دوژمنی مەنتقی و بەرژەوەندی هاوبەش، عەلی هیمەتی

ئەگەر ئاوڕێكی سەرپێیی لە مێژووی دەسەڵاتی كۆماری ئیسلامی ئێران بدەینەوە، زیادەڕۆیی نییە كە بڵێم، ئەگەر هەموو رۆژێك دروشمی مردن بۆ ئامریكا و دروشمی مردن بۆ ئیسڕاییل لە لایەن كاربەدەستان و

لایەنگرانی ئەو رژیمە نەگوترابێتەوە، ئەوا هەموو حەوتوویەك لە نوێژی هەینیدا گوتراوەتەوە.

ئەوانەی پسپۆڕن لە بواری شرۆڤەكردنی هەڵگیرساندنی شەڕدا، زۆر باش دەزانن كە سەرەتای هەڵگیرسانی هەر شەڕێكی فیزیكی بە شەڕی راگەیاندن دەست پێدەكات.

زۆر سەیرە!… نزیك 34 ساڵە كە رژیمی ئێران بۆ مانگێك شەڕی راگەیاندنی لە دژی ئامریكا و ئیسڕاییل رانەگرتووە و لەولاتریشەوە ئامریكا و ئیسڕاییلیش بە درێژایی تەمەنی دەسەڵاتی كۆماری ئیسلامی، رستەیەكی پۆزێتیڤیان بەرانبەر بەو رژیمە بەكار نەهێناوە.

كەوابوو ئا لێرەدایە پرسیار دروست دەبێت، بۆچی هیچكاتێك شەڕو پێكدادانی راستەوخۆ لە نێوانیاندا ڕووی نەدا؟!؟

لە سیاسەتدا دەستەواژەیەك هەیە كە پێی دەگوترێ‌: “دوژمنی مەنتقی”. كە ماناكەی بۆ ئەو دوژمنانە بەكار دەبرێت كە بە درێژایی دوژمنایەتی لەگەڵ لایەنی بەرانبەری، لە ناكاودا هیچكام لە هێڵە سوورەكان نابەزێنێت و هیچكام لە كردارەكانی چاوەڕوان نەكراو نین.

بۆ نموونە، دەوڵەتی سووریا وێڕای ئەوەی كە دوژمنێكی دێرینی دەوڵەتی ئیسڕاییلە و لەبیرمان نەچێت كە  شەڕی گەرمی نێوانیان لە ساڵی 1972 كۆتایی هات و سووریا بەشێك لە خاكەكەی واتە بەزاییەكانی جەولانی لەدەست دا، بەڵام هەر لە كاتی ئاگربەستەكەوە تا ئەمڕۆ هیچ لایەنێكیان چ ئیسڕاییل و چ سووریا، كتوپڕ هەڵیان نەكوتایە سەر خاكی یەكتری، ئەمە وێڕای ئەوەی لە درێژایی ئەم ساڵانە هەردوولا بەردەوام بوون لە شەڕی راگەیاندن دژ بە یەك.

بە پێچەوانەوە هەروەك چۆن دەستەواژەی دوژمنی مەنتقی هەیە، دوژمنی نامەنتقیش هەیە.

لێرەدا بەو واتایە دێت كە دوژمنی نامەنتقی، هەڵسوكەوتەكانی چاوەڕواننەكراوە و لە هەر چركەیەكدا دەكرێت یەكێك لە یاسا نێودەوڵەتییەكان و هێڵە سوورەكان ببەزێنێ‌.

بۆ نموونە رژیمی رووخاوی سەددام حسەین، لە ریزی دوژمنانی نامەنتقیدا بوو. هەڵسوكەوتی پێشبینی نەدەكرا. لە بنكە سەربازییەكانی خاكی خۆیەوە چەند جارێك خاكی ئیسڕاییلی بە مووشەك كردە نیشان. یا خود ئەو هێرشە لەناكاوەی كردیەسەر خاكی كوەیت و داگیری كرد.

كەوابوو بەم پێوەرە كۆماری ئیسلامی ئێران دەچێتە خانەی دوژمنی مەنتقی یەوە.

ئەمانە وێڕای ئەوەی كە هەر لە سەرەتای هاتنەسەركاری كۆماری ئیسلامییەوە گومانی لێدەكرا كە ئەو رژیمە بە شێوازێك لە شێوازەكان، هاوبەرژەوەندی دەبێت لەگەڵ دەوڵەتی ئامریكا، وێڕای ئەوەی كە هەموو شرۆڤەكارێكیش ئەوەی لەبەرچاو گرتووە كە دەكرێ راگەیاندنەكانی هەردوو لا، بە ڕووكەش بێت و زۆریش گرنگ نەبێت ڕای گشتی بەچەواشەدا ببرێت.

دەنا ئەگەر بەو پێَوەرانە نەبێت، واتە بوونی دوژمنی مەنتقی و نامەنتقی، دەبوایە لەم چەند دەیەی رابردوودا ئێران لە لایەن ئامریكاوە بكەوتبایەتە بەر پەلاماری گورزی سەربازی.

لە راستیدا ئەم بابەتە پێش سێپتامبری 2001 زۆر خوێندنەوەی وردی بۆ نەدەكرا و زۆر جاریش شرۆڤەكارانی رووداوەكان لەسەر بنەمای رووكەشی رووداوەكان شرۆڤەیان دەكرد، بەڵام لەپاش هێرشەكەی 11 سێپتامبر ئیتر دەبوایە قووڵایی رووداوەكان بخوێندرێتەوە و  ئەمەش وایكرد كە دوژمنانی نامەنتقی و چاوەڕواننەكراو زۆر زووتر لەوەی كە دەكرێت ئاكادەكاری گورزی سەربازی بۆ لێدانیان لە لایەن بریاربەدەستەكانی جیهان بۆ بكرایە.

هەر ئەم خوێندنەوەیە زۆر لە جێدایە بۆ كۆمەڵێك لە دەوڵەتانی دیكتاتۆری رۆژهەڵاتی ناوەڕاست كە سەرەتای داڕمانیان بە بەهاری عەرەبی پێناسە كرا. بۆ نموونە دەوڵەتی قەززافی، دەستەواژەی دوژمنی نامەنتقی دەیگرێتەوە.هەر ئەوەش وایكرد كە دەوڵەتی ئامریكا بۆ پاراستنی بەرژەوەندییەكانی خۆی، زۆر زوو بریاری گورزی سەربازی راستەوخۆ بۆسەر رژیمی قەززافی پەسند بكات. بە پێچەوانەوە رژیمی سووریا وێڕای ئەوەی كە لە مارسی 2011 وە نزیك بە 15 هەزار هاوڵاتی خۆی كوشتووە، بەڵام چونكە ئەم كێشەیە بە كێشەی ناوخۆیی باسدەكرێت و دەوڵەتەكە دەچێتە خانەی دوژمنی مەنتقی و بەرژەوەندی هاوبەش، ئەوا دەبینی لەسەر میزی كاری بریاربەدەستانی جیهانی، بیركردنەوە لە گورزی سەربازی لاوازە.

{jcomments off}