی لێ بێ، نه‌کا تووشی ده‌رگیری بن. چونکه‌ وه‌ک له‌ پێشه‌وه‌ باسم کردوه‌، ئێمه‌ له‌ حاڵێ شه‌ڕدا بوین. له‌ولاشه‌وه‌ ئێمه‌ ڕۆیشتین تا گه‌یشتینه‌ نزیک ئاوایی، له‌وێ ڕاوه‌ستاین و دوو که‌سمان چوونه‌ ناو ئاوایی هـه‌تا تاقی بکه‌نه‌وه‌و بزانن که‌ش و هه‌واکه‌ چۆنه‌، دیاره‌ ئێمه‌ له‌و ئاواییه‌ شاره‌زا نه‌بوین. دوو کـه‌سـه‌کـه‌ لـه‌ پـێشه‌وه‌ ده‌چـنه‌ ماڵێک زۆر به‌ زه‌حمه‌ت توانیبوویان پێیان بسه‌لمـێنن که‌ ئێمه‌ پێشمەرگەی  دیمۆکراتین، خاوه‌ن ماڵ که‌ دڵنیا ده‌بێ که‌ ئێمه‌ دیمۆکراتین و شه‌هیدێکمان پێیه‌، فـه‌وری چه‌ند که‌سی دیکه‌یان ئاگادار کردبوو به‌ پیرمانه‌وه‌ هاتن، تا خه‌ڵکه‌که‌ هاتن هاوڕێیانیش گه‌یشتنێ، من گله‌ییم کرد که‌ بـۆچی خۆیان وه‌دوا داوه‌، چونکه‌ ڕێگاکه‌ به‌ فـرو لابـه‌لا و سه‌ره‌و ژێر بوو، ته‌رمه‌که‌مان بۆ ڕانه‌ده‌گیرا هه‌رچـۆنـێـک بێ چـویـنـه‌ ئـاوایی و ته‌رمه‌کەمان برده مزگه‌وت و خۆمان چوینه‌ ماڵان تا نان و چایه‌ک بخۆین وتۆزێک بحه‌سێینه‌وه‌و بڕۆین.

لێره‌دا جێی خۆیه‌تی له‌ قـووڵایـی دڵه‌وه‌ سوپاسی ‌خه‌ڵكی ئاوایی بکه‌ین که‌ ئه‌وه‌نده‌ گه‌رم و گوڕ وه‌ریان گرتین و به‌و نێوه‌شه‌وه‌ میواندارییان لێکردین که‌ مه‌زه‌نده‌ کردنی کاری من نیه‌، بۆ مێژو.  ئێمه‌ ده‌بوو پێش ڕووناک بوون  له‌و ناوه ‌ دوور که‌وینه‌وه‌ و له‌ دیدی پێگه‌ی  دوژمن نه‌دێو بین.

ئێمه‌ که‌ دڵنیا ببوین که‌ ئیدی به‌ ڕاستی له‌ مه‌ترسی ڕزگار بوین، سارد ببوینه‌وه‌ و پێمان خۆش بوو له‌ جێی خۆمان جووڵه‌ نه‌که‌ین، به‌ڵام ده‌بوو هـه‌رچی زووتر بـڕۆین و ته‌رمه‌که‌ش ده‌گه‌ڵ خۆمان به‌رین چونکه‌ ناشتنی له‌وێ سه‌ڵاح نه‌بوو. کوڕانی ئاوایی پیاوانه‌ و گورجانه‌ ته‌رمیان لـه‌ ئـه‌سـپ قـایم کردو گورجانه‌ رفاندیان و ڕۆیشتن، ئێمه‌ش یاغر یاغر سه‌ر به‌ره‌و ژێرمان دایه‌ بۆ گۆره‌شێر که‌ بنکه‌ی پێشمه‌رگه‌کانی گیاڕه‌نگی لێ بوو. پێشمه‌رگه‌کانیان به‌ پیرمانه‌وه‌ هاتن، برایانه‌ باوه‌شیان پێداکردین میوانـداری خـۆمـاڵـیـانه‌ی پێشمه‌رگانه‌یان لێ کردین‌. بێگومان ڕزگار بـوونی مۆعـجـیزه‌ ئـاسامـان ئـه‌وه‌نـده خـۆش بـوو که‌ به ‌وشه‌ ده‌ر نابـڕدرێ‌، له‌ په‌نا    ئه‌ویشدا دێمه‌نێکی دڵته‌زێنی ویـژدان هه‌ژێن، ته‌رمی شه‌هیدی ڕێگای ڕزگاری گه‌ڵ خالید قاره‌مانی به‌ دەستی سروشت له‌وێ ڕاکشاوه‌، هاوڕێـیانی خه‌مبارو دڵ بـریندار له‌ ده‌وری دانیشتوون، له‌ چاوانیان هه‌زاران پرسیارو ده‌ردی دڵ ده‌بـارێ، له‌و حاڵه‌دا له‌ سـه‌ر داوای هاوڕێ به‌رپرس ده‌بوو نامه‌یه‌ک بـۆ کـومیته‌ی سه‌رده‌شت بنووسم، له‌ چرکه‌یه‌کدا که‌ چاوم هه‌ڵـێنا دیتم هه‌موویان چاویان  له‌ ته‌رمه‌که‌ بڕیوه‌، تێکڕا گریانێک گریاین که‌ هیچ دایکێک بـۆ ڕۆڵه‌ی جوانه‌ مه‌رگی ئاوا نه‌ گریاوه.‌

تا ئێمه‌ نان و چایه‌کمان خوارد برایانی هیزی گیاڕه‌نگ قه‌بریان ئاماده‌ کردبوو، له‌ کومیته‌ی شارستانیشڕا ئه‌وه‌ی له‌ بـیرم مابێ خـوا ڵێ خۆشبوو مه‌لا ئه‌حمه‌د خاڵه‌یی و مه‌لا عه‌بدولخالێق ناسـراو به‌ سیروان، یه‌ک دوو هـاوڕێتریش که‌ ناوه‌کانیانم له‌ بیر نه‌ماوه‌ هاتبوون و به‌ تێکڕا له‌ گۆڕستانی گۆڕه‌ شێر شه‌هید خالیدمان به‌ خاک ئه‌سپارد. ئه‌وکات خواڵێ خۆشبوو کاک سه‌لام عه‌زیزی به‌رپرسی کومیته‌ شارستانی سه‌رده‌شت بوو.

وه‌ک له‌ پێشه‌وه‌ش باسم کردووه‌ بابه‌ته‌که‌ زۆر هه‌لده‌گرێ، روداوه‌که‌ زۆر له‌وه‌ گه‌وره‌و گرینگتره ‌ که‌ من بتوانم مافی خۆی بده‌مێ، بۆیه‌ لێره‌ دوایی پێ دێنم وته‌نیا بیروڕاو هه‌ڵێنجانی خومی له‌ سه‌ر ده‌رده‌بڕم.  دیاره‌ ئێمه‌ بڕیارمان دابوو به‌ سه‌رهاتـه‌کـه‌ وه‌ک خـۆی بــۆ کـه‌س جگـه‌ لـه‌ ده‌فته‌ری سیاسی نه‌گێڕینه‌وه‌، ئه‌وه‌ی که‌ ده‌بوو خه‌ڵک بزانێ ئه‌وه‌ بوو کە ئێمه‌ ڕێگه‌مان لێگۆڕاوه‌، شه‌و له ‌کۆخێک واته‌ خانووچکه‌یه‌کدا ماوینه‌وه‌ و لـه‌ ده‌رفه‌تی گـونجاودا خـۆمان گەیاندۆته‌ دۆڵه‌توو، ئاکامی ئه‌و سه‌فه‌ره‌ پڕ رووداوه‌، پڕ له‌ ده‌رس و ئامۆژگاری، پڕ له‌ ڕه‌ نج و ناڕه‌حـه‌تی،  چاوه‌ڕوان نـه‌کـراوو بەر‌هـه‌مـێکی پـڕ خێرو به‌ره‌که‌ت، له‌ هه‌مووی ئه‌وانه‌ش گرینگـتر دوای ئه‌و رووداوه‌ شه‌ڕی نێوان پارتی و حیزب راوه‌ستاو تا ئێستاش هه‌ر راوه‌ستاوه‌، هیوام  وایه‌ هه‌رگیز گه‌لی کورد وێنه‌ی نه‌بینێته‌وه.‌

من وەک کوردێکی ئه‌ندامی حیزبی دیمۆکڕاتی کوردستانی ژێر ده‌ستی ئێران، زۆر ده‌رسی پێ دام و زۆر ئه‌زموونی بـه‌نرخم لێ وه‌رگرت که‌ گرینگترینیان بریتین له:‌

١- له‌و رووداوه  بڕوام به‌وه‌ هێنا که‌ هه‌ستی نه‌ته‌وایه‌تی ئه‌وه‌نده به‌رزو‌ ره‌سه‌ن و پاکه‌ ‌که‌ له‌ کاتی هه‌ستیاردا هه‌مو سنوورێک ده‌په‌ڕێنێ و هه‌قانییه‌تی خۆی ده‌نوێنێ، ئه‌و هه‌سته‌ به‌رزتر له‌ گشت ئیده‌کانه‌، له‌ کاتی پێویستدا ده‌جوڵێ و دیواری حیزبایه‌تی، تایه‌فه‌گه‌ری ده‌ڕمێنێ، چاو چنۆکی و ئێره‌یی ناناسی، به‌ هیچ زه‌برێک ناتاسێ. له‌و چه‌شنه‌ رووداوانه‌ زۆرن له‌ ناو گه‌له‌که‌ماندا و نه‌ناسراون. من به‌چاوی خۆم دیتم که‌ هه‌ستی نه‌ته‌وایه‌تی هه‌موو شه‌ڕو نـاکۆکییه‌کانی وه‌لاناوه‌و ئه‌رکی به‌رپرسایه‌تی خۆی بـه‌ تـه‌واوی به‌ جێ هێناوه‌، له‌وێ مه‌سه‌له‌که‌ هه‌ر ئه‌وه‌نده‌ بۆ کورد هەڵێ قه‌ڵماوه‌ و کوردیش وه‌ری گرتووه‌و په‌نای داوه‌. هه‌ستێکه‌ که‌ حیزبایه‌تی،  ئه‌م دیوو ئه‌ودیو، به‌رژه‌وه‌ندی کاتی وتاکی ژێر پێ ناوه‌، ئه‌وه‌ی بیر بۆی نه‌ده‌چوو و چاوه‌ڕوان نه‌ده‌کرا‌، ئەو بۆێ کردین و ئێمه‌ش دیتمان و کرا! بیهێنه‌ به‌ر چاوی خۆت و لێکی بده‌وه‌، تۆ ده‌گه‌ڵ که‌سێک یان حیزبێک له‌ حاڵی شه‌ردای که‌ ئه‌و بـۆخۆی له‌ ترسی ئاو په‌نای بۆ ئاگر بردووه‌، ده‌گه‌ڵ دوژمنی ئه‌سڵی تۆ دۆست و هـاوپمه‌یمانه‌، تـۆ لێت قـه‌ڵماوه‌ و له‌ ده‌ستی ئه‌ودا گیری، زۆر به‌ هاسانی ده‌کرا بتداته‌ ده‌ستی دوژمنه‌که‌ت و جایزه‌شی پێ وه‌رگرێ و ئاویش ئاو نه‌شڵه‌قێنێ! ئه‌وه‌ هه‌ستی نه‌ته‌وایه‌تی بوو ئه‌و نەکراوه‌ی کرد، به‌ سه‌ر هه‌موو هه‌ست و ویسته‌کاندا زاڵ بوو، دوژمنی کرد به‌ دۆست، شه‌ڕی کرد به‌ ئاشتی، په‌یمان وبه‌ڵێنی ده‌گه‌ڵ دوژمنه‌که‌مان پێی پساند، له‌ زه‌وی و زاری شه‌ڕدا تووی دۆستایه‌تی چاند.

٢-به‌ کرده‌وه‌ بۆم سابیت بوو که‌ وره‌و ئیمان و خۆڕاگری ته‌نگانه‌ ده‌کا به‌ فه‌رعانی، ناخۆشی وه‌ خـۆشی ده‌گێڕێ و له‌ هیچ ململانه‌یه‌کدا مرۆڤی خاوه‌ن ورەو باوه‌ڕ‌ نایدۆڕێنێ. ئـه‌وانەی‌ ئیمان و باوه‌ڕی قـووڵیان هه‌یه‌ و به‌ بێ دڵه‌ خورپه‌ به‌ره‌نگاری ته‌نگ و چه‌ڵه‌مه‌ و ته‌نانه‌ت مه‌رگیش ده‌بنه‌وه‌ 99 له‌ سه‌د له‌ گـۆڕه‌پانه‌که‌ سه‌ربه‌رزانه‌ هه‌ڵده‌ستنه‌وه و به‌ سه‌رکۆسپه‌کاندا زاڵ ده‌بن‌. ئێمه‌ به‌ چاو مه‌رگمان ده‌دیت به‌ڵام له‌ به‌ری ڕاوه‌ستاین و نه‌مانه‌‌ویست ملی بۆ ڕاکێشین که‌ به‌ شێوه‌یه‌کی سه‌رسوڕ هێنه‌ر به‌ سه‌ریدا زاڵ بوین، به کەمترین زیان لەشکری سروشتمان تێک شکانـد. بــه‌ لای     ئێمه‌ خاوه‌ن باوه‌ڕان چ نه‌ته‌وه‌یی و چ ئایینی  بـه‌ وره‌و ئیمان و خـۆڕاگـری و بـه‌رده‌وامـی و نه‌به‌زیـن، بـه‌ سـه‌ر کـۆسپه‌کـاندا زاڵ بوون و سه‌رکه‌وتن کارێکی هاسانه.‌‌

٣- به‌ چاوی خۆم دیم یه‌کگرتوویی و پشتگری یه‌کتر چۆن ده‌تکـاتـه‌ دیوارێکی پته‌وو لـه‌ مه‌ترسیدارترین سات و کاتدا وره‌ت ده‌داتێ و ده‌تکاته‌ دیواری پۆڵایین و ته‌نانه‌ت تۆفانی سروشتیش زه‌فه‌ریان پێناباو کۆڵیان پێنادا. لێکدابڕان و لێک ترازان چۆن تووشی دڵه‌ ڕاوکێ و ترس و نیگه‌رانی و دڕدۆنگیت ده‌کا. ئێمه‌ هه‌تا یه‌ک ده‌ست بوین توانیمان له‌ شه‌وی سه‌رماوه‌زی قه‌ندیلدا لـە ژێر ڕه‌هـێڵه‌ی کڕێوه‌ و بایکوتی ئه‌م ده‌وه‌ره‌و، له‌ نێو دیواری به‌فـریندا خۆڕاگرین و له‌ هه‌موو مه‌ ترسییه‌کان تێپه‌ڕین. به‌ڵام به‌ نوێژی نیوه‌ڕۆو له‌ ژێرعاسمانی ساف و پاکدا، که‌ لێک دابـڕاین که‌وتینه‌ ڕاڕایی و دڵه‌ خورپه‌ و سه‌رئه‌نجام خۆ به‌ ده‌سته‌وه‌ دان، که‌ ئه‌گه‌ر هه‌ستی نه‌ته‌وایه‌تی و دڵسۆزی و هه‌ستی به‌ر پرسایه‌تی برایانی پارتی نه‌بایه‌، تووشی چاره‌نوسێکی ره‌شی نه‌خوازراو ده‌بوین.

٤- ئیمان به‌ ڕێباز تین و گـوڕت ده‌داتێ و له‌ حاڵێکدا که‌ خۆت به‌ دیـل و یه‌خسیریش ده‌زانـــی به‌رگری له‌ ڕیبازه‌که‌ت ده‌که‌ی و مل بۆ وه‌پاڵ دانی تاوانی نه‌ کراو راناکێشی، که‌ ئه‌وه‌ له‌ باسه‌کانماندا خۆی ده‌نواند.

٥- مه‌زنی و به‌رزی و ره‌سه‌نی حیزبیش خۆی دێنا گۆڕی و برای پارتیمان پێی ده‌گوتین حیزبه‌که‌تان ئه‌وه‌نده‌ به‌رزو ره‌سه‌نه‌ که‌ بۆ خۆتان وه‌ک پێویسته‌ نایناسن و قه‌دری نازانن. ده‌نگی رادیۆکه‌تان ده‌نگێکه‌ که‌ مرۆڤ ده‌هـه‌ژێـنێ، ده‌نگێکه‌ ده‌گه‌ڵ هـه‌موو پـروپاگـه‌نه‌ده‌و هه‌ڕه‌شه‌و گوڕه‌شەی رژیمدا نه‌ک له‌ ماڵه‌ کورده‌کان  به‌ڵکو له‌ ماڵه‌ ئازه‌رییه‌کانیش گوێ لێ ده‌گرن، بڕوای پێده‌که‌ن و له‌ سه‌ر راسـتی هه‌واڵه‌کانی حیساب ده‌که‌ن.

 ٦- بـه‌ ڕاسـتـی سه‌فه‌ر سه‌نگی مەحه‌که‌و ده‌زانی کێیه‌ هاوڕێ و هاوکاری راسته‌قینه‌ت، بۆت لێک ده‌کاته‌وه کە ده‌بێ پشت به کێ ببەستی، له حاڵەتی ‌ تەنگانه‌و ئاسته‌مدا مرۆڤی خاوه‌ن ئێـمان و بڕواو دۆستی ‌ڕاسته‌قینه‌ت بۆ ده‌دۆزێته‌وه.‌

 ٧- ئه‌وه‌ی له‌ ناو هاوڕێیانی پارتیدا سرنجی منی ڕاکێشا  نه‌زم و پڕنسیپ بوو، به‌ش به‌ حاڵی خۆم   هیچم نه‌دیت و نه‌بیست که‌ بـۆنی ئه‌وه‌ی لێ بێ که‌ گـۆیا ئێمـه‌ دیلی ئه‌وانین، پێکه‌وه‌ش ناکۆکیمان هه‌یه‌، به‌ پێچه‌وانه‌ هه‌ر ده‌تگوت په‌لـێک لـه‌ پـێشـمه‌رگه‌کانی خۆیانین و تووشی ئـه‌و  کاره‌ساته‌ هاتووین. ته‌نانه‌ت جگه‌ له‌ کاتی باسه‌که‌ماندا تاکه‌ جارێکیش باسی شه‌ڕو نیوان ناخۆشیمان لێ نه‌بیستن. له‌ دواییدا بـه‌ دڵێکی پـڕ له‌ هیواو ئاوات داوا له‌ هه‌مو گه‌ڵی کوردو خوێنه‌رانی ئه‌م نـووسراوه‌یه‌ ده‌که‌م بـزانن کـورد نـابێ دوژمنی یه‌کتربن، بۆ گه‌یشتن به‌ ئاواتی ئازادی و  ڕزگاری کوردستان و کورد و وه‌ده‌ست هێنانی مـافـی گه‌له‌که‌مان یەکڕێزو پشتی یەکتر بن، مـافی نه‌ته‌وایه‌تی به‌ لاتانه‌وه‌ لـه‌ هه‌موو حیزب و ‌ئیده‌یه‌ک بـه‌رزترو گرینگترو پیرۆزتر بێ. بـزانن هه‌تا هه‌موومان بۆ یه‌ک ئـامانـج کـه‌ وه‌دیهێنانی مـافی نه‌ته‌وایه‌تـی و ڕزگاری کوردسـتانه تـێـنه‌کــۆشین و خه‌بات نه‌که‌ین ڕزگار نابین و سه‌رکه‌وتوو نین، جیاوازی بیڕوڕا گرینگ نیه‌ و بۆ ترسیش نابێ، جیاوازی ئامانج مه‌ترسـیداره‌و لێکمان دەتارێنێ و ده‌تۆرێنێ‌، ئێمه‌ ئه‌وکاته‌ سه‌رده‌که‌وێن که‌ ئامانجی نه‌تەوه‌که‌مان له‌ پێشه‌وه‌ی هه‌موو ویست و ئامانجەکان بێ، ئه‌و ئامانجه‌ بـۆ هـه‌موومان به‌ڕاده‌یه‌ک پیرۆز بێ که‌ ببێته‌ خه‌تی سوورو په‌ڕاندنی گوناحی‌ نەبەخشراو بێ، هه‌ر که‌س بیپەڕێنێ توندترین سه‌زای ره‌وایه‌. با ئه‌وه‌ش بڵێم: ئه‌وانه‌ی خاوه‌ن بـاوه‌ڕی ئــایینین بـا بزانن داوای مافی نه‌ته‌وایه‌تی مـافێکی خواییه‌و له‌ قورعاندا ده‌قــاوده‌ق باسی لێکراوه‌و ناوی هێندراوه‌، له‌ روانـگه‌ی مافی مـرۆڤـیشڕا مافێکه‌ له‌ دنیادا پەسـند کـراوه‌.  داواکـردن و به‌رگری  لێکردنی ئه‌رکی شه‌رعی و قانونیه.

هێندێک له‌و هاوڕێیانه به‌ داخـه‌وه‌‌ شه‌هـیـد بـوون، هێندێکیان خۆیان ته‌حویل داوه‌ته‌وه‌، هێندێکیان هه‌ر وا له ‌سه‌نگـەری خه‌باتدا مـاون، جـا فـه‌رق ناکا له‌ باشوور بن یان ئۆرووپا، چـونکه‌ به‌ داخه‌وه‌ به‌ره‌نگاری و رووبـه‌روو بوونمان ده‌گـه‌ڵ دوژمن راگیراوه‌. جێی داخـه‌ لـه‌ سەرده‌می ئێستادا ده‌یانه‌وێ به‌رگری ره‌وا بخه‌نه‌ ژێر پـرسیارو به‌ره‌نگـاری و تێکۆشـان بــۆ راو نـانـی داگیرکه‌ران به‌ شەڕی چه‌کداری ناو ده‌به‌ن! له‌ حاڵێکدا هـه‌ر کـەس بێ غەرەزو به وردبینی بروانێته‌ کوردستان، ده‌زانێ پێشمه‌رگه‌ شه‌ڕخواز نەبووه ونیه‌و بەردەوام لـه حاڵی بەرگری له‌ گه‌ل و نیشتمـانـدایـه، ئه‌وه‌ش ئه‌رکیکی پیرۆزو رەوایه‌. پێویسته‌ هه‌موو ئێوه‌ی باش بزانن چاوه‌ڕوانی له‌ رژیمێک که‌ له‌ بنه‌ڕه‌تدا بڕوای به‌ ئازادی و دیمۆکراسی نیه‌، که‌ی ره‌وایه‌ وابزانی به‌ تۆی ره‌وا ده‌بێنێ!

مه‌ لا برایم  مه‌ جید پور{jcomments off}

سه‌رچاوه‌: ماڵپه‌ڕی پێشمه‌رگه‌کان