هۆکاری بکوژ و کوژراوەکان ناسنامەکانن، یان ئایینەکان؟. مەجید کاکەوەیسی

بە ناوی خوای گەورەو میهرەبان

( ناسنامە بکوژەکان)

ئایا! ئایینی ئیسلام، ئایینی کامڵ بوونی گشت ئایینەکان، سەرچاوەی ئاشتی ئەخلاق و بەرنامەی ژیان بووە بۆ مرۆڤایەتی،

یان ئایینی توندوتیژی، کوشتن و سەربڕین، تێکدان و داسەپاندن، چاوترسێن و داپڵۆسین!؟

– پێش ئەوەی بچمە سەر باسی نێوەڕۆکی ئایینەکان و بە تایبەت ئایینی ئیسلام؛ داواکارم لە هەموو ئەوانەی وا بە جۆرێک لە جۆرەکان بیرۆکەی دژ بە ئایینیان لا دروست بووە و بە داوای لێبووردن؛  لە رووی بزانی یان نەزانیەوە، تووتیوار و لاسایی کەرەوە، بە هەڵخەڵەتاندن لە روانگەی میدیاکانەوە و بە گوتار و بیرو هزری فرچک گرتوویی دژە ئاینییەوە لە زمان و قەڵەم و بیرو هزری ئەوانەی وا نەیار بوون و هەن؛. ئەوانەی وا تەنیا دروست بوون بۆ دژایەتی کردنی ئایین و ڕیشەیەکی کۆن و کینە دۆزییان هەیە. وەک دەزانین ئەوە هەر لە سەرەتایی هاتنی ئایینی ئیسلامەوە، و دژایەت کردنی تا بە ئەمڕۆ، هەردەم هەولیان داوە بۆ ناشیرین کردنی ئایین بەو فەن و فێڵ و کەرەسانەی کە بە دەستیانەوە هەیە و بە سیاسەتی ئابووری و ئامێری و چەواشەکاری، خەڵکیان توشی سەرلێشێواوی و شڵەژاوی کردووە و هەر ڕۆژە بە جۆرێک بیانوو دادەتاشن بۆ ئەوەی بە ئامانجەکانی خۆیان بگەن کە ئەویش گەرانەوەی مرۆڤایەتیە بۆ تێکدانی نەزمی کۆمەڵگە و بێنرخ بوونی مرۆڤ و سەردەمی بی سەرەو بەرەیی و شکاندنی هەموو بەها مرۆیی و ئەخلاقیەکان کە ئەمڕۆ بە چاوی خۆمان نیشانەو تەنانەت چەسپاندنی ئەو بشێوی و نائارامیە دەبیین، کە هەر ڕۆژە بە پەلاماری هەوەس شەهوەتبازی بۆ سەر منداڵ و تەنانەت کچ و دایک و کوڕ و کەسی هەرە نزیکی خۆیان کە هندیک بە شانازیەوە ئەنجامی ئەدات و پێی خەتا نیەو لەو پەڕی

جنایەتکردن و ئەتک کردنی مرۆڤدایە و لە کچ و دایک و خوشکی خۆیان چەندین منداڵیان هەیە و هەر درێژەی دەبێت و هەر جارە تەک و توکێک لە گۆشەی ڕۆژنامەکانیانەوە سەر دەر دەهێنن؛ ئاخۆ چەندەی بە شاراوەیی ئەنجام درابێت و بدرێت،؟! دەڵێن ئازادیە و مرۆڤ دەبێ ئازاد بێت! ئەوەیە ئازادی و سیکۆلاری.!!.

– پرسیاری گرنگ لێرە ئەوەیە؟ ئەوانەی کە هەر زمانی پلار، پەلامار و دژایەتی دەزانن و لاسایی دەکەنەوە، زۆربەی هەرە زۆری ئەندامی ناو بنەماڵەی موسڵمانەکانە! ناویان هێشتا هەر ناوی ئیسلامیان پێوەیە؛ سوێند بە خوا و قورئان و چی و چی دەخۆن! هێشتا باوەڕیان بە تڵاق و مارەبڕینی ئیسلامی هەیە، باوەڕیان بە زۆربەی بەها ئیسلامیەکان هەیە، کە چی لەو لاوە باوەڕیان بە ئایینی ئیسلام نیە؛! دەڵێن ئیسلام درۆیە! دەبێژێ لای خواە نەهاتووە! دروستکراوە! شێعری محممد خۆیەتی! …. بەلای باوەڕی منەوە دەلیلیشی ئەوەیە کە نەتوانڕاوە یان نەیانهێشتووە بە باشی و دروستی مرۆڤەکان فێری ئایینەکە بن و کەس و مامۆستای شارەزا نەبوون لە هندێک شوێن و خەڵک هەروا بە لاسایی کردنەوە بەشێکی فێری ئایین و ئەرکانەکانی ئایینی بووە و بە داخەوە هەتا ئیستاش بە کەم و کۆڕی و نادروستی بەشێکی جێبەجی دەکەن و مافی، بە راستیی دروستی ئەرکانەکان و ئەسل و فەرعی دینەکەیانەوە نیە. وەک عورف عادات کردوویانەتە دین و بە ناوی دینەوە بە خەڵکی تری ناشارەزا دەڵێنەوە و ناحەزانیش کروویانن بە نما سیمای ئایینەکەو بەوانەوە ئایینەکە دەناسن!.

– پرسیار و باسە دژبەرەکان هەر هەمانن کە لە سەرەتای هاتنی ئاینی ئیسلام ئیراد و رەخنەیان دەگرت و بەربەستیان دروست دەکرد، شەڕیان بە پەیامهێنەرەکەی و یارانی دەفرۆشت؛! هەر هەمانن بەڵام ئەمڕۆ بە ناوی عەلمانیەت و فرت و فێڵی داتاشراوی ڕایەڵە خێراکان، کە  زۆر بیانوو بەهانەیان هەیە و لەم ڕووە دەیانەوێ بە ناشیرین کردنی ئیسلام خۆیان بە ژیرو تێگەیشتوو نوێپەرەست پیشان بدەن.!

– شەوێک میوانی کەسێکی ناسیاو دۆست بووم، کە خۆی بە ڕۆشنبیر دەزانێت و بە لای باوەڕی منەوە کەسێکی تێگەیشتووە، باسمان لە سەر توندڕەوی ئیسلامی و ئیسلام دەکرد، کە چی لە ناکاو وتی ئەم ئێوارەیە شتێکم بەرچاو کەوت لە ئینتێرنێت و وابزانم فەیسبووکی وت، کە گوا بە قەولی ئەو نوسرا بوو کە محممد لە ناو کۆڕی یارانیدا کەسیک لەویوە تێپەڕیوە و بە خرابی سەیری کردووە و گومانی لێی هەبووە، ئەویش گورج دەستوری بە یەکێک لە ئەسحابانی کە گوا ئیمامی عەلی یان عومەر بووە، ئەوانیش زوو بێ یەک و دوو، سەریان لە لاشەی کردووەتەوە!!!  جا بزانە چەندە لە ئاکار و ڕەوشتی ئیسلام و خودی پێغەمبەر بێئاگایانە و بە ئەنقەست بۆ ناشیرینکردنی ئیسلام و پێغەمبەرەکەی بابەتی وا بڵاو دەکەنەوە کە فڕی بە ڕاستیەوە نیە، هەر زۆر جێگای سەرسوڕمانە بۆ من کە کەسانێک خۆیان بە ڕۆشنبیر دادەنێن لەو جۆرە بابەتانە دەخوێننەوە و دەیکەنە هەوێنی ناو ئاخنی باسەکانیان.!!! دا خوا ئەوەی ئاکارو کرداری ئەو پێغەمبەرو ئەسحابانە بە باشی و بێ دەمارگرژی بخوێنێتەوە، و تەنیا تۆسقاڵێک ڕامێنێ لەو خەبات و تێکۆشانە کە لە ماوەیەکی کورتدا نیوەی جیهانی گرتەوە، بە کارو کردەوەی خراب و ناشیرین توانیویانە بگەنە ئەو ئاستە بەرزە لە موسڵمان کردن و خواپەرەستی؟! نە خێر نە!  

– ئەوانەی لە مێژوودا کاری باشیان نەکردووە دەوامیان زۆر نەهێناوە بەرنامە و ناو و ناتۆرەیان کەوتووەتە زبڵدانی مێژووەو و کەس ناویان هەر ناهێنێت و پەیڕەوانیان شەرم ئەکەن کە باسیان لێوەبکەن.

– ئەوە تەنیا ئاینی ئیسلامە بە شانازییەوە ڕێڕەوانە ڕاستەقینەکانی شادومانن و بەو پەڕی سەربەرزی خۆشەویستیەوە درێژە بەو ڕێگا و ڕێبازە مەزن و پیرۆزە دەدەن، هەر بۆیە هێشتا تەنزیم و ئاکار، ئەخلاق و ڕەوشتی بەرزی کۆمەڵگە هەر لە ناو خواپەرەستانی بێ ڕیاو دڵ و دەس پاک و خاوێن ماوەتەوە و تام و چێژی ژیان هەست پێدەکرێ. بۆیە ئەوانەی وا دەیانەوێ بە کامەرانی، سەربەرزی و سەرفرازی بژین با بچن لەوانە نزیک ببنەوە و درەسیان لێوەرگرن.

– جێی سەر سوڕمانە کە هێشتا ئەو کەسانەی لە ناو جەرگەی کۆمەلگەی ئیسلامی فرچکیان گرتووە و تەنانەت هەموو کەس و دەوروبەری نزیک لە خۆشیان موسڵمانن و ناوەکانیشیان ناوی ئیسلامییە و باوەڕی بە سوێند و تڵاق و مارەیی، عورف عاداتی ئیسلامی هەیە، بەڵام لەو لاوە باس لە دژایەتی ئەکات و بێحورمەتی بە ئایین و بە بیرو باوەڕی زیاتر لە یەک ملیارد مرۆڤ ئەکات!؛

– پرسیار ئەوەیە؟ ئەگەر باوەڕت بە خوا هەیە و پێتوایە خوایەک وجودی هەیە؛ ئەی چۆن باوەڕت بە پەیامەکەی و بەرنامەکەی نیە!؟ ئەگەر خوا وجودی هەبێ حەتمەن پەیامیشی هەیە و پەیامبەری بۆ داناوە و ڕای سپاردووە. ئەگەر پەیام ڕاسپاردەی هەیە کە وایە کتێب و پەیامە ئاسمانیەکان هەموو ڕاستن. ئەی چۆن بە هندێک لە پەیامبەران باوەڕتان هەیە و بە بەشێکیان باوەڕتان نیە؟ ! ئەگەر لە ڕوانگەی هندێک موسا (ع) و عیسا (ع).. بونیان هەبێ و ڕاست بن و پەیامی ئاسمانییان پێ بووە، ئەی چۆن باوەڕیان بە محممد ( ص) نیە، کە پێغەمبەر بوو بێت و کتێبی ئاسمانی بۆ هاتبێت؟! بۆیە هندێک تەنیا بێ بیر کردنەوە تەنیا بە دژایەتی کردن لە گەڵ عەرەب و عەجەم.. و نازانم چی هەموو شتێک ڕەش دەبیین و ڕاستیەکان  ناپێکن و نایانەوێ تێبگەن، کە ئەوەش لە گەڵ مەنتقا ناگونجێ.

– پێیان وایە ماسڵمانێکی ” ئەندونزی و مالزی” و وڵاتە دوورەکان باشن و زۆر بە جوانی ڕەفتار ئەکەن، بەڵام موسڵمانێکی عەرەب تورک فارس، زۆر خرابن و ئاین لە چاو ئەوانەوە دەبینن؟! پرسیار لێرە ئەوەیە؟ ئەوە دینەکەیە یان ڕەگەزەکە کە وا دوژمنایەتیت دەکات؟! عەرب و تورک و فارس و غەیرە بە ناو ئایینەوە لایەنێکیان چەوساندووەتەوە و خۆیان پێ دروست کردووە و ناسنامەی خۆیان چەسپاندووە، بەڵام لایەنی بۆ نمونە وەک کورد نە توانیویەتی لە ئایین بە باشی کەڵک وەر گرێت و ئەویش خۆی پێ ڕزگار بکات نە توانیویەتی بە ناو نەتەوەپەرەستی، وڵات پارێزیش خۆی و وڵاتی تا ئیستا ڕزگار بکات.

– ئەوە ئایین نیە کە خرابە بەڵکوو ئەوە مرۆڤ و نەتەوە و قەومەکانن کە وا ئایین بۆ بەرژەوەندی ڕەگەز پەرەستی خۆیان بە کار دەبەن و لایەنی تری پێدەچەوسێنەەوە و ئایین لای من و تۆ و ئەو ناشیرین ئەکەن. بەڵام دەبی بزانین ئایین بۆ خۆی وەک بەرنامەو پرۆگرام، ژیاننامەی مرۆڤایەتیە و هیج کەم و کۆڕی نیە. بەڵکوو مرۆڤەکان بە باو خواست و ویستی خۆیان بە کاری دەبەن و هەر لا لە هەر دەورو زەمانێک کەلکی نا دروستی لێوەر دەگرێت.

– لە هەموو داختر ئەوەیە:؛ ئەوانەی کە خۆماڵین لە ناو جەرگەی ئایینی ئیسلام و کۆمەڵگەی ئیسلامی گەورە بوون، بێحورمەتی زۆرتر ئەکەن!؛ ئاخۆ لە خۆیان نەپرسیوە؛ چۆنین وا ئیزن بە خۆیان دەدەن کە هێشتا نەیانتوانیوە بە باشی ئیسلام بناسن و بیخوێننەوە، تەنانەت مێژوویی ئیسلامی ناناسن، مانای ئایەتەکانی قورئان نازانن، حەدیسەکانی پەیامبەری ئیسلام نازانێ و بێ ئاگایە؛ کە چی، دژبەری ئاکارو کردەوەو کردارەکانی پەیامبەر و ئەسحابانی و باقی ئەو ئیمامانەی کە تەواوی تەمەنی خۆیان بە شوێن شیکردنەوەی ئایەتەکانی قورئان و حەدیس و زانستی ئیسلامی بوون و بەو پەڕی ئەمانەتەوە لە سەختترین ڕۆژگاری ژیانیان و بەو پەڕی لە خۆ بووردوویی و بە ئەمانەتەوە توانیویانە پاش دەیان ساڵ دوورکەوتنەوە لە ماڵ و منال و ژیانی ئاسایی خۆیان تەرخان بکەن بۆ دۆزینەوە ڕاستی و ڕەواییەکانی ئەو ئایینە پاک و بیگرد و خاوێنە، بۆ حیکمەتەکانی ئەو پێغەمبەرە بە تواناو و زاناو پڕ حتکمەتە کە بە ئیزنی خوای گەورە، مرۆڤایەتی لە چنگ تاریکی و لە ژێر دەستی مرۆڤ بۆ سەربەستی و ئازادی بەرز کردەوە و لە بەندەیی کردنی بەندەوە بۆ بەندەیی کردنی خالەقیەوە فێری ژیان و ڕەوشت ئاکاری مرۆڤی و یەکتا پەرەستی کرد.

– ئەوانە چۆنین ئیزن بە خۆیان ئەدەن بە بی بەڵگە و بە بێ خویندنەوە و بە بێ شارەزا بوون و ناسینی ئیسلام و پەیامهێنرەکەی و حەدیسەکانی، و بە بێ تێڕامان و تێفکرین، بێ هەلسەنگاندن، هەر بە بینینی هەڵەیەک کە ناشزانێ لە کوێوە سەرچاوەی گرتووە هێرش دەکاتە سەر ئیسلام، و بە تیرۆریست و پیاو کوژ و دواکەوتوو ناوی دەبات و ئیهانەت و بێحورمەتی پێدەکات!؛

– دەپرسم؟ ئێوەی دژبەر توانیوتانە بچن بە زانستی و بێ دەمار گرژی و بێ حەساسیەت، لێکۆڵینەوە بکەن لە سەر دۆخ و هەل و مەرجی ئەو کاتی جیهان کە ئایینی ئیسلام تیایدا سەری هەڵدا.

– دەپرسم؟ بێ دەمار گرژی توانیوتانە ژیانی حەزرەتی محممد بە جوانی بخوینەوە؟ توانیوتانە هەڵس و کەوتی پێش پێغەمبەرایەتی و پاش پێغەمبەرایەتی بخوێننەوە و خۆتان سەر پشک بن لە لێکدانەوە و ئاکارو ڕەوشتە بەرز و پڕ بەهاکانی؟

– دەپرسم؟ توانیوتانە ژینانامەی ٢٣ ساڵەی هاتنەخوارەی ئایەتەکانی قورئان و سەرجەم حەدیسەکان، حەدیسە دروست باوەرپێکراوەکان نەک هەڵبەستراوەکان؛ بخویننەوە یان سەرنجێکی بدەن، و ئەو کات قەزاوەت بکەن؟

– دەپرسم؟ مێژووی ئیسلام و پێغەمبەرەکەی باشتر دەناسن و خوێندووەتەوە، یان گۆرانیبێژێک، سیاسەتمەدارێک، یان بە قەولی خۆتان داروین و مارکس ئنگلس و لینین…. وە یان ستالین و هیتلێر …. هتد. کە بەراوردێک بکەن لە نێوان هەموو میژوویی ئیسلامی و شەڕی داگیرکەرانی جیهان لە کۆن و نوێ، بزانن ئیسلامی هەژار و بێ چەک و چۆڵ کە تانیا ئەگەر هەیبووبێ هەتا ئیستاش لە شمشیرێک زیتری نەبووە، و گەر پاریزگاریشی لە خۆ کردبێت و پەلاماری دابێت بەو شمشێرەکی بەرامبەرەکەی ڕای کردووەو ڕزگاری بووە و تەنات نەیتوانیوە لە مەودایەکی چەند بستی ئامانجی خۆی ببپێکێ، وەک ئەو هەموو چەکە سوک قورسانەی کە لە دووری چەند کیلۆمتریشەوە ئامانجی ڕاست و دروست دەپێکن و مرۆڤەکان بە کۆمەڵ دەکوژن، کە هەموو ئەوانە دروستکراوی دەستی عەلمانیەت و مۆدێڕنیتە و دیمۆکراسیە و بە کۆمەڵ کوشتنی مرۆڤەکان نابینن بەڵام دەمی چەقۆیەک کە ئەویش کاری دژە ئاین و ئیسلامە، باش دەبینن و بەرچەسپی دەدەن بە موسڵمانەوە، بە بیانووی ئەوەی کە بە ناوی خوا، اللە و اکبر، کە فڕیان بە ئیسلامەوە نیە دەخەنە ڕوو و دەڵێن ئیسلام ئەو خەتایانە دەکات! .

– خوای گەورە بە پێی نەسی حەدیس ئایەت، کوشتنی کەسێک هەر کەسێک موسڵمان یان غەیری موسڵمان بە گرانتر لە ڕووخانی کەعبەی پیرۆز ناو دەبات. جا چۆن خوا پێی باشەو عەبدی خۆی هان دەدا بۆ کوشتنی عەبدی خۆی کە هەردوکیانی وەک یەک خوڵقاندووە! بۆ بیر ناکەنەوە ئەگەر وایە بۆ وایە؟! ئەمەی چۆنە و ئەوەی چۆنە؟!

– هەر چەند ئەمە بەراورد نیەو نامەوێ لە تەنیشت یەک وەک نمونە بیانهێنمەوە، بەڵام تەنیا بۆ ئەوانەی هێشتا وە خۆ نەهاتوون دەڵێم؛  لە زەمان و دەوری هیتلەر و ستالین و چی و چی زۆر خەڵک کوژران و سوتێنران، و بە ئەتۆم بۆمب و موشەک و تفەنگ و چەک و تەقەمەنی، ئەڵغام  و گاز و ژەهر و،،…  کە ئیستاش و ئەمڕۆ بە چەکی مۆدێڕن بە ناو دیمۆکراسی مۆدێڕنیتەوە، مرۆڤەکان دەکرینە قەقنەس و دەکوژرین و دەسوتێن و بێحورمەتی پێ دەکرێن و مال و ژیانیان دەکڕێتە قوربانی بەرژەوەندی و چاو چنۆکی و داگیرکاری و نژاد و نەتەوە پەرەستی و پاوانخوازی و ئاڵا و زلهێزی…؟  یان لە زەمان  ئیسلامی بانگخوازی ئاشتی ئازادی و پێکەوەژیان و ڕێز و حورمەت و ئاکار ئەخڵاق، کە تا ئەمڕۆ دەستی ئاشتی پێش هەر شەڕو پێکدادانێک بووە.؟

– کێ هاتووە داوای لە ئیسلامی و ئیسلام کردووە بۆ ئاشتی و پێکەوە ژیان کە ئیسلام جوابی نەی دابێتەوە؟! بە پێچەوانە ئەمڕۆ بە ناو کاری تێکدان و تیرۆریستی، شەڕیان، بە سەر کۆمەڵگەی ئیسلامی و ئیسلامدا سەپاندووە و بەردەوام بۆ ناشیرین کردنی ئایینی ئیسلام بە هەموو میدیای سەردەم و چەک و ئامێری مۆدیڕن و داگیرکاری بڵاو کردنەوەی شتی ناشیرین و ناڕاست، گروپی بە ناو ئیسلامی و تەقاندنەوەو خۆ کۆژی ئایینان لە بەرچاوی ئەوانەی وا خۆشباوەڕن و هیچ خوێندنەوەیکی ڕاست و دروستیان نیە و تەنیا لەبەیک دەڵێنەوە، ناشیرین کردووە و بۆ مەبەستی ئامانجی گلاوی خۆیان خۆمانیان بە گژ خۆمان داوە!

– دوژمن بە پلان فرت فێڵ هەر لە دێر زەمانەوە حاکمی زاڵمی لە کۆمەڵگەی ئیسلامی داناوە و پشتی گرتووە و دەگرێ و بە گژ گەل و نەتەوەکانی دەوری بەر و گشت کۆمەڵگەی ئیسلامی داوە و گەلانی بێدەسەڵات و ئیسلامی هەژاری خستووەتە تەڵەوەو دەڵێ خۆیشت لادە و هیچ نەکەی؟! ماڵ و عەرز و حاڵ و وڵات، و تەنانەت گەرووی ڕۆح و هەناسەی گرتووە و بە ئاشکراو بە نهێنی، لە ڕاست چەپەوە بە چەکی سوک و قورس بە بۆمب و بۆمباو موشەک تۆپ و تەیارە و ژەهر خەریکی لە ناو بردنیەتی، و ماڵ و حاڵی داگیر کردووە و دەڵێ هەقیشت نیە دەنگت وەدەر بێت و لە خۆت پارێزگاری بکەیت؟!

– بە هەر حاڵ؛ شەڕ و وێرانکاری پیشەی ئایین کۆمەڵگەی ئیسلامی نەبووە و نابێ، بەڵام ژێردەستی و کۆیلەییش لە کەس قەبوڵ ناکەن، وەک قورئان هەر بۆ ئەوە دابەزی کە مرۆڤ لە کۆیلەیی و ژێر دەستی ڕزگار بکات و یەکتا پەرەستی بکاتە بنەمای بڕوا ڕۆحیەکانی مرۆڤایەتی.

– خوای گەورە بە پێی نەسی قورئان، ڕێزی لە مرۆڤ گرتووە.

– مافی ئازادی و بەرابەری بۆ مرۆڤ داناوە، بە پێ ئایەتەکانی قورئان و حەدەیسە پیرۆزەکان، مرۆڤەکان تەنیا لە عیبادەت و خواناسیدا بەرزی و نزمی هەیە و بەس.

– ڕێزی لە ئایینە ئاسمانی و مرۆییەکان گرتووە. دەستی ئاشتی ئاشتەوایی بڵاو کردووەوتەوە.

( …لکم دینکم ولی دین)

– هەر کەسیک نەفسێک بە بێتاوان بکوژێ وا بزانە هەموو مرۆڤایەتی کوشتووە…

– هەر کەسیک کەسێک ڕزگار بکات لە کۆیلەتی و چەوساندنەوە و ژیردەستی و مردنی ناسروشتی.، وا بزانە هەموو مرۆڤایەتی ڕزگار کردووە….

– ئەوانەی دەیانەوی دژایەتی یان بەرچاو ڕوونیان هەبێت لە ڕابرددو و ئیستا و بە تایبەت لە ئایین و ئاینزاکان. با بچن خویندنەیان هەبێ و دواتر باس و خواست  بکەن.

– تۆ کە باس لە ئیسلام و پێغەمبەرەکی بە ناشیرینی دەکەی؛ توانیوتە لانی کەم بە ڕادەی گۆرانی بێژیک یان شاعیرێک یان فیلسوفێک کە بە تامەزرۆوە دەتەوێ بزانی ژیان و ژیاننامەی چۆنە، بخوێنیتەوە و هەر هیج نەبێ وەک بیرمەندێک و زانایەک کە بە هیمەتی خوای گەورە لە خودی خۆیەوە بە تەنیا لە ناو تاریکترین دوڕگەی جەهل و نەفامی سەر گۆی زەوی دەستی پێکرد و بە گژ هەموو نا عەداڵەتی و خورافاتەکاندا هاتەوە و شەڕ و بەر بەرەکانی کرد لە تەک سەرسەختترین دوژمنی خوا و مرۆڤ و دین.؟!

– کەسێک کە هەموو تەمەنی تەرخان کرد بۆ بانگەوازو خوا پەرستی و جوانپەروەری و ئەخلاق و کەرامەتی مرۆڤایەتی.

– مرۆڤێک کە خوای گەورە هەڵیبژارد و کردی بە ” ڕحمتآ للعالمین”. پەیامی ئاشتی بڵاو کردەوە و ژنی کردە هاوژیان و هاوبەشی پیاو و ڕێزی بۆ گێڕایەوە.

– لەوانەیە ئەوانەی ئیستا لە هندێک لەم بابەتە دڵڕەنج بن و بڵێن هیچی وانیە، بەڵام تکایە پێش ئەوەی توڕەیی بنوێنن و خۆ گرژ کەن با بچن بنج و بنەوای ژیان حەزرەتی موحەممەد و حەدیسەکانی بخوێننەوە و پاشان قەزاوەتی خۆیان بکەن. لانی کەم هەر ئەوەندەی ئەوەی کە باس و ڕوانگەی دژە ئایین و حەزرەتیان خوێندووەتەوەو بیستووە یەک لە سەدی ئەوەش ڕاستیەکان ببینن.   

– لەو کاتەوەی کە مرۆڤ وەک دواین دروستکراو هاتووەتە سەر زەوی، ئایینیشی لە تەک خۆیا هێناوە، یان بۆی بەڕێکراوە و کردوویەتی بە سەر چاوەی بە هێزبوونی ڕۆح و جەستەی لە بەرامبەر ڕووداو و کارەساتە سروشتیەکان و خۆی پێ بە هێز کردووە.

– وەک زۆربەی هەرە زۆری زانا بەناوبانگەکان باوەڕیان وا بووە و هەیە کە؛ خووایەک، خالەقێک، هێزێکی [ ماورالطبیعە]، وجودی هەیە و کەون و کائینات بە دروستی جوانی دەجوڵێنی، پێیان وایە کە جیهانی دیارو نادیار خاوەنێکی بە تواناو مافەوقی هەیە، کە ئەوەش هەر لە سەرچاوە ئایینەکانەوە مرۆڤ پەی پێ بردووە و تێیی گەیشتووە، هەمان خوایەکە کە بە درێژایی مرۆڤایەتی، بە پێی زەمان و سەردەم و تێگەیشتوویی مرۆڤ، ڕێنموونی و هەناردەی تایبەتی خۆی بۆ مرۆڤ بەڕێ کردووە و بەرنامەی بۆ داناوە کە چۆن بتوانێت بە پلەی تێگەیشتوون و پێگەیشتن بگات و خۆی لە چنگ ترس و تۆقاندن و هەواو هەوەسی شەیتانی ڕزگار بکات.

– مرۆڤ وەک، خۆ خاوەن و خۆ بڕیاردەر و خۆ ئیختیار، دروستکراوە، و گەیەنڕاوەتە سەر زەوی؛ لە لایەن خالەقیەوە ڕێزی تایبەتی لێگیراوە؛ بە ئازادی، وجود و بیرو هزری پێ بەخشراوە؛ لە پاڵ ئەوەش کارو ئەرک و فەرمانی پێ سپێردراوە؛ بەرنامەی ژیان و ئەنجام و کۆتایی پێ وتراوە؛ هاتن و چوونی بۆ دیاری کراوە؛ بووە بە سەنتەری کەون؛ کراوە بە خەلیفەی خوا لە سەر زەویدا؛ بەرنامەی ئاسمانی بۆ دابەزێنراوە؛ ڕێگاکانی چاکە و خراپەی بۆ دەسنیشان کراوە؛ پلەی بەرزی نزمی؛ ڕووناکی و تاریکی؛ پێوتراوە؛ ڕێگای گەیشتنەوەی بە پلەی نەمری و هەتاهەتایی لە هەموو دێڕە ناردراوەکانی ئاسمانی بۆ نێردراوە؛ تەنانەت لە ناو خودی سروشتیشدا ئەگەر بە کەمێک تێفکرین و وردبینییەوە لێی بڕوانین هندێک لە ڕازە نهێنی و ئاشکراکانی بۆ دەبینڕێتەوە.

– هەموو ئایینەکان باوەڕیان بە یەکتا پەرەستی هەیە و لە بنەڕەتدا سەر بە یەک کانزاو سەرچاوەن. بە پێی هەل و مەرج، قۆناخ بە قۆناخ بۆ وشیاری مرۆڤەکان هاتوون، هەر جارە مرۆڤیان لە تەنگەژەو گیرۆدە بوون بە خۆ پەرەستی و دڕندەیی ڕزگار کردووە، و گەڕاندوویانەتەوە بۆ چاکسازی و پاکسازی.

– چەندین قەوم و میللەت لە مێژوودا بە هۆی هەڵگەڕانەوەو فەسادی و دوورکەوتنەوە لە خواپەرەستی و نوقوم بوون لە شەهوەتبازی و وەحشیگەری و خۆکوژی، لە ناو چوون و خوای گەورە کردونیەتی بە عیبرەت و نمونە بۆ مرۆڤایەتی. بە پێی قۆناخەکانی مرۆڤایەتی و لە ڕێگای پەیامبەرانیەوە سەرگوزەشتەی بەشێک لە ڕابردووی مرۆیی بۆ نەوەو نەسڵی داهاتوو باس کردووە و چاکە و خرابەکانی دەسنیشان کردووە، بۆ ئەوەی مرۆڤەکان بتوانن چارەنوسی خۆیان بە باشی دیاری بکەن، کە چی مرۆڤ سەڕای ئەو هەموو ڕێنوێنیانە هەر لاساری و لەشپەروەرێنی و شەهوەتڕانی نا ڕەوا دەگرێتە بەر و خۆی لێ گێل ئەکات!.

– ئایینی ئیسلام کە کۆتا ئایینی ئاسمانی بوو، لە سەردەم و کاتی زۆر پێویست، لە کاتێکدا کە مرۆڤ نرخی مرۆڤبوونی خۆی لە دەست دابوو؛ ببووە کەرەسەو ئامێری دەستی خۆی و خۆی بە خۆی لە ناو ئەدا، بەشی زۆری کرا بووە کۆیلە و کۆیلەکانیان دژ بە یەک هان دەدا و خۆیان لە ناو دەبرد، کاتیک کە ژن و میینە نرخی نەما بوو و لەو پەڕی ژێردەستەیی و بێحورمەتی پێکردن بۆ شەهوەت و ئارەزووە ناڕەواو نامرۆییەکان بە کار دەبران، لە کاتێکدا کچان و ژنان زیندە بە چاڵ دەکران و ژنی سکپڕیان لە سەر لێوی گۆڕ لە کاتی مناڵبوونیدا دادەناو چاوەڕێ منداڵەکەیان دەکرد بزانن کوڕە یان کچ، کە ئەگەر کچ بوایە بە خۆی و تەناەت دایکیەوە فڕێ دەدرایە ناو گۆڕەوە و زیندە بە چاڵ دەکران!، لە کاتێکدا کە مرۆڤ ببوو بە بەردە و بە دەستی خۆی لەو پەڕی بێڕێزی پێکردندا بوو، لە کاتێکدا ملهوڕو زۆردار هەژار و بێدەسەڵات و کەمزۆری دەکردە کۆیلە و فەرمان بەری خۆی و تەنانەت وەک ئاژەڵیش ڕێزی نەبوو؛ ئا ئەو کاتە زەرورەتێکیی مێژوویی کە ئاینی ئیسلام بوو، هاتە خوارەوە و بوو بە پێشەنگ بۆ ڕزگاری یەکجاری مرۆڤ لە دەست جەهل و نەزانی.

– ئاینی ئیسلام، لەو کاتەوەی زەروورەتی پەیدا کردووە و هاتووە، هەردەم ئایینی ئاشتی و سەلام، ڕێگای تەنزیم کردنەوەی ئاکار و ئەخلاقی مرۆڤایەتی بووە. ئایینی مدارا، پێکەوەژیان، ڕێز و کەرامەت و حورمەتی مرۆڤ بووە. کەسایەتی بۆ مرۆڤ گەڕاندووەتەوە. مرۆڤی لە دەست بەردەیی و چەوساندنەوە دەرهێناوە و کردوویەتیەوە بە جێگرەوەی خالەق لە سەر زەویدا. ئاشتی و ئازادی، بەزەیی و خۆشەویستی، ڕەوشت و ئاکار بەرزی بۆ مرۆڤ گەڕاندەوە. باوک و دایکی بە ڕەسمی دەسنیشان کرد. منداڵی بۆ باوک و دایکی خۆی گەڕاندەوە، مافی ئافرەتی دیاری کرد. مافی ژن و پیاوی دانا. مساواتی لە نێوان ژن و پیاو بەر قەرار کرد، ئەرکی ژن و پیاوی بەرامبەر بە یکتری دیاری کرد. ئەرکی باوک و دایکی بەرامبەر بە منداڵی خۆی، بەرامبەر بە منداڵی کەسانیتر، ڕوونکردەوە. ئەرکی منداڵی بەرامبەر بە باوک و دایکی، و ڕیز و حورمەتی دەسنیشان کردووە. هەموو مافێکی بۆ هەر کەس و خێزان، و بنەماڵە و تیرە و تایفە، بۆ هەر قەوم و نژاد و نەتەوەیەک بە ڕوونی باس کردووە و داناوە.

– لێرە کتێبەکەی پرۆفیسۆر ” امین معلوف”  بە ناوی ( هویتهای مرگبار) الهویاتة القاتیلە” دێتەوە بیرم، کە بە کوردیەکەی دەکرێ بێژین ‘ ناسنامە بکوژەکان’. ئەو کتێبە بەڕاست بۆ من زۆر بە کەڵک بوو و زۆر شتی بەکەلک و ڕاتستبێژیەکی تێدایە و بە جوانی باسی هەر سێ کۆتا ئایینە ئاسمانیەکە دەکات کە لە یەک جێگاوە سەرچاوەیان گرتوو وە، کە چی دواتر و مرۆڤەکان بۆ بەرژەوەندی خۆیان کەڵکی نادروستیان لێوەرگرتوو کردیانە کێشەیەکی زۆر گەورە کە وابزانم تا ڕۆژی قیامەت کۆتای نایەت. تکام وایە هەر بەو ناوەوە بچن ئەو کتێبە بخوێننەوە. تا ئیستا بە کوردی نەمبینیوە و ویستم بیکوردێنم بەڵام تا ئیستا بۆم نەلواوە. بە فارس و عەربی و زمانە زیندووەکانی جیهان هەیە لە بەردەستدایە…. کە وابوو  ئەوە ناسنامە و نەتەوەو ڕەگەزە کە بووەتە هۆی جیاوازی و دژەکرداری بەرامبەر بە یەکتری. ئەگەر من و تۆ عرەب یان تورک بووینایە و بێ ئایینش بووینایە پێم وایە کێشەمان نەدەبوو.. کەوایە با بۆ هۆکاری بنەڕەتی کە ناسنامەیە بگەڕێین نەک ئایین. ئێمەمانان ناسنامەکانن بوونەتە دوژمنمان و ناسنامەکان دوژمنایەتیمان دەکەن بەڵام لە هندێک شوێن بە ناوی ئایینەوە…

مجید کاکەوەیسی

دانمارک

١٤/٩/٢٠١٣ز