عوسمان ئۆجەلان: ئەرگەنەکۆنی پەکەکە دەستیان لە تیرۆرەکەی فەڕەنسا دا هەبووە

  سیاسەتمەداری كوردستانی توركیا عوسمان ئۆجەلان

هه‌ولێر ١٤ـی كانوونی دووه‌م / یه‌نایه‌ر (PNA) –

عوسمان ئۆجەلان دەڵێ عەبدوڵڵا ئۆجەلان پێی وایە ئەم جارە بە ئەگەری 90% ڕێككەوتنەكە سەركەوتوو دەبێت. ئەو ڕێككەوتنەی لە نێوان عەبدوڵڵا ئۆجەلان و حكوومەتی توركیا بۆ چارەكردنی ئاشتیانەی كێشەی كورد كراوە. سەبارەت بە تیرۆركردنی سێ چالاكوانە ئافرەتەکەی پەكەكەیش لە فەڕەنسا، بێ دوودڵی دەڵێت “ئەرگەنەكۆنی ناو پەكەكە ئەو كارەیان كردووە.”

ئێستاكە ئەندامی سەركردایەتیی پێشووی پارتی كرێكارانی كوردستان عوسمان ئۆجەلان، زیاتر لە 100 كیلۆمەتر لە چیای قەندیل دوورە. ئەو كە برای سەرۆكی بەندكرای پەكەكە عەبدوڵڵا ئۆجەلانە، لە ساڵی 2004ـەوە بە هۆی ناكۆكی لەگەڵ سەركردایەتیی حزبەكەی، وازی لە خەباتی چەكداری هێناوە. عوسمان ئۆجەلان دانیشتووی کە شاری كۆیەیە و لەوێوە ئامادەیی خۆی بۆ ناوبژیوانیی نێوان پەكەكە و حكوومەتی توركیا دەدەبڕێت.

ئەو لە پەیامێكدا كە بنەماڵەكەی لەسەر زای عەبدوڵڵا ئۆجەلانەوە پێی گەییشتووە، دەڵێ “ئاپۆ پێی وایە ئەم جارە بە ئەگەری 90% ڕێككەوتنەكە سەركەوتوو دەبێت.” ئەو ڕێككەوتنە لە نێوان عەبدوڵڵا ئۆجەلان و حكوومەتی توركیا بۆ چارەكردنی ئاشتیانەی كێشەی كورد كراوە.

 عوسمان ئۆجەلان پێی وایە لە ماوەی كەمتر لە ساڵێكدا حكوومەتی توركیا لێبووردنی گشتی دەردەكات و عەبدوڵڵا ئۆجەلانیش بەر لێبووردنەكە دەكەوێت. كاتێك سەبارەت بە تیرۆركردنی سێ چالاكوانی ئافرەتی پەكەكە لە فەڕەنسا پرسیارم لێ كرد، ئەو بێ دوودڵی گوتی “ئەرگەنەكۆنی ناو پەكەكە ئەو كارەیان كردووە.” عوسمان ئۆجەلان بەڕێوەبەری كۆنگرەی دامەزراندنی پەیەدەیش بووە و پڕۆگرامی ئەو حزبەیشی نووسیوە. ئەو دەڵێ “بە مافی خۆمی دەزانم داوا لە پەیەدە بكەم كە واز لە سیاسەتی یەكدەستی بێنێت و ببێتە هێزێكی سەربەخۆ، ڕێز لە ڕابردووی خۆی بگرێت و ڕێگە بدات دیموكراسی لە ڕۆژئاوای كوردستاندا دروست بێت.”

* ڕای خۆت چییە سەبارەت بە دانوستانەكانی حكوومەتی توركیا لەگەڵ عەبدوڵڵا ئۆجەلان، پێت وایە ئەم جارە پەكەكە و توركیا گەییشتوونەتە قەناعەتی تەواو بۆ چارەكردنی كێشەكانیان؟

لە توركیادا دوو نەتەوەی سەرەكیی كورد و تورك و چەند كەمەنەتەوەیەكی دیكە هەیە. توركیا 74 ملیۆن دانیشتووی هەیە و ئەگەر بكرێتە سێ بەش، بەشێكی توركە و بەشێكی دیكەیشی كوردە. لە دامەزراندنی توركیاوە تا بەئێستا، توركەكان و بۆچوونی كەمالیزم باڵادەست بووە و كوردیش لە نێویاندا تواوەتەوە. نەتەوەیەكی گەورەی وەكوو كورد نابێ چارەنووسی بەو شێوەیە بێت، چونكە ئەوانیش وەكوو توركەكان لەمێژە لەسەر ئەو خاكە دەژین.

توركیا زۆر ڕێگەی زوڵم و زۆری تاقیكردەوەی بۆ نەهێشتنی نەتەوەی كورد، بەڵام بە هیچ ئەنجامێك نەگەییشتن. كوردیش بەو قەناعەتە گەییشتن كە ڕێگەی سەربازی، چارەی كێشەكان ناكات و پێویستە لە ڕێگەی سیاسەتەوە بێت. زۆر جار ئەو مەسەلەیە لە ناو پەكەكەدا گفتوگۆی لەسەر كرا. لە 1993ـدا ئاگربەست ڕاگەیەندرا و ڕەحمەتی توركوت ئۆزال ویستی كێشەی كورد چارە بكات، بەڵام كوشتیان. لە 1999ـیشدا بەڕێز ئۆجەلان دەستگیر كرا و دیسان ئاگربەست ڕاگەیەندرا و دواتر ڕێگەچارەی ئاشتیانە لەلایەن پەكەكەوە ڕاگەیەندرا. ئەو كات توركیا خۆی كەڕ و كوێر كرد و چاوەڕێ بوو كورد خۆی تەسفییە بكات. لە ناو پەكەكەیشدا گرووپی شەڕخواز زۆر بوون.

ئەمە تا 2003 درێژەی كێشا. لەو نێوەدا پەكەكە خۆی تەسفییە كرد بۆ ڕەخساندنی كەشێكی لەبار. لەو كاتەوە تا ئێستا كورد و تورك باوەڕیان بە یەكتر نەكرد تائێستا. ئێستا سەرۆك ئۆجەلان ڕێككەوتنی ئاشتیی قبووڵ كردووە و دەیەوێ بەكردەیی بكرێت. ئەمە هەمان ڕێگەچارەكانی ساڵانی 93 و 2003ـیە. من ئەوە بە هەنگاوێكی زۆر پیرۆز و بەجێ دەزانم. پێویستە شەڕ ڕابگیرێت و كورد لە ڕێگەی ئاشتیانەوە كێشەكەی چارە بكات.

* پێت وایە ئێستا پەكەكە و توركیا باوەڕیان بەو ڕێگەچارەیە هەبێت؟

دەتوانم بڵێم ئەمساڵ زەمینەی چارەكردنی سیاسیی كێشەی كورد لە توركیا، لە هەموو كاتێك زیاترە. هەر دوو لا زۆر ڕێگەی چەكداری و سەربازییان تاقی كردەوە، بەڵام بە هیچ نەگەییشتن. ئێستاكەیش هەندێ كەس و گرووپ لە ناو توركیا و پەكەكەدا هەن كە ئاشتیخواز نین و دەیانەوێ شەڕ بەردەوام بێت، چونكە بەرژەوەندییان لەوەدایە. هەندێ وڵاتی ناوچەییش ئەمەیان ناوێت. سووریا لە ناو شەڕدایە و نایەوێ ئەو ڕێككەوتنە بكرێت. ئێران هاوپەیمانی سووریایە و نایەوێ لەو كاتەدا بە ڕێگەی ئاشتی كێشەی كورد چارە بكرێت. ئەمە بۆ چین و ڕووسیایش ڕاستە، بەڵام دەتوانم بڵێم بەشێكی گەورە لە هەر دوولا (پەكەكە و توركیا)، داوای ئاشتی دەكەن و دەیانەوێ كێشەی كورد بە ڕێگەی سیاسییەوە چارە بكرێت و بەو هۆیەیشەوە توركیای نوێ بەهێز ببێت.

* لە ساڵانی 93 و 2003ـدا هەندێ كەس و گرووپ لە ناو پەكەكەدا هەبوون كە دژایەتیی ئاشتیی نێوان كورد و توركیان دەكرد، پێت وایە ئێستا ڕێژەی ئەو كەسانە كەم بووەتەوە؟

ئەو كات 2003 بوو و ئێستایش 2013ـیە. ئەوان دە ساڵان شەڕیان تاقی كردەوە، بەڵام بینییان كە ڕێگەیەكی زۆر كورتیان بڕیوە و مەترسیی لاوازبوونی پەكەكەیش هەیە. ئەوانەی پێشتر لەگەڵ شەڕدا بوون، ئێستا ماندوو بوون. پێم وایە ئێستا گەییشتوونەتە ئەو قەناعەتەی كە لەگەڵ درێژەدانی شەڕدا نین.

* كاك عوسمان ئاگاداری ناوەڕۆكی ڕێككەوتنی نێوان بەڕێز ئۆجەلان و حكوومەتی توركیا هەی؟

زانیاریم لەو بارەیەوە كەمە. ساڵێك زیاترە ئۆجەلان وازی لە پەكەكە و توركیا هێناوە، پەكەكە دەڵێ ئێمە شەڕی ڕزگاریی گەل دەكەوین و توركیایش دەڵێ لەناویان دەبەین. دواجار هەر دوولا بەو ئەنجامە گەییشتن كە ڕێگەكەیان هەڵەیە. لە چالاكیی مانگرتندا ئاپۆ هەنگاوێكی نا و لەسەر قسەی ئەو، مانگرتنەكە كۆتایی پێ هات. ئەمە ڕای گشتی ئاگادار كردەوە كە ئاپۆ دەتوانێ كارێك بكات. بەڕێز عەبدوڵڵا ئۆجەلان لە ڕێگەی خزمەكانەوە پەیامێكی ناردووە و گوتوویەتی كە ئەم جارە دانوستانەكان 90% ئەگەری سەركەوتنیان هەیە.

* كاك عوسمان بەڕێز عەبدوڵڵا ئۆجەلان چی لە دەوڵەتی توركیا داوا كردووە؟ تەنیا دیموكراسی دەوێ یان داوای زیاتر لەوەی هەیە؟

پێش هەموو شتێك، بەڕێز ئۆجەلان ناڵێ كە هەر لەو ڕۆژەدا دەبێ بە ئەنجامی كۆتایی بگەین. دەیەوێ پێش هەموو شتێك ڕێگە بۆ چارەكردنی كێشەی كورد، كراوە بێت. بەو واتایەی كە كورد بتوانێ هێزی خۆی لە سستەمێكی دیموكراتدا بەكار بێنێت. هەر لەبەر ئەوەیش داخوازیی سەرۆك ئاپۆ و هەموو كورد ئەوەیە كە سیستەمێكی دیموكرات دروست بێت و كورد بتوانێ لەو سیستەمەدا درێژە بە خەباتی سیاسیی خۆی بدات.

بۆ ئەمەیش پێویستە لە دەستووری توركیادا مافی كورد قبووڵ بكرێت. پێشتر توركەكان دەیانگوت كورد لە توركیا نییە، هەر بۆیە هیچ مافێكیشی نییە. حكوومەتی ئێستا بوونی كوردی قبووڵ كردووە، بەڵام ئەمە بە تەنیا بەس نییە. كورد بە پێویستی دەزانێ لە ناو دەستووری توركیایشدا، بوونی قبووڵ بكرێت. لە 30 ساڵی ڕابردووی شۆرشی كورددا، كار بۆ ئەمە كراوە كە بوونی كورد لە توركیادا و مافەكانی قبووڵ بكرێت، ئەمە ئێستا هاتووەتە دی.

ئێستا توركیا بۆ دەستوورێكی مەدەنی خەبات دەكات و پێویستە بوونی كورد لەوێدا هەبێت، ئەمە خاڵی یەكەمە. خاڵی دووەمیش ئەوەیە كە مافی بنەڕەتی دانی پێدا بنرێت، وەكوو پەروەردە بە زمانی كوردی و شەریكبوونی كورد لە دەستەڵاتی ناوەندی و دەستەڵاتی هەرێمی. هەروەها پێویستە سیاسەت ئازاد بێت و خەڵك بتوانێ بچێتە پەرلەمان و یاسای 10% بۆ پەرلەمان نەمێنێت. ئەوان هەندێ هەنگاویان ناوە، بەڵام تەواو نین و دەبێ دەستووری بۆ هەموار بكرێتەوە.

* پەكەكە دروشمی كوردستانی گەورە و سەربەخۆی بەرز كردەوە، ئەدی ئەو دروشمە چی لێ بەسەر دێت؟  

ڕاستە، كاتی خۆی پەكەكە دروشمی كوردستانێكی دیموكراتیك، سەربەخۆ و یەكگرتووی بەرز كردبووەوە. ئەو كات پێویستیی ئەو دروشمە زۆر بوو، بۆ ئەوەی كورد كەسایەتییەكی نوێی خۆی دروست بكات. ئەو دروشمە زیانی نەبوو، بەڵكوو قازانجی تێدا هەبوو. كوردی توركیا مردبوو، لە كوردبوونی خۆمان شەرممان دەكرد.

دەمانەویست بە خێراترین كات ببینە تورك. سیستەمی توركیا كەسایەتی بۆ كورد نەهێشتبووەوە. دۆخێكی لەو شێوەیە پێویستی بە دروشمی بەهێز هەبوو بۆ ئەوەی ورە بێتەوە بەر كوردان. دروشمەكە زۆر عەمەلی نەبوو، بەڵام قازانجی زۆری تێدا بوو. دواجار گۆڕانكارییە ناوچەییەكان وای لە كورد كرد دروشمێكی واقیعیانە بۆ خۆی هەڵبژێرێت و ئەمە لە كوردستانی باشووردا هاتە دی كە سیستەمی فیدراڵی بوو.

پێم وایە بۆ پێشكەوتنی ئازادی و چارەكردنی كێشەی نەتەوەیی، سستەمی فیدراڵییە. پێویستە لە هەموو پارچەكانی كوردستان، كێشەی كورد بە پێی سیستەمی فیدراڵی چارە ببێت. ئێستاكە توركیا پێشتوازی لەو سستەمە ناكات، بۆیە دەكرێ حوكمی زاتی باش بێت بۆ ئێستا. ئەمە لە ستراتیژی پەكەكەدایە. ئەزموونی كورد لە باشووری كوردستان قەناعەتی بە هەموو كەسێك هێنا.

 * كەواتە ئێستا پەكەكە وازی لەو دروشمە هێناوە؟ – بەڵێ.

* سەرۆكوەزیرانی توركیا ڕەجەب تەییب ئەردۆغان دەڵێ لێبووردنی گشتی پەكەكە ناگرێتەوە. باشە ئەگەر كێشەی كورد چارە بوو، ئەدی چارەنووسی گەریلاكانی پەكەكە چی دەبێت؟ هەر لە قەندیل دەمێننەوە؟

حكوومەتی توركیایش ئێستا هەندێ كێشەی خۆی هەیە، بۆیە زۆر جار قسە دەكەن و دواتر لێی پاشگەز دەبنەوە. توركیا مەسەلەی كوردی بۆخۆی كردووەتە كێشەیەكی زۆر گەورە.

كورد لە دروستبوونی كۆماری توركیادا، نزیكەی 90 ساڵە ئەمە دەگوترێت. سیستەمێك لەسەر نەبوونی كورد دابمەزرێت، قبووڵكردنی بوونەكە زۆر ئەستەمە. پێم وایە لە 10 ساڵی ڕابردوودا گۆڕانكاریی زۆر هەبووە. بۆیە پێم وایە دوای قۆناغێكی دیكە، لێبووردنی گشتی قبووڵ دەكرێت. لە سەرەتاوە دەڵێن كە لێبووردنی گشتی ئەو كەسانە ناگرێتەوە، بەڵام من دەڵێم دادگەیی ئەرگەنەكۆن كۆتایی پێ دێت و كەسەكان سزا دەدرێن.

دادگەییكردنی كەجەكەیش كۆتایی پێ دێت. یانی لە ساڵی 2013ـدا كێشە گەورەكان یەكلا دەبنەوە. پێم وایە لە ماوەی دوو ساڵی داهاتوودا لێبووردنێكی گشتی دەردەكرێت و بەڕێز ئۆجەلانیش دەگرێتەوە، بۆیە ئێستایش باسی لێوە ناكرێت، بۆ ئەوەی كێشە بۆ ڕێككەوتنی نێوان ئۆجەلان و توركیا دروست نەكرێت.

* لە ماوەی دوو ساڵی ڕابردوودا گۆڕانكارییەكی گەورە لە ناوچەكەدا ڕووی دا و توركیا لە بەهاری عەرەبی و دەرەنجامەكانی دەترسا. هەلێكی باش بۆ كورد ڕەخسابوو بۆ ئەوەی بەهاری كوردی دەست پێ بكات. پێت وا نییە حكوومەتی ئەنكارا بە هۆی دانوستان لەگەڵ بەڕێز ئۆجەلاندا، بەهاری كوردی لە ناو توركیادا كۆنتڕۆڵ كرد؟

لە وڵاتانی عەرەبیدا كێشەی دیموكراسی و كۆمەڵایەتی و ئابووری هەبوو. زەمینەی ئەو بەهارە لە توركیا ئامادەیە. توركیا هەشت هەزار كوردی زیندانی كرد و ئەمەیش تۆوی بەهاری كوردی چاند. بۆیە توركیا هەستی پێكردووە كە ڕەنگە لە ساڵانی داهاتوودا مەسەلەی كوردەكان بتەقێتەوە. توركیا لەمە دەترسا و دەیزانی ئەگەر گفتوگۆ بكات، زەمینەی بەهاری كوردی نامێنێت. توركیا ئەمەی هەست پێ كرد، بۆیە ڕێككەوتنە تازەكەی دەست پێ كرد، لە ئێرانیش ئەو زەمینەیە هەیە.

* ئێستاكە نزیكەی چواردە ساڵە بەڕێز عەبدوڵڵا ئۆجەلان لە ناو زینداندایە، پێت وایە ئێستاكە بتوانێ ڕێگەیەكی گونجاو بۆ چارەكردنی دۆزی كورد دابنێت؟

وەكوو من ئاگادارم بەڕێز ئاپۆ لەو ڕەوشەدا نییە خەباتی سیاسی بەرەو پێش ببات، بەڵام سەركردەیەكی زۆر بەهێز كە بتوانێ جیگەی ئاپۆ بگرێتەوە، نییە. ئەگەر ڕەوشی ئاپۆ هەندێ باشتر بێت، دەتوانێ ڕێگەی چارەكردنی خۆش بكات. ناتوانێ بە تەواوی خەباتی سیاسی بەڕێوە ببات. ئێستاكە توركیا پێویستی بە ئاپۆ هەیە. چونكە تەجرووبەی دانیشتنی ئۆسلۆ هەیە كە سەركەوتوو نەبوو.

* بۆچوونێك هەیە پێیان وایە ئەو بەشەی لە ناو پەكەكەدان و دژایەتیی ڕێككەوتنی نێوان بەڕێز ئۆجەلان و توركیا دەكەن، سەر بە دەستگەی میتی توركیان، ئەمە تا چەند ڕاستە؟

میتی توركیا ئێستا لەگەڵ حكوومەت، دانوستان لەگەڵ ئۆجەلاندا دەكەن. میتی توركیا دژی چارەكردنی پرسی كورد نییە، بۆیە ئەوەی لە ناو پەكەكەدا دژایەتیی ڕێككەوتنەكە دەكەن، پێوەندییان بە میتەوە نییە، بەڵكوو لەگەڵ ئەرگەنەكۆندان. ئەرگەنەكۆن لە ناو حكوومەتی توركیادایە و نایەوێ پرسی كورد لە ڕێگەی ئاشتی و سیاسییەوە چارە ببێت. مستەفا قەڕاتسور و ڕەزا ئاڵتون كە لە ناو زیندانی توركیادا بوون، بەڵام سێ ساڵ پێش تەواوبوونی سزاكەیان ئازاد بوون. گومان لە كەسایەتیی ئەو دووانە هەیە كە پێوەندییان بە ئەرگەنەكۆنەوە هەیە. بە گشتی دەتوانم بڵێم ڕابردووی پەكەكە، كەسەكان پاوانخواز دەكات. هێزێك لە ناو سیستەمی سۆسیالیستدا لایەنگری ستالین بوو. ئەوان خاوەن بیروبۆچوونێكی پاوانخوازن، بۆیە پەكەكەیش وایە. زۆربەی ئەندامانی پەكەكە ئەزموونیان هەیە و ماندوو بوون، بۆیە پێم وایە لەگەڵ پڕۆژەكەی بەڕێز ئۆجەلاندان.

 * بۆچوونی تۆ لەسەر تیرۆركردنی سێ چالاكوانە ئافرەتە كوردەكەی فەڕەنسا چییە؟

پێت وایە كێ ئەمەی كردووە؟ مەبەست لەو كارە چییە؟ ئەردۆغان دەڵێ ئەرگەنەكۆنی ناو پەكەكە كردوویەتی و پەكەكەیش ئەو تۆمەتە دەخاتە پاڵ توركیا، ئەمە چۆنە؟ – گومان لە مستەفا قەڕاتسور و ڕەزا ئاڵتون هەیە. ڕەزا ئاڵتون لەگەڵ دەستگەی سیخوڕیی ئێران پێوەندیی باشی هەیە و لە 2003ـیش لە فەڕەنسا بوو. ئەو كات لەگەڵ دەستگەی سیخوڕیی فەڕەنسا لە دانوستاندا بوو. ئەو كات هیچ ئەندامێكی سەركردایەتیی پەكەكە نەیدەتوانی لە ئەورووپا نیشتەجێ بێت، بەڵام دەستگەی سیخوڕیی فەرەنسا پشتگیری لە ڕەزا ئاڵتون كرد و ئیقامەی ئەو وڵاتەی وەرگرت. ئەو كات بەڕێز قەرەیڵان لە هۆڵەندا بوو، بەڵام لە ترسی دەستگیركردنی، هاتەوە بۆ چیا. ڕەنگە گرووپەكەی ڕەزا ئاڵتون بە پشتگیریی دەستگەكانی سیخوڕی وڵاتانی فەڕەنسا و ئێران، ئەو كردەوەیەیان كردبێت.

* پێت وایە ئەمە لە پێناو كۆتاییهاتن بە ڕێككەوتنی نێوان بەڕێز ئۆجەلان و توركیا بووە؟

ئەرگەنەكۆنی توركیایش ڕێگەی چارەی ئاشتیانەی بۆ كورد ناوێت. ئێران و بەشێكیش لە ئەورووپا لەگەڵ چارەی سیاسیی پرسی كورددا نین. دەتوانم بڵێم لە ڕێگەی ڕەزا ئاڵتونەوە دەیانەوێ ئاستەنگ بۆ ڕێككەوتنەكە دروست بكەن.

* بێینە سەر باسی كوردستانی سووریا. ئێستاكە پەیەدە سنوورەكانی كۆنتڕۆڵ كردووە و بەشار ئەسەدیش لە دوالێدوانیدا بە شێوەیەكی ناڕاستەوخۆ دەستخۆشی لێ كردن كە ناوچە كوردییەكانیان پاراستووە. تۆ چۆن لە پەیەدە دەڕوانی؟ پەیەدەیش وەكوو گرووپەكەی ئەرگەنەكۆنە لە ناو پەكەكەدا؟

– پەیەدە، پەكەكەی سووریایە. كاتی دروستبوونی پژاك، پەچەدەكە و پەیەدە دوو بۆچوونیان هەبوو. یەكیان دەیویست ئەو حزبانە سەر بە پەكەكە بن و ئەوەی دیكەیش دەیویست سەربەخۆ بن. من پشتگیریم لە سەربەخۆبوونەكە دەكرد و بڕیارەكەیش بۆ دامەزراندنیان هەر ئەمە بوو. دوای ئەوەی ئۆپۆزسیۆنی ناو پەكەكە وازیان لە حزبەكەیان هێنا، بنەماكانی دامەزراندنی ئەو حزبانەیان بەلاوە نا و كردیانە پاشكۆی خۆیان. لە ناو پەكەكەدا سیاسەتی یەكدەستی هەیە.

چۆن دەڵێن خودا یەكە، پەكەكەیش دەڵێ كە لە سیاسەتدا دەبێ شوێنی خودا بگرێت. بەو واتایەی جیا لە پەكەكە، هیچ هێزێكی دیكە نەبێت. ئەو سیاسەتەیش لە دژی دیموكراسی و ڕێككەوتنی ناوخۆ و دیپلۆماسییەكی باشە. ئێستا كە دەرفەت لە ڕۆژئاوای كوردستان دروست بووە، هێزی پەكەكە (پەیەدە) ڕێگە نادات كە هێزێك لە ناو شۆڕشدا ببێتە خاوەن دەستەڵات. دەیانەوێ هەموو شتێك لە ژێر دەستی ئەواندا بێت.

دەیانەوێ یەكێتیی نەتەوەیی دروست بكەن، بەڵام دەیانەوێ لە ژێر كۆنتڕۆڵی ئەواندا بێت و قسەی پەیەدە قبووڵ بكەن. ئەمڕۆ پەكەكە بە ناوی پەیەدە ڕێگە نادات لە ڕۆژئاوی كوردستان سیستەمێكی دیموكراسی و یەكێتیی نەتەوەیی پێش بكەوێت و ئەمەیش زۆر مەترسیدارە. فرەحزبی كورد بەهێز دەكات و لە ناو ڕۆژئاوای كوردستانیشدا یەكدەستیی سیاسەتی پەیەدە، كورد لاواز دەكات، بۆیە پێویستە هەموو كەسێك ڕەخنە لەو سیاسەتەی پەیەدە بگرێت. لە شتێكدا پشتگیرییان دەكەم، كاتێك پەیەدە لە دژی سوپای ئازادی سووریا كورد دەپارێزێت، من لەگەڵیدام. دیمانه‌ی:

کاوه‌ جه‌م – هەولێر{jcomments off}