دەقی‌ وته‌كه‌ی‌ سه‌رۆكی هه‌رێم کاک مسعود بارزانی سه‌باره‌ت به‌و ئاڵۆزیانه‌ی‌ ئه‌مڕۆ له‌ نێوان هه‌رێمی كوردستان‌و به‌غدا هه‌ن

خوشک و برایانی ئازیز: کوردستانیانی خۆشەویست لە کوردستان و لە هاندەران پڕ بە دڵ پیرۆزبایەکی گەرم لە هەمووتان دەکەم بە بۆنەی جەژنی نەتەوەییمان جەژنی نەورۆزی پیرۆز. 

بەر لە زیاتر لە 2500 ساڵ کورد ڕاپەری و دیکتاتۆریەتی قەبول نەکرد، لەو ڕۆژەوە کورد لە تێکۆشان و بەرخوداندا بووە لە پێناوی ئازادی و سەربەستی تا ئیمرۆ، ئەمە زۆر مانا هەڵدەگرێت مانای ئەوەیە کە ئێمە میللەتێکی زیندووین و میللەتێکین بندەستی و زۆرداری لە کەس قەبول ناکەین، میللەتێکین ئەبێ ئازاد بین و بە ئازادی بژین، ئەمە دەرسێکە بۆ ئێمە و هەموو خەڵکی تر.
خوشک و برایان:لەم ڕۆژەدا زۆر کەس داوایان دەکرد، پەیوەندیان دەکرد کە لەم ڕۆژەدا مژدەیەکی خۆش و گەورە بە هەموو خەڵکی کوردستان رابگەینین، من دڵنیتان دەکەم انشاْ الله ئەو ڕۆژە هەر دێـت کە ئەم مژدەیەتان پێ رابگەیندرێت بەڵام دەبێت لە کاتێکی گونجاو دابێت، بەڵام دڵنیابن ئەو مژدەیە هەر دێت.بەڕێزان ئێمە بە کاتێکی هەستیاردا تێدەپەرین لەم ڕۆژانەدا کابینەی حەوتەم دەست بە کار دەبێت و من زۆرم حەز دەکرد هەموو هێزە کوردستانیەکان بەشدار بن بە ئۆپۆزسیۆنیشەوە، بەڵام لەوە دەچێت برایانی ئۆپۆزسیۆن بڕیاریان دابێت بەشدار نەبن بەڵام ئومێدەوارم وەکو ئاوێنەیەک بن بۆ حکومەتی هەرێم و کەموکوریەکانی حکومەت پیشان بدەن بەو ئامانجە کە گەندەڵی نەمێنێت، کەموکوری نەمێنن و ئەزموونەکەمان ڕۆژ بە ڕۆژ بەرەو پێشتر بچێت. هەروەکو زۆرجار ووتومە دەکرێت ئێمە بۆچوونی جیاوازمان هەبێت چەند حزب و رێکخراو بین بەلام ئەبێ هەموومان لە ژێر خێوەتی کوردایەتی بین بەتایبەتی ئێمرۆ کە جارێکی تر دیسان هەرێمی کوردستان کەوتۆتەوە بەر پڵان و هێرشی نارەوای ناحەزان، زۆریان بە خەیاڵی خاویان ئومێدیان لەسەر ئەوە بەستووە کە درز دروست بکەن لە نێو هێزەکانی کوردستانیدا بەڵام ئەگەر بگاتە ئەو حەدەی کە تەهدیدی ئەمنی هەرێم و ئاییندەی کورد و کوردستان بکرێت کورد هەموو یەکن، هەندێک کەس پەیدا بوون کە کەمن بەداخەوە وە بە ئێش و ئازارەوە ئەلێم بێ نان و نمەکن چونکە ئەوەی کورد بۆ ئەوانی کردوە لەبەر چاویان نەماوە، ڕۆڵی کورد زۆر دیار و ئاشکرایە کوردستان هەمیشە پەناگایەک بووە بۆ لێقەوماوان و بۆ خەڵکی مەزلوم، ئەو چەند کەسەی ئیمرۆ لە بەغدا بە زۆر خۆیان سەپاندووە ئەوانە ئاوارە بوون لە کوردستان و کوردستان دەرگای خۆی کردبووەوە بۆیان، ئیمرۆ قەیرانێکی جددی هەیە لە عێراق کە ئێمە ئەلێین قەیرانێکی جددی هەیە ئەزانین ئەلێین چی، ئێمە هەوڵمان داوە هەمیشە کە چۆن خزمەتی کوردستان بکەین ئەوها خزمەتی برا عەربەکانمان و برا تورکمانەکانمان و ئاشووریەکان و کلدانیەکان بکەین لە هەموو عێراق ئێمە ویستوومانە خزمەتی هەموو عێراق بکەین.
دوای رووخانی ڕژێمی دیکتاتۆری لە 2003 بە هەموو توانایەکمانەوە هەوڵمان دا ئەزموونی کوردستان لە شوێنەکانی تری عێراقیش سوودی لێوەربگیرێت، بەداخەوە ئەوان سوودیان لە ئەزموونی ئێمە وەرنەگرت. ئێمە زۆر بە پەرۆشەوە هەوڵماندا نەبێتە شەر و ململانێی تایفەگەری و مەزهەبی و گوتمان و ئەیلێین نابینە بەشێک لەو ململانێیە، و ئێمە پێمان ناخۆشە یەک کوری عێراقی بکوژرێت چ لە بەێرا یا لە هەولێر یا لە بەغدا یا لە نەجەف یا لە هەر شارێکی تری عێراقی، هەموویان بە کەس و کار و خۆشەویستی خومانیان دەزانین . بەڵام هەمووشتان ئەزانن کە ڕۆلی کورد ڕۆلێکی سەرەکی بووە لە رووخاندنی رژێم و لە دروست کردنی عێراقی تازە، وە بەتایبەتی پێش دوو ساڵ لە دامەزراندنی حکومەتی ئێستای عێراق بە پێی رێککەوتننامەی هەولێر، ئەگەر ڕۆڵی کورد نەبا خوا دەیزانی عێراق بەرەو چ هەڵدێرێک دەچوو. ئێستا بە داخەوە چەند کەسێکی کەم پەیدا بوون هەموو دەسەلاتیان ئیحتکار کردووە و ئیرهابێکی فکریان دروست کردووە نابێت کەس رەخنە بگرێت یان رەئی خۆی بدات ئەگەر نا هارئەبن وە دەکەونە پەلاماری جۆراوجۆر.
کاتی ئەوە هاتووە هەموو راستیەکان بۆ خەڵکی کوردستان و بۆ خەڵکی عێراق روون بکرێنەوە با بزانین خیلافی ئێمە لەسەر چییە.خیلافی ئێمە لەسەر ئەمەیە:
-یەکەم شەراکەتە لە حوکم لە بەینی کورد و عەرەب (یەعنی عەرەبی شیعی و عەربی سوونی) لەگەڵ ڕیزگرتن و بەشداری کردنی مکوناتی تر کە ئەێلەن ئێستا ئەو شەراکەتە مانایەکی نەماوە.
-ئیلتزامە بەدەستوور کە ڕۆژانە خەرقی ئەو دەستوورە دەکرێت.-جێبەجێکردنی رێککەوتننامەکانی هەولێرە کە ئەێلەن پشت گوێ خراون و جێبەجێ نەکراون. بە موجەرەد بە گەیشتنیان بۆ سەر حوکم هەموو رێککەوتنێکیان لە بیر چوو، دەستوریان لە بیر چوو، شەراکەتیان لە بیر چوو کە ئەمە عیلاقەی بە چارەنووسی عێراق و هەموو عێراقیەکانەوە هەیە هەر پەیوەندیان بە هەرێمی کوردستانەوە نییە.ئینجا بێینە سەر ئەو خیلافانەی کە بەینی هەرێم و ئەو دەسەتەی کە دەسەلاتدارە ئێستا لە بەغدا.
1.لەسەر کەرکوک و ناوچە دابراوەکانە کە هەمیشە خۆیانی لی َ ئەدزنەوە ئێمە ئەو پەری مرونەتمان بە کار هێنا، وە سوپاسی ئێوە ئەکەم جەماوەری خەڵکی کوردستان کە تەحەمولتان کردووە تا ئێستا، گەیشتووتە حەدێک رەنگە ئێوە گومان بکەن کە ئێمە بە جددی هەولمان نەداوە یا کەمتەرخەمیمان کردووە، ئێمە هەوڵمان داوە و کەمتەرخەمیشمان نە کردووە و بەڵام نیەتێکی پاکمان پیشان داوە ویستمان لە ڕێگەی دەستوورەوە چارەسەر بکرێت، ئێمە وامانزانی خەڵک ئیحترامی پەیمان دەگرێت، ئیحترامی ئیمزای خۆی دەگرێت، بە پێی دەستوورێک چارەسەری ئەو کێشانە دەست نیشان کراوە وە بێگومان ئەگەر بە پێی دەستوور چارەسەر کرابا و ئێستاش چارەسەر بکرێت ئەمە پەسەندە، بەلام مومکین نییە ئێمە واز لەم بابەتە بینین چونکە مەسەلەیەکی لە مەبدەئی مەبەدەئی ترە بۆ ئێمە .
2.مەسەلەی پێشمەرگە هەموو ئەزانن پێشمەرگە چ ڕۆڵێکی بووە بۆ هەموو عێراق ئێستا وەکو دوژمن، دوژمنایەتی پێشمەرگە دەکەن ئەمە پێنج شەش ساڵە هەرچی میزانییەی پێشمەرگەیە دزیویانە ناهێلن بێت بۆ کوردستان، لەوەش خراپتر ئەو چەند کەسەیە چاوەروانی ئەوە دەکەن فرۆکەی ئێف16 یان بۆ بێت بۆ ئەوەی جارێکی تر شانسی خۆیان لەگەڵ پێشمەرگە تاقی بکەنەوە بەم عەقلەتیەوە حوکمی عێراق دەکەن.
3.مەسەلەی نەوت و غاز لە ساڵی 2007 لە مانگی شوباتی 2007 ئێمە ئیتفاقمان کرد لەسەر پرۆژەیەک بۆ نەوت و غاز کە بچیت بۆ پەرلەمان، ئەگەر تا مانگی 5ی ئەو ساڵە لە پەرلەمان دەرباز نەبوو هەردووک لامان هەرێم و حکومەت بۆیان هەیە عقود ئیمزا بکەن ئێمە بە پێی دەستوور هیچ خیلافێکمان نییە نەوت و غاز مولکی عێراق و واریداتیشی بۆ هەموو خەڵکی عێراقە کەواتە بۆ قانونەکە نانێرن بۆ پەرلەمان بەڵام هەر کۆمپانیایەک بێت بۆ ئەوەی عەقدێک لەگەل هەرێم ئیمزا بکات ئەوان شێت ئەبن لە بەغدا ئەزانن ئەمە دەستوریە، موشکیلە ئەوە نییە کە ئەو عقودانە دەستووری نیین، بەڵام چاویان هەڵناهێت و دژی ئەوەن کە کوردستان پێش بکەوێت، لەگەل ئەوەی ئەو عقودە خێری هەموو عێراقی تێدایە، ئێمە پابەندین کە ئەم واریداتە بۆ هەموو خەڵکی عێراقە، لەگەڵ ئەوەش ناهێلن هیچ کۆمپانیایەک بێ بۆ ئێرە ئەگەر تەهدیدی نەکەن، ئەگەر فشاری نەخەنە سەر بە ڕێگەی جۆراوجۆر.
4.خاڵی تر دروستکردنی سوپایەکی یەک ملیۆنییە کە وەلای بۆ یەک نەفەر بێت، لە کوێی دونیا هەیە یەک نەفەر رەئیس وزەرا بیت قائد عامی قوات مسەلەحە بی، وەزیر دیفاع بی وەزیر داخلیە بی، رەئیسی موخابرات بی، رەئیسی مەجلسی ئەمنی قەومی بی، دوێنێش نامەیەک چووە بۆ بانکی مەرکەزی کە بانکی مەرکەزیش عائد بە خۆی بێت، چ ما بۆ خەڵکی تر ئەگەر زۆر کەس پێی وا بیت کە شیعەکان رازین بەم وەزعە شیعەکان پێش سوننە و کورد تەهمیش کراون . لە هەمووی ناخۆشتر ئەو چەند کەسە دەیانەوێت وا پیشانی بدەن کە کورد هەڵویستی گۆریوە لە شیعە یاخود هاوپەیمانی خۆی گۆریوە، ئەو شیعانەی ئێمە دەیانناسین پەیرەوانی حەکیم و ێدر ئەوانەن کە هەمیشە لەگەڵ کورد وەستاون و هەمیشە کورد لەگەڵیان وەستاوە، لەمەودواش هەموو کات بەیەکەوە دەوەستین و لەیەک سەنگەرین، و ئەوانەی کە ئیدعای ئەوە دەکەن کە بەرگری لە مافی شیعە دەکەن بەرگری کردن لە مافی شیعە بەوە نابێ هاوپەیمانانی شیعە تەهمیش بکەن بەوە نابێت دوژمن بۆ شیعە زیاد بکەن بەوە نابێت حساب بۆ خەڵکی تر نەکەن لە عێراق، ئێمە ئەلێین عێراق بۆ هەموومانە بۆ کوردە بۆ شیعەیە بۆ سونەیە بۆ تورکمانە بۆ ئاشورییە بۆ کلدانە بۆ هەموو خەڵکی عێراقە هەرکەسە و بە پێی حەجمی خۆی بە پێی موقعی خۆی. بەوە خزمەت شیعە دەکەن کە خەدەمات بۆ شیعەکان تەقدیم بکەن ئەمن و ئاسایش بۆ خەلکی عێراق تەئمین کەن، ئێوە چتان کردووە بۆ عێراق؟ فەرموون با حسابات هەمووی بخەینە سەر مێز .
ئێمە پابەندین بە هاوپەیمانەتی خۆمان لەگەل برایانی شیعە بەڵام نەک لەگەل ئەم چەند نەفەرە ئەم چەند کەسەی کە هەموو دەسەلاتێکیان ئیحتکار کردووە و حیساب بۆ هیچ کەسی تر ناکەن، وە من دڵنیام کە شیعەکان پێش کورد و سوننە رازی نین بەم وەزعە.
خوشک و برایانی بەڕێز:
کاتی ئەوە هاتووە بلێین ئیتر بەسە، عێراق بەرەو هەڵدێر دەچێت، خەریکە چەند کەسێک حوکمی عێراق بەرەو دیکتاتۆریەت ببەن، عێراق لە قەیرانێکی جددی دایە. بە نسبەتی ئێمە بە هیچ شێوەیەک قابلی قەبول نییە بەردەوام بوونی ئەم وەزعە، بۆیە داوا لە رابەرانی هەموو حزب و لایەنە سیاسیەکانی عێراق تێکرای عێراق دەکەم هەرچی زووتر دانیشن و بەپەلە چارەسەرێک بۆ ئەم وەزعە بدۆزنەوە ئالیەتی بۆ دابنێن و لە کاتێکی کورت چارەسەری ئەم وەزعە بکرێت ئەگینا ئێمە دەگەرێینەوە بۆ میللەتی خۆمان وە بڕیاری کۆتایی میللەتی ئێمە دەیدات پاشان با کەس گلەیی نەکات .لە کۆتایدا سڵاو دەنێرین بۆ گیانی شەهیدانی عێراق بە تێکرایی، شەهیدانی کورد و کوردستان، وە هەموو شەهیدانی ڕێگای رزگاری لەسەرتاسەری جیهان جارێکی تر نەورۆزتان پیرۆز بێت و زۆر سوپاستان دەکەم.

سه‌رچاوه‌::  هه‌ولێر، ئاوێنه‌نیوز: ئێواره‌ی‌ ئه‌مڕۆ(سێ شه‌ممه‌)، به‌بۆنه‌ی‌ جه‌ژنی نه‌ورۆزه‌وه‌، 20120320

بۆ بینینی به‌ ڤیدیۆ ئێره‌ کلیک بکه‌ن 

{jcomments off}