با كاك خالید عەزیری بەتەنێ نەچوو بێتە لای قازی! رامیار و رێباز، رۆژهەڵاتی كوردستان

بەڕێز كاك خالید عەزیزی لە ماوەی سكرتێری حیزبەكەیدا، بە تایبەت لە ماوەی دەستپێكردنی دەوەرەی دووهەمی ئەو بەرپرسایەتییەی لە زۆربەی زۆری وتووێژ‌و دیمانەكانیدا،
بە مناسبەت‌و بێ مناسبەت دەچێتە سەر هێندێك باسی كلیشەیی لە چوارچێوەی پێداهەڵگوتن بە حیزبەكەی‌و پێشكەوتنەكانی كە ناوەڕۆك‌و كاكڵەی ئەو پێداهەڵكوتنەش مەبەست پێداهەڵگوتن لە خۆیەتی كە بیر‌وبۆچوونەكانی جیاوازە لە سیاسەت‌و بەرنامەكانی پێشووی حیزبی دێموكرات‌و باقی حیزبەكانی كوردی دژبەری كۆماری ئیسلامی گویا تیئۆری یان “گوفتمانێكی” نوێی لەگەڵ رێژیمی كۆماری ئیسلامی، هێناوەتە ئاراوە كە لە سی‌و چەند ساڵی رابوردوودا هیچ كەس‌و لایەنێك كەشفی نەكردوە، ئەو ” گوفتمانەش” دەگەڕێتەوە بۆ رخنەگرتن لە هێندێك لە سیاسەتەكانی رابوردووی حیزبی دێموكرات‌و نزیك بە تەواوی حیزبەكانی دیكەی كوردی وەك وەلانانی دروشمی رووخانی كۆماری ئیسلامی، لە هەموو دەركەیەك دان بە هیوای ئەوەی رێژیم باوەڕٍی پێ بكا‌و دەلاقەیەكی بە رووی حیزبەكەیدا بكاتەوە بۆ ئەوەی لەو وەزعەی تێیدایە رزگاری بێ.

ئەم تیئۆری‌و “گوفتمانە” نوێ‌یە كە لە راستیدا بێهیوایی‌و داماوی لە درێژەدانی خەباتە، كاك خالیدی تووشی هەڵبەزدابەزێكی وا كردوە كە نەك هەرلایەنەكانی دیكە‌و بەڵكوو بەشێك لە ئەندامانی دڵسۆزی حیزبەكەی خۆشی لە ئاستی رێبەرایەتی‌و بەدەنەدا تووشی سەرسوڕمان كردوە، زۆرتر لەبەر ئەوەی ئەو “گوفتمانە”ی كە بەڕێزیان تازە كەشفیان كردوە لە مێژساڵە نەك حیزبەكانی كوردی، بەڵكوو نزیكترین‌و وەفادارترینی بەرپرسانی ئەو رێژیمە كە بەدڵەوە باوەڕیان بەو رێژیمە‌و پارێزگاری كردن‌و بە هێزكردنی هەیە‌و هەبوە‌و هیچ گومانێكیان لەسەر ناشەرعی بوون‌و تەنانەت نادێموكراتیك بوونیدا نیە‌و بۆ سەلماندنی باوەڕی قووڵیان بە رێژیم بە كردەوە فیداكارییان كردوە، شەڕیان بۆ كردوە‌و لە مەیدانەكانی شەڕی ئێران‌و عێراق‌و كورد‌و باقی ئازادیخوازانی “چد انقلاب!” دا كەمئەندام بوون، خۆشەویستەكانیان لە دەستداوە لەسەر ئەو ” گوفتمانە” بەردەوامن،‌و ماوەیەكە بەو قەناعەتە گەیشتوون كە نەك هەر تازەگی نەماوە، بەڵكوو ئەوەندە سواوە‌و بێ ئاكام بووە كە لە ئێستادا كاك خالید تازە پێی گەیشتوە زۆربەی ئەوان وازیان لێ‌ هێناوە‌و گەیشتوون بە‌و راستییەی كە لەو رێژیمەدا ئیمكانی كرانەوەی هیچ دەلاقەیەك‌و تەنانەت درزێكی بچووكیش بە رووی دێموكراسی‌و ئەو داوایانەی كاك خالید دەیانكا ناگرێتەوە.

لەو پێوەندییەدا نموونەی كۆن‌و نوێ ئەوەندە زۆرن كە پێویست بە ناوهێنان ناكا چوونكە لەو بڕوایەدا نیم كە كاك خالید بۆ خۆشی زۆرێك لەوانە نەناسێ. ئێمە تێدەكۆشین لەم وتارەدا ئەوەندەی مەجاڵ هەبێ هێندێك بابەتی زۆر روون بخەینەوە بیری كاك خالید‌و كەسانێكیش لە حیزبەكەی كاك خالیددا ـ هەرچەند وێ ناچێ ژمارەیان زۆر بن ـ بەڵام لە پیش ئەوەیدا، بچینە سەر ناوەرۆكی باسەكە، ئێمە باوەڕمان بەو راستییە هەیە كە ئەگەر لایەنێكی سیاسی تەنانەت تاكێك، دوای لێكدانەوەی دروستی رابوردووی خۆی بەو ئاكامە بگا كە لە درێژەی سیاسەت‌و بەرنامەكارییەكانیدا تووشی هەڵە بوە، دان بە هەڵەكانیدا بنێ بە مەبەستی چاكسازی‌و دووركەوتنەوە لە دووبارە كردنەوەی هەڵەكان ئەوە سیاسەتێكی دروستە‌و پێشكەوتن لەو رێگایەوە مسۆگەر دەبێ، بەڵام ئەوەی كاك خالید هێناویەتە گۆڕێ رێگایەكی تەواو پێچەوانەیە‌و لە زمانی فارسیدا شتێكی دیكەی پێ دەڵین.

1ـ سەبارەت بە دەربڕینی ئامادەیی كاك خالید لەسەر وتووێژ لە گەڵ كۆماری ئیسلامی سەبارەت بە مادەی 15‌و مادەی 19ی یاسای بنچینەیی ئێران، یەكێك لە ئەندامە وەفادار‌و دڵسۆزەكانی حیزبەكەی كاك خالید لە رێكەوتی 18/12/2009 لە باسێكدا لە ژێر سەردێڕی ” لە كوێوە بۆ كوێ” ئاوا دەدوی ‌و ئێمە بە بێ هیچ لێكدانەوەیەك دەقی ئەو بەشە لە بابەتەكە تەنیا بۆ وەبیر هێنانەوە وەك خۆی دێنین:

…” لانی كەم خاڵێكی سەرەكی كە لەشی خوێناویی خەباتی كوردی لە پێناودا لەت‌وكوت كراوە، لە بۆچوونەكانی تێكۆشەر عەزیزیدا وا كەم بایەخ كراوە كە ئینسانی تووشی ناهۆمیدی دەكا. ئەو خاڵە كە لە راستیدا زۆریش گرینگە‌و پێناسەی خەباتی چەندین ساڵەی حیزبی دێموكرات دەكا، لە چاوی كاك خالیدەوە هەتا رادەی پارانەوە بۆ دانیشتن دەگەڵ كۆماری ئیسلامی بە هەر قیمەتێك هاتوەتە خوار، لە وەڵامی پرسیارێكی هەواڵنێری رووداودا كە لێی دەپرسێ‌:

“رووداو : ئەگەر كۆماری ئیسلامی ئامادە بێت گفتوگو كردن لەسەر جێبەجێكردنی مادەی 15ی دەستووری ئێران لەگەڵ ئێوە دەست پێ‌ بكات، كە رێگە بە خوێندن بە زمانە نافارسییەكان دەدات، ئێوە ئامادەن لەو كلیلەوە بچنە ژوورەوە؟” بەڕێز عەزیزی ئاوا وەڵام دەداتەوە:

” خالید عەزیزی: ئەگەر كۆماری ئیسلامی لە هەر بوارێكی یاسایی بۆ نموونە ماددەی 15‌و ماددەی 19 كە هەندێك پێوەندی لەگەڵ مەسەلەكانی ئێمە هەیە وتوێژ بكا، ئێمە ئامادەین. ئەگەر بڵی ئێمە ئامادەین وەك كۆماری ئیسلامی لەسەر ماددی 15 گفتگو لەگەڵ حیزبی دێموكرات كوردستان بكەین، ئێمە ئامادەین قسەی لەسەر بكەین.”

من دیپلومات نیم هەتا پشتیپەردەی ئەو بۆچوونە بخوێنمەوە، بەڵام وەك كەسێك كە زیاتر لە 30 ساڵە بۆ گەیشتنی كورد بە ئاواتەكانی هەوڵمداوە‌و ئێستاش لێی ماندوو نەبووم، پێم وایە ئەو دەربڕینە تەنیا دەتوانێ‌ خوێ‌ بە برینی تێكۆشەرانی نەسرەوتوی كورد دا بكا‌و خەفەتی هەوڵی بە باداچوویان پێ‌ بخوا. جێی پرسیارە حیزبێك بە رابردووی زیاتر لە 60 ساڵ خەبات‌و بە فیداكردنی گیانی هەزاران تێكۆشەر‌و بە وەسەر یەكنانی سەدان ئەزموونی گرینگ كە هیچیان بە خۆرایی وەدەست نەهاتوون، چۆنە ئاوا ورەی دابەزیوە كە تەنیا بەچاو هەڵتەكاندنی دەسەڵاتدارانی ئێران خۆی بۆ دانیشتن ئامادە بكا بێ‌ئەوەی بزانێ‌ خۆی چی دەوێ‌‌و وەدوی چی كەوتوە. پێموایە تێكۆشەر عەزیزی ئەوەی باش دەزانێ‌ كە وەدوای ئامانج كەوتن پشووی درێژی دەوێ‌‌و بە تایبەت رێبەرانی سیاسی دەبێ‌ لەو بارەوە سەبری ئەیوبیان هەبێ‌، سیاسەت كردن هەر ئەوە نیە بە هێنانی شتی نوێ‌ خۆت بكەیە مەیدانداری مەیدانی سیاسەت كردن كە دیارە ئەوە زۆر گرینگ‌و لازمە، بەڵام سیاسەت كردن ئەوەشە كە چۆن باوەڕ‌و پرستیژ‌و ئامانجەكانی خەباتی خۆت پێ‌ گرینك بن‌و لە هیچ حاڵەتێكدا سووكیان نەكەی.

ئێمە دڵمان خۆش بوو كە حیزبی دێموكراتی كوردستان رەوتێكی تازەی لە خەبات‌و كوردایەتی هێناوەتە گۆڕی كە دەتوانێ‌ برینەكان سارێژ بكا‌و هەستی خۆ بەكەمگرتنمان لێ‌ بتارێنی. ئێستا وادیارە نەك سەربەخۆیی، نەك فیدراڵی، نەك خودموختاری‌و نەك تەنانەت خودگەردانییەكەی پێشنیاركراوی دەوڵەتیش لە ئولەویەتدا نین‌و باس باسی وەگەڕكەوتنی ماددەی15ی قانوونی ئەساسی كۆماری ئیسلامییە. من یەك پرسیار دێنمە گۆڕی كە رەنگە بەڕێز عەزیزی نەخوازێ‌ وەڵامی بداتەوە ئەویش ئەوەیە، كۆماری ئیسلامی ئێران چ پێویستی بەوەیە لەسەر دابەزاندنی مادەی15 كە خۆی لە قانوونەكەیدا گونجاندوویەتی دەگەڵ حیزبێكی كوردی كە 30 ساڵە لە بەرامبەریدا راوەستاوە قسە بكا؟ بۆ مەگەر خۆی كەسی شارەزای بواری فەرهەنگی‌و ئاموزشی كەمن كە بێ‌ داوای یارمەتی لە ئێمە بكا؟ ئەوە راستە كە بزووتنەوەی كورد لە رۆژهەڵاتی كوردستان لاوازە، بەڵام تكایە با وای لێ‌ نەیە ئینسان بە فرمێسك‌و حەسرەتەوە لە رابردووی خەبات بڕوانی‌و هێزی چوونە پێشی لێ‌ ببڕی. من ئەگەر بزانم هەموو خەباتی ئێمە بۆ باس لەسەر ماددەیەكی قانوونی ئەساسی كۆماری ئیسلامییە، رقم لە خۆم هەڵدەستێ‌ كە وەدوای كڵاوی خوار كەوتوم. “

ئەندامێكی دیكەی حیزبەكەی كاك خالید لەو پێوەندییەدا لە بەشێك لە بابەتێكدا لە ژێر سەردێڕی “سرنجێك لەسەر وتووێژەكەی كاك خالید عەزیزی ‌و پرسیارێك لە بڵاو كراوەی رووداو” كە رێكەوتی 23/12/2009ی لەسەرە لە سایتی رۆژهەڵات تایمدا بڵاوكراوەتەوە بۆچوونی خۆی بەم چەشنە دەردبڕێ:

… “كاك خالید لە بەشێكی دیكە سەبارت بە وتووێژ دەگەڵ بڵاو كراوەی رووداودا‌و لە وڵامی پرسیارێك سەبارەت بە ماددەی 15‌و 19یاسای بنەڕەتی دەڵی:

” ئەگەر كۆماری ئیسلامی لەهەر بوارێكی یاسایی بۆ نموونە ماددەی 15‌و ماددەی 19 كە هەندێك پێوەندی لەگەڵ مەسەلەكانی ئێمە هەیە وتوێژ بكات، ئێمە ئامادەین. ئەگەر بڵێ ئێمە ئامادەین وەك كۆماری ئیسلامی لەسەر ماددەی 15 گفتگو لەگەڵ حیزبی دێوكراتی كوردستان بكەین، ئێمە ئامادەین قسەی لەسەر بكەین.

بەراستی من لێرەدا سەرم سووڕماوە، چ پێویست دەكا رێبەری حیزبێكی سیاسی بەو شێوە لاواز ‌و بێدەرەتان خۆ بنوێنی ئەویش لە حاڵێكدا كە رێژیم لەو پەڕی داماوی‌و بێزراوی دایە، ئاخر بۆچی رێژیم لەسەر 2 مادەی یاسای بنەڕەتی دەگەڵ حیزبە سیاسییەكان قسە بكات؟ لەسەر مادەی 15‌و 19 قانوونی ئەساسی كە 30 ساڵە جێبەجێ‌ نەبووە‌و قەتیش نابێ‌ با دەگەڵ نوێنەرانی كورد قسە بكات لە مەجلیسی شوورای ئیسلامیدا، با لەگەڵ شوورای شارەكان قسە بكات! كاك خالید دەیتوانی راست ئەو وڵامە بداتەوە چ پێویستە حیزبێك كە زیاتر لە 30 ساڵە دەگەڵ ئەو رێژیمە لە خەباتێكی خوێناویدایە بەو شێوازە هەڵوێست وەرگرێ‌ لە حاڵێكدا كە سوور دەزانی رێژیمی ئیسلامی ئێران تەنانەت ئامادە نیە ناوێ‌ هیچ حیزبێكی سیاسی كورد وەك هەیە لە هیچ كوێیەك‌و لە هیچ راگەیەنراوێكی رەسمیدا بێنێ‌!

ئایا كاتی ئەوە نەهاتووە كە ئازایەتی ئەوە مان هەبێ‌ بڵێین سیاسەت‌و دین لێك جۆدان‌و رێژیمێك كە لەسەر ئەساسی شەریعەت‌و دین دامەزرا بێ‌ ناتوانێ‌ رێژیمێكی دادپەروەر ‌و دێموكرات بێت؟ خۆ هەموو لایەك باش دەزانین ئەساسەن هیچ پێوەندییەك لە نێوان دین‌و دێموكراسیدا نیە ئەدی ئەو هەموو بادان‌و پێچ‌وپەنایە بۆ حیزبێكی دێموكراتی كورد لە پێناو چیدا؟ دەسەڵاتداری سەرەڕۆی رێژیمی ئیسلامی ئێران لە ماوەی 30 ساڵی رابردوودا بە كردەوە ئەوەیان سەلماندوە كە جگە لە خۆیان‌و باوەڕە تەسك‌و یەكجار دواكەووتەوەكانی خۆیان هیچی دیكەیان قەبوول نیە، رێژیمێك كە روحم بە رەفسنجانی‌و خاتەمی‌و كەرووبی‌و موسەوی نەكات‌و تەحەمولی ئەوانی نەبێت بڵێی دەگەڵ حیزبی دێموكراتدا رێككەوێ‌‌و دانووی بكوڵی؟ لە جیات ئەو شێوە گفتگویە‌و باس كردن لە رێژیمی ئیسلامی ئێران كە لە ماوەی 30 ساڵی رابردوودا هەرگیز بە رادەی ئەمرۆ بیهێز‌و كڕمۆڵ نەبوە بە بڕوای من دەبێ‌ باری قورسی وتار‌و قسەكردنمان بۆ گەورەكردنەوە‌و بەهێز كردنی ئەو رەوتە رێفۆرمخواز‌و ئەو حەرەكەتە دژی دیكتاتۆرییە بێ‌ كە خەریكە پەرە دەستێنێ‌‌و رێژیم بە هەموو درندەیی‌و بێ‌رەحمییەك كە نواندوویەتی نەی توانیوە ئەو بزووتنەوەیە بە چۆك دابێنێ‌.”

ئێمە لەم بڕگەیەدا تەنیا ئەو پرسیارە بە پرسیارەكانی هاوڕێیانی كاك خالید زیاد دەكەین‌و دەپرسین ئەو هەموو خۆبچووك كردنەوە، دەست لە دروشم‌و پرنسیبەكانی حیزبی هەڵگرتن‌و ملكەچ بوون لە بەرامبەر ئەو رێژیمەدا لە پێناو چ دەسكەوتێكە؟ ئایا كۆماری ئیسلامی لە بەرانبەر ئەو هەموو هەرزانفروش كردنەی خۆین‌و خەباتی دەیان هەزار رۆڵەی كورد هیچ ئاورێكی بەخێری لێ‌ داونەتەوە بێجگە لە وڵامەكانی عەزیم حوسینی كونسولی گشتی ئێران لە هەولێر كە پڕ بوو لە ئیهانەت كردن‌و نەوعێك گاڵتە كردن بە كاك خالید‌و “گفتمان”ە نوێ‌یەكەی؟

2ـ بەشداری كردن‌و بەشداری نەكردنیان لە هەڵبژاردنەكانی دەوری دەهەم‌و یازدەهەم سەرۆك كۆماری ئێراندا.

سەبارەت بە بەشداری كردن! ی حیزبەكەی كاك خالید عەزیزی سرنجی خوێنەرانی ئەم بابەتە بۆ وتارێكی 4 ـ5 لاپەڕی پڕ نێوەڕۆك رادەكێشم كە ماڵپەڕی ” هەڵویست” لە كاتی خۆیدا لەسەر هەڵویستەكانی ئەو حیزبەی نووسیوە. سەردێڕی بابەتەكە ئەوەیە” هەڵبژاردن، تاكتیكێك كە ستراتێژی حیزبی دێموكراتی كوردستانی گۆڕی”

سەرەتای ئەم وتارە بەم شێوەیە دەست پێ دەكا:

” لە رەوتی هەڵبژاردنەكانی سەركۆماری لە ئێران حكوومەت توانی بە رەچاوكردنی تاكتیكی رەقابەتی كردنی ئەو هەڵبژاردنە(لە ناو”خودی”یەكاندا)، سەرنجێكی زۆرتر بۆ ئەو هەڵبژاردنە راكێشی، بە شێوەیەك كە تەنانەت لە نێو كوردانیشدا كە هیچكات شوبهە‌و تەوەهومێك بە نیسبەت حكوومەت‌و هەڵبژاردنەكانییەوە نەبوو، یەك دوو لایەن بكەونە ناو گەمەی ئەو هەڵبژاردنەوە.

یەكێك لەو لایەنانە حیزبی دێموكراتی كوردستان بوو (لێرە بە دواوە حدك) ئەم حیزبە كاتێك لە ئاست هەڵویستەكەیدا كەوتە بەر رەخنەی ماڵپەڕە سەربەخۆكان، تاكی چالاك‌و هێندێك رێكخراو، دژكردەوەی جۆربەجۆری لە خۆی نیشاندا، كە ئەمە نیشانەی ناروونی‌و نایەكدەستی بوو لە ناو رێبەری‌و ریزەكانیدا بە شێوەیەك كە سەرەتا قورس‌و قایم لە كەرووبی پشتیوانی كرد‌و پاشان نەفەری یەكەمی بە گەرمی لەو هەڵوێستە دیفاعی كرد، بەڵام بە دەركی ئەوەی كە كۆمەڵگای كوردستان چ هەڵوێستێكی هەیە، لە وتووێژەكانیدا بە كوردی بە جۆرێك قسەی دەكرد‌و بە فارسی جۆرێكی دیكە، تا رادەیەك كە لەو هەڵبەز دابەزەدا سەرنجام روون نەبوەتەوە كە قسەی ئاخری ئەم حیزبە چییە!! جارێك وتیان كە ئێمە باسی بەشداریكردنمان نەكردوە‌و تەنیا وتوومانە بەیانەكەی كەرووبی موسبەتە، سەرەڕای ئەوە تا بەڕێوەچوونی هەڵبژاردن ئێمە چەند شێوە هەڵسوكەوت لە ئەندامانی سەرەوەی ئەم حیزبە دەبینین، كە نیشانەی ئەوەیە كە ئەو رێبازەی كە ئەم حیزبە هەڵبژارد بوو، نەك هەر لە كۆمەڵگە، بەڵكوو لە نێو ریزەكانی خۆیشیدا هەروا بە هاسانی هەزم ناكرێ‌.

پاش هەڵبژاردن‌و ئەو كردارەی حكوومەت لەگەڵ دەنگی خەڵك ئەنجامیدا‌و سەرهەڵدانی ئاخێزی ئیعترازیی خەڵك، حدك دیسان بە دەركردنی راگەیەندراوێك، خۆی دەكاتە خاوەنی هەڵبژاردنەكە‌و سپاسی بەشداری خەڵك دەكات!! ئەمەش لە كاتێكدایە كە خۆشی ئیشارە بەوە دەكات كە ئەگەر خەڵك بەشداریش بوو بێتن، دەنگیان بە موسەوی، نەك كاندیدای حدك(كەرووبی) داوە جا چ سەركەوتنێك لەم نێوانەدا نەسیبی حدك بوە، ئێمە تێنەگەیشتین.”

سەرەڕای باس‌و بابەتەكانی ئەم وتارە لە پێوەندی لەگەڵ ئەم هەڵبژاردنەدا ـ دەوری دەهەمی سەركۆماری ـ لە بەشێك لە وتەكانیدا 25/5/2009 لە لایەن عەزیز شێخانییەوە ئامادەكراوە هاتوە… ” لەسەر ئەو مژارە عبداللە حسنزادە پێداگری دەكا، كە حدك باوەڕی بە مسوگەر بوونی ئال‌وگۆڕ لە چوارچێوەی نیزامدا نییە، نا‌وبراو لەو بارەوە رادەگەیەنێ:”حدك دروشمی رووخانی كۆماری ئیسلامی دەدا، ئەوە نیشانەی ئەوەیە كە لە چوارچێوەی ئەو نیزامەدا، ئەو ئامانجانە دەستەبەر نابن.. ” . قسەكانی عبداللە حسن زادە لەم پێوەندیییەدا لە دوو لایەنەوە جێگای سرنجە:

یەكەم: بەشێك لە چاودێران‌و تەنانەت لە نێوخۆی حیزبەكەی كاك خالیدیشدا باوەڕیان وابوو بڕیاری حدك لەسەر ئەو هەڵبژاردنە لە ژێر پرسیاردایە‌و دەنگی موخالف زۆرە.

دووهەم: پێداگری عبداللە حسن زادە كە دەڵی ” حدك دروشمی رووخانی كۆماری ئیسلامی دەدا.. ئەوە لە حاڵیكدایە كە كاك خالید رادەگەیەنێ كە دروشمی رووخانی رێژیمیان وەلاناوە.

3ـ لە پێوەندی لەگەڵ خۆبەزلزانی ‌و هەڵكێشانی حیزبەكەی، جار‌وبار كاك خالید بە پێچەوانەی ئەوەی بەرواڵەت دەیەوێ تەوازوع نیشان بدا‌و حورمەت بۆ بۆچوونی خەڵك دابنێ دەكەوێتە خۆپەسەندییەكی ئەوتۆ كە وێناچی بۆ خۆیشی باوەڕی پێی هەبێ‌، لە وڵامی بەشێك لەو پرسیارەدا كە: بۆچی سپای پاسداران لەم نێوەدا یانی لەم چەند حیزبەی تارا‌وگەنشین بەتایبەتی كۆمەڵەكان‌و دێموكراتەكان بە تایبەتی ناوی ئەو حیزبە دەهێنێت كە جەنابت رێبەریی دەكەی؟ بەم شێوە وڵام دەداتەوە:

…”هۆكاری دووهەم بە باوەڕی من سپای پاسداران هەدەفمەند ئەوە دەكات لەبەر ئەوەی «گفتمان »ی ئێستای حیزبی دێموكرات، ئەو شێوازەی كە ئێمە «تعامل » لەگەڵ وەزعی ناوخۆ دەكەین، تەشویقی ئاڵوگۆر دەكەین خەڵك تەشویق دەكەین كە بەشدار بن لە ئاڵوگۆر‌و چالاكی مەدەنی‌و دەڵێین كە گوفتمانی كوردی لە تاران بێننە گۆڕێ‌،‌و خەڵكێكی زۆر گوێ‌ بەوە دەدەن. بۆیە بە باوەڕی من سیستمی ئیتلاعاتی ئێران، سپاسی پاسداران لەوە نیگەرانن گوتاری مەدەنی لە نێو كۆمەڵانی خەڵكدا شكڵ بگرێ‌‌و خەڵكێكی زۆر بەدەوری خۆی كۆ كاتەوە‌و كۆماری ئیسلامی لە كوردستان بەرەبەرە لەگەڵ جووڵانەوەیەكی بەربڵاو‌و بەرینی مەدەنی‌و جەماوەری رووبەروو بێ‌.”(1)

4ـ پێوەندی حیزبی دێموكراتی كوردستانی ئێران‌و لایەنی جیابووە لە حیزب

ئەوەی دەبینرێ‌و دەبیسرێ پێوەندی نێوان ئەو دوو لایەنە بە خۆشییەوە ئاڵ‌وگۆڕی پوزتیڤی زۆری بە سەردا هاتوە، بەڵام جاری نەگەیشتوەتە ئامانجی كۆتایی كە یەكبوونەوەیە، لەو بارەشەوە ـ هەرچەند كولاندنەوەی برینەكان ناخۆشە ـ كاك خالید بە شێوەیەك باس لە گرفتەكە دەكا وەك ئەوەی مێژوو لەو كاتەوە دەست پێ دەكا كە بەڕێزیان ” گوفتمانی” نوێی خۆیانی ئاراستە كرد بێ:

” پێداویستیەكانی كوردستانی ئێران لە داهاتوودا پێمان دەڵێت، ئەگەر كورد یەكگرتوو نەبێ‌ بە تایبەت حیزبی دێموكرات ئەگەر لە یەك حاڵی نەبین یان یەك نەگرینەوە لەو یارییە ئاڵوزە، لەو سیناریۆ ناروونەدا لەو گێژاوەدا كە ئێمە تەجرووبەی دەكەین لە سووریا‌و لە عێراق‌و لە توركیا، كورد رەنگە دۆڕاو بێ‌، ئێمە نازانین چێ‌ لێ‌ دەبێتەوە. زەمانێك كورد لەو كێشانە دێتە دەری كە رێبەریەكی بەهێزی هەبێ‌، حیزبەكەی بە «اقتدار» بێ‌.” (2)

بەڵام كاك خالید لێرەدا هیچ ئیشارە بەو راستییە ناكا كە ئایا ئەو زەروورەتە هەر ئێستا هاتوتە پێش؟ ئەدی ئەودەم كە لە حیزب جیابوونەوە ئەو زەروورەتانە لە ئارادا نەبوون؟ بە پێی ئەو لێكدانەوەیە وا دەردەكەوێ كە لە دوای كونگرەی سێزدە یەكگرتوویی، بوونی حیزبی بە هێز‌و… خراپ بوو ‌و دەبوایە حیزب ـ بە وتەی ئەوان ـ لەت بكرێ بەڵام ئێستا بە پێچەوانە بوەتەوە.

لە دانوستان‌و نوسینەكانی دیكەی هاوڕێیانی دیكەی كاك خالید زۆر جار دەبینین ‌و دەخوێنینەوە كە خەڵكی كوردستان، دۆستان‌و دڵسۆزانی حیزب هەموو داوا دەكەن ‌و پێیان خۆشە كە حیزب یەكبگریتەوە ‌و زۆر لەسەر ویستی خەڵك پێ داگری دەكەن، بەڵام لە بیریان چوەتەوە كە لەبەرەبەری جودا بوونەوەیاندا چۆن هەر ئەو خەڵكە‌و دڵسۆزانە دەهاتن‌و دەپاڕانەوە كە با جیابوونەوە نەبێ، بەڵام ئەو كات گوێ‌یان بە خەڵك نەدا‌و ئەوەیان كرد كە خەڵك پێیان ناخۆش بوو ‌و، تەنیا لەبەر قازانج‌و بەرژەوەندی تاقمێك. دیارە كاك خالید بۆ خۆشی بە بێ ئەوەی بیری لێ كردبێتەوە ئەو راستییە بەو جۆرە دەدركێنێ:

” لەتبوونی حیزبی دێموكرات بەرهەمی كێشەی سیاسی نەبوو ئێمە لە بەحسە سیاسییەكاندا لەكۆنگرەی13دا زۆر بە ئارامی‌و رێك‌وپێكی بەحسەكانمان بردوەتە پێش لە بەشی پێڕە‌و پرۆگرامیشدا زۆر بە ئارامی بە خۆشی لایەنەكان بێ‌كێشە لێكمانداوەتەوە، بەڵام كە دێنە سەر هەڵبژاردنەكان كێ‌ بەشدار دەبێ‌‌و كێ‌ بەشدار نابێ‌‌و دواتر دەسەڵات چوون لەگەڵ ئەوانە تەعامول دەكات لەوێدا لێك هەڵبەزینە درووست دەبێ‌ لەوی كێشەكان درووست دەبێ‌ تەنانەت بڕێكی دیكەش دەگەڕێمەوە دواوە لە كۆنگرەی 8دا كە ئینشعاب یا لەتبونەكەی پێشووی لێكەوتەوە دەقیقەن وابوو لە بەشە سیاسییەكان دیسان كێشە نەبوو لە پێڕەو پرۆگرامدا دیسان كێشە نەبوو، بەڵام كە دێتە سەر میكانیزمی هەڵبژاردنی كومیتەی مەركەزی كە دەبێ‌ كێ‌ بێ‌‌و كێ‌ بەشدار بێ‌ كێ‌ بەشدار نەبێ‌ دیسانەوە لەوی ئینشعابەكە دروست دەبێتەوە.” (3)

كاك خالید دەڵی” كە دێتە سەر میكانیزمی هەڵبژاردنی كۆمیتەی مەركەزی كە دەبێ‌و كێ بێ‌و كی بەشداربێ، كێ‌ بەشدار نەبێ دیسانەوە لەوێ ئینشعابەكە دروست دەبێتەوە”. بەڵام كاك خالید باش دەزانی كە میكانیزمی هەڵبژاردنی كۆمیتەی ناوەندی، ئامادەكردنی راپورتی كۆمیتەی ناوەندی‌و باقی كار‌وبارەكانی ئامادەكاری كۆنگرەی سێزدە لە هەل‌ومەجێكدا بەرێوەچوون كە ئەوان لە زۆرایەتی كۆمیتەی ناوەندیدا بوون‌و بەرپرسی كۆمیتەی ئامادەكاریش بە پێی بڕیارێكی لە مێژینەی حیزب سكرتێری گشتی بوو كە ئەویش هەر لەوان بوو، بەڵام كە ئاكامی هەڵبژاردن راگەیەندرا‌و تاقمی ئەوان نەبوونەوە زۆرایەتی هەر لەو دەمەیەوە بەرنامە بۆ كارشكێنی‌و كۆسپ پێكهێنان لە سەر رێگای كومیتەی ناوەندی تازە‌و لە نیهایەتدا خۆشكردنی زەمینەی جیابوونەوە ئامادە كرا. مانای راستەقینەی ئەو قسانەی كاك خالید ئەوەیە كە مەبەستی ئەوان وەدەستهێنانی كورسی زیاتر بوو لە هەڵبژاردندا‌و ئەگەر ئەو مەبەستە بەدی هاتبا ئەوان لە حیزب جودا نەدەبوونەوە. ئەو راستییە بەداخەوە دوورە دیمەنی یەكبوونەوەی داهاتووش دەخاتە ژێر پرسیارەوە كە ئەگەر ئەو تاقمەی ئەوان ئەو جارەش لە ئاكامی هەڵبژاردندا ئەندامانی كومیتەی ناوەندییان نە كەوتنە زۆرایەتی دیسان ئەو كایە دژی دێموكراتیكە دەست پێناكەنەوە؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

(1) وتووێژ لەگەڵ كوردكاناڵ 8/11/2013

(2) هەمان سەرچاوە

(3) وتەكانی كاك خالید عەزیزی لە كورد كاناڵ، مانگی 6ی ساڵی1390