په‌رۆشی و سه‌ره‌خۆشی خاڵه‌ حه‌مه‌شه‌ریفی هه‌ورامانی، ئەحمەد کاکەمەمی

خاڵه‌ی خۆم! مرۆڤی شه‌ریفی شه‌ریف! پاکزادی حه‌لیمی سه‌لیم!

په‌روه‌رده‌ی بناری شاهۆ، خۆش مه‌شره‌فی شیرین گفتوگۆ، پیری به‌ بیری تێکۆشه‌ر، ڕێبواری ڕێگای رزگاری کورده‌واری،

پیاوی دیاری هه‌ورامان، رزگاریخوازی ڕیبازی هه‌رمان، هاو مه‌ته‌رێزی به‌ پاڕیزی وڵاتپاریزی ڕێبه‌ران، شینگێڕی شه‌هیدان و وره‌ده‌ری به‌ باوه‌ڕی خه‌باتکاران، خاڵه‌ی شه‌هید شه‌ره‌فکه‌ندی و  قاسملوو، جگه‌ر سووتاوی ڕۆڵه‌مردوو، خه‌باتکاری هاوسه‌نگه‌ر له‌ ده‌ستچوو، پیری ژیان پڕ له‌ خه‌م و ته‌م، ئه‌وینداری نیشتمان وه‌ک په‌روانه‌ بۆ شه‌م، مرۆڤیی ئاهورا ڕه‌وشتی به‌ری له‌ ڕه‌خنه‌ و زه‌م، چه‌ندی بۆت بنووسم که‌مه‌ که‌م.

 به‌ بیستنی مه‌رگت، به‌رگی ڕه‌شم پۆشی و بۆ هه‌زاران جار  شه‌ربه‌تی تاڵترین خه‌به‌رم نۆشی.  به‌ر له‌ فه‌تیحاو ماتیحا جارێکی دیکه‌ش هه‌موو نامه‌کانتم خوێنده‌وه‌ و نامه‌کان و  نامه‌ گۆرینه‌که‌ی کاکه‌ ئه‌فراسیاوی جوانمه‌رگیشم به‌سه‌ر کرده‌وه‌. به‌ بیستنی کۆچت جارێکی دیکه‌ش به‌ په‌له‌ ده‌فته‌ری په‌ڕپه‌‌ڕی ژیانم، هاته‌وه‌ به‌رچاوانم. بیره‌وه‌ری پڕ له‌ سه‌روه‌ری ده‌ورانی ده‌ربه‌ده‌ری، سه‌نگه‌ره‌کانی پێشمه‌رگه‌، گه‌وره‌دێیی شوێنی گه‌وره‌پیاوان، دوندی ژیلوانی جێ ژوانی ڕاز و نیازی ئاخه‌رین تیشه‌که‌نانی هه‌تاوی پاییزی، باخچه‌ و گوڵزاری ده‌ستچه‌قێنی ماندوو حه‌سێنی ده‌ستی پیرۆزت، ڕادیۆ و بلوره‌که‌ی قاڵه‌ مه‌ڕه‌، نه‌ڕه‌ی به‌ گوڕه‌ی سه‌رنجه‌کانی شێربه‌گی و ده‌نگی نه‌رم و گه‌رمی کاک ته‌ها، ده‌نگی به‌ سۆزی  خه‌جێ، ڕیشه‌ سپی و پاکتر له‌ به‌فری سپیی مه‌لا خالید، چاویلکه‌کانی مامه‌قاله‌، قه‌ڵافه‌ت و کاریزمای سیمای دوکتورقاسملو، جامه‌دانییه‌که‌ی لا تیلاکی مه‌لا ڕه‌سووی گه‌ردی، که‌ریم حه‌سه‌نی پاڕێزه‌ری فێرگه‌، حه‌سای ده‌ستی مه‌لا ره‌حمانی لاجانی، کوڵه‌باڵه‌که‌ی مام تاهیری هه‌ورامانی، به‌ربه‌سێڵه‌کانی داده‌ ئامینی هاوسەری کاک ئەحمەد قادری (سیمبان)،  نانه‌ گه‌ڵاگه‌ڵاکه‌ی کاکه‌ نه‌جمه‌ی حیسامی دڵسوتاو،  دوو چاوه‌ حه‌مامه‌که‌ و مام ڕه‌حمانی یه‌کچاو، تفه‌نگی شانی عومه‌ر به‌قایی،  ئاوازی دڵگری(زهره‌ یارم)ی کاکه‌ ئه‌سعه‌دی تاتایی… یادیان به‌خێر، یادیان به‌خێر، یادت به‌خێر، یادت به‌خێر…

 

ئاخر خاڵه‌ی خۆم و خاڵانم! مه‌گه‌ له‌ یادت چووبۆوه‌، له‌ سه‌رخۆشییه‌که‌ی کاکه‌ ئه‌فراسیاو گوتت: دێیته‌وه‌ به‌سه‌ربه‌رزی و پێکه‌وه‌ به‌ ده‌ستنوێژی ئاوی زرێوار و به‌ که‌ڵاشی ده‌ستچنی وه‌ستای هه‌ورامی سه‌فه‌رێکی باغاتی نودشه‌ و سه‌ری شاهۆی شاهۆ نشین بکه‌ین.

به‌ڵام وادیاره‌ هاوسه‌فه‌ری فریشته‌ی مه‌رگت له‌ هاوڕێێه‌تی منی بێ به‌رگت  لا خۆشتر بووه‌.

ئه‌و فریشته‌ی هاوڕڕی دوا کۆچی هه‌مووانه‌. ده‌ک مه‌رگو ده‌ردی بێ.

منیش به‌ڵێنم  پێ دای، له‌ ژێڕ ساییه‌ی دار هه‌نارێکی نۆدشه‌ به‌ هه‌ناسه‌ی سارده‌وه‌ نامه‌کانی ئه‌فرسایاو‌ت بۆ بخوێنه‌مه‌وه‌ و تۆش به‌ فرمێسکی گه‌رمه‌وه‌ دیوانی مه‌وله‌ویم بۆ خه‌تم که‌ی.

 ئاخ له‌م ژیانه‌ و داد له‌م مانه‌. نه‌ ئاوات دێنه‌ دی و نه‌ به‌ڵێن دێنه‌ جێ. خۆزگه‌م ده‌خواست مه‌رگ مۆڵه‌تی داباین، تا لای وه‌ستا سێمانی گاگه‌شیی جووته‌ کاڵه‌یه‌کی ئاسن هه‌ڵبه‌ستین و له‌ شاهۆوه‌ به‌ره‌وه‌ نه‌کرۆز و زمزیران و گه‌ده‌ و هه‌ڵگورد و داڵانپه‌ڕ… هه‌موو کوردستانی خۆشه‌ویست بگه‌ڕێن، جا وه‌گه‌ڕێن.

من وه‌گه‌ڕیم بۆ دیاری له‌ بیرچوونه‌وه‌، تۆش بۆ دیاری هه‌ر دیار و له‌ بیر مان.

ده‌زانم کۆچه‌که‌ت،  کۆچی نابه‌دڵی بووه‌ و چاو له‌ ئاسۆی گزینگی خۆری رزگاری و پشکوتنی گوڵزاری به‌ختیاری کوردستان بووی.

به‌ڵام ئه‌رخه‌یانم  هه‌ر وه‌ک لێره‌ به‌ بڕواوه‌ به‌گژ  زۆرداران و سته‌مکاراندا چوویه‌، له‌ وه‌ڵامی قه‌برێشدا هه‌ر ئه‌و ره‌وشته‌ت ده‌بێ و له‌ وه‌رامی هه‌ر پرسیارێکدا هۆنراوه‌که‌ی(وه‌ڕامی قه‌بر)ی مامۆستا هه‌ژار ده‌خوێنیته‌وه‌ و هه‌ر به‌ زاراوه‌ی‌ شیرینی هه‌ورامی بانگیان به‌ گوێدا ده‌خوێنی و هۆره‌ی ئاهورایی و هۆنراوه‌ی مه‌وله‌ویان بۆ ده‌چڕی و باسی هه‌ژاری کوردیان بۆ ده‌که‌ی.

به‌ڵێن بێ، گه‌ر‌ مه‌رگ به‌ربینگم پێ نه‌گرێ و پێشی گه‌ڕانه‌وه‌م لێ نه‌گرێ. ده‌گه‌ڵ پیرێکی هه‌ورامی بێمه‌ سه‌ر گڵکۆت و جارێکی دیکه‌ش له‌ بان کێلی سه‌رت دیوانی مه‌وله‌ی خه‌تم که‌ینه‌وه‌.

 

 رووحت هه‌ر شاد بێ

یادت هه‌ر به‌خێر بێ، خاڵه‌ی خۆم.

خۆشه‌ویستت: ئه‌حمه‌د.

بابەتی پەیوەندیدار

پیرێکی سه‌نگه‌ری کوردایه‌تی ، (لالۆ حه‌مه‌ شه‌ریف حه‌لیمـی) به‌ کۆڕی هاوڕێیانی په‌یوه‌ست بوو.

‌