یاگه‌و ( جێگای ) شابازان، کۆر کۆره وازان…. فه‌ریق یووسفی

پێشه‌کی ده‌بێ بلێم، ئه‌م نووسراوه، بابه‌تێکی نیزیک له ته‌نزه. که‌وا بوو، ئامانجی نووسه‌ری ئه‌م دێڕانه، بێ حورمه‌تی، یا گاڵته، یا ناو زڕاندنی هیچ که‌س و گرووپێک نیه.

ئه‌و په‌ندی پێشینیانه، که سه‌ر دێڕی بابه‌ته‌که‌یه، په‌ندێکی کوردیه، که من زیاتر له زاراوه‌ی هه‌ورامیدا بیستوومه. شاباز یا باز، ناوی ها به خۆیه‌وه، هه‌موو که‌س ده‌یناسێ. کۆر کۆره‌ش، ناوی باڵنده‌یه‌که که زۆر چووکه‌تره له باز، که ئه‌ویش باڵنده‌یه‌کی ڕاو که‌ره. که به‌داخه‌وه، نازانم دروست ناوی چیه له زاراوه‌کانی دیکه‌ی کوردیدا.

به‌ڵام، پێوه‌ندی ئه‌م په‌نده به ئه‌م بابه‌ته له چیدایه؟  ئێستا ده‌ڵیم: زۆر جار که سه‌یری کاناڵی ئاسمانی حیزبه‌کانی ڕۆژهه‌ڵات ده‌که‌ین، زۆر جار ووت و وێژی ته‌له‌فزیۆنی له گه‌ڵ ئه‌ندامانی ڕێبه‌ری پارته کوردیه‌کانی ڕۆژهه‌ڵات ده‌بینین. که بابه‌تی په‌یوه‌ندیدار ، له گه‌ڵ به‌ڕێوه‌به‌ری پرۆگرامه‌که شی ده‌که‌نه‌وه.

به‌ڵام که ده‌ڵێن خاکی کوردستان به پیته، گاڵته نیه و لانیکه‌م له بواری سیاسیدا، زۆر ڕاسته. ماشاڵڵاه، سکرتێر هینده زۆر بووه، که مرۆڤ، ده‌بێ زیره‌ک بێت که بتوانێ ناوی هه‌موویان له به‌ر بکات. جا ئه‌ندامانی ده‌فته‌ری سیاسیش با لێگه‌ڕێین.

به‌ڵام ئه‌ندامانی کومیته ناوه‌ندی، ڕێژه‌یان هینده زۆره، ئه‌گه‌ر له داهاتووی ڕزگاری کوردستاندا، به‌شێکی به‌رچاو له پاره‌ی وڵات ته‌رخان بکرێت بۆ ماشین و بادیگارد بۆ پاراستنیان، هێشتا هه‌ر کورتی دێنێ…!!

هه‌ر حیزبیک بۆته چوار یا سێ یا لانیکه‌م دوو حیزب. به حیسابێکی خێرا، تا ئێستا نیزێکه‌ی 280 ئه‌ندامی کومیته‌ی ناوه‌ندیمان هه‌یه، ( خه‌رمان به‌ره‌که‌ت ). بۆ ده‌ڵێم تا ئێستا، چوون زۆر حیزبمان هه‌یه، له به‌ر که‌می ئه‌ندام، هێشتا لیستی 19 که‌سی ئه‌ندامانی کومیته ناوه‌ندیان پڕ نه‌کردۆته‌وه…..! هه‌ندێ حیزبیشمان هه‌یه که له حاڵی حازردا، یه‌ک ئه‌ندام یا چه‌ند ئه‌ندامی هه‌یه، ئه‌وانیش له داهاتوودا، به دڵنیایه‌وه ئه‌و بۆشاییه پڕ ده‌که‌نه‌وه..! جا ئه‌گه‌ر بێتوو حیسابی جێگر و موشاویری کومیته ناوه‌ندی بکه‌ین، ده‌بێ چاڵه نه‌وته‌کانی نه‌فت شا، به‌س بۆ ئه‌و زاتانه ته‌رخان بکه‌ین…!

هه‌موو شت نۆشی گیانیان، خۆ ئێمه به‌خیل نین، به‌ڵام با سه‌یرێکی واقیعی ئێستا  بکه‌ین. شه‌وێک، سه‌یری پرۆگرامی یه‌کێ له کاناڵه ئاسمانیه‌کانم ده‌کرد، له گه‌ڵ دوو ئه‌ندامی کومیته‌ی ناوه‌ندی حیزبێک،  له سه‌ر بابه‌تێکی نه زۆر ئه‌سته‌م، ووت و وێژیان ده‌کرد. له ئاخیری پرۆگرامه‌که‌دا، سه‌د بریام خواست له ئه‌و کاتانه‌ی که حیزبه‌کان به‌س ڕادیۆیان هه‌بوو. ئاخیر له نێوخۆی کوردستان، که‌متر که‌سێک هه‌بوو که ناوی ئه‌ندامانی کومیته‌ی ناوه‌ندی بزانێ.  که کادرێکی حیزبی له کاتی گه‌ڕانه‌وه بۆ نێوخۆ، له سه‌ر جاده‌کان یا له ئاوایه‌کان، بۆ خه‌ڵک قسه‌ی ده‌کرد، مرۆڤ هه‌ر خودا خودای بوو، بۆ جارێکیش بێت، چاوی به ئه‌ندامانی سه‌ره‌وه‌ی ئه‌و حیزبه بکه‌وێت. ئه‌و کات کومیته‌ی ناوه‌ندی، پرستیژ و ئیعتبارێکی دیکه‌ی هه‌بوو. من باوه‌ڕم به په‌روه‌رده کردن و خۆ پێگه‌یاندن هه‌یه. به‌ڵام میوه‌ی کرچ و کال، تفته، ده‌رخواردی خه‌ڵکی بده‌ی، ده‌یتفنه‌وه.

له پێشدا، ئیشاره‌م کرد، بۆ پڕ کردنی بۆشایی کومیته‌ی ناوه‌ندی، زۆر جار که‌سی وا هه‌ڵده‌بژێردرێ، هه‌ر کات له ووت و وێژی سیاسیدا ده‌یبینی، ده‌ڵێی  له شه‌ونشینی ماڵان دانیشتووه، هه‌ر هینده‌ی ماوه قاو بکات بڵێ، ئا چایێک بێنن….! نه چوار ووشه‌ی ئیمرۆیی، نه دوو ڕسته‌ی مێدیا په‌سه‌ند، نه دوو زانیاری ده‌گمه‌ن، هیچ، خوا نه‌کات. هه‌ر هه‌مووی چوار ڕسته‌ی کۆن و تیکراری، که هینده ووتراون، سوواون.

هێشتا جێی شوکری باقیه که هه‌ندێ له حیزبه‌کان، کاناڵی ئاسمانیان نیه، ده‌نا بۆ پڕ کردنه‌وه‌ی بۆشایه‌کان، ڕێکلامیان ده‌کرد.

ڕوومه‌تی حیزب، زمانی حیزب، هێزی پاڵنه‌ری حیزب، ئێستا به‌شێکی زۆری له تی‌ڤی‌یه‌کاندا ده‌بینرێته‌وه. پێویست ناکات هه‌موو سکرتێرێک ناتق بێت. یا هه‌موو ئه‌ندامانی کومیته ناوه‌ندی، ئوستادی فه‌ننی ووتووێژ کردن بن. به‌ڵام ده‌بێ پرۆگرامی سیاسی له ئاستی شعور و ده‌رکی کۆمه‌ڵگادا بێت. کۆمه‌ڵگای کوردستان، کۆمه‌ڵگای سی و پێنج ساڵ له‌مه‌و پێش نیه. ئێستا به هه‌زاران دوکتۆر و ئه‌ندازیار و لیسانس له ئه‌و کۆمه‌ڵگایه‌دا ده‌ژی. کۆمه‌ڵگای کوردستان، له باری سیاسیه‌وه، له کۆمه‌ڵگای پایته‌ختیش له پێشتره. با کایه به ئه‌قلیه‌تی خه‌ڵک نه‌که‌ین. ئه‌گه‌ر وا بڕوات، کۆمه‌ڵگای کوردستان، ده‌بێت به پێشڕه‌وی حیزبه‌کان. پرۆگرامی بێ مایه، خه‌ڵک بێزار ده‌کات. په‌نا بۆ کاناڵی دیکه ده‌به‌ن. ئه‌مرۆ دنیای ڕیکلامه. ئه‌وه‌ی هێزی ڕیکلامی به‌ هێزه، خه‌ڵکی زیاتر بۆ لای خۆی ڕاده‌کێشێت.

با پرۆگرامی سیاسی، پێش ئه‌وه‌ی بڵاو بێته‌وه، کاری جیدی له سه‌ر بکرێت،  ده‌نا به‌رهه‌می پێچه‌وانه‌ی ده‌بێت. با ئه‌وه‌ی لێزان و سیاسیه، پلان دابنێت، ئه‌و که‌سه‌یش، ناتق و زمان زانه، ووته‌بێژ بێت. یا زیاتر ده‌ر بکه‌وێت. په‌ندێکی کوردی هه‌یه، ده‌ڵێت: قسه له پێشدا بیگێژه، پاشان بیبێژه، ئینجا بیوێژه. با ئه‌وانه‌ی ده‌ر ده‌که‌ون، بێژراو بن، هه‌م خه‌ڵک شتیان لێ فێر بێت، هه‌م پرستیژی حیزبه‌کان ببه‌نه سه‌رێ.

به چیروکێکی ساده، به‌س پڕ نێوه‌رۆک، بابه‌ته‌که‌م، ته‌واو ده‌که‌م: ده‌ڵێن کابرایه‌کی کوێر، له سه‌ر گوزه‌رێ دانیشتبوو، تابلۆیه‌کی له ده‌ستدا بوو، له سه‌ری نووسرا بوو: من کوێرم، یارمه‌تیم بده‌ن. کابرایه‌کی هونه‌رمه‌ند، به لایدا تێده‌په‌ڕێ، سه‌یر ده‌کات، به‌س یه‌ک دوو نه‌فه‌ر پاره‌یان پێداوه، ڕاده‌وه‌ستێ، تابلۆکه‌ی له ده‌س ده‌ردێنێ، له سه‌ری شتێ ده‌نووسێ. پاشان تابلۆکه‌ی پێده‌داته‌وه. پاش ماوه‌یه‌ک کابرای هونه‌رمه‌ند ڕێده‌که‌وێته‌وه ئه‌و شوێنه، سه‌یر ده‌کات زه‌رفی کابرای کوێر پڕه له پاره.

کابرای کوێر به ده‌نگی پێڵاوه‌کانی، ده‌یناسێته‌وه، ده‌ڵێ ئه‌وه تۆی، ڕاستی ئه‌وه چیت له ئه‌و تابلۆیە کرد که وا خه‌ڵک ئاوا یارمه‌تیم ده‌ده‌ن. کابرای هونه‌رمه‌ند ده‌ڵێت: کارێکی سه‌یرم نه‌کرد. نووسراوه‌که‌ی تۆم کوژانده‌وه، له جیاتی نووسیم: وه‌رزی به‌هاره، هه‌موو لایه پڕه له دیمه‌نی جوان، به‌س من ناتوانم بیبینم……….!!!

 فه‌ریق یووسفی  

{jcomments off}