بەیاننامه‌ی یەكیەتیی خوێندكارانی دێموكراتی كوردستانی ئێران بە بۆنەی ٦مین ساڵیادی شەهیدكرانی خوێندكاری دێموكراسیخواز،ئیبراهیم لوتفۆڵڵاهی

“باشترین پاداش بۆ شەهیدان درێژەدانی رێگایانە”.

خەڵكی ئازادیخوازی كوردستان

خوێندكارانی دێموكراسیخواز و نەتەوەخوازی كورد

٦ ساڵ بەر لە ئێستا و لە ٢٥ی بەفرانباری ساڵی ١٣٨٦ی هەتاوی، دەزگای تیرۆریزمی دەوڵەتی رێژیمی تاران، جارێكی دیكە یەكێك لە رۆڵە راستەقینەكانی كوردستانی شەهید كرد. رێژیمی ئەشكەنجە و سێدارە، چالاكی خوێندكاریی كورد، رۆڵەی نەتەوەخواز و دێموكراتی كوردستان، ئیبراهیم لۆتفۆڵڵاهی، خوێندكاری بەشی مافی زانستگەی پەیامی نووری شاری سنەیان لە دوای چەند رۆژ دەستبەسەركردن لە سیاچاڵە سەدە نێوەڕاستیەكانی خۆی، ناجوامێرانە و دوور لە هەر چەشنە هەڵسوكەوتێكی مرۆییانە شەهید كرد.

ئەشكەنجەگەرانی رێژیمی ئاخوندی بە پشت بەستن بە تەوەهۆمی خۆسازكەر، ئیبراهیمان بەدڕندانەترین  شێواز  ئەشكەنجە كرد، تا بە خەیاڵی بەتاڵی خۆیان دان بەو كار و كردەوانەی كە نەیكردووەدا بنێت. قیزەونتر لەو كردوە ناپەسەند و دژە مرۆییە، تەرمی ئیبراهیمیشیان نیوەشەو و بە بێ ئاگایی بنەماڵەكەی لە ژێر چەند میتر “بتۆن”دا ناشت، تاكوو ئاسەواری ئەشكەنجە وەحشیانەكەیان لە سەر جەستەی لاواز و بێ تاوانی ئیبراهیم دەرنەكەوێت.

ئەمەش یەكەمین جار نەبوو كە رێژیمی تیرۆریست پەروەری كۆماری ئیسلامی، یەكێك لە رۆڵەكانی كوردستانی شەهید دەكرد. دیرۆكی نگریسی ئەم رێژیمە لە گەڵ قەڵاچۆ و تیرۆری خەڵكی كوردستان تێكەڵاوە. لە قەڵاچۆی بە كۆمەڵی خەڵكی بێ تاوانەوە بگرە تا تیرۆری خوێندكاران، ئازادیخوازان و رێبەرانی بزووتنەوەی نەتەوەیی دێموكراتیكی كوردستان.

بەڵام حەقیقەت خەیاڵی پووچەڵی داگیركەرانی كوردستان نیە. بەرەنجامی ئەم تیرۆرانە نەیتوانیوە كوردستان و رۆڵەكانی لە هەنگاونان بەرەو ئازادی راگرێت.

نەتەوەی كورد و خوێندكارانی دەروەست و یەكیەتیی خوێندكارانی دێموكرات هەنووكەش خۆڕاگر، سەربەرز و نەبەزێۆ بۆ گەیشتن بە ماف و ئارمانجەكانیان راوەستان.

شەهید كرانی ئیبراهیمەكان، نابێتە هۆی هەڵگەڕانەوەی لاوان و خوێندكارانی كورد لە سەرهەڵدان و خەبات، بەڵكوو ئیلهام بەخشی لە خۆبردوویی و خۆڕاگری و بەرخۆدانن.

كوردستان گۆڕستانی داگیركەران دەبێت و ئاسۆی ئازادی نزیكە.

بەرز و پیرۆز بێت یادی سەرلەسەردارانی سەرداری كوردستان

یەكیەتیی خوێندكارانی دێموكراتی كوردستانی ئێران

٢٣ی بەفرانباری ١٣٩٢ی هەتاوی