یادێک له‌کاره‌ساتی دڵته‌زێنی گوندی میشه‌دێی پیرانشار! سه‌ید عه‌لی هاشمی

کۆماری ئیسلامی ئێران له‌مێژووی هاتنه‌سه‌رکاریه‌وه ‌تا ئێستا له‌هیچ جینایه‌تێک  دژ به‌گه‌لی کورد ,

و لە هیچ سیاسەتێکی دژی مرۆڤایەتی  بۆ تواندنه‌وه‌ی ئه‌و نه‌ته‌وه‌ دێرینه‌ی رۆژهه‌ڵاتی ناوه‌راست درێغی نەکردووە، نه ‌له ‌سووتاندنی گونده‌کان، تۆپبارانی کوێر کوێرانه‌، سووتاندنی به‌روبوومی وه‌رزێران، شه‌هید کردنی زیاتر له ‌په‌نجا هه‌زار که‌س لە  خه‌لکی بێتاوان، سه‌دان و هه‌زاران جینایه‌تی تر  که ‌ته‌نیا له ‌کۆماری ئیسلامی ئێران ده‌وه‌شێته‌وه‌.

ده‌مهه‌وێ لێره‌باسی به‌سه‌رهاتێک بکه‌م که‌له دوایین رۆژه‌کانی‌ساڵی 1362ی هه‌تاوی (1984)م له‌مه‌ڵبه‌ندی پیرانشار به‌هۆی برای شه‌هیدێکی حیزبی دێموکراته‌وه ‌له ‌گوندی “میشه‌دێ” بنکه‌ی ته‌شکیلاتی کۆمیته‌ی ناوچه‌ی پیران سه‌ر به‌کۆمیته‌ی شارستانی پیرانشار به‌گشتی ده‌رمانداو کران.

له‌رۆژه‌کانی 27-28/12/1362ی هه‌تاوی کۆبوونه‌وه‌ی کۆمیته‌ی شارستانی پیرانشار له‌ یه‌کێک له گونده‌کانی ‌‌ناوچه‌ی” نه‌ڵێن‌” به‌رێوه‌چوو، ئه‌و کۆبوونه‌وە ‌تایبه‌تی بوو، چونکه ‌وه‌ک داب و نه‌ریتێک له‌نێو ته‌شکیلاتی حیزبی دێموکراتی کوردستانی ئێران له‌زۆربه‌ی مه‌ڵبه‌نده‌کانی کوردستانی ئێران هه‌ر دوو ساڵ جارێک به‌رپرسی کۆمیته‌شارستانه‌کان له‌لایه‌ن رێبه‌رایەتی حیزبه‌وه ‌ئاڵوگۆڕیان پێده‌کرا،کاک سه‌دیق بابایی له‌لایه‌ن رێبه‌ریی حیزبی دێموکراته‌وه ‌وه‌ک به‌رپرسی کۆمیته‌ شارستانی پیرانشار ناردرابوو که ‌له ‌گه‌ڵ نه‌مر نه‌بی قادری جێگاکه‌یان ئاڵو گۆڕ بکه‌ن.

به‌هۆی ئه‌وه ‌که‌ شه‌هید مه‌لاره‌سوڵی گه‌ردی به‌ماوه‌ی سێ مانگ له‌لایه‌ن کۆمیته‌ی ناوچه‌وه ‌بۆ سه‌ردانی ماڵ و مناڵی مەره‌خه‌سی پێدرابوو، ئه‌رکی کاری کۆمیته‌ی ناوچه‌ی پیران له‌لایه‌ن هاورێیانه‌وه‌به ‌من ئه‌سپێردرابوو، به‌و بۆنه‌وه ‌من وه‌ک به‌رپرسی کۆمیته‌ی ناوچه‌له ‌کۆبونه‌وه‌ی کۆمیته‌ی شارستانی پیرانشار دا به‌شدار بووم.

دوای ته‌واو بوونی کۆبوونه‌وه‌که ‌‌پێشنیار کرا میوانی کۆمیته‌ی ناوچه‌ی پیران بن له‌گوندی میشه‌دێی، منیش پێش میوانه‌کان به ‌په‌له ‌خۆم گه‌یا‌نده‌وه‌لای هاوڕێیانم و پێم ڕاگه‌یاندن که ‌میوانمان‌دێ، بۆ رێز گرتن له‌به‌ر پرسی کۆمیته‌ی شارستانی پیرانشار نه‌مر نه‌بی قادری که ‌دوو ساڵ بوو هه‌م به‌رپرسمان بوو هه‌میش هاورێیه‌کی نزیک،‌هه‌روه‌ها بۆ رێزگرتن له کاک ‌سه‌دیق بابایی وه‌ک به‌رپرسی تازه‌ی کۆمیته‌ی شارستانی پیرانشار میوانداریەکی خۆمانه‌مان بۆ میوانه‌کان ساز کرد. به‌ڵام کاتێک گه‌یشتمه‌وه ‌بنکه‌ی کۆمیته ‌بارێکم سابوون له ‌بنکه‌ی دی، پرسیم ئه‌و باره‌سابوونه ‌هی کێیه‌؟ وتیان هی برای شه‌هید که‌ریم نێزه‌یه‌ی “کاسه‌که‌ران”ه‌دوو ڕۆژه ‌لێره‌یه‌و ده‌ڵێ سابوونان ده‌فرۆشم، منیش پرسیم جا بۆ ڕاست ئێره‌؟ مه‌گه‌ر ئێره ‌دووکانه‌؟(له‌گه‌ڵ یه‌کێک له‌ ئه‌ندامانی کۆمیته‌ تووشی ده‌مه‌چه‌ققه‌بووم له‌سه‌ر ئه‌وه‌ی ڕێگایان پێداوه‌ دوو رۆژ له‌ بنکه‌ی ته‌شکیلات بمێنیته‌وه‌)

نه‌مر نه‌بی قادری و سه‌دیق بابایی ئه‌ندامی کۆمیته‌ی ناوه‌ندی حیزب و برایم لاجانی و مراد که‌ریمی ئه‌ندامی هه‌یئه‌تی ئیجرائی کۆمیته‌ی شارستانی پیرانشار، سه‌ید ره‌سووڵی ئه‌حمه‌دی (سه‌ید ره‌سوو چکۆڵه‌) فه‌رمانده‌ری هێزی ئاواره‌،  محه‌ممه‌د میقدادی (محه‌ممه‌ده ‌ره‌شه‌) فه‌رمانده‌ری لکی 3 به‌جێگره‌که‌یه‌وه‌ خدر مه‌نگوڕ،  فه‌رمانده‌ی ده‌سته‌ی شه‌هید ساڵح لاجانی، شه‌هید عه‌لی عومه‌ری و جێگره‌که‌ی شه‌هید ره‌سوو مسته‌و چه‌ند پێشمه‌رگه‌یه‌ک له‌ئه‌رکانی هێز که ‌هاورێی سه‌ید ره‌سووی بوون، به‌ڵام میوانه‌کان هه‌موو وه‌به‌ر ئێمه‌نه‌که‌وتن، چوونکه ‌کاک خدری میشه‌دێی دۆستێکی نزیک و‌خۆشه‌ویستی حیزبی دێموکرات بوو، ناردبووی که‌کاک نه‌بی قادری و هێندێک له‌ میوانه‌کان، میوانی ئێمه‌ن، به‌ڵام نه‌مر نه‌بی قادری گوتی زۆر سوپاسی کاک خدری ده‌که‌م ئه‌من ئاخیر رۆژی کاری حیزبیمه‌ ‌له ‌پیرانشار ده‌مهه‌وێ ئه‌وشۆ له‌لای  هاورێیانی کۆمیته‌ی ناوچه‌ی پیران بمێنمه‌وه‌،به‌ ڵام ده‌گه‌ڵ کاک سه‌دیق ته‌قسیمی کار ده‌که‌م ئه‌وشۆ ئه‌و له‌گه‌ڵ چه‌ند کادر وپێشمه‌رگه‌ی کۆمیته‌ی شارستان وئه‌گه‌ر بۆی هه‌ڵبسووڕێ فه‌رمانده‌ری هێزی ئاواره‌(سه‌ید ره‌سووڵ) بێن بۆ لای ئێوه‌.

نه‌مر نه‌بی قادری و برایم لاجانی و مراد که‌ریمی و شه‌هید عه‌لی عومه‌ری و شه‌هید ره‌سوو مسته ‌له ‌بنکه‌ی ته‌شکیلاتی ناوچه‌ی پیران مانه‌وه له‌گه‌ڵ باقی کادرو پێشمه‌رگه‌کانی کۆمیته‌ی ناوچه‌، ‌پێویسته‌لیره بکوتری که‌شه‌هید مه‌لا ره‌سووڵی گه‌ردی به‌رپرسی کۆمیته‌ له‌پشوودان بوو وه عومه‌ر ئاریغ ئه‌ندامی کۆمیتیه‌ی ناوچه ‌له ‌مه‌ئموریه‌ت بوو، قه‌رار بوو  محه‌ممه‌ده‌ره‌شه‌ و خدر مه‌نگور  به‌رێوه‌به‌رانی لکی 3 ی هێزی ئاواره‌به‌شداری ئه‌و خوانه بن که‌ بۆ رێز لێنان له‌ کاک نه‌بی وکاک سه‌دیق پێکهێندرابوو،‌به‌ڵام به‌هۆی کاری تایبه‌تی لک بۆیان نه‌کرا به‌شدار بن، پێش ئه‌وه‌ی تاریکدابێ به‌ سواری ئه‌سپ هه‌ردووکیان خواحافیزیان له‌ ئێمه‌ کرد وگه‌ڕانه‌وه‌ بۆ بنکه‌ی لکی 3 له‌ گوندی گه‌نه‌دارێ مه‌نگوران.

له‌نێوان کاتژمێر حه‌وت و هه‌شتی شه‌و له ‌رێکه‌وتی 28/12/1362ی  هه‌تاوی، (18/3/1984) م له‌لایه‌ن ئاشپه‌زی جێگای رێزو خۆشه‌ویستی کۆمیته‌ی ناوچه،‌مام ئه‌حمه‌د شوانه ‌نانداندرا، وه‌ک داب و نه‌ریتی پێشمه‌رگایه‌تی بێفه‌رق و جیاوازی وه‌ک به‌رخی کۆزێک، میوان و خانه‌خوێ له‌ده‌وری که‌وڵی نان خواردن هاڵاین و به ‌پێکه‌نین و شۆخی کردن ده‌گه‌ڵ نه‌بی قادری ” که ‌داخوا به‌یانی حیزبی دێموکرات بۆ کام گۆشه‌ی کوردستانت هه‌ڵده‌دێرێ؟” ده‌ست کرا به‌خواردنی شۆرباو قاز.

 به‌ڵام داخی گرانم ئه‌و شه‌وه ‌مێژووییه ‌که ‌دوو ئه‌ندامی کۆمیته ‌مه‌رکه‌زی حیزب جێگۆڕیان ده‌کرد و ته‌نیا دوو شه‌و  مابوو ساڵی کۆن له‌گه‌ڵ ساڵی نوێ  جێ گۆڕی بکا،  ئه‌و شۆخی و پێکه‌نینه‌بوو به‌شین وگریان و تازی ‌له‌ناو هاورێیانمان و خه‌ڵکی ناوچه‌ی پیرانشار.

زۆر باشم له‌بیره‌ئه‌و شه‌وه ‌شه‌وێکی نه‌رمه‌باراناوی بوو خوناوکه‌ی باران وه‌ک شاعیران و هونه‌رمه‌ندان ده‌فه‌رموون “خوناوکه‌ی باران له‌سه‌ر کوڵمی خونچه‌لێوان ده‌ڵی هه‌زاران لاوی بۆ ده‌ریای خه‌یال ده‌فراند” به‌ڵام خوناوکه‌ی بارانی ئه‌و شه‌وه ‌جیابوو له‌وه‌ی شاعیران ده‌یفه‌رموون، خوناوکه‌بارانی ئه‌و شه‌وه‌  له‌ گه‌ل فرمێسکی دایک و خۆشک و خۆشه‌ویستانی پێشمه‌رگه ‌له‌سه‌ر کۆڵمه‌یان تێکه‌ڵ ده‌بوو.

له‌ئاخیر و ئۆخری نان خواردندا و به‌ر له‌ته‌واو بوونی نان خواردن یه‌ک یه‌ک و دوو دوو کادر و پێـــشمه‌رگه‌کان له‌مه‌قه‌ر وه‌ده‌ر که‌وتن، زانیم به‌ڵایه‌کی گه‌وره‌ به‌ پیلن وه‌هاتوه‌  وتم کاک نه‌بی ده‌رمانداو کراوین، ته‌نیا به‌وه‌ ڕاگه‌یشتین هه‌ڵاتین بۆ ده‌رێ و ده‌ستمان کرد به‌ڕشانه‌وه، به‌زوویی زوو هێزو کۆمیته‌ی شارستانی پیرانشار له‌ده‌رمانداوکرانی ئێمه‌ئاگادار کران‌، له‌هه‌مان کاتدا فه‌رمانده‌ری هێزی ئاواره ‌باری نائاسایی ڕاگه‌یاند و هه‌موو بنکه‌کانی ئاگادار کرده‌وه ‌بۆ هه‌ر ئه‌گه‌رێکی هێرشی دوژمن،  ڕایگه‌یاند که‌هه‌موو رێگاکان بگرن نه‌هێڵن هیچ‌که‌س له‌ ناوچه‌ وه‌ده‌رکه‌وێ وله‌هه‌موو جموجۆڵێک و هاتووچۆیه‌ک چاوه‌دێری بکرێ، به‌بیستنی ده‌رمانداو کردنی ئێمه‌فه‌رمانده‌ری لکی 1 ی هیزی ئاواره‌(شه‌هید حه‌سۆ عه‌لیپوور) که‌بنکه‌کانی له‌گونده‌کانی سنجه‌ڵێ و گرداسێ (ناوچه‌ی لاجان) بوون، به ‌په‌له ‌خۆی و په‌لێک پێشمه‌رگه ‌هه‌ڵده‌گرێ و ده‌چێ بۆ ئاگادار کردنه‌وه‌ی نەخۆشخانەی 25 ی گه‌لاوێژ له‌”کانێ زه‌رد”ی سه‌رشاخان،‌هه‌روه‌ها به‌بێسیم له‌گه‌ڵ نه‌خۆشخانه‌ی حیزب له‌کانێزه‌ردێ په‌یوه‌ندیان گرت بوو.

دوکتۆر به‌هێزی ڕاگه‌یه‌ندبوو تا ئێمه ‌ده‌گه‌ینێ  یه‌که‌م، شیری کاڵیان بده‌نێ، دووهه‌م مه‌هێڵن هیچ کامیان بخه‌ون چونکه‌هه‌رچی بخه‌وێ هه‌ڵناستیته‌وه،‌ و‌داوا کرا بوو له‌دێیه‌کانی میشه‌دێ و ده‌وروبه‌ری که‌مه‌ڕوو ماڵاته‌کانیان بدۆشن و شیره‌که ‌بده‌ن به‌پێشمه‌رگه‌کان، شیری 3 دێیان په‌یتا په‌یتا بۆ ئێمه‌ ده‌هات، کاتێک شیره‌که‌مان ده‌خوارده‌وه ‌به ‌که‌متر له‌یه‌ک ده‌قیقه ‌وه‌ک په‌نیری لێده‌هات و ده‌ما‌نهێناوه‌، دوای چه‌ند کاتژمێرێک ئه‌و جار که ‌ده‌ڕشاینه‌وه ‌خوێن له‌گه‌ڵ شیره‌که‌ده‌هات، ئه‌وه‌نده ‌شه‌که‌ت و که‌له‌لا ببووین هه‌م به‌ڕشانه‌وه‌و هه‌م به‌لێدانی پێشمه‌رگه‌کان بۆ ئه‌وه‌ی نه‌خه‌وین تا دوکتۆر ده‌گاتێ نه‌ک خۆمان بۆ ڕانه‌ده‌وه‌ستا به‌ڵکوو  ملیشمان بۆ ڕا نه‌ده‌گیرا.

“خوێنه‌ری به‌رێز سه‌د خۆزگه ‌توانیبام ئه‌و شه‌وه‌ وه‌ک خۆی بده‌مه‌ ‌به‌ر دیدی ئێوه‌، سه‌د خۆزگه‌ قوتابی یان ساده‌تر بڵێم خزمه‌تکاری نووسه‌رو زانایه‌کی به‌توانای نه‌ته‌وه‌که‌م بام بۆ ئه‌وه‌ی توانیبام ئه‌وکاره‌ساته‌ سامناکه‌ حه‌قیقه‌ته‌، وه‌ک ڕۆمانێک به‌ گوێی هه‌موو جیهان بگه‌یه‌نم که‌ به‌ نێوی دین چ‌ به‌سه‌ر ئه‌و گه‌له‌ بێ ده‌ره‌تان و بێ پشتیوانه‌ دێنن.  

له‌سه‌ر چونیه‌تی ئه‌و شه‌وه‌ی که‌ئێمه‌له‌لایه‌ن دوژمنه‌وه‌ده‌رمانداو کراین  هه‌موو ئومیدی ژیان یان زیندوو بوونمان له‌ده‌ست دابوو،هیوایه‌ک به‌ ژیان له‌ ده‌لاقه‌ی رووحی هه‌موومان رووناکی لێبرابوو،  هاوسه‌نگه‌رانمان هه‌موویان به‌چاوی پڕ له‌فرمێسکه‌وه ‌ده‌یان ڕوانیه ‌ئێمه‌، چاوه‌روانی ئه‌وه‌ بوون  ئێمه چۆن ‌گیان ده‌سپێرین، هه‌تا ماموستای ئاوایی گوندی مێشه‌دێ به‌خه‌ڵکی دێی کوتبوو که ‌ئه‌وانه ‌له‌وانه‌یه ‌هه‌موویان بمرن وا باشتره‌ قه‌برستانه‌که ‌ڕاگوێزین (خه‌ڵكێ مـێشه‌دێ له‌مێژ بوو به‌نیاز بوون قه‌برستانه‌که‌ی ڕاگوێزن) .

ئێستاش که دوای28 ساڵ ‌ئه‌و ڕۆژه‌م وه‌بیر دێته‌وه‌ پێم وایه‌ موعجیزه‌یه‌کی غه‌یبیه‌ یان  خه‌یاڵه‌‌ که‌ ئێمه‌ چۆن ره‌زگار بووین!! به‌ڵام ‌هیممه‌تی خه‌ڵکی دڵسۆزی گونده‌کانی میشه‌دێ و تووژه‌ڵێ و گه‌نه‌دار هه‌رگیزاو هه‌رگیز له‌بیرمان ناچێته‌وه‌، خوشکانی ئه‌و سێ گوندانه‌ که‌به‌و شه‌وه ‌مانگا و مه‌ڕه‌کانیان ده‌دۆشی و شیره‌که‌یان بۆ ئێمه ‌ده‌نارد، هه‌ر ئه‌و په‌نجه‌ نه‌خشینانه‌ بوون ‌ئێمه‌یان له‌مه‌رگ نه‌جاتدا، ئه‌وه‌ نه‌ یه‌که‌م هاوکاری بوه‌ نه‌ ئاخیریش ده‌بێ که‌ خه‌ڵکی به‌ وه‌فای کوردستان بۆ هاوکاری ونه‌جاتدانی ڕۆڵه‌کانیان هه‌میشه‌ ئاماده‌ن وهه‌رگیز ماندوو نابن.  ڕێز و پێزانین بۆ هه‌موو هاورێیانمان له‌هێزی ئاواره‌ی ئه‌وکات به‌ هه‌ر چوار لکییه‌وه‌ و کۆمیته‌ی شارستانی پیرانشار به‌ هه‌ر چوار کۆمیته‌ ناوچه‌یه‌وه‌ که ‌له‌ ڕاگه‌یاندنی ئه‌و باره ‌نائاساییه‌ی فه‌رمانده‌ری هێزی ئاواره‌دا چه‌نده‌ ماندوو بوون، هه‌روه‌ها تیمی کادری ده‌رمانی 25 ی گه‌لاوێژ و ‌ئه‌و کادر و پێشمه‌رگانه‌ی که‌تا رۆژ له‌بن سه‌رمان بوون وپه‌یتا په‌یتا شیریان پێده‌داین وحازربوون ئه‌و بۆنه‌ ناخۆشه‌ی ڕشانه‌وه‌ وبۆن سه‌ممه‌ی قبووڵ بکه‌ن.

کانێزه‌رد

کانێزه‌ردی سه‌رشاخان که‌نه‌خۆشخانه‌ی حیزبی لێ بوو ناوچه‌ی نه‌غه‌ده‌یه‌ وه‌سه‌رکه‌وتن له‌کوێستانه‌کانی کانێزه‌ردێ به‌ده‌رووی ڕۆسته‌می‌دا بۆ دۆڵه‌ڕه‌شێ ناوچه‌ی پیرانشار رێگایه‌کی حه‌سته‌مه‌, به‌تایبه‌ت له‌ئاخیر رۆژه‌کانی زستان که‌به‌فری کوێستانه‌کان شل ده‌بێ.

به‌ر پرسی نه‌خۆشخانه‌ی25 ی گه‌لاوێژ  سه‌ید برایمی حوسێنی به‌تیمێکی کادری ده‌رمانی و دوکتۆر مراد قادری بۆ سه‌عاتی چوار تا پێنجی به‌یانی گه‌یشتنه‌ گوندی میشه‌دێی لای ده‌رماندراوه‌کان، به‌گه‌یشتنیان له‌لایه‌ن دوکتۆر و کادره‌کانی حیزب به‌پێی توانا هاوکاریمان کرا، دوای بیست و چوار سه‌عات وه‌ک مزگێنی دوکتۆر مراد پێراگه‌یاندین نه‌تیجه‌ی ئازمایشی ژه‌هره‌که ‌ئه‌وه‌ نیشان ده‌دا به‌هۆی کوڵینی زۆری شۆرباوه‌که‌ ژه‌هره‌که ‌خاسیه‌تی مه‌وادی مه‌رگی له‌ده‌س داوه‌، به‌ڵام وتی شایه‌د له‌داهاتوودا تووشی نه‌خۆشی جۆراو جۆر ودرێژخایه‌ن بن .( نەخۆشخانەی 25 ی گه‌لاوێژ له‌ناوچه‌یه‌کی ئه‌من و دوور له‌دوژمن به‌نێوی “سه‌رشاخان” له‌لایه‌ن کۆمیته‌ی شارستانی نه‌غه‌ده‌، شنۆ و پیرانشار پێک هێندرابوو و بوودجه ‌و  خه‌رجی ئه‌و نه‌خۆشخانه ‌له ‌ئه‌ستۆی ئه‌و 3 کۆمیته‌شارستانه ‌بوو، زۆربه‌ی برینداره‌کانیشی پێشمه‌رگه‌کانی هێزی ئه‌فشین و کێله‌شین و ئاواره‌بوون)

رادیو ده‌نگی کوردستان

رۆژی دواتر هه‌واڵه‌که ‌له ‌لایه‌ن کۆمیته‌ی شارستانی پیرانشار بۆ رادیۆ ده‌نگی کوردستان حه‌واڵه‌کرابوو، به‌و شێوه‌بڵاو کرایه‌وه‌” بنکه‌ی کۆمیته‌ی ناوچه‌ی پیران سه‌ر به‌کۆمیته‌ی شارستانی پیرانشار، له‌لایه‌ن کۆماری ئیسلامی ئێران به‌هۆی برای شه‌هیدێکی حیزبی دێموکرات، ته‌واوی کادر و پێــشمه‌رگه‌کانی ئه‌و بنکه‌یه‌ ده‌رمانداو کراون، به‌ڵام به‌خۆشیه‌وه‌ دوای پێڕاگه‌یشتنی پێویست و ڕێنوێنی دوکتۆر و هاوکاری خه‌ڵکی ناوچه‌ له‌مه‌رگ ره‌زگاریان بووە‌.

داوای تاوانبار

‌دوای دوو ڕۆژ که‌هاتینه‌وه‌ سه‌ره‌خۆ، له‌سه‌ر داوای تاونبار که‌داوای دوو نه‌فه‌ری کردبوو(سه‌ید عه‌لی هاشمی وعوسمان پرگورد) بۆ ئه‌وه‌ی ته‌واوی ئه‌و به‌سه‌رهاته ‌وه‌ک خۆی به‌ڕاستگۆیانه‌ بگێریته‌وه‌، به‌شه‌رتێک(1): له‌لایه‌ن حیزبی دێموکراته‌وه ‌داوای تاوانبار قبوڵ کرا، کاتێک ئێمه ‌چووین له‌گه‌ڵی دانیشتین، له‌یه‌که‌م ده‌قیقه ‌سه‌رمان سووڕما له‌وه‌عده ‌باوه‌ڕ پێ نه‌کراوه‌کان و جینایه‌ته‌کانی کۆماری به‌ناو ئیسلامی ئێران.لە گێرانه‌وه‌ی ئه‌و به‌سه‌رهاته ‌دڵته‌زێن و سه‌رسوڕهێنه‌ره‌، نه‌ک تاوانبار فرمێسکی بۆ ڕانه‌ده‌وه‌ستا، ئێمه‌ش هه‌موو وجوودمان وه‌له‌رزه ‌هات و بوینه ‌هاوڕێی تاوانبار بۆ گریان، به‌ڵام گریانی ئێمه ‌ڕق و قین له‌کۆماری ئیسلامی وبه‌زه‌یی به‌برای شه‌هید که‌ریم نێزه‌و سه‌دان لاوی تری کورد که‌به‌و شێوه‌یه له‌لایه‌ن دوژمنه‌وه فریو ده‌خۆن یا  فریو ده‌درێن.

خوێنه‌ری هێژا. له‌به‌ر پاراستنی ژیانی هێندێک که‌س و به‌رگری له‌پێشهاتی که‌ند و کۆسپ وئاشکرانه‌کردنی رازی حیزبی‌، خۆم له‌چۆنیه‌تی و ورده‌کاری رووداوه‌که ‌پاراستووه‌، به‌و هیوایه ‌که ‌رۆژێک ئێمه‌ش وه‌ک گه‌لانی تر ببینه ‌خاوه‌نی وڵاتێکی ئازاد، ئه‌و کات به‌ڕاشکاوانه ‌و به‌شێوه‌یه‌کی ئاشکرا، په‌رده‌له‌سه‌ر هه‌موو لایه‌نه‌کانی ئه‌و کاره‌ساته سامناکه‌ ‌هه‌ڵده‌مه‌وه‌. به‌ڵگه‌ی زیندوو به‌ نه‌واری ده‌نگی تاوانبار ئێستا له‌ لای حیزبی دێموکرات هه‌یه‌.

(1) شه‌رته‌که‌ی تاوانبار ئه‌وه‌بوو که‌پێی به‌تاوانه‌که‌ی داناو هه‌ستی به‌وه ‌کردبوو چ ‌فێڵێکی  گه‌وره‌ و قه‌ره‌بوو نه‌کراوه‌ی لێ کراوه ‌و داوای له ‌‌ئێمه کرد( پێم ئه‌سپێردرابوو که‌ ده‌بێ مه‌رگی چه‌ند که‌سێک حه‌تمی بێ، ئه‌و دوانه‌تان له‌و که‌سانه‌ن، بۆیه‌ دوو رۆژه‌ چاوه‌روانت بووم، بۆیه‌ش داوای ئه‌ودوانه‌تانم کرد که‌ له‌گه‌ڵم دانیشن وته‌واوی ئه‌و سوریاته‌تان بۆ باس بکه‌م) ‌له ‌تاوانه‌که‌ی خۆشبین و داوای به‌خشینی له‌به‌شی کۆمه‌ڵایه‌تی حیزب بۆ بکه‌ین، ئێمه‌ش په‌یمانی خۆمان برده‌ سه‌ر، کۆبوونه‌ویه‌کمان له ‌گه‌ڵ هاورێیانمان کردوو ته‌واوی به‌سه‌رهاته‌که‌ و هه‌ڵه‌ی تاوانبار و سه‌رچاوه‌ی سه‌ره‌داوه‌که ونه‌واری زه‌بتییه‌که‌ ‌که ‌له ‌لایه‌ن سوپای پاسدارانی پیرانشار به‌ سه‌رپه‌رستی “صدره‌” به‌هاوکاری به‌کرێگیراوی خۆماڵی ” کوێخا عه‌وڵای کاسه‌که‌ران” ته‌ڵه‌به‌ندی کرابوو, بۆ باس کردن و داوای به‌خشینمان بۆ تاوانبار کرد.

بۆ خاتری خوێنی شه‌هید که‌ریم نێزه‌ی برای و برایه‌کی تری که ‌ئه‌ویش له‌سه‌ر حیزبی دێموکرات له‌زیندان به‌ند کرابوو، به‌شی هه‌ره‌زۆری کۆبوونه‌وه‌که‌ پشتیوانیان له‌پێشنیاره‌که‌ی ئێمه ‌کرد و به‌خشیمان و ئیمزای 12 که‌س له ده‌رمانداوکراوه‌کانمان بۆ کۆکرده‌وه‌، وه‌ هه‌روه‌ها ته‌واوی به‌ڵگه‌و راپۆرته‌که‌ن ته‌حویلی‌ به‌رپرسی به‌شی قه‌زایی حیزب له‌ پیرانشار ماموستا مه‌لا محه‌ممه‌دی پووریادا و داوای به‌خشینمان بۆ کرد وئه‌ویش قبووڵی کرد. به‌ڵام وادیاربوو رێبه‌رایه‌تی حیزب ئیمزای ئێمه ‌و داوای به‌شی کۆمه‌ڵایه‌تی پیرانشاری ره‌د کرده‌وه‌و بڕیاری دواییان دابوو. کۆمیته‌ی پیران که ‌قوربانی سه‌ره‌کی ئه‌و کاره‌ساته ‌دڵته‌زێنه ‌بوو بە به‌رپرسی کۆمیته‌ی شارستانیشه‌وه ‌ئاگاداری چونیه‌تی به‌رێوه‌بردنی ئیعدام کردنی عوسمان نێزه‌ برای شه‌هید که‌ریم نێزه ‌نه‌بوون و له‌به‌ر ده‌رکی ماڵی باوکی له‌گوندی کاسه‌که‌ران کوشتیان و رۆژی دواتر له‌کوشتنی ئاگادار کراین.

به‌راوردێک

خۆێنه‌ری ئازێز به‌ پێویستم زانی له‌ کۆتایی ئه‌م بیره‌وه‌ریه‌ تاڵه‌دا هه‌ڵسه‌نگاندنێکی کورتی نێوان دوو سیاسه‌ت ، دوو ڕێباز، دوو ڕێوشوێن  له‌ لایه‌ن حێزبی دێمۆکرات و کۆماری ئێسلامی ئێران وه‌ک ڕاستیه‌کی ئه‌زموون کراوی خۆم پێشکه‌ش به‌ بیرو رای گشتی  کۆمه ڵگا که‌مان به‌تایبه‌ت ئه‌و لاینانه‌ بکه‌م که‌ ئێستاش له‌ هه‌ر بۆنه‌یه‌کدا لاینی کوردی به‌ ئاڵا هه‌ڵگری توندو تیژی نێو ده‌به‌ن !

پاش ده‌رمانداو کرانی پۆلێک له‌ به‌ر پرس و پێشمه‌رگه‌ ( ساڵی 1362) ده‌ره‌تانی ئه‌وه‌ بۆ کۆمیته‌ی حێزب له‌ پیرانشار  هه‌ڵده‌سوورێ تا کرداری هاوشێوه‌ له‌ سه‌ر هێزی چه‌کداری جێگر له‌ قه‌رارگای “ساکان” وه‌ک بنکه‌یه‌کی سترایژیکی ڕژیم له‌ ناوچه‌ی پیران  دابه‌زێنێ و سه‌رجه‌م هێزه‌کانی کۆماری ئێسلامی له‌و پایه‌گایه‌ ‌به‌و ده‌رده‌به‌رێ که که‌ پێشمه‌رگه‌کانی ‌ئێمه‌تووشی ببوون.

به‌ سه‌ر به‌رزیه‌وه‌ ده‌بێ بڵێم سیاسه‌تی ئینسانی و خۆبواردنی حێزب له‌ تۆڵه‌ کردنه‌وه‌ به‌ شێوه‌یه‌کی نا ئێنسانی وه‌ک کاره‌ ساته‌که‌ی ئاوایی ( میشه‌دێ)  ئه‌و ڕاستیه‌ی جارێکیتر سه‌لماند کورد هه‌رچه‌ند له‌ ئه‌و په‌ڕی بێ به‌زه‌یی و دڕندانه‌ په‌لاماری ده‌درێ، به‌ڵام هیچکات ئاماده‌ نیه‌ ده‌ست له‌ ڕه‌وشتی شاکاری وجوانمێری کوردانه‌ هه‌ڵگرێ.

کاتێک ئێمه‌ ( کۆمیته‌ی پیران) ڕاپۆرتی توانای ده‌رمانداو کردنی پایگا که‌مان به‌ به‌ر پرسی کومێته‌ی شارستانی پیرانشار ( سدێق بابایی) و ئه‌وانێش ده‌فته‌ری سیاسیان له‌ پێشنیاره‌که‌  ئاگا دار کردبوو  به‌ تێکڕای ده‌نگ دژایه‌تی ده‌فته‌ری سیاسیان بۆ به‌ڕێوه‌ بردنی کردارێکی ئه‌وتۆ هه‌ر چه‌ند کۆماری ئێسلامی ده‌سپێشخه‌ری کردبوو ده‌ر بڕیبوو . به‌ کارێکی دژه‌ مرۆڤی له‌ قه‌ڵه‌م ده‌ده‌ن و به‌ توندی له‌ برا‌مبه‌ر وه‌ها تۆڵه‌ کردنه‌وه‌یه‌کدا ڕاده‌وه‌ستن .

 ڕه‌نگه‌ کۆماری ئێسلامی توانیبێتی به‌ پاڵپشتی دڵ ره‌قی و کرداری نامرۆڤانه‌ی وه‌ها بۆماوه‌یه‌ک ته‌مه‌نی ده‌سه‌ڵاتداره‌تی خۆی درێژتربکات ، به‌ڵام گومان له‌وه‌ دا ناکرێ سه‌رکه‌وتووی سه‌ره‌کی کورد و ڕه‌وشته‌ ئێنسانیه‌که‌یه‌تی .

سه‌ید عه‌لی هاشمـــی   28/12/1390  (18/3/2012)

ئه‌و وێنه‌یه‌ له‌ لایه‌ن کاک  س . بابایی . دوای که‌مێک چاک بوونه‌وه‌ گیراوه‌ وپارێزراوه‌

 

ئه‌و پۆله‌پێشمه‌رگه‌ی که‌له‌ساڵی 1362 دا له‌پیرانشار ده‌رمانداو کران بریتی بوون له‌:

1 مام ئه‌حمه‌د شوانه‌ئاشپه‌زی کۆمیته‌ی ناوچه‌ی پیران (خۆشه‌ویست و جێگای باوه‌ری کۆمیته‌)

2 ئه‌حمه‌د به‌زله‌ئه‌ندامی کۆمیته‌ی ناوچه‌ی پیران.

3 محه‌ممه‌د ئه‌حمه‌دی ئه‌ندامی کۆمیته‌ی ناوچه‌ی پیران.

4 سه‌ید عه‌لی هاشمی ئه‌ندامی کۆمیته‌ی ناوچه‌ی پیران.

5 نه‌بی قادری به‌رپرسی کۆمیته‌ی شارستانی پیرانشار.

6 ره‌حمان چێشته‌پێشمه‌رگه‌ی کۆمیته‌ی ناوچه‌ی پیران.

7 شه‌هید عه‌لی عومه‌ری فه‌رمانده‌ی ده‌سته‌ی شه‌هید ساڵح لاجانی سه‌ربه‌لکی 3 ی هێزی ئاواره‌.

8 عوسمان پوڕگورد ئه‌ندامی ئه‌ندامی کۆمیته‌ی ناوچه‌ی پیران.

9 برایم لاجانی ئه‌ندامی کۆمیته‌ی شارستانی پیرانشار.

10 عوسمان جۆخۆر پێشمه‌رگه‌ی به‌شی شه‌هێــدان.

11 شه‌هید ڕه‌سوو مسته‌ جێگری فه‌رمانده‌ی ده‌سته‌ی شه‌هید ساڵح لاجانی سه‌ربه‌لکی 3 ی هێزی ئاواره‌.

12 مراد که‌ریمی ئه‌ندامی کۆمیته‌ی شارستانی پیرانشار.

13 ئه‌بووبه‌کره‌رووت پێشمه‌رگه‌ی کۆمیته‌ی ناوچه‌ی پیران.

14 عومه‌ر مسته‌فاپوور کادری کۆمیته‌ی ناوچه‌ی پیران.

15 شه‌هید ڕه‌سووڵ ساوجبڵاغی کادری کۆمیته‌ی ناوچه‌ی پیران وزانست له‌به‌شی میدیا. ( له‌لایه‌ن کۆماری ئیسلامی ئیعدام کرا).

16 سمایله‌رووت ئه‌ندامی کۆمیته‌ی ناوچه‌ی پیران.

{jcomments off}