نه‌ورۆزی 2712 له‌ رۆژهه‌لاتی کوردستان . سه‌ید ئه‌حمه‌د حوسه‌ینی

نه‌ورۆزی سالی رابردوو له‌ رێوره‌سمێکی بێ‌وێنه‌دا. خه‌لکی ره‌به‌ت ئاگری نه‌ورۆزیان کرده‌وه‌

و ده‌سپێکی سالی تازه‌یان کرده‌ ئاهه‌نگێکی پڕشکۆ. ئه‌وسالیش ئه‌و رێوره‌سمانه‌ به‌شێکی به‌رچاوی گوند و شاروچکه‌کانی گرته‌وه‌، که‌ دیسان ره‌به‌ت سه‌رتۆپی هه‌موویان ده‌هاته‌ به‌رچاو.

پیرۆز کردنی نه‌ورۆز بۆ کورد شتیکی تازه‌ نیه‌، به‌لام پێکهێنانی رێوره‌سمی نه‌ورۆز به‌م شێوه‌ و به‌م ناوه‌رۆکه‌ له‌ ناو دلی ده‌سه‌ڵاتی تاریک په‌ره‌ستی ئێراندا، نه‌ک هه‌رشتێکی بێ‌وێنه‌ به‌لکوو سه‌ره‌تایه‌ک بوو بۆ گۆرانکاری به‌رچاوی کۆمه‌لگای کوردی. بۆیه‌ دێنێ به‌ چاوی ورد بینیه‌وه‌ بخرێته‌ به‌ر سرنج و لێکۆلینه‌وه‌ و له‌ سۆنگه‌ی ئه‌م واقع‌شدا، هه‌لسوکه‌وت و خوێندنه‌وه‌ی گونجاوی له‌ گه‌ڵ بکرێت.

بۆ من وه‌ک کوردێکی دوره‌ولات، ریوره‌سمه‌کانی نه‌ورۆزی ئه‌مسال، ته‌نیا رێوره‌سمی ئاسایی پیرۆزکردنی نه‌ورۆز نه‌بوون. به‌لکوو هه‌لگری ده‌یان هێما و په‌یام و هاوکات راگه‌یه‌نه‌ری پێگه‌یشتنی نه‌سلێکی تازه‌ی کورده‌واری بوون که‌ به‌ ئاگاهیه‌وه‌ چیتر شه‌رمێون نیه‌ و گوتاری خۆی ناشارێته‌وه‌ و بوونی خۆی وه‌ک یه‌که‌یه‌کی جیا له‌ویتر، به‌رجه‌سته‌ ده‌کاته‌وه‌.

ئه‌و رێوره‌سمانه‌ په‌یامی شه‌فافی خه‌لک بوون که‌ له‌گه‌ل‌ گوتار و مه‌یلی به‌ پاشکۆکردنی کورد( له‌ له‌یه‌ن کوردو بێگانه‌وه‌) سنووربه‌ندی روونی هه‌یه‌ و چوارچێوه‌ بۆ ئه‌و خه‌باته‌ مه‌ده‌نیه‌ دیاری ده‌کات که‌ ئێستا له‌ لایه‌ن زۆر کۆروکۆمه‌ل، هه‌ر یه‌ک به‌ مه‌به‌ستێک کراوه‌ته‌ به‌رنامه‌ی کار.

خه‌لکی ره‌به‌ت و گۆلێ و دیواڵان و …… به‌ ئاشکرا نیشانیان دا، ئه‌وان به‌ پاراستنی هوویه‌تی نه‌ته‌وه‌یی خۆیان، سوورن له‌ سه‌ر نرخاندن و رێزگرتن له‌ به‌ها و هێما نه‌ته‌وه‌ییه‌کان و هاوکات مه‌شخه‌لی ده‌سپێکی خه‌باتی نافه‌رمانی مه‌ده‌نیان دژی یاسا و بریاره‌ نائه‌خلاقی و نامرۆڤانه‌کانی ده‌سه‌لاتی تاران، هه‌لکرد تا به‌ ویسته‌کانیان بگه‌ن.

ئه‌وان به‌ کرده‌وه‌ و ئاگاهانه‌ ئه‌م شێوه‌ خه‌باته‌یان دژی نورمه‌کانی یاسامه‌ندکراو ده‌کار هێنا و به‌ شه‌هامه‌ته‌وه‌ بارودووخی نایه‌کسانی و پڕ له‌ سه‌رکوتیان شه‌رمه‌زار کرد و رزگاریان کرده‌ په‌یامی تۆخی خۆیان.

نه‌ورۆزی ئه‌مسال سیمبۆلی گورانێکی به‌رچاوی کۆمه‌لگای کوردی بوو،که‌ جێ‌پێی راپه‌رین خۆش ده‌کات. هوشیاری نه‌ته‌وه‌یی و هوشیاری کۆمه‌ڵایه‌تی و به‌ جه‌ماوه‌ری بوون له‌ تایبه‌تمه‌ندیه‌ به‌رچاوه‌کانی ئه‌م رێوره‌سمانه‌ بوون. ئه‌و تایبه‌تمه‌ندیانه‌ بوونه‌ هۆی ئه‌وه‌، ئیراده‌ی پته‌و، ویستی نه‌ته‌وه‌یی، هاتنه‌مه‌یدانی بویرانه‌ و بروا به‌ ئازادی ژیان، سه‌رچاوه‌ و پالنه‌ری ئه‌م نه‌سڵه‌ بوێره‌ بێت تا یه‌کگرتوانه‌ به‌هاکانی نه‌ته‌وه‌یی و نۆرمه‌کانی کۆمه‌ڵایه‌تی وپرسه‌کانی کولتوریی خۆی وه‌ک که‌مایه‌تی له‌ ئێراندا زیندوو رابگرێت و به‌ هێزی بکات و دواجا زۆرێنه‌ی حاکم ناچار به‌ دان‌پێنانی ئه‌وان بکات.

هه‌وێن و ئولگوی ئه‌م رێوره‌سمانه‌، له‌ رێوره‌سمه‌ سیاسیه‌کان وه‌رگیرابوون و ناوه‌رۆکی سه‌رجه‌م وتار و شیعر و گورانی و سروده‌کان، به‌ ئاشکرا گه‌رانه‌وه‌ بوو بۆ ئامانج و گوتار و شێوازی خه‌باتی جه‌ماوه‌رپه‌سه‌نی ده‌یه‌ی 60ی هه‌تاوی و هاوکات په‌یامیک بوو بۆ جوله‌ و ڕابوون و ئاماده‌یی ده‌ربرین بۆ زیندووکردنه‌وه‌ی سه‌روه‌ری و شانازیه‌کانی سه‌رده‌می به‌رگریی شاخ.

بێگومان به‌رجه‌سته‌ کردنه‌وه‌ی هێماکانی نه‌ته‌وه‌یی و خه‌باتی به‌رگریی پێشمه‌رگانه‌، له‌ وتار و کرداردا، شتێکی به‌ هه‌لکه‌وت و بێ بیرلێکردنه‌وه‌ نه‌بوون. پۆشاکی پێشمه‌رگانه‌، سروودی شورشگێرانه‌ی زه‌مه‌نی پێشمه‌رگایه‌تی، ره‌شبه‌له‌کی کیژوکور، ده‌کارهێنانی ره‌نگی گه‌شی جیاواز، ده‌نگی گورانی چڕینی ژن، توڕهه‌لدانی حیجابی زۆره‌ملی و دواجار هاواری ئازادیی و به‌لێنی سه‌رکه‌وتن و لاواندنه‌وه‌ی دایکی نیشتمان، به‌ ئاشکرا ره‌تکردنه‌وه‌ی یاسا و بریاراتی سه‌پێندراوی رژیمی کۆماری ئیسلامی و واقعی ئیستای کوردستان بوون.

سه‌ره‌رای ئه‌وانه‌ش، له‌ ده‌لاقه‌ی تیروانینێکی کۆمه‌لناسانه‌وه‌، ئه‌م رێوره‌سمانه‌ هێمای ده‌سپێکی پرۆسه‌یه‌کی گرینگی کۆمه‌لایه‌تی بوون که‌ ده‌خوازێت به‌م شیوه‌ جه‌سته‌ی زامدار و شه‌که‌تی سه‌رمایه‌ی کۆمه‌لایه‌تی، کۆمه‌لگای کوردی سارێژ کاته‌وه‌ و کارتێکه‌ری و شوێنه‌واری نه‌رێنی فاکتۆره‌کانی ده‌ره‌کی و ناوخۆیی بۆ له‌ یه‌کترازان و نه‌بوونی متمانه‌، له‌ سه‌ر په‌یکه‌ری کۆمه‌لگا بسرێته‌وه‌.

ئه‌و رێوره‌سمانه‌ ده‌توانن سه‌ره‌تایه‌ک بن بۆ لێک نزیک کردنه‌وه‌ی کۆمه‌لانی له‌یه‌کدابراوی خه‌لک له‌ ده‌وری یه‌ک تا جارێکیتر وه‌ک ساڵانی 57ـ 56 ی هه‌تاوی روحیکی کۆیی یه‌کگرتوو له‌ ناو کۆمه‌لگادا پێک بێنێته‌وه‌ و قۆناخی ته‌فره‌قه‌ و دابران و ئالۆزی فیکری و جیاوازی گوتار، تێپه‌ر کات.

ئه‌م حه‌ره‌که‌تانه‌ ده‌توانن سه‌ره‌تایه‌ک بن بۆ خه‌باتێکی گشتگیری نافرمانی مه‌ده‌نی که‌ بیگومان چاوه‌روان ده‌کرێت، ئه‌م ستراتژیه‌ گرینگه‌ بکاته‌ ئامانج، که‌ مه‌شروعیه‌ت و هێزی ئینسانی به‌ ته‌واوی له‌ هه‌یکه‌لی ده‌سه‌لات دامالێ و سه‌رئه‌نجام بۆ به‌ چۆک‌ داهێنانی دیکتاتۆر و گه‌یشتن به‌ رزگاری ؛

·         بروا به‌خۆ بوون و ته‌کنیک و لێزانی به‌رگریی له‌ ناو خه‌لکدا به‌ هێز بکات

·         خۆیان یه‌کگرتوو بکه‌ن و به‌ هه‌موو جیاوازیه‌کانه‌وه‌ بۆ یه‌ک ئامانج تێبکۆشن

·         نه‌هێلن سیگنال و گوتاره‌کانیتر کار له‌ ئیراده‌یان بکات و تووشی لێکترازان بن

·         به‌ پێکهێنانی رێوره‌سمی له‌م چه‌شنه‌، بانگه‌واز بکه‌ن له‌ روح و گیانی هیوادار و خاوه‌ن هه‌ست و نیشتمانپه‌روه‌ری نه‌ته‌وه‌که‌مان تا ولامی ده‌نگی ویژدان و هاواری ئازادیی ده‌روون بده‌نه‌وه‌ و بۆ رزگاری نه‌ته‌وه‌یی به‌ کۆ تێبکۆشن

بێگومان به‌رێوه‌به‌ران و به‌شدارانی ئه‌م رێوره‌سمانه‌ که‌سانی خاوه‌ن هه‌لویستی نه‌سلی تازه‌ن، که‌ خه‌ونه‌کانیان، چیرۆکی شه‌وانه‌ی مندالیان، داستانه‌کانی قاره‌مانه‌تی ساله‌کانی 60ی هه‌تاوی خه‌باتی نه‌ته‌وه‌که‌مانن و به‌ وه‌رگرتنی ئه‌زموون، سوورن له‌ سه‌ر رێبازی شه‌هیدان . داواکانیان شه‌فاف، هه‌نگاوه‌کانیان قایم، رێبازیکیان گرتۆته‌ پێش که‌ داهاتوویه‌کی رووناکی هه‌یه‌. ئه‌وان گه‌وهه‌ر و ئه‌لماسی به‌ نرخی نه‌ته‌وه‌که‌مانن.

من که‌ له‌ دووره‌وه‌ ده‌روانمه‌ خه‌لکی زێد و نیشتمانه‌که‌م ته‌نیا بۆ کۆتایی ئه‌م نوسراوه‌ ده‌توانم چه‌ند دێر له‌ وتاری * چارلز ستیوارت پارنێل* که‌ له‌ کۆبوونه‌وه‌ی مانگرتوانی ئیرله‌ندا، زیاتر له‌ سه‌د سال پێش ئیستا وتوویه‌تی پێشکه‌ش به‌ به‌رێوه‌به‌ران و به‌شدارانی رێوره‌سمه‌کانی نه‌ورۆزی 2712 کوردی، له‌ رۆژهه‌لاتی کوردستان بکه‌م:

پشت به‌ ده‌وله‌ت مه‌به‌ستن! پیویسته‌ ته‌نیا پشت به‌ ئیراده‌ی خۆتان ببستن. به‌ یه‌کگرتوویتان یارمه‌تی یه‌کتر بده‌ن. ئه‌وانه‌ی لاوازن به‌ هێزیان که‌ن. له‌ ناوخۆتاندا پێوه‌ندی پته‌و پێک بێنن. خۆتان رێکخه‌ن و دلنیام سه‌رده‌که‌ون.

سه‌ید ئه‌حمه‌د

2ی ئاپریلی 2012 ی زایینی{jcomments off}